លោកពូទីន ប្រកាសអនុវត្តច្បាប់អាជ្ញាសិក នៅតាមតំបន់ទាំង៤ ដែលរុស្ស៊ីទើបតែកាត់យកពីអ៊ុយក្រែន
ក្នុងពេលប្រជុំក្រុមប្រឹក្សាសន្តិសុខជាតិរុស្ស៊ី ដែលត្រូវបានផ្សាយផ្ទាល់តាមទូរទស្សន៍ កាលពីថ្ងៃពុធទី១៩តុលា លោកពូទីន ប្រធានាធិបតីរុស្ស៊ីបានប្រកាស អនុវត្តវិធានការច្បាប់សន្តិសុខ ដ៏តឹងតែងបំផុត នៅតាមតំបន់ទាំងអស់របស់រុស្ស៊ី ដែលជាប់ព្រំដែនជាមួយអ៊ុយក្រែន ដោយរាប់ទាំងតំបន់គ្រីម៉េផង។ ដោយឡែក តំបន់ទាំង៤ដែលរុស្ស៊ីទើបតែកាត់យកទៅពីអ៊ុយក្រែន នឹងត្រូវអនុវត្តច្បាប់អាជ្ញាសិក។
ចុះផ្សាយនៅថ្ងៃ៖ កែប្រែថ្ងៃទី៖
វិមានក្រឹមឡាំង បានចេញផ្សាយក្រិត្យច្បាប់ថ្មីនេះ ប្រកាសដាក់តំបន់ទាំង៤ក្នុងច្បាប់អាជ្ញាសិក ចាប់ពីម៉ោង១២រលំងអាធ្រាត្រ យប់ថ្ងៃព្រហស្បតិ៍ទី២០តុលា។ ក្រិត្យនេះបញ្ជាក់ផងដែរ ថាក្នុងរវាង៣ថ្ងៃទៀត រដ្ឋាភិបាលរុស្ស៊ីនឹងចេញសេចក្តីប្រកាសលំអិត អំពីវិធានការជាក់ស្តែង ក្នុងច្បាប់អាជ្ញាសិក។ វិធានការតឹងតែង ដែលអាចមានដូចជា ការរិតបន្តឹងសន្តិសុខ ការអនុវត្តបំរាមគោចរ ហាមជួបជុំនៅតាមទីសាធារណៈ ការជម្លៀសសហគ្រាសយុទ្ធសាស្ត្រ ការហាមឃាត់ការធ្វើដំណើរចាកចេញ ព្រមទាំងការអនុវត្តការដាក់កំហិតយោធាផ្សេងៗ នៅក្នុងវិស័យទូរគមនាគមន៍ទំនាក់ទំនងជាដើម។
ដោយឡែក តំបន់សហព័ន្ធកណ្តាល ដែលមានរដ្ឋធានីម៉ូស្គូដែរនោះ គឺត្រូវស្ថិតក្រោមរបបសន្តិសុខអាសន្នពិសេសផងដែរ។ លោកពូទីនបានអះអាងថា មូលហេតុដែលលោកចេញបញ្ជាអនុវត្តច្បាប់អាជ្ញសិក និងវិធានការសន្តិសុខរឹងមាំ គឺដោយសារតែអ៊ុយក្រែនបានបដិសេធការចរចា ហើយថែមបានបញ្ជូនក្រុមមនុស្ស ឲ្យមកធ្វើភេរវកម្ម នៅក្នុងទឹកដីរបស់រុស្ស៊ី ថែមទៀតផង។
សម្រង់សំដីលោកពូទីន ដែលប្រាប់ពីហេតុផលប្រកាសច្បាប់អាជ្ញាសិក ថ្ងៃទី១៩តុលា២០២២
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ