ប្រទេសមហាអំណាចពិភពលោកផ្តើមជំរុញជាថ្មីសន្តិភាពនៅលីប៊ី
នៅថ្ងៃពុធ ទី២៣ មិថុនា ឆ្នាំ២០២១នេះ ប្រទេសអាល្លឺម៉ង់ ផ្តើមបើកកិច្ចប្រជុំអន្តរជាតិមួយក្នុងទីក្រុងប៊ែរឡាំងដោយមានការចូលរួមពីប្រទេសមហាអំណាចជាច្រើន ដើម្បីស្វែងរកសន្តិភាពយូរអង្វែងឲ្យលីប៊ី។ ការធានាឲ្យបាននូវការបោះឆ្នោតនាថ្ងៃទី ២៤ ធ្នូខាងមុខ គឺជាប្រធានរឿងដ៏សំខាន់មួយក្នុងជំនួបអន្តរជាតិនេះ។
ចុះផ្សាយនៅថ្ងៃ៖
ស្តាប់ - ០២:៣៧
តំណាងរដ្ឋាភិបាលអន្តរកាលលីប៊ី នឹងចូលរួមជាមួយប្រមុខការបរទេសអាមេរិកលោក អង់តូនី ប្ល៊ីងកិន ក៏ដូចជារដ្ឋមន្រ្តីការបរទេសថ្នាក់តំបន់ និងពិភពលោកជាច្រើននាក់ទៀតនៅឯកិច្ចប្រជុំអន្តរជាតិក្នុងទីក្រុងប៊ែរឡាំងដែលគាំទ្រដោយអង្គការសហប្រជាជាតិ។
សមាសភាពនៃជំនួបខាងលើនេះរួមមានសមាជិកអចិន្រ្តៃយ៍ទាំង ៥ នៃក្រុមប្រឹក្សាសន្តិសុខអ.ស.ប គឺសហរដ្ឋអាមេរិក អង់គ្លេស បារាំង រុស្ស៊ី និងចិន ព្រមទាំងអ៊ីតាលី តួកគី អារ៉ាប់រួម សហភាពអឺរ៉ុប និងតំណាងអ.ស.ប។
នៅមុនកិច្ចពិភាក្សាថ្ងៃនេះ រដ្ឋមន្រ្តីការបរទេសអាល្លឺម៉ង់លោកហៃកូ ម៉ាអាស (Heiko Maas) បានរំឭកដល់សមាជិកអង្គប្រជុំនូវពាក្យសន្យាដែលពួកគេបានព្រមព្រៀងគ្នាម្តងរួចហើយកាលពី ឆ្នាំ២០២០ ក្នុងការបញ្ចប់ការលូកដៃជ្រៀតជ្រែករបស់អន្តរជាតិ និងការដកកម្លាំងទ័ពបរទេស ព្រមទាំងទ័ពស៊ីឈ្នួលទាំងអស់ចេញពីទឹកដីលីប៊ី។
នៅក្នុងបទសម្ភាសន៍ជាមួយកាសែតក្នុងស្រុកមួយ (Die Welt) លោកហៃកូ ម៉ាអាស បានលើកឡើងថាអ្នកដែលបានសន្យាហើយថាដកកម្លាំងទ័ពពីលីប៊ី មិនបានធ្វើតាមពាក្យសន្យារបស់ពួកគេឡើយ។ ទន្ទឹមគ្នានេះ លោកប្រមុខការបរទេសអាល្លឺម៉ង់បានសង្កត់ធ្ងន់ថា ដើម្បីជួយឲ្យប្រជាជនលីប៊ីអាចកំណត់ពីជោគវាសនាប្រទេសរបស់ពួកគេជាថ្មីម្តងទៀតបាន កម្លាំងទ័ពបរទេសត្រូវតែចាកចេញ។
ទោះបីជាលោកម៉ាអាស មិនបាននិយាយឲ្យចំឈ្មោះប្រទេសណាឲ្យប្រាកដ ក៏គេដឹងថាលោកចង់សំដៅដល់ប្រទេសរុស្ស៊ី និងតួកគី ដែលនៅមិនទាន់ដកទាហានស៊ីឈ្នួល និងកម្លាំងទ័ពឲ្យអស់ចេញពីប្រទេសលីប៊ី។
មេដឹកនាំលោកខាងលិចតែងបានអំពាវនាវម្តងហើយម្តងទៀតឲ្យក្រុមយុទ្ធជនបរទេសចាកចេញពីលីប៊ី ដើម្បីជួយឲ្យប្រទេសនៅអាហ្វ្រិកខាងជើងមួយនេះ មានស្ថិរភាព សន្តិភាព និងស្វ័យដឹកនាំដោយខ្លួនឯងបានពិតប្រាកដ។
ដូចគ្នានេះដែរអ.ស.ប បានព្រមានថាដំណើរការជំរុញសន្តិភាពយូរអង្វែងនៅលីប៊ីនឹងនៅបន្តជាប់គាំង ប្រសិនបើនៅតែមានវត្តមានទាហានស៊ីស្នួលនិងកម្លាំងទ័ពបរទេសបែបនេះទៀត។ គួរបញ្ជាក់ជូនថា បើតាមការប៉ាន់ស្មានរបស់អ.ស.ប មានទាហានស៊ីឈ្នួល និងយុទ្ធជនបរទេស ប្រមាណ ២ម៉ឺននាក់ នៅតែមានវត្តមានក្នុងទឹកដីលីប៊ីនៅឡើយ។ ហើយវត្តមាននោះត្រូវបានគេមើលឃើញថាជាការគំរាមកំហែងដល់ការធានាឲ្យបាននូវការរៀបចំបោះឆ្នោតទាំងការបោះឆ្នោតសភានិងប្រធានាធិបតីលីប៊ីដែលជាដំណើរការគាំទ្រដោយអ.ស.ប ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ