រវាងអ៊ីស្រាអែល និងអារ៉ាប៊ីសាអូឌីត មានសញ្ញានៃការរំកិលរកគ្នា តែផ្លូវឆ្ពោះទៅមានទំនាក់ទំនងប្រក្រតីនៅឆ្ងាយ
ចុះផ្សាយនៅថ្ងៃ៖
ស្តាប់ - ០៦:០១
ប្រធានាធិបតីអាមេរិកលោកចូ បៃដិនបានបិទបញ្ចប់ទស្សនកិច្ចរយៈពេល ៤ថ្ងៃនៅក្នុងប្រទេសអ៊ីស្រាអែល ដែនដីប៉ាឡេស្ទីន និងប្រទេសអារ៉ាប៊ីសាអូឌីត។ លទ្ធផលជារួមត្រូវបានគេមើលឃើញថា មានតិចតួចស្តួចស្តើងណាស់។ ស្តួចស្តើង ព្រោះទី១ លោកបៃដិនហាក់មិនបានគិតគូរពីក្តីបារម្ភរបស់ប៉ាឡេស្ទីន និងទី២ លោកបៃដិនហាក់នៅមិនទាន់អាចចាប់អ៊ីស្រាអែល និងអារ៉ាប៊ីសាអូឌីតឲ្យភ្ជាប់ទំនាក់ទំនងការទូតរវាងគ្នាបាននៅឡើយទេ។ តើមានបញ្ហាអ្វីខ្លះដែលបានធ្វើឲ្យអ៊ីស្រាអែល និងអារ៉ាប៊ីសាអូឌីតមិនទាន់អាចមានទំនាក់ទំនងប្រក្រតីរវាងគ្នាបាន និងថា តើប្រទេសទាំងពីរនេះអាចភ្ជាប់ការទូតរវាងគ្នានៅថ្ងៃណាមួយដែរ ឬទេ?។
មិនថាជាមួយប្រទេសអារ៉ាប៊ីសាអូឌីត ឬមួយក៏ជាមួយប្រទេសអារ៉ាប់ណាផ្សេងទេ ការមានទំនាក់ទំនងផ្លូវការ ឬមិនផ្លូវការជាមួយប្រទេសអ៊ីស្រាអែលជារឿងពិបាក។ ចំណែកដើមចមនៃរឿងពិបាកនេះ គឺផ្តើមចេញពីជម្លោះរវាងអ៊ីស្រាអែល និងប៉ាឡេស្ទីនដែលបានអូសបន្លាយអស់ជាច្រើនទសវត្សរ៍។ ក្រុមប្រទេសអារ៉ាប់សឹងទាំងអស់ ក្នុងនោះមានអារ៉ាប៊ីសាអូឌីតមួយផង បានគាំទ្របុព្វហេតុរបស់ប៉ាឡេស្ទីនដែលចង់បានរដ្ឋឯករាជ្យមួយជាផ្លូវការរស់ក្បែរអ៊ីស្រាអែល។ នេះជាលក្ខខណ្ឌតែមួយគត់ដែលក្រុមប្រទេសអារ៉ាប់យកដាក់លើតុដើម្បីជជែក មុននឹងគិតគូរដល់ការភ្ជាប់ទំនាក់ទំនងប្រក្រតីជាមួយអ៊ីស្រាអែល ឬនិយាយបែបម្យ៉ាងទៀត ក្រុមប្រទេសអារ៉ាប់បានភ្ជាប់ការមានទំនាក់ទំនងផ្លូវទូតជាមួយអ៊ីស្រាអែលទៅនឹងការបង្កើតរដ្ឋប៉ាឡេស្ទីន។
តាមពិតទៅ ដំណើរស្វែងរកសន្តិភាពរវាងអ៊ីស្រាអែល និងប៉ាឡេស្ទីនធ្លាប់បានធ្វើជាហូរហែតាមគំនិតផ្តួចផ្តើមរបស់អាមេរិក និងក្រុមប្រទេសអារ៉ាប់ ពិសេសអារ៉ាប៊ីសាអូឌីត។ ក្នុងឆ្នាំ ២០០២ ស្តេចស្នងរាជ្យអារ៉ាប៊ីសាអូឌីតអាប់ដាឡាបានស្នើឡើងនូវផែនការសន្តិភាពមួយក្រោមឈ្មោះ « គំនិតផ្តួចផ្តើមសន្តិភាពអារ៉ាប់ » ហើយក្នុងឆ្នាំ ២០០២ ដដែល ផែនការសន្តិភាពមួយនេះក៏ត្រូវបានអនុម័តទទួលយកដោយសម្ព័ន្ធអារ៉ាប់។ ក្នុងឆ្នាំ ១៩៩៣ កិច្ចព្រមព្រៀងមួយដែលគេហៅកិច្ចព្រមព្រៀងអូស្លូត្រូវបានរកឃើញដើម្បីបិទបញ្ចប់ជម្លោះអ៊ីស្រាអែល និងប៉ាឡេស្ទីន។ តែនៅទីបំផុត ផែនការសន្តិភាព និងកិច្ចព្រមព្រៀងទាំងពីរនេះហាក់ត្រូវបានគេបំភ្លេច និងកប់ចោល។
ពិតណាស់ បស្ចិមលោក ក្នុងនោះមានអាមេរិកមួយដែរសុទ្ធតែបានយល់ឃើញដូចក្រុមប្រទេសអារ៉ាប់ថា រដ្ឋពីរអ៊ីស្រាអែល ប៉ាឡេស្ទីនរស់ក្បែរគ្នាជាដំណោះស្រាយតែមួយគត់។ តែបញ្ហានៅត្រង់ថា ដំណោះស្រាយមួយនេះកំពុងបន្តមានតែទ្រឹស្តី។ មួយវិញទៀត អាមេរិកក្នុងជំនាន់ប្រធានាធិបតីលោកដូណាល់ ត្រាំទាញបានប្រទេសអារ៉ាប់ចំនួន ៣ ឲ្យភ្ជាប់ទំនាក់ទំនងប្រក្រតីជាមួយអ៊ីស្រាអែល គឺអេមីរ៉ាតអារ៉ាប់រួម បារ៉ែន និងប្រទេសម៉ារ៉ុក។ ជាមួយនឹងប្រធានាធិបតីអាមេរិកសព្វថ្ងៃលោកបៃដិន កុំថាឡើយតែនិយាយពីការបង្កើតរដ្ឋប៉ាឡេស្ទីន សូម្បីតែរកវិធីសាស្រ្តដើម្បីជួយផ្តល់សន្ទុះឡើងវិញនូវកិច្ចចរចាសន្តិភាពរវាងអ៊ីស្រាអែល និងប៉ាឡេស្ទីនដែលកំពុងគាំងមួយកន្លែងក៏លោកមិនបានលើកឡើងដែរ។
ផ្ទុយទៅវិញ និងមិនខុសពីលោកត្រាំទេ លោកបៃដិនបានព្យាយាមអូសទាញប្រទេសអារ៉ាប់ផ្សេងទៀត ពិសេសអារ៉ាប៊ីសាអូឌីតឲ្យភ្ជាប់ទំនាក់ទំនងការទូតជាមួយអ៊ីស្រាអែល។ គួរបញ្ជាក់ថា អ៊ីស្រាអែល និងអារ៉ាប៊ីសាអូឌីតជាសម្ព័ន្ធមិត្តរបស់អាមេរិកដូចគ្នា។ ចំណែកទំនាក់ទំនងរវាងអ៊ីស្រាអែល និងអារ៉ាប៊ីសាអូឌីតត្រូវបានគេចាត់ទុកជាទំនាក់ទំនងត្រូវការគ្នាទៅវិញទៅមកក្នុងបុព្វហេតុរួមតែមួយដូចគ្នា។ បុព្វហេតុរួមនេះ គឺដើម្បីប្រឈមទប់នឹងមហិច្ឆតានុយក្លេអ៊ែរ និងឥទ្ធិពលរបស់ប្រទេសអ៊ីរ៉ង់នៅក្នុងតំបន់ ឬអាចនិយាយបានថា អ៊ីរ៉ង់ជាសត្រូវរួមរបស់អ៊ីស្រាអែល និងអារ៉ាប៊ីសាអូឌីត។ តាមរយៈបុព្វហេតុរួមមួយនេះ គេបានឃើញសញ្ញារំកិលរកគ្នាខ្លះរវាងអ៊ីស្រាអែល និងអារ៉ាប៊ីសាអូឌីត។
នៅក្នុងបទសម្ភាសន៍មួយឲ្យកាសែតអាមេរិកមួយក្នុងខែមីនា រាជទាយាទអារ៉ាប៊ីសាអូឌីតបេន សាលម៉ានបានចាត់ទុកអ៊ីស្រាអែលដូចសម្ព័ន្ធមិត្តសក្តានុពលម្នាក់ដោយគូសបញ្ជាក់ពីផលប្រយោជន៍រួមរវាងប្រទេសទាំងពីរ។ ក្នុងខែកញ្ញា ឆ្នាំ ២០២០ អារ៉ាប៊ីសាអូឌីតមិនបានបញ្ចេញប្រតិកម្មអ្វីទាំងអស់នៅពេលប្រទេសអេមីរ៉ាតអារ៉ាប់រួមបានភ្ជាប់ទំនាក់ទំនងជាមួយអ៊ីស្រាអែល និងបន្តដោយប្រទេសប៉ារ៉ែន ម៉ារ៉ុក និងស៊ូដង់។ ថ្មីៗនេះនៅក្នុងដំណើរទស្សនកិច្ចរបស់ប្រធានាធិបតីអាមេរិកលោកបៃដិន អារ៉ាប៊ីសាអូឌីតបានសម្រេចបើកដែនអាកាសសម្រាប់ក្រុមហ៊ុនដឹកជញ្ជូនទាំងអស់ ក្នុងនោះក៏មានអ៊ីស្រាអែលមួយដែរ។
តាមរយៈកាយវិការនៃការរំកិលរកគ្នានេះត្រូវបានគេមើលឃើញថា ទំនាក់ទំនងរវាងប្រទេសទាំងពីរអាចកម្រិតនៅត្រឹមនេះ ឬមួយក៏ជាចំណុចចាប់ផ្តើមនៃការឈានទៅភ្ជាប់ទំនាក់ទំនងការទូតរវាងគ្នា។ តែសួរថា តើមានប្រយោជន៍អ្វីខ្លះ បើអារ៉ាប៊ីសាអូឌីត និងអ៊ីស្រាអែលបែរមុខល្អូកល្អឺនដាក់គ្នា?។ គឺមានប្រយោជន៍ទាំងអស់គ្នា នៅម្ខាង វានឹងបើកផ្លូវឲ្យអារ៉ាប៊ីសាអូឌីតដើរតួនាទីធំជាងមុននៅក្នុងតំបន់ និងនៅលើឆាកអន្តរជាតិ។ ចំណែកនៅម្ខាងទៀត វានឹងបើកផ្លូវឲ្យអ៊ីស្រាអែលបន្តចែចង់ជាមួយប្រទេសអារ៉ាប់ផ្សេងទៀតដើម្បីមានទំនាក់ទំនងប្រក្រតីជាមួយខ្លួន។ តែដើម្បីអាចឈានដល់គោលដៅមួយនេះបាន អ៊ីស្រាអែល និងអារ៉ាប៊ីសាអូឌីតត្រូវមានផែនទីចង្អុលផ្លូវមួយច្បាស់លាស់។
សរុបមក ផ្លូវឆ្ពោះទៅមានទំនាក់ទំនងប្រក្រតីរវាងអ៊ីស្រាអែល និងអារ៉ាប៊ីសាអូឌីតនៅឆ្ងាយ និងលំបាក។ ក្រុមអ្នកវិភាគបានមើលឃើញថា ដរាបណាស្តេចសាលម៉ានដែលមានព្រះជន្ម ៨៦ព្រះវស្សាកំពុងបន្តសោយរាជ្យនៅអារ៉ាប៊ីសាអូឌីត រាជាណាចក្រជង្រុកប្រេងនៅតំបន់ឈូងសមុទ្រពែក្សមួយនេះមិនអាចទៅឆ្ងាយដូចប្រទេសអេមីរ៉ាតអារ៉ាប់រួម ឬបារ៉ែននៅក្នុងទំនាក់ទំនងជាមួយអ៊ីស្រាអែលទេ។ ព្រះមហាក្សអារ៉ាប៊ីសាអូឌីតអង្គនេះបានបញ្ជាក់ជានិច្ចថា បើគ្មានការបង្កើតរដ្ឋប៉ាឡេស្ទីន ក៏គ្មានទំនាក់ទំនងប្រក្រតីរវាងអារ៉ាប៊ីសាអូឌីត និងអ៊ីស្រាអែលដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ