UN ថាគេមិនគួរមើលរំលងវិបត្តិយេម៉ែន ទោះមានសង្គ្រាមអ៊ុយក្រែនក៏ដោយ
ចុះផ្សាយនៅថ្ងៃ៖
ស្តាប់ - ០៤:២៤
សង្គ្រាមរយៈពេល ៧ឆ្នាំបាននិងកំពុងបង្កជាមហន្តរាយមនុស្សធម៌ធ្ងន់ធ្ងរនៅយេម៉ែន។ ប៉ុន្តែអង្គការសហប្រជាជាតិនិយាយថាវិបត្តិយេម៉ែនប្រឈមនឹងត្រូវគេបំភ្លេចចោល ដោយហេតុថាពិភពលោកបានបង្វែរការយកចិត្តទុកដាក់ខ្លាំងលើសង្គ្រាមនៅអ៊ុយក្រែន។ នៅថ្ងៃពុធ ទី១៦ មីនា ឆ្នាំ២០២២ អង្គការសហប្រជាជាតិបានទទូចសុំប្រទេសម្ចាស់ជំនួយឲ្យបែរមកមើលនិងជួយប្រទេសយេម៉ែនផង។ តើអង្គការសហប្រជាជាតិនិយាយអ្វីខ្លះពីវិបត្តិនៅយេម៉ែន? តើសង្គ្រាមអ៊ុយក្រែនជះផលប៉ះពាល់អ្វីខ្លះដល់យេម៉ែន?
យេម៉ែនរងគ្រោះខ្លាំងពីវិបត្តិមនុស្សធម៌
ប្រទេសយេម៉ែនត្រូវបានហែកហួរដោយសង្គ្រាមចាប់តាំងពីឆ្នាំ ២០១៤ នៅក្រោយពេលដែលក្រុមឧទ្ទាមហ៊ូទីគាំទ្រដោយអ៊ីរ៉ង់វាយដណ្តើមយកបានរដ្ឋធានីសាណា និងតំបន់ជាច្រើនផ្សេងទៀតនៅប៉ែកខាងជើងនៃប្រទេស។ សង្គ្រាមនៅយេម៉ែនកាន់តែធ្លាក់ដុនដាបខ្លាំងក្នុងខែមីនា ឆ្នាំ២០១៥ នៅពេលដែលសម្ព័ន្ធអន្តរជាតិដឹកមុខដោយអារ៉ាប៊ីសាអូឌីតចូលធ្វើអន្តរាគមន៍ជួយរដ្ឋាភិបាលយេម៉ែនដែលទទួលស្គាល់ដោយសហគមន៍អន្តរជាតិ។
សង្គ្រាមនៅយេម៉ែនបានឆក់យកជីវិតមនុស្សជាង ១៥ម៉ឺននាក់ ក្នុងនោះមានជនស៊ីវិលជាង ១៤ ៥០០នាក់ និងបណ្តាលឲ្យមនុស្សជាច្រើនលាននាក់ផ្សេងទៀតបាត់បង់ទីជម្រក។ បច្ចុប្បន្ន ប្រជាជនយេម៉ែនជាច្រើនលាននាក់កំពុងរស់ខ្វះខាតស្បៀងនិងការថែទាំផ្នែកសុខភាព។ យោងតាមអង្គការសហប្រជាជាតិ ក្នុងចំណោមប្រជាជនយេម៉ែនសរុបទាំងអស់ប្រមាណ ៣១លាន ៩សែននាក់ មានជាង ២៣លាននាក់ត្រូវការជំនួយមនុស្សធម៌ ហើយក្នុងចំណោមនោះមានប្រជាជនយេម៉ែនជិត ១៣លាននាក់កំពុងត្រូវការជំនួយជាបន្ទាន់។
កម្មវិធីស្បៀងអាហារពិភពលោក (WFP) របស់អង្គការសហប្រជាជាតិបានទាញសញ្ញាអាសន្នពីភាពអត់ឃ្លាននិងគ្រោះទុរ្ភិក្សធ្ងន់ធ្ងរ ប្រសិនបើគ្មានជំនួយថវិកាថ្មីសម្រាប់យេម៉ែនទេនោះ។ WFP បានប៉ាន់ស្មានថាមានមនុស្សរហូតដល់ទៅ ១៩លាននាក់អាចនឹងប្រឈមបញ្ហាអសន្តិសុខស្បៀងធ្ងន់ធ្ងរនៅឆមាសទី២ នៃឆ្នាំ២០២២នេះ។
ជារួម អស់រយៈពេលប្រាំពីរឆ្នាំហើយដែលប្រជាជនយេម៉ែនរស់នៅដោយត្រូវប្រឈមមុខនឹងសេចក្តីស្លាប់ ការបំផ្លិចបំផ្លាញ ការចាកចោលផ្ទះសម្បែង ភាពអត់ឃ្លាន ការភ័យខ្លាច និងការបែកបាក់ខ្ចាត់ព្រាត់គ្នា។
អង្គការសហប្រជាជាតិដង្ហើយរកជំនួយសម្រាប់យេម៉ែន
អង្គការសហប្រជាជាតិបានចាត់ទុកសង្គ្រាមហែកហួរជាច្រើនឆ្នាំនៅយេម៉ែនថាជាមហន្តរាយមនុស្សធម៌ដ៏អាក្រក់បំផុតមួយរបស់ពិភពលោក។ ប៉ុន្តែនៅពេលនេះ ថវិកាដែលគេប្រើដើម្បីរារាំងស្ថានការណ៍ក្នុងប្រទេសយេម៉ែនកុំឲ្យធ្លាក់ដុនដាបខ្លាំងជិតអស់ហើយ។
សង្គ្រាមនៅអ៊ុយក្រែន ក៏កំពុងធ្វើឲ្យគេកាន់តែមើលរំលងពីវិបត្តិមនុស្សធម៌នៅយេម៉ែនទៅទៀត ដូច្នោះហើយទើបអង្គការសហប្រជជាតិបានទទូចសុំយប្រទេសម្ចាស់ជំនួយឲ្យបែរងាកមកមើលនិងជួយប្រទេសយេម៉ែនផង។
នៅក្នុងសន្និសីទវីដេអូស្តីអំពីបញ្ហាយេម៉ែនកាលពីថ្ងៃពុធម្សិលមិញ អគ្គលេខាធិការអង្គការសហប្រជាជាតិលោក អង់តូនីញ៉ូ ហ្គូទែរស៍ និយាយថាបញ្ហាទាក់ទិនយេម៉ែនទំនងជាបាត់លែងសូវឃើញនៅលើបណ្តាញសារព័ត៌មាននានា ដោយហេតុថាពិភពលោកងាកទៅចាប់អារម្មណ៍ខ្លាំងពីសង្គ្រាមអ៊ុយក្រែន។ ក៏ប៉ុន្តែ លោកហ្គូទែរស៍បានលើកឡើងថាការឈឺចាប់និងទុក្ខវេទនារបស់ប្រជាជនយេម៉ែននៅមិនទាន់ធូរស្រាលនៅឡើយទេ។
តើសង្គ្រាមអ៊ុយក្រែនជះផលប៉ះពាល់អ្វីខ្លះដល់ប្រទេសយេម៉ែន?
ក្រៅតែពីបានទាញការចាប់អារម្មណ៍ងាកចេញពីយេម៉ែន ជម្លោះនៅអ៊ុយក្រែនក៏កំពុងគំរាមកំហែងផងដែរដល់ស្ថានភាពមនុស្សធម៌ក្នុងប្រទេសយេម៉ែន ដោយសារតែស្រូវសាលីចំនួន ២២% របស់ប្រទេសនេះនាំចូលមកពីអ៊ុយក្រែននិងរុស្ស៊ី។
កម្មវិធីស្បៀងអាហារពិភពលោកបាននិយាយថាកម្រិតនៃភាពអត់ឃ្លាននៅយេម៉ែនកាន់ធ្លាក់អាក្រក់ខ្លាំង ប្រសិនបើវិបត្តិអ៊ុយក្រែនជំរុញឲ្យតម្លៃស្បៀងអាហារកើនឡើង។ ដើម្បីកាត់បន្ថយវិបត្តិមនុស្សធម៌ដ៏អាក្រក់នៅយេម៉ែននេះ អង្គការសហប្រជាជាតិសង្ឃឹមថានឹងរៃអង្គាសរកបានថវិកាចំនួន ៤,២៧ពាន់លានដុល្លារដើម្បយកទៅជួយប្រជាជនរងគ្រោះយេម៉ែន។ ភ្លាមៗនោះ អាមេរិកប្រកាសថានឹងបរិច្ចាគថវិកាជិត ៥៨៥លានដុល្លារបន្ថែមទៀតដល់យេម៉ែន។ ចំណែកឯប្រទេសផ្សេងទៀតវិញ គេនៅមិនទាន់ទទួលបានព័ត៌មាននៅឡើយនោះទេ។
គួររំឭកជូនថានៅក្នុងសន្និសីទកាលពីឆ្នាំទៅមិញ អង្គការសហប្រជាជាតិបានអំពាវនាវកៀរគរថវិកា ៣,៨៥ពាន់លានដុល្លារដើម្បីយកទៅជួយយេម៉ែន ក៏ប៉ុន្តែអង្គការបានទទួលជំនួយថវិកាត្រឹមតែ ១,៧ពាន់លានដុល្លារប៉ុណ្ណោះ ពីព្រោះថាសេដ្ឋកិច្ចពិភពលោកកាលណោះរងផលប៉ះពាល់យ៉ាងខ្លាំងពីជំងឺរាតត្បាតកូវីដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ