ថៃ៖តើត្រកូលស៊ីណាវ៉ាត់អាចត្រឡប់ទៅកាន់អំណាចជាថ្មីដែរ ឬទេ ក្រោយពីត្រូវបានក្រុមយោធាទម្លាក់ ២ដងមក?
ចុះផ្សាយនៅថ្ងៃ៖
ស្តាប់ - ០៥:៥៨
នៅក្នុងប្រទេសថៃ ក្រុមគ្រួសារលោកថាក់ស៊ីនដែលមានត្រកូលស៊ីណាវ៉ាត់ធ្លាប់បានដឹកនាំប្រទេសអស់រយៈពេលជិត ១០ឆ្នាំ មុននឹងត្រូវក្រុមយោធាកំចាត់ចេញតាមរយៈរដ្ឋប្រហារ។ ក៏ប៉ុន្តែ ត្រកូលស៊ីណាវ៉ាត់មិនទាន់ផុតរលត់ និងកំពុងបន្តមានប្រជាប្រិយភាពនៅក្នុងចំណោមប្រជារាស្រ្តថៃ។ កូនស្រីលោកថាក់ស៊ីន គឺលោកស្រីផែថងថាន ស៊ីណាវ៉ាត់ត្រូវបានគេមើលឃើញជាបេក្ខជននាយករដ្ឋមន្រ្តីរបស់គណបក្សភៀថៃសម្រាប់ការបោះឆ្នោតនៅឆ្នាំ ២០២៣។ តើមានថ្ងៃណាមួយដែលត្រកូលស៊ីណាវ៉ាត់អាចត្រឡប់ទៅកាន់អំណាចជាថ្មីដែរ ឬទេ?
នៅក្នុងប្រទេសថៃ សឹងតែគ្មាន ឬមានប្រជាជនតិចតួចណាស់ដែលមិនស្គាល់ត្រកូលស៊ីណាវ៉ាត់។ មានតិចតួច ឬសឹងតែគ្មានដោយសារតែត្រកូលមួយនេះបានគ្របដណ្តប់ខ្លាំងលើជីវិតនយោបាយថៃអស់រយៈពេលជិត ១០ឆ្នាំ។ លោកថាក់ស៊ីនបានកាន់តំណែងនាយករដ្ឋមន្រ្តីពីឆ្នាំ ២០០១ ដល់ឆ្នាំ ២០០៦ ហើយប្អូនស្រីរបស់លោក គឺលោកស្រីយីងឡាក់បានកាន់តំណែងនាយករដ្ឋមន្រ្តីពីឆ្នាំ ២០១១ ដល់ឆ្នាំ ២០១៤។ ក៏ប៉ុន្តែ បងប្អូនបង្កើតប្រុស ស្រីទាំងពីរនាក់នេះសុទ្ធតែត្រូវបានកងទ័ពកំចាត់ពីអំណាចដូចគ្នាតាមរយៈរដ្ឋប្រហារ។ មេរដ្ឋប្រហារដែលទម្លាក់លោកស្រីយីងឡាក់ គឺឧត្តមសេនីយប្រាយុទ្ធ ចាន់អូចាដែលកំពុងកាន់តំណែងសព្វថ្ងៃនេះឯង។ បច្ចុប្បន្ន លោកថាក់ស៊ីន និងលោកស្រីយីងឡាក់កំពុងរស់នៅក្នុងប្រទេសអេមីរ៉ាតអារ៉ាប់រួម។
ការបោះលំនៅដ្ឋាននៅក្នុងប្រទេសអារ៉ាប់មួយនេះមិនមែនជាជម្រើសទេ តែជាការបង្ខំចិត្តដើម្បីគេចខ្លួនពីការតាមធ្វើទុក្ខបុកម្នេញពីកងទ័ពតាមផ្លូវតុលាការ។ ពិតណាស់ របបសឹកបានធ្វើអ្វីៗគ្រប់យ៉ាងដើម្បីរារាំង និងផាត់ត្រកូលស៊ីណាវ៉ាត់ រួមទាំងបក្សពួកលោកថាក់ស៊ីនចេញពីឆាកនយោបាយ។ តែអ្វីដែលរបបសឹកហាក់កំពុងមើលរំលងនោះនៅត្រង់ថា ត្រកូលស៊ីណាវ៉ាត់មិនបានផុតរលត់ពីទឹកដីថៃ និងថែមទាំងកំពុងបន្តមានឥទ្ធិពល រួមទាំងបន្តមានប្រជាប្រិយភាពនៅក្នុងចំណោមប្រជាជនថៃភាគច្រើនទៀតផង ពិសេសអ្នករស់នៅតាមជនបទ។ វត្តមានត្រកូលស៊ីណាវ៉ាត់នៅថៃដែលគេចង់និយាយពេលនេះ គឺលោកស្រីផែថងថាន ស៊ីណាវ៉ាត់ដែលជាកូនស្រីពៅរបស់លោកថាក់ស៊ីន។
ក៏ដូចជាឱពុក លោកស្រីផែថងថានជាស្រ្តីអ្នកជំនួញម្នាក់ដែលគ្រប់គ្រងសាខាសណ្ឋាគារនៃក្រុមហ៊ុនអចលនទ្រព្យរបស់គ្រួសារឈ្មោះ « RendeDevelopment »។ តែគឺតួនាទីនយោបាយនៅក្នុងគណបក្សភឿថៃឯណោះទេដែលគ្រប់គ្នាកំពុងចាប់អារម្មណ៍ខ្លាំង។ មានអាយុ ៣៥ឆ្នាំ លោកស្រីផែថងថានត្រូវបានគេសំឡឹងឃើញជាបេក្ខជននាយករដ្ឋមន្រ្តីរបស់គណបក្សភឿថៃសម្រាប់ការបោះឆ្នោតនៅឆ្នាំ ២០២៣ ខាងមុខ។ ឆ្លើយនឹងសំណួររបស់ AFP ដែលថា តើលោកស្រីយល់ព្រមធ្វើជាបេក្ខជននាយករដ្ឋមន្រ្តីទេ បើមានសំណើពីគណបក្ស?។ លោកស្រីផែថងថានបានត្រឹមបញ្ជាក់ថា លោកស្រីទុកឲ្យគណបក្សជាអ្នកសម្រេចជ្រើសរើសបេក្ខជននាយករដ្ឋមន្រ្តីនៅប៉ុន្មានខែមុខ។
ក៏ប៉ុន្តែ លោកស្រីផែថងថានមិនបានលាក់បាំងពីមហិច្ឆតានយោបាយរបស់ខ្លួនទេដោយលើកឡើងថា ផ្លាស់ប្តូរប្រទេសថៃពីការជំពាក់បំណុលគេវ័នករ និងគ្មានអនាគតទៅជាប្រទេសមួយដែលមានឱកាសច្រើន និងមានក្តីសង្ឃឹម។ ក្នុងរយៈពេលចុងក្រោយនេះ កូនស្រីពៅរបស់លោកថាក់ស៊ីនរូបនេះបានបង្ហាញមុខញឹកញាប់ជាសាធារណៈ។ ក្នុងខែឧសភាកន្លងទៅថ្មីៗនេះ លោកស្រីផែថងថានចូលរួមនៅក្នុងយុទ្ធនាការឃោសនាបោះឆ្នោតជ្រើសរើសចៅហ្វាយក្រុងបាងកកថ្មីដោយបានចែកខិត្តប័ណ្ណនិងថត Selfiesជាមួយសកម្មជនបក្សភឿថៃ។ « យើងត្រូវការលោកស្រី។ យើងនឹកឱពុកលោកស្រី »នេះជាសម្តីរបស់សកម្មជនបក្សភឿថៃម្នាក់។
« តើឲ្យខ្ញុំនៅស្ងៀមម្តេចនឹងកើតចំពោះអ្វីដែលឱពុកខ្ញុំបានធ្វើសម្រាប់ប្រទេសរបស់គាត់។ ខ្ញុំនៅជាកូនស្រីគាត់ជានិច្ច។ ការគាំទ្ររបស់គាត់បានផ្តល់កម្លាំង និងភាពក្លាហានឲ្យខ្ញុំ »នេះជាការឆ្លើយតបវិញរបស់លោកស្រីផែថងថាន។ ក្រៅពីមានវត្តមាននៅទីកន្លែងសាធារណៈ លោកស្រីផែថងថានបានបង្ហាញមុខ និងមានសកម្មភាពយ៉ាងសកម្មនៅលើបណ្តាញសង្គមដែរ ពិសេសមិនញញើតនឹងបង្ហាញរូបថតដែលបានថតជាមួយឱពុក។ មែនទែនទៅ បើកុំតែមានការរុញច្រានពីឱពុក និងជាត្រកូលស៊ីណាវ៉ាត់ក៏ប្រហែលលោកស្រីផែថងថានមិនប្រថុយឈានជើងចូលក្នុងឆាកនយោបាយដែរ។ កត្តាវិជ្ជមានមួយទៀត លោកស្រីផែថងថានជាមនុស្សជំនាន់ក្រោយដែលតំណាងឲ្យយុវជនជំនាន់ថ្មី។
ចំណែកលោកថាក់ស៊ីនដែលមានអាយុ ៧២ឆ្នាំសង្ឃឹមថា បើគណបក្សភឿថៃឈ្នះឆ្នោត ហើយកូនស្រីឡើងកាន់តំណែងនាយករដ្ឋមន្រ្តី លោកអាចនឹងវិលត្រឡប់ចូលស្រុកវិញតាមទ្វារធំ និងប្រកបដោយកិត្តិយស។ តែក្នុងពេលឥឡូវ លោកស្រីផែថងថានគ្រាន់ជាមនុស្សតុក្កតារបស់ឱពុកតែប៉ុណ្ណោះ នេះជាការយល់ឃើញរបស់លោក Paul Chambers អ្នកជំនាញជនជាតិអាមេរិកខាងប្រទេសថៃ។ ពិតណាស់ ត្រកូលស៊ីណាវ៉ាត់បន្តមានឥទ្ធិពលនៅក្នុងឆាកនយោបាយថៃ។ តែផ្លូវឈានទៅយកអំណាចជាថ្មីនៅវែងឆា្ងយ និងពោរពេញដោយឧបសគ្គច្រើន។ ដើម្បីអាចឲ្យលោកស្រីផែថងថានក្លាយជានាយរដ្ឋមន្រ្តីបាន គណបក្សភឿថៃត្រូវទទួលបានសំឡេងភាគច្រើនទាំងនៅក្នុងសភាដែលមាន ៥០០អសនៈ និងទាំងនៅក្នុងព្រឹទ្ធសភាដែលមាន ២៥០អសនៈ។
តែបញ្ហានៅត្រង់ថា របបសឹកបានកែប្រែរដ្ឋធម្មនុញ្ញកាលពីឆ្នាំ ២០១៧ ដោយឲ្យកងទ័ពជាកាន់កាប់អសនៈទាំងអស់នៅក្នុងព្រឹទ្ធសភា។ ជាក់ស្តែងនៅក្នុងការបោះឆ្នោតឆ្នាំ ២០១៩ គណបក្សភឿថៃទទួលបានសំឡេងភាគច្រើននៅក្នុងសភា។ តែគឺគណបក្សគាំទ្រកងទ័ពទៅវិញទេដែលត្រូវបានអនុញ្ញាតឲ្យបង្កើតរដ្ឋាភិបាលចម្រុះថ្មីដោយសារមានសំឡេងគាំទ្រពីព្រឹទ្ធសភា។ ដូច្នេះបើគណបក្សភឿថៃអាចនឹងទទួលបានសំឡេងភាគច្រើននៅក្នុងការបោះឆ្នោតឆ្នាំ ២០២៣ ខាងមុខ សេណារីយ៉ូដូចគ្នានេះនឹងកើតមានជាថ្មីដោយមិនអាចចៀសរួច និងដែលវិលចុះ វិលឡើង ទោះមាន ឬគ្មានត្រកូលស៊ីណាវ៉ាត់ ប្រហែលគ្មានអ្នកណាអាចដណ្តើមអំណាចពីដៃកងទ័ពបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ