លោកហ្សេឡេនស្គី ដង្ហើយអង្វរអូតង់ជួយការពារដែនអាកាសអ៊ុយក្រែន ក្រោយព្រលានយន្តហោះក្រុងវីនីតស្យ៉ា ត្រូវមីស៊ីលរុស្ស៊ីកម្ទេច
កាលពីថ្ងៃអាទិត្យទី៦មីនា កងទ័ពរុស្ស៊ីបានបាញ់មីស៊ីល យ៉ាងហោចចំនួន៨គ្រាប់ ទៅលើទីក្រុង វីនីតស្យ៉ា (Vinnytsia) ដែលស្ថិតនៅចំងាយប្រមាណ២០០គីឡូម៉ែត្រ ភាគនិរតីទីក្រុងកៀវ។ ក្រៅពីបានកម្ទេចផ្ទះសម្បែង មីស៊ីលទាំងនោះបានកម្ទេចព្រលានយន្តហោះទីក្រុង វីនីតស្យ៉ាទាំងស្រុង។ នេះបើផ្អែកតាមការប្រកាស របស់លោកប្រធានាធិបតី អ៊ុយក្រែន វ្លូឌីមៀរ ហ្សេឡេនស្គី។
ចុះផ្សាយនៅថ្ងៃ៖
គួររំលឹកថា តាំងតែពីថ្ងៃសុក្រ លោកប្រធានាធិបតីអ៊ុយក្រែន បានអំពាវនាវសូមអង្វរ ឲ្យអូតង់ សម្រេចកំណត់ដែនអាកាសអាកាសអ៊ុយក្រែន ថាជាតំបន់ហាមឃាត់ការហោះហើរ ឬហៅថា No-Fly Zone។ ធ្វើបែបនេះ គឺដើម្បីឲ្យអូតង់ អាចធ្វើអន្តរាគមន៍ រារាំងយន្តហោះចម្បាំងរុស្ស៊ី និងអាចកម្ទេចមីស៊ីលរបស់រុស្ស៊ី ដែលហោះលើដែនអាកាសអ៊ុយក្រែន។ តែយ៉ាងណា អង្គការអូតង់ បានបដិសេធ ថាមិនអាចជួយបែបនេះបានទេ ព្រោះវាមានន័យថាអូតង់ ចូលធ្វើសង្គ្រាមទល់នឹងរុស្ស៊ី។
នៅល្ងាចថ្ងៃអាទិត្យ បន្ទាប់ពីបានដំណឹងថាទីក្រុងវីនីតស្យ៉ា បានរងមីស៊ីល៨គ្រាប់របស់រុស្ស៊ី លោកវ្លូឌីមៀរ ហ្សេឡេនស្គី បានផ្ញើសារវីដេអូ ដង្ហើយសូមអង្វរជាថ្មីម្តងទៀត ដោយសូមឲ្យអូតង់ ត្រូវតែយល់ព្រមជួយការពារដែនអាកាសអ៊ុយក្រែន។ ក្នុងសម្តីទទូចសូមដោយក្តុកក្តួល លោកហ្សេឡេនស្គីបានលើកឡើងថា បើមិនជួយអ៊ុយក្រែនពេលនេះទេ គឺមានន័យថាប្រទេសលោកខាងលិច កំពុងតែទុកឲ្យរុស្ស៊ី សំលាប់ប្រជាជនអ៊ុយក្រែនហើយ។
សារដង្ហើយហៅជាថ្មីរបស់ លោកប្រធានាធិបតីហ្សេឡេនស្គី សូមឲ្យអូតង់ជួយការពារដែនអាកាសអ៊ុយក្រែន
"ខ្ញុំទើបតែទទួលបានដំណឹងថា ពួករុស្ស៊ីបានបាញ់មីស៊ីលកម្ទេច កំទេចទីក្រុង Vinnytsia។ មីស៊ីល៨គ្រាប់ បានធ្លាក់លើទីក្រុងរបស់យើង ទីក្រុងដែលមនុស្សធ្លាប់រស់ដោយសុខសន្តិភាព ដោយចិត្តជ្រះថ្លា នឹងមិនដែលទៅមានគំនិត គំរាមសំឡុតរុស្ស៊ី ដោយប្រការណាមួយឡើយ។ ការវាយប្រហារដ៏ឃោរឃៅគ្មានធម៌មេត្តានេះ បានកំទេចព្រលានយន្តហោះនៅទីក្រុងនេះទាំងស្រុង។
យើងខ្ញុំសូមទទូច អង្វរហើយអង្វរទៀត សូមមេត្តាជួយសម្រេច បិទលំហរអាកាសរបស់អ៊ុយក្រែនផង ដើម្បីរារាំងមីស៊ីលរបស់រុស្ស៊ី រារាំងយន្តហោះចម្បាំងរបស់រុស្ស៊ី ដែលជាពួកភេរវកម្ម។ ត្រូវតែបង្កើត លំហរដែនអាកាស ដោយយោងលើមនុស្សធម៌ កុំឲ្យមានមីស៊ីល និងគ្រាប់បែករបស់រុស្ស៊ីហោះរំលងបាន។ ពួកយើងគឺជាមនុស្សដូចគ្នា ហើយវាគឺជាកាតព្វកិច្ចមនុស្សធម៌ របស់យើងដែលត្រូវតែជួយការពារជីវិតមនុស្សដូចគ្នា។ ខ្ញុំជឿថាអ្នកពិតជាអាចធ្វើបាន!
ប្រសិនបើអ្នកនៅតែមិនបិទដែនអាកាសអ៊ុយក្រែន ពីការហោះហើរទេនោះ ហើយបើសូម្បីតែយន្តហោះ ក៏អ្នកមិនជួយផ្តល់មកឲ្យយើង ដើម្បីប្រយុទ្ធការពារខ្លួនទៀតនោះ ដូច្នេះគឺវាមានន័យ ពួកអ្នកទាំងអស់គ្នា ចង់ឲ្យពួកយើង ត្រូវគេសម្លាប់ដោយសន្សឹមៗ។ វាគឺជាការទទួលខុសត្រូវ របស់ថ្នាក់ដឹកនាំនយោបាយទាំងអស់ មិនថានៅអឺរ៉ុប ឬទូទាំងពិភពលោក ហើយមិនមែនសម្រាប់តែថ្ងៃនេះទេ គឺជារៀងរហូតតែម្តង៕"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ