អ្នកជំនាញ៖សង្រ្គាមអ៊ុយក្រែនកំពុងរុញពិភពលោកឲ្យធ្លាក់ក្នុងវិបត្តិខ្វះស្បៀង
ចុះផ្សាយនៅថ្ងៃ៖
ស្តាប់ - ០៧:៣៣
ជាង ៣សប្តាហ៍ដែលរុស្ស៊ីបានបើកការវាយប្រហារលើអ៊ុយក្រែន។ ខណៈដែលទីក្រុងធំៗមួយចំនួនកំពុងបន្តរងគ្រាប់មីស៊ីល ការទម្លាក់គ្រាប់បែក និងការឡោមព័ទ្ធពីទ័ពរុស្ស៊ី សង្រ្គាមមួយនេះក៏បាន និងកំពុងបន្តបង្ខំឲ្យប្រជាជនអ៊ុយក្រែនភាគច្រើនភៀសខ្លួនចេញដែរ។ គិតត្រឹមថ្ងៃពុធ ទី១៦ មីនា មានជនភៀសខ្លួនអ៊ុយក្រែនជាង ៣លាននាក់បានភៀសខ្លួនទៅជ្រកកោននៅតាមបណ្តាប្រទេសជាប់ព្រំដែន ដូចយ៉ាងប៉ូឡូញ ឬរូម៉ានី។ ក្តីបារម្ភមួយទៀតសម្រាប់ពិភពលោកពីសង្រ្គាមអ៊ុយក្រែនពេលនេះ គឺវិបត្តិខ្វះស្បៀង។ អ្នកជំនាញបារាំងលោកសេបាស៊្យៀង អាបីសហ៊ានទាំងលើកឡើងថា សង្រ្គាមអ៊ុយក្រែនកំពុងគូសវៀសឡើងវិញនូវផែនទីស្រូវសាលី និងភាពអត់ឃ្លានសម្រាប់ទាំងអស់គ្នា។
សង្រ្គាមអ៊ុយក្រែនពេលនេះមានជាប់ពាក់ព័ន្ធផ្ទាល់នឹងប្រទេសអ៊ុយក្រែន និងប្រទេសរុស្ស៊ី។ តែគេមិនត្រូវភ្លេចនិយាយទេថា អ៊ុយក្រែន និងរុស្ស៊ីជាប្រទេសកសិកម្មដំណាំស្រូវសាលី និងដំណាំពោត។ រុស្ស៊ីជាប្រទេសនាំចេញស្រូវសាលីទី១ ក្នុងលោកបន្ទាប់ពីសហរដ្ឋអាមេរិក និងអ៊ុយក្រែន ហើយអ៊ុយក្រែនក៏ជាប្រទេសនាំចេញពោតលំដាប់ទី៣ ក្នុងលោកដែរ។ ក្រៅពីស្រូវសាលី និងពោត អ៊ុយក្រែនក៏ជាប្រទេសកសិកម្មដំណាំផ្កាឈូករ័ត្នសម្រាប់ធ្វើប្រេងឆា។ ចំណោទនៅត្រង់ថា សង្រ្គាមពេលនេះមិនអាចអនុញ្ញាតឲ្យអ៊ុយក្រែនបន្តដំាស្រូវសាលី ពោត ឬផ្កាឈូករ័ត្នដូចទម្លាប់សព្វមួយដងបានទៀតឡើយ។
ដល់អ៊ីចឹងទៅ តម្លៃស្រូវសាលី ពោតរួមទាំងផ្កាឈូករ័ត្ននៅលើទីផ្សារអន្តរជាតិកំពុងឡើងថ្លែខ្ពស់ ព្រោះគ្រប់គ្នាកំពុងចោទសួរថា តើគេត្រូវរកស្រូវសាលី ពោត ឬប្រេងឆាពីណាដើម្បីបំពេញកន្លែងផ្គត់ផ្គង់របស់អ៊ុយក្រែន។ ពិតណាស់ រុស្ស៊ីដែលជាប្រទេសនាំចេញស្រូវសាលី ឬពោតលំដាប់ទី១ ក្នុងលោកអាចបន្ត និងអាចបង្កើនការនាំចេញរបស់ខ្លួន។ មួយវិញទៀត អ៊ុយក្រែនក៏នៅមានសល់បរិមាណស្តុកស្រូវសាលី ឬពោតច្រើនគួរសមដែរ។ តែត្រង់ចំណុចនេះត្រូវបានអ្នកជំនាញបារាំងលោកសេបាស៊្យៀង អាបីសចោទជាសំណួរមួយចំនួន តើវានឹងមានរឿងអ្វីកើតឡើង បើបរិមាណស្តុកស្រូវសាលី ឬពោតរបស់អ៊ុយក្រែនធ្លាក់ក្នុងដៃរុស្ស៊ី?។
តើគេអាច ឬគេហ៊ានទិញស្រូវសាលី ឬពោតរបស់អ៊ុយក្រែនក្រោមយីហោរុស្ស៊ីបានដែរ ឬទេក្នុងពេលដែលរុស្ស៊ីកំពុងជាប់ទណ្ឌកម្មបស្ចិមប្រទេស?។ ចុះតើរុស្ស៊ីខ្លួនឯងអាចបន្តលក់ស្រូវសាលី ឬពោតរបស់ខ្លួនបានដែរ ឬអត់?។ ទាំងនេះសុទ្ធសឹងជាសំណួរដែលនៅមិនទាន់មានចម្លើយច្បាស់លាស់នៅឡើយទេ។
សង្រ្គាមអ៊ុយក្រែនរុញក្រុមប្រទេសអាហ្រ្វិកឲ្យធ្លាក់ក្នុងភាពអត់ឃ្លាន?
អ្វីដែលកំពុងលេចច្បាស់ពេលនេះ គឺតម្លៃស្រូវសាលី និងពោត ពិសេសស្រូវសាលីកំពុងឡើងថ្លៃខ្លាំង។ នៅចំពោះមុខពេលនេះ ប្រហែលអាចមានក្រុមប្រទេសដែលពឹងខ្លាំង ឬនាំចូលលើស្រូវសាលី ឬពោតច្រើនពីប្រទេសអ៊ុយក្រែន ឬរុស្ស៊ី។ តែអ្នកជំនាញបារាំងលោកសេបាស៊្យៀង អាបីសបានព្រមានទុកជាមុនថា នៅពេលខាងមុខ និងក្នុងករណីដែលសង្រ្គាមអ៊ុយក្រែនអូសបន្លាយ កង្វះស្រូវសាលី ពោត រួមទាំងប្រេងឆាធ្វើពីផ្កាឈូករ័ត្ននឹងមានកាន់តែខ្លាំង ហើយតម្លៃរបស់វាក៏នឹងហក់ឡើងកាន់តែខ្ពស់។ ក្រៅពីផលវិបាកកើតចេញពីសង្រ្គាម អ្នកជំនាញបារាំងរូបនេះដដែលក៏បានលើកឡើងពីភាពរាំងស្ងួតនៅក្នុងប្រទេសមួយចំនួនដូចយ៉ាងចិនដែលត្រូវបង្កើនការនាំចូលស្រូវសាលីដើម្បីបំពេញតម្រូវការរបស់ខ្លួន។
តែគឺក្រុមប្រទេសដែលពឹងច្រើន ឬពឹងសឹងទាំងស្រុងលើស្រូវសាលីរុស្ស៊ី និងអ៊ុយក្រែនដែលកំពុងប្រឈមខ្លាំងជាងគេ ពិសេសក្រុមប្រទេសអាហ្វ្រិក។ បច្ចុប្បន្ន មានប្រទេសអាហ្រ្វិកចំនួន ៤៥ប្រទេសបានទិញស្រូវសាលីពីអ៊ុយក្រែន ឬពីរុស្ស៊ីក្នុងចំនួនយ៉ាងតិច ១ភាគ៣។ អ៊ីចឹងហើយបានជាអគ្គនាយិកាមូលនិធិរូបិយវត្ថុអន្តរជាតិលោកស្រីគ្រីស្តាលីណា ហ្សកជីវ៉ាបានសង្ខេបខ្លីថា សង្រ្គាមអ៊ុយក្រែនមានន័យស្មើនឹងភាពអត់ឃ្លាននៅអាហ្រ្វិក។ ក្រុមប្រទេសដែលផុយស្រួយ និងរងគ្រោះខ្លាំងបន្ទាប់ គឺក្រុមប្រទេសដែលកំពុងមានសង្រ្គាម ដូចយ៉ាងយេម៉ែន ឬស៊ូដង់ខាងត្បូងដែលមានមនុស្សរាប់លាននាក់នឹងគ្មានអ្វីច្រកក្រពះនាពេលខាងមុខ។
សព្វថ្ងៃនេះ ស្រូវសាលីក្នុងមួយតោនមានតម្លៃចន្លោះពី ៣៨០ដុល្លារទៅ ៤៤០ដុល្លារ។ នេះជាតម្លៃមួយខ្ពស់ដែលមានប្រទេសខ្លះគ្មានលទ្ធភាពអាចបន្តទិញបានទេ។ ពិតណាស់ គេអាចទិញស្រូវសាលី ពោត ប្រេងឆា រួមទាំងស្បៀងខ្លះពីប្រទេសផ្សេង។ តែបញ្ហានៅត្រង់ថា ប្រទេសផ្សេងខ្លះទាំងនោះបានប្រកាសពីការកាត់បន្ថយ ឬបិទការនាំចេញស្រូវសាលី ពោត ប្រេងឆា ឬស្បៀងទាំងស្រុងតែម្តងដើម្បីទុកផ្គត់ផ្គង់ឲ្យតម្រូវការខ្លួនឯង។ ជាក់ស្តែង ប្រទេសអាល់ហ្សេរីប្រកាសហាមការនាំចេញស្បៀង។ អាហ្សង់ទីនប្រកាសព្យួរការនាំចេញប្រេងឆា ឬម្សៅសណ្តែកសៀង។ ឥណ្ឌូណេស៊ីរឹតបន្តឹងការនាំចេញប្រេងដូង ហើយសូម្បីតែរុស្ស៊ីខ្លួនឯងក៏អាចប្រកាសព្យួរការនាំចេញស្រូវសាលីរហូតដល់ដំណាច់ខែមិថុនាដោយសារតែខ្លួនបានជួបគ្រោះរាំងស្ងួត។
មានមនុស្សពី ៨លានទៅ ១៣លាននាក់បន្ថែមអាចខ្វះស្បៀងអាហារ
តម្លៃស្បៀងឡើងថ្លៃពេលនេះហាក់មានកម្រិតខ្ពស់ជាងកាលពីឆ្នាំ ២០០៨។ អង្គការសហប្រជាជាតិបានទាញសញ្ញាអាសន្នពីវិបត្តិខ្វះស្បៀងដែលកំពុងកើតចេញពីសង្រ្គាមអ៊ុយក្រែនពេលនេះ។ អង្គការស្បៀង និងកសិកម្មពិភពលោកហៅកាត់ FAO បានប៉ាន់ប្រមាណថា មានមនុស្សពី ៨លានទៅ ១៣លាននាក់បន្ថែមទៀតក្នុងលោកអាចនឹងខ្វះអាហារបរិភោគ ប្រសិនបើការនាំស្បៀងពីអ៊ុយក្រែន និងពីរុស្ស៊ីត្រូវជាប់គាំង និងអូសបន្លាយយូរ។ តាមអង្គការ FAO មានផ្ទៃដីកសិកម្មដំណាំស្រូវសាលី និងផ្កាឈូករ័ត្ននៅអ៊ុយក្រែនចំនួន ៣០% ត្រូវបានបំផ្លាញដោយសង្រ្គាម។
« យើងកំពុងស្ថិតក្នុងវិបត្តិសកល » នេះជាការថ្លែងរបស់អ្នកជំនាញបារាំងលោកសេបាស៊្យៀង អាបីស។ លោកអាប៊ីសបានបន្ថែមថា ទោះបីជាសង្រ្គាមត្រូវចប់នៅថ្ងៃស្អែកក៏ដោយក៏ផលវិបាកនឹងបន្តមានយូរពេល ព្រោះការស្រោចស្រង់ដីកសិកម្មអ៊ុយក្រែនដែលរងគ្រោះដោយសង្រ្គាមត្រូវការពេលយូរ។ តែអ្វីដែលអ្នកជំនាញបារាំងចង់ព្រមាន គឺការផ្ទុះកំហឹងរបស់ពលរដ្ឋប្រឆាំងនឹងភាពអត់ឃ្លានដូចដែលធ្លាប់កើតមានកាលពីឆ្នាំ ២០០៨។ ជាក់ស្តែងនៅអ៊ីរ៉ាក់ គេបានឃើញមានបាតុកម្មនៅរៀងរាល់ចុងសប្តាហ៍ប្រឆាំងនឹងទំនិញឡើងថ្លៃ។ តាមលោកសេបាស៊្យៀង អាបីស បាតុកម្មនៅក្នុងប្រទេសប្រជាធិបតេយ្យជារឿងធម្មតា តែការធ្វើបាតុកម្មនៅក្នុងប្រទេសផ្តាច់ការអាចរងការបង្រ្កាបចាស់ដៃ។
ទោះជាយ៉ាងនេះក្តី លោកសេបាស៊្យៀង អាបីសបានមើលឃើញថា នៅពេលដែលក្រពះឃ្លានហើយ គេលែងខ្លាចអ្វីទាំងអស់ ព្រោះបើមិនចុះផ្លូវតវ៉ាក៏គង់តែស្លាប់ដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ