កងទ័ពផ្លូវអាកាសរបស់ កូរ៉េខាងជើង នៅមានកម្រិតខ្សោយខ្លាំង បើធៀបនឹងគូប្រជែង
ចុះផ្សាយនៅថ្ងៃ៖
ស្តាប់ - ០៥:៣២
ប៉ុន្មានសប្តាហ៍មកនេះ កូរ៉េខាងជើង ប្រឹងសម្តែងឫទ្ធានុភាពខាងកម្លាំងអាវុធ តាមរយៈការបាញ់មីស៊ីលយ៉ាងច្រើនសន្ធឹក មានទាំងមីស៊ីលរយៈចម្ងាយមធ្យមនិងចម្ងាយឆ្ងាយ ព្រមទាំងបាញ់មីស៊ីលបាលីស្ទិក ទៀតផង។ នេះគឺជាការវិវឌ្ឍជឿនលឿនខាងសមត្ថភាពកងទ័ពជើងគោករបស់របបក្រុងព្យុងយ៉ាង ក៏ប៉ុន្តែ ប្រសិនបើគេក្រឡេកទៅមើល ផ្នែកកងទ័ពជើងអាកាសវិញនោះ គឺ កូរ៉េខាងជើង នៅមានកម្រិតខ្សោយខ្លាំង បើធៀបនឹងគូប្រជែង។ តើហេតុអ្វីបានជាដូច្នេះ?
យន្តហោះចម្បាំងរបស់កូរ៉េខាងជើងមានចំនួនតិចតួច។
អ្នកជំនាញជាច្រើននាក់ ទាំងអ្នកឯកទេសខាងយោធាផ្លូវអាកាសរបស់សហរដ្ឋអាមេរិក និងអ្នកជំនាញជាតិកូរ៉េខាងត្បូង ព្រមទាំងអ្នកវិភាគតាមដានស្ថានការណ៍ឧបទ្វីបកូរ៉េ គឺសុទ្ធសឹងតែបានមូរមាត់គ្នាឯកភាព ក្នុងការវាយតម្លៃសេចក្តីសន្និដ្ឋានថា កម្លាំងកងទ័ពផ្លូវអាកាសនៃរបបក្រុងព្យុងយ៉ាង នៅទន់ខ្សោយ ហើយបំពាក់ដោយគ្រឿងច្បាំង ចាស់គំរឹល ហួសសម័យ។ ហួសសម័យ ពីព្រោះថា យន្តហោះចម្បាំង ដែលកូរ៉េខាងជើង ចាត់ទុកខ្លួនឯងថាចំណាប់ចំនួនគ្រាន់បើនោះ គឺជាយន្តហោះចម្បាំង ប្រភេទ MiG-29 សល់តាំងពីសម័យអតីតសហភាពសូវៀត អំលុងទសវត្សរ៍១៩៨០ មកម្ល៉េះ។ ហើយ យន្តហោះចម្បាំងរបស់កូរ៉េខាងជើងទៀតសោត ក៏មានចំនួនតិចតួចទៅទៀត។
ជាក់ស្តែង កម្លាំងទ័ពផ្លូវអាកាស របស់យោធាប្រជាមានិតកូរ៉េខាងជើង មានយន្តហោះចម្បាំង ប្រមាណ ៩០០ គ្រឿង, យន្តហោះដឹកជញ្ជូនសម្រាប់សឹកសង្គ្រាម ៣០០ គ្រឿង, ហើយនិង ឧទ្ធម្ភគចក្រ ប្រមាណ ៣០០ គ្រឿងដែរ។ នេះបើតាមការវាយតម្លៃរបស់ ទីភ្នាក់ងារស៊ើបការសម្ងាត់ខាងយោធា របស់សហរដ្ឋអាមេរិក (DIA) ក្នុងរបាយការណ៍ ឆ្នាំ២០២១។ ប្រភពអាមេរិកដដែល គឺបញ្ជាក់ថា យន្តហោះចម្បាំង និងយន្តទម្លាក់គ្រាប់បែក ដែលក្រុងព្យុងយ៉ាង មាននោះ គឺភាគច្រើន ជាយន្តហោះចាស់ៗ សល់ពីសម័យសហភាពសូវៀត និងខ្លះជារបស់ចិន ដែលមានអាយុកាលបីបួនទសវត្សរ៍ទៅហើយ។
មិនតែប៉ុណ្ណោះ យន្តហោះចម្បាំងចាស់ៗទាំងនោះ មួយចំនួន ក៏លែងប្រើការកើតទៅហើយ ខ្លះទៀត មិនទាំងអាចហោះហើរបានផង។ នេះបើតាមការបញ្ជាក់របស់លោក Joseph Dempsey អ្នកស្រាវជ្រាវនៅវិទ្យាស្ថានអន្តរជាតិខាងសិក្សាយុទ្ធសាស្ត្រ (IISS) ដែលសរសេរប្រាប់ទីភ្នាក់ងារព័ត៌មានបារាំង AFP ។
ការហ្វឹកហាត់អ្នកបើកបរយន្តហោះចម្បាំង យ៉ាងអត្តខាត។
ទន្ទឹមនឹងការខ្វះខាតយន្តហោះច្បាំងទំនើបៗ ការបង្វឹកហ្វឹកហាត់អ្នកបើកបរយន្តហោះចម្បាំងនោះទៀតសោត ក៏ប្រព្រឹត្តទៅយ៉ាងអត្តខាត។ នៅកូរ៉េខាងជើង ការបង្រៀនអ្នកបើកបរយន្តហោះចម្បាំង ឲ្យបានស្ទាត់ជំនាញ មិនអាចទៅរួច។ ទៅមិនរួចពីព្រោះគ្មានប្រេងសាំងគ្រប់គ្រាន់សម្រាប់ផ្គត់ផ្គង់វគ្គរៀនសូត្រយន្តហោះនេះឲ្យសមរម្យនិងបានច្រើនម៉ោង។ អ្នកបើកយន្តហោះ ដែលរៀនហោះហើរបានតិចតួច គឺច្បាស់ជាមិនអាចនឹងធានាដល់ការប្រយុទ្ធផ្លូវអាកាសបាននោះឡើយ។ នេះបើតាមទីភ្នាក់ងារស៊ើបការសម្ងាត់ខាងយោធា របស់សហរដ្ឋអាមេរិក (DIA) និងដែលបញ្ជាក់ថា អ្នកបើកយន្តហោះចម្បាំងកូរ៉េខាងជើង រៀនហោះហើរ បានតែ ១៥ម៉ោង ទៅ២៥ម៉ោងតែប៉ុណ្ណោះ ក្នុងមួយឆ្នាំ។ រយៈពេលរៀនស្តួចស្តើងប៉ុណ្ណេះ គឺមិនអាចនឹងមានមោទនភាពអ្វីទៅប្រៀបធៀបនឹងកងទ័ពផ្លូវអាកាសកូរ៉េខាងត្បូង ដែលមានបច្ចេកវិទ្យាទំនើប ផុតលេខ និងបំពាក់បំប៉ន់ដោយសហរដ្ឋអាមេរិកទៀតផង។ នេះបើតាមការយល់ឃើញរបស់ Ahn Chan-il អ្នកជំនាញកិច្ចការកូរ៉េខាងជើង។
កូរ៉េខាងជើងខ្លួនឯង ក៏បានដឹងច្បាស់ថា សមត្ថភាពទ័ពអាកាសរបស់ខ្លួន នៅទន់ខ្សោយ ហើយប្រសិនបើករណីមានជម្លោះមែន កងទ័ពព្យុងយ៉ាងនឹងវាយប្រហារមូលដ្ឋានយោធាផ្លូវអាកាសរបស់គូសត្រូវជាមុន។ នេះតាមការវិភាគរបស់ លោក Choeung Seong-chang អ្នកស្រាវជ្រាវ នៅវិទ្យាស្ថាន Sejong ។
សហរដ្ឋអាមេរិក និងសម្ព័ន្ធមិត្តកូរ៉េខាងត្បូង ក៏បានដឹងចំណុចខ្សោយរបស់ទ័ពអាកាសកូរ៉េខាងជើង ទើបកាលពីពេលថ្មីៗ សមយុទ្ធរួមគ្នា របស់ សេអ៊ូល និង វ៉ាស៊ីនតោន គឺបានសម្ញែងឫទ្ធានុភាពយ៉ាងខ្លាំងពីក្បួនទ័ពផ្លូវកាស ហើយនេះ ក៏ជាការគំរាមឲ្យឃើញច្បាស់ដែរ ចំពោះរបបក្រុងព្យុងយ៉ាង។
ដោយហេតុដែលដឹងថាខ្លួនមិនសូវខ្លាំងខាងផ្លូវអាកាសទេ និងមិនចង់ឲ្យនរណាហោះហើរពីលើខ្នងរបស់ខ្លួន ទើប កូរ៉េខាងជើង ប្រឹងគំរាមសម្បើមណាស់ដែរ ដោយបាញ់មីស៊ីលពីលើដីនិងឆ្លងសមុទ្រជាច្រើនសន្ធឹក ដើម្បីគំរាមបក និងព្រមានកុំឲ្យអាមេរិកនិងកូរ៉េខាងត្បូង ធ្វើសមយុទ្ធរួមគ្នា។
ពីអតីតកាល ទ័ពផ្លូវអាកាសកូរ៉េខាងជើង ខ្លាំង ព្រោះបានជំនួយពីសហភាពសូរៀត។
គេក៏ត្រូវទទួលស្គាល់ដែរថា ពីអតីតកាល កូរ៉េខាងជើង ធ្លាប់មានកម្លាំងខ្លាំងខាងកងទ័ពផ្លូវអាកាស ដ្បិតបានជំនួយពីសហភាពសូរៀត។ នាឆ្នាំ២០១៣ កូរ៉េខាងត្បូង តាមរយៈវិទ្យាស្ថានប្រវត្តិយោធានៅក្រុងសេអ៊ូល ធ្លាប់ធ្វើវាយតម្លៃក្នុងរបាយការណ៍មួយ ថា ទ័ពអាកាសព្យុងយ៉ាង ខ្លាំងជាងពីរដងពីទ័ពជើងអាកាសរបស់ក្រុងសេអ៊ូល នាអំលុងទសវត្សរ៍១៩៧០។
កូរ៉េខាងជើង ធ្លាប់បានបញ្ជូនកម្លាំងជំនួយយោធា ទៅជួយវៀតណាម ក្នុងសង្គ្រាមប្រឆាំងចក្រពត្តិបច្ចិមលោក, ហើយក៏ទៅជួយច្បាំងសង្គ្រាមនៅស៊ីរី និង នៅអេហ្ស៊ីប នៅពេលសង្គ្រាម Kippour រវាងអារ៉ាប់និងជ្វីហ្វ។ ចម្បាំងទាំងពីរនាអំលុងដើមទសវត្សរ៍១៩៧០។ ក៏ប៉ុន្តែ តាំងពីសហភាពសូវៀតរំលំរលាយទៅ កូរ៉េខាងជើងបាត់បង់ខ្នងបង្អែក ហើយម្យ៉ាង ពេលក្រោយមក រុស្ស៊ីចុះកិច្ចព្រមព្រៀងភ្ជាប់ទំនាក់ទំនងឡើងវិញ ជាមួយកូរ៉េខាងត្បូង គឺរុស្ស៊ីត្រូវឈប់ផ្តល់ជំនួយយោធាដល់កូរ៉េខាងជើង។
ដូច្នេះហើយ កូរ៉េខាងជើង បានជួបភាពខ្សត់ខ្សោយខាងយោធាផ្លូវអាកាសជាច្រើនទសវត្សរ៍។ ដើម្បីមានទឹកប្រៃក្នុងការចរចាជាមួយគូប្រជែងនិងពួកបច្ចិមលោក កូរ៉េខាងជើង បានប្រឹងអភិវឌ្ឈកម្មវិធីនុយក្លេអ៊ែរ និងគ្រឿងសព្វាវុធផ្លូវគោក ហើយនិងចាត់ទុកកម្មវិធីនុយក្លេអ៊ែរ ជាស្នូលបណ្តូលអាយុជីវិតរបស់ជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ