សង្គ្រាមនៅអ៊ុយក្រែន៖ រដ្ឋមន្ត្រីការពារជាតិរុស្ស៊ី ទូរស័ព្ទនិយាយជាមួយសមភាគីបារាំង និងអង់គ្លេស
កាលពីថ្ងៃអាទិត្យ ទី២៣តុលា លោករដ្ឋមន្ត្រីការពារជាតិរុស្ស៊ី បានទូរស័ព្ទទៅនិយាយជាមួយរដ្ឋមន្ត្រីការពារជាតិតួកគី និងរដ្ឋមន្ត្រីការពារជាតិបារាំង ស្តីអំពីបញ្ហាសង្គ្រាមនៅអ៊ុយក្រែន។ បន្ថែមពីនេះ លោករដ្ឋមន្ត្រីការពារជាតិរុស្ស៊ី ក៏បានទូរស័ព្ទទៅនិយាយជាមួយរដ្ឋមន្ត្រីការពារជាតិអង់គ្លេសដែរ។ ជាការបង្កើនការសន្ទនាផ្ទួនៗគ្នា ជាមួយក្រុមប្រទេសបស្ចឹមលោក ដែលរុស្ស៊ីអះអាងថា ដើម្បីប្រាប់រំឭកឲ្យដឹងអំពីគ្រោះថ្នាក់ ប្រសិនបើអ៊ុយក្រែននៅតែបង្ករឿង។
ចុះផ្សាយនៅថ្ងៃ៖
ស្តាប់ - ០២:២២
យោងតាមលិខិតប្រកាសរបស់ក្រសួងការពារជាតិរុស្ស៊ី ចេញផ្សាយថ្ងៃអាទិត្យទី២២តុលា នៅក្នុងពេលនិយាយគ្នាជាមួយសមាភាគីបារាំង លោករដ្ឋមន្ត្រីការពារជាតិរុស្ស៊ី បានថ្លែងលើកឡើងថា ស្ថានការណ៍កាន់តែចុះដុនដាបខ្លាំង ប្រសិនបើអ៊ុយក្រែននៅតែគំរាម បង្ករឿងមកលើរុស្ស៊ី។ លោកស៊ែរហ្កី ឆយហ្គូ លើកឡើងទៀតថា ភាគីរុស្ស៊ីសង្ស័យថា អ៊ុយក្រែន មានគម្រោងប្រើ “គ្រាប់បែកប្រភេទកាចសាហាវ” ហើយបន្ទាប់មកចោទថាគឺរុស្ស៊ីជាអ្នកប្រើវា។ រដ្ឋមន្ត្រីការពារជាតិរុស្ស៊ីអះអាងថា គ្រាប់បែកប្រភេទកាចសាហាវ អាចជាគ្រាប់បែកជាតិផ្ទុះធម្មតា តែផ្ទុកបង្កប់ដោយសារធាតុវិទ្យុសកម្ម។
ជាការឆ្លើយតបទៅនឹងសំដីលើកឡើង របស់លោកស៊ែរហ្កី ឆយហ្គូនេះ លោករដ្ឋមន្ត្រីការពារជាតិបារាំង សេបាស្យៀង ឡឺក័រនុយ បានលើកឡើងថា បារាំងប្រឆាំងដាច់ខាត ចំពោះការគំរាមសម្លុតគ្នា ដោយការប្រើប្រាស់អាវុធនុយក្លេអ៊ែរ។ ភាគីបារាំងបានអំពាវនាវឲ្យរុស្ស៊ី ត្រូវតែបញ្ឈប់សង្គ្រាមឈានពាននៅអ៊ុយក្រែនជាបន្ទាន់ ហើយបារាំងសន្យាធ្វើគ្រប់យ៉ាង សហការជាមួយសម្ព័ន្ធមិត្ត ដើម្បីជំរុញឲ្យមានដំណោះស្រាយដោយសន្តិវិធី ក្នុងសំណុំរឿងអ៊ុយក្រែននេះ។
គួររំលឹកថា កាលពីថ្ងៃសុក្រ លោក ស៊ែរហ្កី ឆយហ្គូ រដ្ឋមន្ត្រីការពារជាតិរុស្ស៊ី បានទូរស័ព្ទនិយាយជាមួយលោក ឡយ អូស្ទីន រដ្ឋមន្ត្រីការពារជាតិអាមេរិក។ ២ថ្ងៃក្រោយមក រដ្ឋមន្ត្រីការពារជាតិរុស្ស៊ី បានទូរស័ព្ទនិយាយជាមួយលោករដ្ឋមន្ត្រីការពារជាតិបារាំង និងលោករដ្ឋមន្ត្រីការពារជាតិតួកគី។ ហើយនៅថ្ងៃអាទិត្យដដែលនេះ លោកស៊ែរហ្កី ឆយហ្គូ ក៏បានទូរស័ព្ទទៅនិយាយជាមួយ លោក បេន វ៉ាឡាស រដ្ឋមន្ត្រីការពារជាតិអង់គ្លេស ដែលនេះគឺជារឿងកម្របំផុត។ តើរុស្ស៊ីកំពុងតែបង្ហាញជំហរ បន្ទន់ចង់ចរចាឬ?
យ៉ាងណាក៏ដោយ ការទូរស័ព្ទទៅនិយាយជាមួយក្រុមប្រទេសលោកខាងលិច ផ្ទួនៗគ្នានេះ គឺវាគាប់ជួនចំពេលដែលនៅសមរភូមិ កងទ័ពរុស្ស៊ីកំពុងបរាជ័យ ជួបការលំបាកជាខ្លាំង។ ជាងនេះទៀត រុស្ស៊ីបានអះអាងថា កងទ័ពអ៊ុយក្រែន បានបាញ់ប្លោងគ្រាប់វាយប្រហារកាន់តែញឹកញាប់ ទៅខាងទឹកដីរុស្ស៊ី។ ទន្ទឹមគ្នានេះ ក្រសួងការពារជាតិរុស្ស៊ី ទទួលស្គាល់ថាខ្លួននៅតែបន្ត បាញ់ប្លោងគ្រាប់ វាយប្រហារទៅលើហេដ្ឋារចនាសម្ព័ន្ធថាមពលរបស់អ៊ុយក្រែន។ ក្រៅពីបានកម្ទេចរោងចក្រផលិតចរន្តអគ្គិសនីអ៊ុយក្រែន កងទ័ពរុស្ស៊ីអះអាងថា ខ្លួនបានកម្ទេចស្តុកប្រេងឥន្ធនៈ របស់កងទ័ពអាកាសអ៊ុយក្រែន ចំនួន១សែនតោន ព្រមទាំងបានវាយកម្ទេចទីតាំងស្តុកអាវុធ-គ្រាប់រំសេវ និងទីតាំងស្តុកប្រេងម៉ាស៊ូត សម្រាប់រថយន្តកងទ័ពអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ