ហេតុអ្វីបានជាទេសចរណ៍ពិភពលោកបានផ្តើមយកចិត្តទុកដាក់ខ្លាំងលើបញ្ហាបរិស្ថាន?
ចុះផ្សាយនៅថ្ងៃ៖
ស្តាប់ - ០៥:៥៤
ថ្ងៃទី២៧ កញ្ញាជាទិវាទេសចរណ៍ពិភពលោក។ ទិវាមួយនេះត្រូវបានបារព្ធធ្វើឡើងនៅថ្ងៃទី២៧ កញ្ញាជារៀងរាល់ឆ្នាំតាំងពីឆ្នាំ ១៩៨០ ដោយមានប្រធានបទខុសៗគ្នា។ សម្រាប់ឆ្នាំ ២០២២ ទិវាទេសចរណ៍ពិភពលោករៀបចំឡើងក្រោមប្រធានបទ « ការគិតគូរឡើងវិញពីទេសចរណ៍ »។ តាមរយៈប្រធានបទមួយនេះ អង្គការសហប្រជាជាតិចង់ដាស់តឿនឲ្យគ្រប់ប្រទេសទាំងអស់ពិនិត្យមើលឡើងវិញលើការអភិវឌ្ឍន៍វិស័យទេសចរណ៍ដោយគិតគូរពីវិស័យបរិស្ថាន។ ចូរកុំភ្លេចថា វិស័យទេសចរណ៍ក៏បានរួមចំណែកយ៉ាងសំខាន់នៃការចាក់ចោលឧស្ម័នផ្ទះកញ្ចក់នៅក្នុងបរិយាកាសដែរ។
ក្នុងឆ្នាំ ២០១៩ ពោលមុនផ្ទុះវិបត្តិជំងឺកូវីដ១៩ មានទេសចរប្រមាណជា ១ ៥០០លាននាក់បានចេញដើរលេងដោយខ្លះបានជ្រើសទីកន្លែងកំសាន្តក្នុងស្រុក និងខ្លះទៀតបានចេញដើរកំសាន្តនៅបរទេស។ ចំណែកប្រាក់ចំណូលបានមកពីវិស័យមួយនេះមានប្រមាណជា ១ ៥០០ ០០០លានដុល្លារ នេះជាតួលេខផ្តល់ដោយអង្គការទេសចរណ៍ពិភពលោក។ តែនៅពេលដែលពិភពលោកបានផ្តើមដាំក្បាលចូលក្នុងវិបត្តិកូវីដ១៩ នាចុងឆ្នាំ ២០១៩ ដើមឆ្នាំ ២០២០ វិស័យមួយនេះបានធ្លាក់ចុះយ៉ាងគំហុកហៅមិនឮ។ កុំថាឡើយគ្មានអ្នកចេញដើរលេងនៅបរទេស សូម្បីតែការដើរកំសាន្តក្នុងស្រុកខ្លួនឯងក៏សឹងតែគ្មានផង។
ដូច្នេះសម្រាប់ប្រទេសមួយចំនួនដែលសេដ្ឋកិច្ចមិនសូវពឹងច្រើនលើវិស័យទេសចរណ៍ វាមិនសូវជាចំណោតប៉ុន្មានទេ។ ផ្ទុយទៅវិញសម្រាប់ប្រទេសខ្លះទៀតដែលសេដ្ឋកិច្ចបានពឹងខ្លាំងលើវិស័យទេសចរណ៍ វាប្រៀបដូចជាការដកសារ៉ូមចេញពីមនុស្សដែលកំពុងឈឺធ្ងន់មិនអាចទទួលទានអាហារតាមមាត់បានអ៊ីចឹង ឬអាចនិយាយបានបែបម្យ៉ាងទៀត អត់ទេចរមានន័យស្មើនឹងអត់បាយ។ នេះជាចំណុចអវិជ្ជមាន។ ចំណែកចំណុចវិជ្ជមានដែលគេទទួលបានត្រឡប់វិញពីការធ្លាក់ចុះវិស័យទេចរណ៍ គឺបរិស្ថាន ព្រោះចូរកុំភ្លេចថា ទេសចរណ៍ក៏ជាវិស័យមួយដែលបានចូលរួមចាក់ចោលឧស្ម័នផ្ទះកញ្ចក់ទៅក្នុងបរិយាកាសដែរ។
នៅពេលដែលពិភពលោកបានញាំញីពេញទំហឹងដោយជំងឺកូវីដ១៩ ក្នុងរយៈពេល ២ឆ្នាំ អ្វីៗត្រូវបានជាប់គាំងសឹងតែទាំងស្រុង ពិសេសវិស័យដឹកជញ្ជូនអ្នកដំណើរ។ រូបភាពដែលគេបានសង្កេតឃើញក្នុងឆ្នាំ ២០២០ និង ២០២១ គឺយន្តហោះចតចោលត្រៀបត្រានៅតាមអាកាសយានដ្ឋាន និងភាពស្ងាត់ជ្រងំនៅតាមផ្លូវដោយសឹងគ្មានចរាចរណ៍ឡាន ឬម៉ូតូ។ តែអ្វីដែលគេទទួលបាននាពេលនោះ គឺរុក្ខជាតិលូតលាស់ស្រង់បំព្រង និងខ្យល់មានគុណភាពល្អដែលស្រួលដកដង្ហើម។ ចូរកុំភ្លេចថា ផ្សែងចេញពីបំពង់ស៊ីម៉ាំងយន្តហោះ ឡាន ឬម៉ូតូ គឺជាឧស្ម័នផ្ទះកញ្ចក់ ហើយឧស្ម័នប្រភេទនេះជាប្រភពមួយនៃការបង្កឲ្យមានការឡើងកម្តៅនៅក្នុងបរិយាកាស។
អង្គការទេសចរណ៍ពិភពលោកបានទទួលស្គាល់ថា ទេសចរណ៍ជាវិស័យមួយដែលងាយរងគ្រោះនឹងការប្រែប្រួលអាកាសធាតុផង និងជាប្រភពនៃការបញ្ចេញឧស្ម័នផ្ទះកញ្ចក់ផង។ តាមការសិក្សាមួយរបស់អង្គការទេសចរណ៍ពិភពលោកចេញផ្សាយក្នុងខែធ្នូ ឆ្នាំ ២០១៩ សម្រាប់ COP25 ឧស្ម័នកាបូនិកដែលចាក់ចោលដោយវិស័យទេសចរណ៍ត្រូវកើនយ៉ាងតិចចំនួន ២៥% ពីពេលនេះទៅឆ្នាំ ២០៣០។ ក្រៅពីនេះ វត្តមានទេសចរទាំងហ្វូងៗដោយគ្មានការកំណត់ចំនួននៅតាមតំបន់ទេសចរណ៍ មិនថាតំបន់ឆ្នេរសមុទ្រ សួនឧទ្យានជាតិ សួនសត្វ ឬមួយក៏តំបន់ទេសចរណ៍ណាទេសុទ្ធតែបានចូលរួមជះផលវិបាកដល់បរិស្ថាន។
ដូច្នេះ វាជារឿងបន្ទាន់បំផុតដែលពិភពលោកត្រូវគិតគូរឡើងវិញ និងឲ្យបានឆាប់បំផុតពីទេសចរណ៍ ខណៈដែលវិស័យមួយនេះបានចាប់ផ្តើមមានសកម្មភាពឡើងវិញ និងហាក់កំពុងមានសកម្មភាពខ្លាំងជាងមុនពេលផ្ទុះជំងឺកូវី១៩ ទៅទៀត។ អ៊ីចឹងហើយបានជាជម្រើសប្រធានបទ « ការគិតគូរឡើងវិញពីទេសចរណ៍ » សម្រាប់ទិវាទេសចរណ៍ពិភពលោកឆ្នាំ ២០២២ នេះមិនមែនជារឿងចៃដន្យទេ។ នាឱកាសថ្ងៃទិវាទេសចរណ៍ពិភពលោកនេះ ការតាំងពិព័រណ៍ទេសចរណ៍មួយត្រូវបានរៀបចំក្នុងទីក្រុងប៉ារីស។ គេបានសង្កេតឃើញថាខុសពីប៉ុន្មានឆ្នាំមុន ទេសចរណ៍ភ្ជាប់នឹងលក្ខខណ្ឌបរិស្ថានត្រូវបានគេលើកទៅនិយាយច្រើននៅពេលនេះ។
ចៀសវាងការទទួលទេសចរទាំងហ្វូងៗដោយគ្មានការកំណត់ចំនួន ចៀសវាងការធ្វើដំណើរតាមយន្តហោះក្នុងចម្ងាយខ្លី ចូលរួមជួយថែរក្សាទីតាំងធម្មជាតិ គោរពឲ្យបានត្រឹមត្រូវលើតំបន់ដែលទទួលបានការការពារ ដើរលេងកាន់តែជិតកាន់តែល្អ ឬមួយក៏ជំរុញ និងបង្កើនគោលដៅទេសចរណ៍ក្នុងស្រុក ទាំងនេះសុទ្ធសឹងជាវិធីសាស្រ្តដែលត្រូវពិចារណាដើម្បីគិតគូរឡើងវិញពីទេសចរណ៍។ លោក Eric La Bonnardière ស្ថាបនិកទីភ្នាក់ងារទេចរណ៍ Evaneos បានយល់ឃើញថា គេមិនអាចបំបាត់ការធ្វើដំណើរទាំងស្រុងបានទេ តែគេត្រូវរៀបចំការធ្វើដំណើរបែបផ្សេងដោយគិតគូរពីរឿងបរិស្ថាន។ តាមលោក Eric La Bonnardière អ្នកដំណើរវ័យក្មេងបានគិតគូរ និងព្រួយបារម្ភខ្លាំងពីបញ្ហាបរិស្ថានជាងអ្នកដំណើរវ័យចំណាស់។
តាមការសិក្សាមួយក្នុងប្រទេសបារាំង មានមនុស្សដែលបានសួរនាំចំនួន ៤៤% បានគិតគូរពីការប្តូររបៀបដើរលេងរបស់ខ្លួនក្នុងឆ្នាំ ២០២២ ដោយសារតែពួកគេបារម្ភពីរឿងបរិស្ថាន។ ទោះជាយ៉ាងនេះក្តី គេបានសង្កេតឃើញថា នៅតែមានការយល់ដឹង និងចាប់អារម្មណ៍ខុសគ្នាក្នុងរឿងបរិស្ថានដោយផ្អែកតាមប្រទេសនីមួយៗក្នុងលោក។ សម្រាប់ប្រទេសខ្លះ បរិស្ថានជាប្រធានបទអាទិភាពទី១។ តែសម្រាប់ប្រទេសខ្លះទៀត ពិសេសប្រទេសដែលសេដ្ឋកិច្ចពឹងខ្លាំងលើវិស័យទេសចរណ៍ បរិស្ថានជាប្រធានបទអាទិភាពទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ