រាជទាយាទអារ៉ាប៊ីសាអូឌីត៖ អ៊ីស្រាអែលមានសិទ្ធិជាប្រទេសរដ្ឋឯករាជ្យមួយ
ប្រទេសដ៏មានឥទ្ធិពលនៅតំបន់ដើមបូព៌ា អារ៉ាប៊ី សាអូឌីតកំពុងខិតទៅរកអ៊ីស្រាអែល ដើម្បីរួមគ្នា ប្រជែងទប់ទល់នឹងសត្រូវរួម នៅក្នុងតំបន់ គឺអ៊ីរ៉ង់។ ជំហរខិតជិតរបស់ទីក្រុងរីយ៉ាដ ទៅរកអ៊ីស្រាអែល ត្រូវបានស្តែងឲ្យឃើញ នៅក្នុងបទសម្ភាសន៍របស់រាជបុត្រស្នងរាជ្យ ម៉ូហាម៉េដ បិន សាលម៉ាន ទៅឲ្យទស្សនាវដ្តីអាមេរិកាំង The Atlantic ដែល នៅក្នុងនោះ រាជទាយាទអារ៉ាប៊ី សាអូឌីត បានវាយតម្លៃថា ប្រជាជនអ៊ីស្រាអែល ក៏ដូចជាប៉ាឡេស្ទីន គឺមានសិទ្ធិក្នុង ការរស់នៅជាប្រជាជាតិដែលមានរដ្ឋឯករាជ្យរៀងៗខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
នៅក្នុងអំឡុងពេលធ្វើទស្សនកិច្ចនៅឡើយ នៅសហរដ្ឋអាមេរិក រាជទាយាទ អារ៉ាប៊ី សាអូឌីត ហាម៉េដ បិន សាលម៉ាន បានបញ្ជាក់ប្រាប់ទស្សនាវដ្តីអាមេរិកាំង ថា អារ៉ាប៊ី សាអូឌីត មិនប្រឆាំង នឹងការបង្កើតឲ្យមានរដ្ឋអ៊ីស្រាអែលនោះទេ។
សូមបញ្ជាក់ថា កន្លងមក អារ៉ាប៊ី សាអូឌីត ដែលមានតាំង នូវទីកន្លែងសក្ការៈអ៊ីស្លាមច្រើនជាងគេ លើលោក មិនដែលទទួលស្គាល់វត្តមានរបស់អ៊ីស្រាអែល ប្រទេសជ្វីហ្វ នៅក្នុងតំបន់នោះទេ។ ជាច្រើនឆ្នាំមកហើយ អារ៉ាប៊ី សាអូឌីត ដែលជាអ្នកគាំទ្រ សំខាន់ បុព្វហេតុរបស់ប្រជាជនប៉ាឡេស្ទីន បានទាមទារឲ្យអ៊ីស្រាអែល ដកខ្លួនចេញពីតំបន់ ទឹកដីប៉ាឡេស្ទីន ដែលអ៊ីស្រាអែល បានរំលោភចូលកាន់កាប់ ចាប់តាំងពីសង្រ្គាម៦ថ្ងៃ នៅឆ្នាំ ១៩៦៧។
ប៉ុន្តែ ដោយទទួលស្គាល់ថា អ៊ីស្រាអែលមានសិទ្ធិមានទឹកដីផ្ទាល់ខ្លួន យ៉ាងដូច្នេះ រាជទាយាទ ម៉ូហាម៉េដ បិន សាលម៉ាន បានផ្លាស់ប្តូរទាំងស្រុងជំហរការទូតរបស់អារ៉ាប៊ី សាអូឌីត នៅចំពោះមុខអ៊ីស្រាអែល។ នៅខែមីនាមុននេះ អារ៉ាប៊ី សាអូឌីត បានបើកជាលើកទី១ ដែនអាកាសរបស់ខ្លួន សម្រាប់យន្តហោះពាណិជ្ជកម្មអ៊ីស្រាអែល។ គេជឿថា ភាពតានតឹងកាន់តែខ្លាំងឡើងរវាងអារ៉ាប៊ី សាអូឌីត និងអ៊ីរ៉ង់ នៅក្នុងតំបន់ ជាហេតុផលសំខាន់មួយ ដែលធ្វើឲ្យអារ៉ាប៊ី សាអូឌីត និងអ៊ីស្រាអែលខិតចូលជិតគ្នា។ ទាំងអារ៉ាប៊ី សាអូឌីត និងអ៊ីស្រាអែល សុទ្ធតែបានចាត់ទុក អ៊ីរ៉ង់ថា ជាប្រទេសដ៏គ្រោះថ្នាក់ និងគំរាមកំហែងនៅក្នុងតំបន់។ ថ្មីៗនេះ នាយករដ្ឋមន្រ្តីអ៊ីស្រាអែលធ្លាប់បានលើកឡើងថា អ៊ីស្រាអែល ជាដៃគូដ៏សំខាន់ មិនអាចខ្វះបាន របស់ប្រទេសអារ៉ាប់ ដើម្បីអាចប្រឈមទប់ទល់នឹងការពង្រីកដែនឥទ្ធិពលរបស់អ៊ីរ៉ង់។
រាជបុត្រស្នងរាជ្យរបស់អារ៉ាប៊ី សាអូឌីត ខិតចូលជិត អ៊ីស្រាអែល ប៉ុន្តែ ដោយមិនភ្លេច បុព្វហេតុរបស់ប្រជាជនប៉ាឡេស្ទីន។ នៅក្នុងបទសម្ភាសន៍ជាមួយទស្សនាវដ្តីThe Atlantic រាជទាយាទ របស់អារ៉ាប៊ី សាអូឌីត បានមានបន្ទូលថា អារ៉ាប៊ី សាអូឌីត គ្មានបញ្ហាជាមួយ ជនជាតិជ្វីហ្វ របស់ប្រទេសអ៊ីស្រាអែលនោះទេ។ ក្តីកង្វល់តែមួយ របស់អារ៉ាប៊ី សាអូឌីត គឺ អនាគតរបស់ទីតាំងសក្ការៈបូជាអ៊ីស្លាម នៅយេរូសាឡឹម ដែលអ៊ីស្រាអែលចូលកាន់កាប់ ដោយខុសច្បាប់ ហើយនិងសិទ្ធិរបស់ប្រជាជនប៉ាឡេស្ទីន។ សម្រាប់អនាគត ព្រះចៅអារ៉ាប៊ី សាអូឌីត ប្រជាជនប៉ាឡេស្ទីន ក៏ដូចជាប្រជាជនអ៊ីស្រាអែលគឺមានសិទ្ធិ មានប្រទេសរដ្ឋឯករាជ្យ រៀងៗខ្លួន។ ដើម្បីធ្វើដូច្នេះ បាន គេត្រូវរកឲ្យឃើញ កិច្ចព្រមព្រៀងសន្តិភាពមួយ ដើម្បី ធានាស្ថិរភាពឲ្យប្រជាជាតិទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ