លោកបៃដិនថាលោកពូទីន ជាឧក្រិដ្ឋជនសង្គ្រាម និងបង្កើនជំនួយយោធាទៅអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:២២
នៅថ្ងៃទី១៧មីនា ២០២២ ជាថ្ងៃទី ២២ នៃសង្គ្រាមអ៊ុយក្រែន។ ទោះបីតុលាការយុត្តិធម៌អន្តរជាតិបានបញ្ជាឱ្យរុស្ស៊ីបញ្ឈប់សកម្មភាពយោធា នៅអ៊ុយក្រែនក្តី ក៏ការវាយប្រហារនៅតែបន្ត។ បើតាមប្រភពអ៊ុយក្រែន រុស្ស៊ីបានវាយប្រហារតាមផ្លូវអាកាសត្រូវចំរោងល្ខោនមួយក្នុងក្រុង ម៉ារីយូប៉ូល ដែលមានជនស៊ីវិលរាប់ពាន់នាក់កំពុងជ្រកការពារខ្លួន។ ប្រឈមនឹងស្ថានភាពនេះ ប្រទេសលោកខាងលិចចំនួន៧ មានជាអាទិ៍ បារាំង សហរដ្ឋអាមេរិក និងអង់គ្លេស បានស្នើសុំបើកជំនួបប្រជុំបន្ទាន់នៅក្រុមប្រឹក្សាសន្តិសុខអង្គការសហប្រជាជាតិ ដោយចោទរុស្ស៊ី ពីបទ “ឧក្រិដ្ឋកម្មសង្គ្រាម”។ ចំណែកលោកប្រធានាធិបតីអាមេរិក ចូ បៃដិន បានហៅប្រធានាធិបតីរុស្ស៊ី លោកពូទីន ថា ឧក្រិដ្ឋជនសង្គ្រាម និងបានប្រកាសបន្ថែមជំនួយយោធាដល់អ៊ុយក្រែនចំនួន៨០០លានដុល្លារ។
នៅក្នុងសេចក្តីថ្លែងការណ៍ នៅចំពោះមុខសភាអាមេរិក ដ៏គួរឱ្យរំជើបរំជួល លោកប្រធានាធិបតីអ៊ុយក្រែន បានទទូចសុំឱ្យអាមេរិកក្នុងនាមមេដឹកនាំពិភពលោក ត្រូវធ្វើជាមេដឹកនាំសន្តិភាព និងសុំជាថ្មីឱ្យអាមេរិកជួយធ្វើអន្តរាគមន៍ការពារតំបន់ដែនអាកាសអ៊ុយក្រែន។ តែលោកប្រធានាធិបតីអាមេរិក នៅរឹងជំហរចែស មិនទន់ទោរតាមសំណើរបស់អ៊ុយក្រែនទេ។ សម្រាប់លោកបៃដិន ការបង្កើនតំបន់ការពារដែនអាកាសអ៊ុយក្រែន ជាសេចក្តីសម្រេចជ្រុលហួសហេតុ នាំឱ្យមានសង្គ្រាមលោកលើកទីបី។
ប៉ុន្តែនៅចំពោះមុខការរៀបរាប់ និងចោទប្រកាន់របស់លោកហ្សេឡេនស្គី ថារុស្ស៊ីជាប្រទេសភេរវនិយម បានវាយប្រហារតាមផ្លូវអាកាសប៉ះលើរោងល្ខោនមួយនៅទីក្រុងម៉ារីយូប៉ូល ដែលមានប្រជាជនជាងមួយពាន់នាក់កំពុងសំងំពួនជ្រក រហូតបណ្តាលឱ្យស្លាប់ជាច្រើននាក់ តែគ្មានតួលេខពិតប្រាកដមក លោកបៃដិន ធ្លោយមាត់ ជាលើកទីមួយហៅលោកពូទីន ថាជា “ឧក្រិដ្ឋជនសង្គ្រាម”។
ដោយគ្មានចម្លែក ខាងរុស្ស៊ីបានបញ្ចេញប្រតិកម្មតបវិញភ្លាម ថា សំដីរបស់ប្រមុខរដ្ឋដែលធ្លាប់ប្រើគ្រាប់បែកសម្លាប់មនុស្សរាប់ម៉ឺននាក់ នៅលើពិភពលោក ជាពាក្យដែលមិនអាចអត់ទោសឱ្យបាន និងមិនអាចទទួលយកបានទេ។ ដូចទម្លាប់ រុស្ស៊ីក៏បានបដិសេធ ថាមិនបានវាយប្រហារលើរោងល្ខោននៅម៉ារីយូប៉ូលនោះដែរ។ ឯកអគ្គរដ្ឋទូតរុស្ស៊ីប្រចាំទីក្រុងវ៉ាស៊ីនតោន ថាជាឃោសនាព័ត៌មានក្លែងក្លាយ។
លោកបៃដិន បន្ថែមជំនួយយោធា ៨០០លានដុល្លារ
លោកប្រធានាធិបតីអាមេរិក បានចុះហត្ថលេខា នៅចំពោះមុខអ្នកកាសែត លើសេចក្តីប្រកាសផ្តល់ជំនួយយោធា ៨០០លានដុល្លារបន្ថែមទៀតដល់អ៊ុយក្រែន ដែលបើគិតជាសរុបទៅ ក្នុងរយៈពេលតែមួយសប្តាហ៍អាមេរិកបានផ្តល់ជំនួយយោធាដល់១ពាន់លានដុល្លារ ពោលជាជំនួយដ៏ធំដែលពុំធ្លាប់មានពីមុនមកទេ។
អាមេរិកមិនបង្កើតតំបន់ការពារដែនអាកាសអ៊ុយក្រែនមែន ប៉ុន្តែអាមេរិកនឹងជួយអ៊ុយក្រែនឱ្យការពារដែនអាកាស ឱ្យបានប្រសើរបំផុត ដោយនឹងផ្តល់មធ្យោបាយការពារដល់យោធាអ៊ុយក្រែនយ៉ាងសន្ធឹកសន្ធាប់។ ដោយលម្អិត ក្នុងកញ្ចប់៨០០លានដុល្លារ យោធាអ៊ុយក្រែននឹងទទួលបាន នូវ ប្រព័ន្ធការពារអាកាសចល័ត Stingers បាញ់ពីដីការពារអាកាស ៨០០គ្រឿង ប្រព័ន្ធមីស៊ីលប្រឆាំងរថពាសដែក៩០០០គ្រឿង អាវុធធុនស្រាលប្រមាណ ៧០០០ដើម (ប្រដាប់គប់គ្រាប់បែក ១០០ កាំភ្លើងវែង៥០០០ដើម កាំភ្លើងខ្លី១០០០ដើម កាំភ្លើងស្វ័យប្រវត្តិ៤០០ដើម) និង២០លានគ្រាប់។
លោកចូបៃដិន ក៏បានសន្យាជួយក្រុងកៀវ ឱ្យមានបំពាក់ប្រព័ន្ធការពារអាកាសរយៈឆ្ងាយ ប្រភេទបាញ់ពីដីទៅអាកាស S-៣០០ ដែលទាហានអ៊ុយក្រែនចេះប្រើច្បាស់។ អាមេរិកមិនមែនអ្នកផលិតមីស៊ីលប្រភេទនេះទេ ប៉ុន្តែអាមេរិកនិងសមាជិកអូតង់ផ្សេងទៀត ដូចជាស្លូវ៉ាគី ប៊ុលហ្ការី ដែលរដ្ឋមន្ត្រីក្រសួងការពារជាតិអាមេរិកនឹងទៅបំពេញទស្សនកិច្ច មាន និងបញ្ជូនទៅដល់អ៊ុយក្រែននៅពីរបីខាងមុខ។ នេះបើតាមប្រភពយោធាអាមេរិក។
អ៊ុយក្រែន នឹងបាន ដ្រូនចំនួន១០០គ្រឿង សម្រាប់យកការពារប្រកបដោយប្រសិទ្ធភាពប្រឆាំងនឹងកងរថក្រោះដែលកំពុងភ្ជង់លើក្រុងអ៊ុយក្រែន។ ជាប្រភេទដ្រូនអត្តឃាត Swichblade ដែលនឹងផ្ទុះនៅពេលប៉ះផ្ទាំងស៊ីប។ តូចមែនតែអាចបំផ្ទុះរថពាសដែកធុនស្រាលបាន។
បង្គាប់របស់តុលាការយុត្តិធម៌អន្តរជាតិ
តុលាការយុត្តិធម៌អន្តរជាតិដែលជាស្ថាប័នរបស់អង្គការសហប្រជាជាតិមានបន្ទុកដោះស្រាយជម្លោះរវាងរដ្ឋនិងរដ្ឋ។ ឆ្លើយតបនឹងបន្តឹងរបស់អ៊ុយក្រែន ដែលបានប្តឹងទៅតុលាការភ្លាមនៅពេលរុស្ស៊ីបើកប្រតិបត្តិការយោធាចូលឈ្លានពានបានពីរបីថ្ងៃ តុលាការយុត្តិធម៌អន្តរជាតិបានចេញវិធានការបន្ទាន់បីចំណុច ៖
- តុលាការបញ្ជាឱ្យរុស្ស៊ី ផ្អាកជាបន្ទាន់ប្រតិបត្តិការយោធាលើដែនដីអ៊ុយក្រែនទាំងមូល។
- តុលាការបង្គាប់ឱ្យមូស្គូ តាមដានមើលថាគ្មានកងពលយោធា កងកម្លាំងប្រដាប់អាវុធក្រោមការឃុំគ្រងរបស់ខ្លួន ឬបុគ្គលណាម្នាក់ បញ្ចេញសកម្មភាពក្នុងន័យបន្តប្រតិបត្តិការយោធា
វិធានការពីរនេះ ជាសេចក្តីសម្រេចស្ទើរ ជាឯកច្ឆន្ទ ដោយក្នុងចំណោមចៅក្រមទាំង១៥រូប មានពីររូប (ចិននិងរុស្ស៊ី) បោះឆ្នោតប្រឆាំង។
វិធានការទីបី ជាសេចក្តីបង្គាប់សម្រាប់ភាគីទាំងពីរ ឱ្យរុស្ស៊ីនិងអ៊ុយក្រែន កុំធ្វើអ្វីដែលនាំឱ្យជម្លោះកាន់តែរីកធំ។
ភាគីដើមបណ្តឹង ពេញចិត្តនឹងសេចក្តីសម្រេចរបស់តុលាការយុត្តិធម៌អន្តរជាតិនេះ ប៉ុន្តែ ទោះបីសេចក្តីបង្គាប់នេះ មានតម្លៃជាកាតព្វកិច្ចមែន ប៉ុន្តែតុលាការគ្មានមធ្យោបាយបង្ខំភាគីណាឱ្យអនុវត្តទេ។
នរណាក៏ដឹងថាសេចក្តីរបស់តុលាការមិនអាចបញ្ឈប់សង្គ្រាមនៅអ៊ុយក្រែនបានទេ ប៉ុន្តែដីកាបង្គាប់អាចជាប្រយោជន៍អនាគត នៅពេលមានការចរចាតាមផ្លូវទូត និងនៅលើវេទិកាអន្តរជាតិផ្សេងៗ។ នេះបើតាមតំណាងភាគីអ៊ុយក្រែន។
ចំណែក រុស្ស៊ីបានច្រានចោលនៅព្រហស្បតិ៍នេះ សេចក្តីសម្រេចរបស់តុលាការ ថាមិនអាចយកជាការណ៍បានទេ ព្រោះទាល់តែភាគីរុស្ស៊ីអ៊ុយក្រែនព្រមព្រៀងគ្នាសិន តែគ្មានកិច្ចព្រមព្រៀងផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ