តើសង្រ្គាមនៅអ៊ុយក្រែនអាចបញ្ចប់នៅពេលណា និងដោយរបៀបណា?
ចុះផ្សាយនៅថ្ងៃ៖
ស្តាប់ - ០៥:៥២
សង្គ្រាមឈ្លានពានរបស់រុស្ស៊ីលើប្រទេសអ៊ុយក្រែនបានអូសបន្លាយជាង៧ខែ រួចទៅហើយ ចាប់តាំងពីថ្ងៃទី២៤ ខែកុម្ភៈ ហើយនិងបានបង្កផលជាប៉ះពាល់យ៉ាងច្រើនលើពិភពលោកទាំងមូល។ ក៏ប៉ុន្តែ តើសង្រ្គាមនេះអាចបញ្ចប់នៅពេលណា និងដោយរបៀបណា?
សង្គ្រាមឈ្លានពានរបស់រុស្ស៊ីលើប្រទេសអ៊ុយក្រែនបានអូសបន្លាយជាង៧ខែទៅហើយ ក៏ប៉ុន្តែទីបញ្ចប់របស់សង្គ្រាមនេះហាក់មិនទាន់មានពន្លឺនៅឡើយទេ។
នាពេលបច្ចុប្បន្ន អ៊ុយក្រែនបានវាយរុញច្រានដណ្ដើមយកទឹកដីពីរុស្ស៊ីបានកាន់តែច្រើន ក៏ប៉ុន្តែរុស្ស៊ីបានប្រកាសបង្កើនទ័ពឡើងវិញផងដែរ។ គ្មាននរណាអាចដឹងប្រាកដថា សង្គ្រាមនេះនឹងទៅជាយ៉ាងណាពិតប្រាកដទេ។
ផ្អែកតាមអ្នកជំនាញ ទីបញ្ចប់នៃសង្គ្រាមនេះអាស្រ័យលើកត្តាច្រើន មិនត្រឹមតែអាស្រ័យលើសកម្មភាព និងការសម្រេចចិត្តរបស់រុស្ស៊ី និងអ៊ុយក្រែនខ្លួនឯងផ្ទាល់ប៉ុណ្ណោះទេ ប៉ុន្តែវាអាស្រ័យទៅលើកត្តាផ្សេងៗ ជាពិសេស សកម្មភាព និងការសម្រេចចិត្តរបស់សហភាពអឺរ៉ុប និងសហរដ្ឋអាមេរិក។
យោងតាមបទវិភាគរបស់កាសែត The Economist សង្រ្គាមនៅអ៊ុយក្រែនទំនងជាអាចបញ្ចប់ដោយសេណារីយ៉ូច្រើនយ៉ាង ក៏ប៉ុន្តែ សម្ព័ន្ធមិត្តលោកខាងលិចហាក់មិនទាន់យល់ស្របគ្នា ចំពោះលក្ខខណ្ឌនៃសន្តិភាពនៅឡើយ។
ជំហររបស់សហភាពអឺរ៉ុប
ជារឿយៗ គេតែងតែសង្កេតឃើញថា បណ្ដាលោកខាងលិចសង្កត់ធ្ងន់ថា វាគឺជាអ៊ុយក្រែនដែលជាអ្នកសម្រេច។ ក៏ប៉ុន្តែ ជាក់ស្ដែង អឺរ៉ុបគឺជាកត្ដាជំរុញចម្បងឱ្យអ៊ុយក្រែនសម្រេចចិត្តរបស់ខ្លួន។
លោក Ivan Krastev អ្នកជំនាញវិទ្យាសាស្រ្ដនយោបាយ ពី មជ្ឈមណ្ឌលសម្រាប់យុទ្ធសាស្ត្រសេរី (the Centre for Liberal Strategies) បានពន្យល់ថា ស្ថានភាពបញ្ចប់សង្គ្រាមនេះកំពុងចែកចេញជាពីរផ្នែក។ មួយផ្នែក គឺ ក្រុមប្រទេសដែលចង់បានសន្ដិភាព (peace party) ហើយចង់បញ្ឈប់ការប្រយុទ្ធគ្នា និងការចាប់ផ្តើមការចរចាឲ្យបានឆាប់តាមដែលអាចធ្វើទៅបាន។ មួយផ្នែកទៀត គឺក្រុមប្រទេសដែលចង់បានយុត្តិធម៌ (justice party) ហើយគិតថា រុស្ស៊ីត្រូវសងថ្លៃខូតខាតចំពោះការឈ្លានពានរបស់ខ្លួន។
ជាឧទាហរហ៍ ការចរចាអាចក្រោមទម្រង់ដែលគេអាចអនុញ្ញាតឱ្យរុស្ស៊ីកាន់កាប់ទឹកដីដែលរុស្ស៊ីបានឈ្លានពានរហូតមកដល់ពេលនេះ ឬរុញរុស្ស៊ីឱ្យត្រឡប់ទៅបន្ទាត់ព្រំដែនដី នៅថ្ងៃទី២៤ ខែកុម្ភៈ ឬព្យាយាមរុញរុស្ស៊ីឱ្យត្រលប់ទៅវិញទៅដល់ព្រំដែនអន្តរជាតិ ដែលរុស្ស៊ីបានឈ្លានពានកាលពីឆ្នាំ២០១៤?
នៅអឺរ៉ុប ក្រុមទាមទារឱ្យមានសន្ដិភាព និងការចរចា ក៏មិនឯកភាពទាំងស្រុងនោះដែរ។ ប្រទេសអាល្លឺម៉ង់បានអំពាវនាវឱ្យមានបទឈប់បាញ់។ ប្រទេសអ៊ីតាលីកំពុងទាមទារឱ្យមានផែនការផ្សេង សម្រាប់ដំណោះស្រាយនយោបាយ។ ប្រទេសបារាំងនិយាយអំពីកិច្ចព្រមព្រៀងសន្តិភាពនាពេលអនាគត ដោយធ្វើយ៉ាងណាមិនឱ្យមាន "ភាពអាម៉ាស់" សម្រាប់រុស្ស៊ី។ បណ្ដាប្រទេសផ្សេងទៀតដែលមិនគាំទ្រជំហរខាងលើ គឺ ប៉ូឡូញ និងបណ្ដារដ្ឋនៅតំបន់បាល់ទិក និងកំពុងដឹកនាំដោយចក្រភពអង់គ្លេស។
ជំហររបស់សហរដ្ឋអាមេរិក
ចុះអាមេរិកវិញ? អាមេរិកគឺជាប្រទេសគាំទ្រដ៏សំខាន់បំផុតចំពោះប្រទេសអ៊ុយក្រែន ប៉ុន្តែអាមេរិកនៅមិនទាន់កំណត់គោលដៅច្បាស់លាស់នៅឡើយនោះទេ ក្រៅពីការធ្វើយ៉ាងណាពង្រឹងអ៊ុយក្រែនឱ្យមានអំណាចចរចាក្នុងដៃកាន់តែខ្លាំង។ ផ្អែតតាមសារព័ត៌មាន BBC អាមេរិកបានចំណាយប្រាក់ជិត ១៤ពាន់លានដុល្លារអាមេរិកលើសង្រ្គាមរហូតមកដល់ពេលនេះ ហើយសភាអាមេរិកគ្រោងនឹងផ្ដល់ជំនួយថវិកាបន្ថែមទៀត។ អាមេរិកក៏បានប្រមូលជំនួយយោធាពីប្រទេសជាង៤០ផ្សេងទៀត។ ប៉ុន្តែ ជំនួយនេះមានដែនកំណត់។ ជាឧទាហរណ៍ អាមេរិកបានបញ្ជូនកាំភ្លើងធំ ប៉ុន្តែមិនមែនប្រព័ន្ធរ៉ុក្កែតបាញ់ចម្ងាយឆ្ងាយដែលអ៊ុយក្រែនកំពុងស្នើសុំនោះទេ។
ផ្អែកតាមលោក Henry Kissinger អតីតរដ្ឋមន្រ្ដីការបរទេសអាមេរិកដ៏ល្បីឈ្មោះ ក្នុងការចេញផ្សាយរបស់កាសែត The New York Times ការបរាជ័យរបស់រុស្ស៊ីគឺមានគ្រោះថ្នាក់ខ្លាំងណាស់។ ការជួយអ៊ុយក្រែនខ្លាំងជ្រុលអាចធ្វើឱ្យសង្រ្គាមហួសពីដើម្បីសេរីភាពរបស់អ៊ុយក្រែនទេ ប៉ុន្តែវាគឺជាសង្រ្គាមថ្មីមួយប្រឆាំងនឹងរុស្ស៊ីខ្លួនឯងផ្ទាល់តែម្ដង។ លោកបាននិយាយថា ប្រទេសរុស្ស៊ីមានតួនាទីសំខាន់ក្នុងការរក្សាតុល្យភាពអំណាចនៅអឺរ៉ុប។ អាមេរិកមិនគួររុញរុស្ស៊ីឱ្យចូលទៅក្នុងសម្ព័ន្ធភាពអចិន្ត្រៃយ៍កាន់តែខ្លាំងជាងនេះជាមួយប្រទេសចិននោះទេ។
ជំហររបស់អ៊ុយក្រែន
“សង្រ្គាមនៅអ៊ុយក្រែននឹងត្រូវបានឈ្នះនៅលើសមរភូមិ ប៉ុន្តែអាចបញ្ចប់បានតែតាមរយៈការចរចា។” នេះបើតាមសម្ដីរបស់ ប្រធានាធិបតីអ៊ុយក្រែន លោក Volodymyr Zelensky។
សម្រាប់ពេលនេះ ស្ថានភាពបានឈានដល់ដំណាក់កាលមួយគឺថា អនាគតគឺសម្រាប់អ៊ុយក្រែនក្នុងការសម្រេចចិត្ត។ ក៏ប៉ុន្តែ ជម្រើសរបស់អ៊ុយក្រែនក៏ត្រូវបានកំណត់ដោយអ្វីដែលបណ្ដាប្រទេសលោកខាងលិចនឹងផ្តល់ឱ្យផងដែរ។ លោក Zelensky បានលើកឡើងក្នុងកិច្ចប្រជុំនៅ Davos ថា “អឺរ៉ុបគួរតែរួបរួមគ្នា។ អ៊ុយក្រែនគឺខ្លាំង នៅពេលដែលពួកអ្នករួបរួមគ្នា។ អ៊ុយក្រែននឹងប្រយុទ្ធរហូតដល់ទទួលបានទឹកដីទាំងអស់របស់ខ្លួនមកវិញ”។ ប៉ុន្តែ គាត់ក៏ហាក់ដូចជាទុកកន្លែងសម្រាប់ការសម្រុះសម្រួលចរចាជាមួយរុស្ស៊ីផងដែរ។ លោកបាននិយាយថា ការចរចាជាមួយរុស្ស៊ីអាចនឹងចាប់ផ្តើម នៅពេលដែលរុស្ស៊ីដកខ្លួនទៅដល់ចំណុច ថ្ងៃទី២៤ ខែកុម្ភៈ។
ជំហររបស់រុស្ស៊ី
ក្រៅពីការមិនឯកភាពគ្នានៃបណ្ដាប្រទេសអឺរ៉ុប និងអាមេរិក ក៏មានការព្រួយបារម្ភពីរចម្បងផ្សេងទៀតផងដែរ ជាពិសេស ពីជំហររបស់រុស្ស៊ី។ មួយគឺថា គេមិនអាចមើលស្រាលលើកម្លាំងរបស់ទ័ពរុស្ស៊ី ទោះក្រោយទ័ពអ៊ុយក្រែនអាចដណ្ដើមទឹកដីឡើងវិញ។ មួយទៀត គឺថា សង្គ្រាមនេះគឺផុយស្រួយណាស់។ ប្រសិនបើសង្គ្រាមកាន់តែបន្ដ នោះរុស្ស៊ីអាចពង្រីកសង្គ្រាមដល់អង្គការណាតូ ឬងាកទៅប្រើប្រាស់អាវុធគីមី ឬសូម្បីតែអាវុធនុយក្លេអ៊ែរ ដើម្បីបញ្ចៀសការបរាជ័យ។ លោក Emmanuel Macron ប្រធានាធិបតីបារាំងនិយាយថា ក្នុងរយៈពេលវែង អឺរ៉ុបនឹងត្រូវស្វែងរកផ្លូវរស់នៅជាមួយរុស្ស៊ី។
លោក Volodymyr Fesenko អ្នកវិភាគនយោបាយនៅទីក្រុង Kyiv បាននិយាយថា "ភាពផ្ទុយគ្នានៃស្ថានភាពគឺថា ភាគីទាំងពីរនៅតែជឿថាពួកគេអាចឈ្នះ។ លុះត្រាតែសង្គ្រាមឈានដល់ចំណុចជាប់គាំង ហើយអ៊ុយក្រែន និងរុស្ស៊ី ទទួលស្គាល់វាគឺជាប់គាំងមែន ដូច្នេះការពិភាក្សាអំពីការសម្របសម្រួលណាមួយនឹងអាចធ្វើទៅបាន។”
សរុបជារួម ទីបញ្ចប់នៃសង្គ្រាមរបស់រុស្ស៊ី និងអ៊ុយក្រែន អាស្រ័យលើកត្តាច្រើន ពីសំណាក់អ៊ុយក្រែន និងរុស្ស៊ីផ្ទាល់ ក៏ដូចជាពីសំណាក់បណ្ដាប្រទេសអឺរ៉ុប និងសហរដ្ឋអាមេរិក ដែលមិនមាននយោបាយរួម។ ដូច្នេះហើយ សង្គ្រាមនេះអាចនឹងបន្ដអូសបន្លាយទៅមុខទៀត ហើយលទ្ធភាពដែលរុស្ស៊ីអាចឈ្នះសង្គ្រាម ឬអ៊ុយក្រែនអាដណ្ដើមយកទឹកដីបាត់បង់មកវិញទាំងស្រុង គឺស្ថិតនៅជាប្រូបាប៊ីលីតេនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ