សង្គ្រាមអ៊ុយក្រែន ៖ រុស្ស៊ីសំរុកវាយប្រហារ ដោយមីស៊ីលជាង៣០គ្រាប់ ផ្តាច់ចរន្តអគ្គិសនីមនុស្សជាង១លានគ្រួសារ
ស្ថានភាពសង្គ្រាមនៅអ៊ុយក្រែនកំពុងតែក្តៅគគុក។ យោងតាមកងទ័ពអ៊ុយក្រែន កាលពីថ្ងៃសៅរ៍ទី២២តុលាម្សិលមិញ រុស្ស៊ីបានបាញ់ប្លោងមីស៊ីល ចំនួន៣៦គ្រាប់ ក្នុងរវាងយប់ថ្ងៃសុក្រ ឈានចូលថ្ងៃសៅរ៍។ ប្រភពពីភាគីអ៊ុយក្រែនដដែល អះអាងថាកងទ័ពរុស្ស៊ី បានសំរុកវាយប្រហារមកលើហេដ្ឋារចនាសម្ព័ន្ធស៊ីវីល រោងចក្រផលិតចរន្តអគ្គិសនីរបស់អ៊ុយក្រែន ធ្វើឲ្យប្រជាជនអ៊ុយក្រែន គ្មានអគ្គិសនីប្រើប្រាស់ ខណៈដែលរដូវរងារកាន់តែខិតជិតមកដល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
យ៉ាងហោចណាស់ មីស៊ីល៣៦គ្រាប់ ត្រូវបានរុស្ស៊ីបាញ់ប្លោងមកលើអ៊ុយក្រែន ក្នុងរវាងយប់ថ្ងៃសុក្រ ឈានចូលថ្ងៃសោរ៍ទី២២តុលា ក្នុងនោះ១៨គ្រាប់ត្រូវបានស្ទាក់កម្ទេចបាន។ នេះបើផ្អែកតាមការបញ្ជាក់ពីកងទ័ពអ៊ុយក្រែន។ លោកវ្លូដីមៀរ ហ្សេឡេនស្គី ប្រធានាធិបតីអ៊ុយក្រែន បានថ្លែងថ្កោលទោស ថាសកម្មភាពសំរុកវាយប្រហាររបស់កងទ័ពរុស្ស៊ីនេះ គឺមានកម្មវត្ថុធ្វើឲ្យអ៊ុយក្រែន ត្រូវងងឹងសូន្យសុងដោយសារគ្មានប្រព័ន្ធអគ្គិសនីប្រើប្រាស់។
យ៉ាងណាមិញ យោងតាមលោក Kyrylo Timochenko ទីប្រឹក្សាម្នាក់របស់លោកហ្សេឡេនស្គី គឺយ៉ាងហោចណាស់ ផ្ទះសំបែងរបស់ប្រជាជនប្រមាណជាង១លានខ្នង ដែលត្រូវដាច់ចរន្តអគ្គិសនី។ គិតចាប់ពីថ្ងៃទី១០តុលាមក រុស្ស៊ីបានវាយប្រហារ កម្ទេចស្ថានីយ៍ផលិតចរន្តអគ្គិសនីជាច្រើនកន្លែង ព្រមទាំងស្ថានីយ៍ផ្គត់ផ្គង់ទឹកស្អាតរបស់អ៊ុយក្រែន។
លោក Mykhailo Podoliak ទីប្រឹក្សាពិសេសម្នាក់ទៀតរបស់លោកហ្សេឡេស្គី បានចោទប្រកាន់រុស្ស៊ី ថាមានចេតនារុញច្រាន បណ្តេញឲ្យប្រជាជនអ៊ុយក្រែនភៀសខ្លួន ចាកចេញពីប្រទេស ហើយធ្វើឲ្យអឺរ៉ុបត្រូវរងផលលំបាកដោយរលកជនភៀសខ្លួនអ៊ុយក្រែន បាក់ជនជោរជាថ្មីម្តងទៀត។ ចំណែកលោក Dmytri Kuleba រដ្ឋមន្ត្រីការបរទេសអ៊ុយក្រែន បានចាត់ទុកការវាយប្រហាររបស់រុស្ស៊ី មកលើហេដ្ឋារចនាសម្ព័ន្ធស៊ីវីលចាំបាច់របស់អ៊ុយក្រែន ថាជាផ្នែកមួយនៃផែនការប្រល័យពូជសាសន៍ ដែលរុស្ស៊ីចង់ធ្វើមកលើប្រជាជនអ៊ុយក្រែន។
គួរបញ្ជាក់ថា ភាគីកងទ័ពរុស្ស៊ីបានទទួលស្គាល់ថា ខ្លួនពិតជាបានវាយប្រហារ ទៅលើហេដ្ឋារចនាសម្ព័ន្ធផលិតថាមពលអគ្គិសនី របស់អ៊ុយក្រែនពិតមែន តែមិនបានវាយប្រហារសំដៅទៅលើប្រជាជនស៊ីវីលទេ។ ដោយឡែក នៅរសៀលថ្ងៃសៅរ៍ លោក Viatcheslav Gladkov អភិបាលតំបន់Belgorod របស់រុស្ស៊ី ដែលស្ថិតនៅក្បែរព្រំដែនអ៊ុយក្រែន បានអះអាងថា កងទ័ពអ៊ុយក្រែន បានវាយប្រហារទៅលើតំបន់ខ្លូន បណ្តាលឲ្យស្លាប់ជនស៊ីវីល២នាក់ និង១៥០០០គ្មានចរន្តអគ្គិសនីប្រើប្រាស់។ នៅតំបន់ឃែរសិន ភាគខាងត្បូងអ៊ុយក្រែនឯណោះវិញ អាជ្ញាធរគ្រប់គ្រងដែលជាកូនចៅខាងរបស់រុស្ស៊ី បានចេញបញ្ជាឲ្យប្រជាជន ភៀសខ្លួនចេញទៅកាន់ត្រើយខាងកើតទន្លេ Dniepr ជាបន្ទាន់ ព្រោះកងទ័ពអ៊ុយក្រែន កំពុងសំរុកវាយប្រហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ