តើអាមេរិកអាចបិទភ្នែក បណ្តោយទុកឲ្យរុស្ស៊ីធ្វើសង្រ្គាមបំផ្លាញអ៊ុយក្រែនដល់ពេលណា?
ចុះផ្សាយនៅថ្ងៃ៖
៤៨ថ្ងៃមកហើយ ដែលរុស្ស៊ីចូលធ្វើសង្រ្គាមឈ្លានពានអ៊ុយក្រែន។ សហគមន៍អន្តរជាតិនៅតែបន្តខ្វែងគំនិតគ្នា គ្មានសំឡេងរួមដើម្បីដាក់សម្ពាធឲ្យរុស្ស៊ីដកទ័ព ឈប់ធ្វើសង្រ្គាម នៅអ៊ុយក្រែន នោះបើទោះបីជាកងទ័ពរុស្ស៊ីរងការចោទប្រកាន់ ក្នុងរឿងសម្លាប់រង្គាល ប្រជាជនស៊ីវិលអ៊ុយក្រែន នៅតាមទីកន្លែងដែលខ្លួនវាយដណ្តើមមកកាន់កាប់។ នៅអាមេរិក រដ្ឋបាលលោកចូ បៃដិនក៏កំពុងរងការរិះគន់ខ្លាំងណាស់ដែរ ពីសំណាក់អ្នកនយោបាយទាំងពីរបក្ស ដែលបានស្តីបន្ទោស រដ្ឋបាលលោកចូ បៃដិនថា អាមេរិកជួយអ៊ុយក្រែនមិនគ្រប់គ្រាន់ ដោយបណ្តោយទុកឲ្យអ៊ុយក្រែនរងការវាយបំផ្លាញ ឈ្លានពានពីសំណាក់កងទ័ពរុស្ស៊ី។ អាមេរិកជាប្រទេស ដែលផ្តល់គ្រឿងសព្វាវុធច្រើនជាងគេទៅឲ្យអ៊ុយក្រែន ដើម្បីទប់ទល់នឹងកងទ័ពរុស្ស៊ី។ ដូច្នេះ តើអាមេរិកត្រូវធ្វើអ្វីបន្ថែមទៀត ដើម្បីជួយអ៊ុយក្រែន ឲ្យបានច្រើនគ្រប់គ្រាន់នោះ?
តាំងពីរុស្ស៊ីចូលធ្វើសង្រ្គាមអ៊ុយក្រែន មហាអំណាចពិភពលោកអាមេរិកពិចារណា ថ្លឹងថ្លែងដើម្បីកុំឲ្យបាត់ភាពលំនឹងរបស់ខ្លួន នោះ គឺអាមេរិកអាចផ្តល់អាវុធទៅជួយអ៊ុយក្រែន ដោយមិនធ្វើឲ្យរុស្ស៊ីអាចផ្ទុះកំហឹង ទៅពង្រីកសង្រ្គាមឈ្លានពានក្នុងប្រទេសផ្សេងទៀត។
ជាក់ស្តែង ចាប់តាំងពីអ៊ុយក្រែនធ្លាក់ក្រោមការវាយប្រហារពីគ្រប់ទិសរបស់កងទ័ពរុស្ស៊ី អាមេរិកបានបញ្ជូនអាវុធ ដូចទឹកបាក់ទំនប់ ទៅជួយកងទ័ពអ៊ុយក្រែន។ ប៉ុន្តែ ជាការកត់សំគាល់ សព្វាវុធ ដែលអាមេរិកបញ្ជូនទៅអ៊ុយក្រែន ភាគច្រើនជាអាវុធធុនស្រាល ដូចជា មីស៊ីលប្រឆាំងរថក្រោះ ដែលគេអាចបាញ់ពីលើស្មា។
ត្រូវដឹងថា រហូតមកដល់ពេលនេះ អាមេរិកនៅតែបដិសេធមិនព្រមបញ្ជូនអាវុធធុនធ្ងន់ ទៅតាមការទាមទារ ស្នើសុំរបស់អ៊ុយក្រែន ក្នុងមូលហេតុថា អ៊ុយក្រែនមិនទាន់ចេះប្រើសព្វាវុធធុនធ្ងន់របស់អាមេរិក ឬថា ការបញ្ជូនសព្វាវុធធុនធ្ងន់របស់អាមេរិក ដូចជា យន្តហោះចម្បាំង ទៅជួយកងទ័ពអ៊ុយក្រែន នឹងអាចត្រូវរុស្ស៊ី មើលឃើញនិងចាត់ទុកថា ជាចេតនាចង់បង្កហេតុជាមួយ រុស្ស៊ី ដែលនឹងអាចទៅបង្កើនគ្រោះថ្នាក់ផ្ទុះសង្រ្គាមនុយក្លេអ៊ែរ ដែលនេះជាដំណឹងល្អទេសម្រាប់មនុស្សជាតិលើផែនដី។
ដោយលើកឡើងជាញយដងពីបច្ចេកវិទ្យា សព្វាវុធទំនើប របស់អាមេរិក ដែលកងទ័ពអ៊ុយក្រែនគ្មានទម្លាប់ប្រើពីមុនមក រដ្ឋបាលលោក ចូ បៃដិន បានបដិសេធ មិនផ្តល់យន្តហោះចម្បាំងទៅឲ្យអ៊ុយក្រែន។ ផ្ទុយទៅវិញ អាមេរិកបានអំពាវនាវប្រទេសអតីតសហភាពសូវៀត ដូចជាប៉ូឡូញជាដើម ឲ្យផ្តល់សព្វាវុធរុស្ស៊ី ដែលពួកគេមាន ទៅឲ្យអ៊ុយក្រែន។ ប៉ុន្តែ ដូចជាអាមេរិកប៉ូឡូញ ដែលខា្លច មិនចង់ប្រឈមមុខផ្ទុះជាមួយ រុស្ស៊ី បានបដិសេធមិនបញ្ជូនយន្តហោះចម្បាំងផលិតនៅរុស្ស៊ី ទៅឲ្យកងទ័ពអ៊ុយក្រែន។
នៅអាមេរិក ជំហរលឹបល របស់រដ្ឋបាលលោកចូបៃដិន នៅក្នុងរឿងផ្តល់សព្វាវុធទៅជួយអ៊ុយក្រែន បានបង្កឲ្យមានការរិះគន់ពីអ្នកនយោបាយទាំងពីរគណបក្ស។ នៅក្រោយឃើញរូបភាពដែល បង្ហាញកងទ័ពរុស្ស៊ី ថមថយកម្លាំង និងដកថយ លែងឡោមព័ទ្ធទីក្រុងកៀវ ហើយរុស្ស៊ី កំពុងប្រឈមនឹងការចោទប្រកាន់ពីបទឧក្រិដ្ឋកម្ម សង្រ្គាម មន្ទីរបញ្ចកោនអាមេរិកបានរងការដាក់សំពាធកាន់តែខ្លាំងពីសមាជិកព្រឹទ្ធសភា។ នៅក្នុងសវនាការដេញដោលមេដឹកនាំយោធាជាន់ខ្ពស់ កាលពីសប្តាហ៍មុន សមាជិកព្រឹទ្ធសភាអាមេរិកលោកRichard Blumenthal បាននិយាយខ្លាំងៗថា យុទ្ធសាស្រ្តរបស់អាមេរិកសព្វថ្ងៃ ដូចជារោគសរសៃប្រសាទ គិតផ្សេង ធ្វើផ្សេង។ “យើងចង់ឲ្យអ៊ុយក្រែនឈ្នះសង្រ្គាម លើរុស្ស៊ី។ ប៉ុន្តែ ជាមួយគ្នានោះ យើងខ្លាចថា បើរុស្ស៊ីចាញ់ វានឹងធ្វើកើតផ្ទុះសង្រ្គាមកាន់តែធំ”។
សមាជិកសភាមកពីគណបក្សសាធារណរដ្ឋ លោកKevin Cramer បានសួរបន្ថែមថា “តើយើងមានដែលសួរខ្លួនឯងទេ ថា លោកពូទីនមិនដែលខ្លាចទេឬ ដែលការសម្លាប់រង្គាលទៅលើស្រ្តីនិងកុមារនឹងអាចធ្វើឲ្យផ្ទុះកើតមានសង្រ្គាមកាន់តែធំនោះ”។ សមាជិកព្រឹទ្ធសភារូបនេះសោកស្តាយដែលមន្ទីរបញ្ចកោនបដិសេធមិនផ្តល់យន្តហោះចម្បាំងទៅឲ្យអ៊ុយក្រែន។
ឆ្លើយតបនឹងការរិះគន់របស់សមាជិកព្រឹទ្ធសភា សេតវិមានបានបញ្ចេញបញ្ជីរាយឈ្មោះសព្វាវុធដែលអាមេរិកបានផ្តល់ទៅឲ្យអ៊ុយក្រែន រហូតមកដល់ពេលនេះ។ នៅក្នុងនោះមានប្រព័ន្ធប្រឆាំងមីស៊ីល១៤០០ដើម មីស៊ីលប្រឆាំងរថក្រោះ ៥ពាន់ដើម យន្តហោះដ្រូនអត្តឃាត ដែលមានប្រសិទ្ធិភាពខ្ពស់ក្នុងការវាយប្រហារលើរថពាសដែក កាំភ្លើងស្វ័យប្រវត្តិ៧០០០ដើម គ្រាប់កាំភ្លើង ៥០លានគ្រាប់ អាវការពារគ្រាប់ រ៉ាដាប្រឆាំងគ្រាប់ផ្លោង និងដ្រូន រថពាសដែកធុនតូច ប្រព័ន្ធ ទូរគមនាគមន៍ដ៏មានសុវត្ថិភាព និងឧបករណ៍ការពារមីនជាដើម។
វាយបកនឹងការរិះគន់ដែលថា អាមេរិកធ្វើមិនគ្រប់គ្រាន់ដើម្បីជួយអ៊ុយក្រែន អ្នកនាំពាក្យរបស់ក្រសួងការពារជាតិអាមេរិក លោកJohn Kirby បាននិយាយថា គិតរហូតមកដល់ពេលនេះ នៅមិនទាន់មានប្រទេសណាដែលបានធ្វើច្រើន ដូចជាអាមេរិកនោះទេ។
តាំងពីចូលកាន់តំណែងជាប្រធានាធិបតីអាមេរិក លោកចូ បៃដិនបានផ្តល់ជំនួយយោធាដល់អ៊ុយក្រែន ប្រមាណ ២,៤ពាន់លានដុល្លារ។ ជាជំនួយដ៏ច្រើនសន្ធឹកសន្ធាប់ ដែលជិតស្មើនឹងថវិកាយោធារបស់អ៊ុយក្រែន។ បន្ថែមពីជំនួយយោធាសម្រាប់អ៊ុយក្រែន អាមេរិកបានពង្រាយទ័ពរបស់ខ្លួននៅទឹកដីអឺរ៉ុប ពី ៨ម៉ឺនទៅ ១០ម៉ឺននាក់ និងបានបញ្ជូនប្រព័ន្ធខែលមីស៊ីលទៅស្លូវ៉ាគី នៅក្រោយ រុស្ស៊ីចូលធ្វើសង្រ្គាមឈ្លានពានអ៊ុយក្រែន។
អាមេរិកនាំមុខគេខាងផ្តល់ជំនួយយោធាដ៏ច្រើនសន្ធឹកសន្ធាប់សម្រាប់ជួយកងទ័ពអ៊ុយក្រែន។ គ្មានប្រទេសណាមួយដែលមានធនធាន សមត្ថភាពធ្វើបានដូចអាមេរិកនោះទេ។ ប៉ុន្តែ អ្នកនាំពាក្យរបស់ក្រសួងការពារជាតិអាមេរិកបានសន្និដ្ឋានចុងក្រោយថា ទោះយ៉ាងណាអាមេរិកនៅតែចងចាំក្នុងខួរក្បាលថា រុស្ស៊ីជាមហាអំណាចនុយក្លេអ៊ែរមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ