NGO៖ចំនួនជនរងគ្រោះស៊ីវិលយេម៉ែនបានកើនទ្វេដង ក្រោយពីការបណ្តេញក្រុមអ្នកជំនាញអន្តរជាតិ
នៅថ្ងៃព្រហស្បតិ៍ ទី១០ កុម្ភៈ អង្គការក្រៅរដ្ឋាភិបាលមួយក្នុងប្រទេសន័រវែសឈ្មោះ « ក្រុមប្រឹក្សាន័រវែសទទួលបន្ទុកជនភៀសខ្លួន » បានប្រកាសថា តាំងពីការបណ្តេញក្រុមអ្នកជំនាញរបស់អង្គការសហប្រជាជាតិទទួលបន្ទុកស៊ើបអង្កេតរឿងរំលោភសិទ្ធិមនុស្សនៅយេម៉ែនកាលពីខែតុលា ឆ្នាំ ២០២១ មក ចំនួនជនស៊ីវិលស្លាប់ ឬរបួសនៅយេម៉ែនបានកើនទ្វេដង។ តាមក្រុមប្រឹក្សាន័រវែសទទួលបន្ទុកជនភៀសខ្លួន អំពើហិង្សាបានកើនឡើងខ្លាំងនារយៈពេលប៉ុន្មានខែចុងក្រោយនេះនៅក្នុងប្រទេសយេម៉ែន។
ចុះផ្សាយនៅថ្ងៃ៖
ស្តាប់ - ០២:១០
នៅក្នុងរយៈពេល ៤ខែនៃបេសកកម្មរបស់ក្រុមអ្នកជំនាញអន្តរជាតិទទួលបន្ទុកស៊ើបអង្កេតរឿងរំលោភសិទ្ធិមនុស្សនៅយេម៉ែនមានស្លាប់ ឬរបួសជនស៊ីវិលចំនួន ៨២៣នាក់។ តែនៅក្នុងរយៈពេល ៤ខែដែលលែងមានវត្តមានក្រុមអ្នកជំនាញអន្តរជាតិទទួលបន្ទុកស៊ើបអង្កេតរឿងរំលោភសិទ្ធិមនុស្សនៅយេម៉ែន ចំនួនជនស៊ីវិលស្លាប់ ឬរបួសមានដល់ទៅ ១ ៥៣៥នាក់ នេះបើតាមការប្រកាសរបស់ក្រុមប្រឹក្សាន័រវែសទទួលបន្ទុកជនភៀសខ្លួនហៅកាត់ NRC នៅក្នុងសេចក្តីប្រកាសព័ត៌មានមួយ។
កំណើនអំពើហិង្សានៅយេម៉ែនដែល NRC ចង់និយាយនេះ គឺកំណើននៃការវាយប្រហាររបស់កម្លាំងសម្ព័ន្ធអារ៉ាប់ដឹកនាំដោយប្រទេសអារ៉ាប៊ីសាអូឌីតដើម្បីជួយរដ្ឋាភិបាលយេម៉ែនក្នុងការប្រឆាំងនឹងក្រុមឧទ្ទាមហ៊ូទីដែលគាំទ្រដោយប្រទេសអ៊ីរ៉ង់។ បន្ទាប់មក នៅមានអំពើហិង្សារបស់ពួកឧទ្ទាមហ៊ូទី និងការវាយប្រហាររបស់ពួកនេះទៅលើប្រទេសអារ៉ាប៊ីសាអូឌីត និងប្រទេសអេមីរ៉ាតអារ៉ាប់រួម។ គួរបញ្ជាក់ថាក្នុងថ្ងៃទី៧ តុលា ឆ្នាំ ២០២១ ក្រុមប្រឹក្សាសិទ្ធិមនុស្សសហប្រជាជាតិបានបដិសេធមិនបន្តបេសកកម្មរបស់ក្រុមអ្នកជំនាញអន្តរជាតិទទួលបន្ទុកស៊ើបអង្កេតរឿងរំលោភសិទ្ធិមនុស្សនៅយេម៉ែន។
លោកស្រីអេរីន ហាត់ស្ហ៊ីនស៊ុន នាយិកាអង្គការ NRC បានយល់ឃើញថា អវត្តមានក្រុមអ្នកជំនាញអន្តរជាតិបាននាំឲ្យមានអំពើហិង្សាយ៉ាងរន្ធត់ និងមិនអាចគ្រប់គ្រងបាន។ « តើអ្នកណាជាអ្នកទទួលខុសត្រូវនៃការស្លាប់កូនក្មេង និងក្រុមគ្រួសារ?។ ប្រហែលជាយើងមិនអាចដឹងបានទេ ព្រោះគ្មានការស៊ើបអង្កេតឯករាជ្យ អន្តរជាតិ និងមិនលំអៀង » នេះជាការសោកស្តាយរបស់លោកស្រីអេរីន ហាត់ស្ហ៊ីនស៊ុន។ នៅក្នុងន័យនេះ លោកស្រីអេរីន ហាត់ស្ហ៊ីនស៊ុនបានអំពាវនាវឲ្យបញ្ជូនក្រុមអ្នកជំនាញអន្តរជាតិទទួលបន្ទុកស៊ើបអង្កេតរឿងរំលោភសិទ្ធិមនុស្សទៅយេម៉ែនជាថ្មី។
តាមអង្គការសហប្រជាជាតិ សង្រ្គាមក្នុងរយៈពេល ៧ឆ្នាំនៅយេម៉ែនបានបណ្តាលឲ្យមានមនុស្សស្លាប់យ៉ាងតិច ៣៧៧ ០០០នាក់ ក្នុងនោះ មានភាគច្រើនបានស្លាប់ដោយអត់បាយ និងជំងឺ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ