គួដឌីស្ថានស៊ីរីជាអ្នករងគ្រោះនៃការរំកិលរកគ្នារវាងតួកគី និងស៊ីរីដោយមានរុស្ស៊ីនៅពីក្រោយ?
ចុះផ្សាយនៅថ្ងៃ៖
ស្តាប់ - ០៥:៣៧
នៅថ្ងៃពុធ ទី២៨ ធ្នូ ប្រទេសរុស្ស៊ីបានរៀបចំកិច្ចប្រជុំត្រីភាគីថ្នាក់រដ្ឋមន្រ្តីការពារជាតិរវាងប្រទេសរុស្ស៊ី ស៊ីរី និងប្រទេសតួកគី។ តាំងពីស៊ីរីបានធ្លាក់ក្នុងសង្រ្គាមស៊ីវិលហែកហួរក្នុងឆ្នាំ ២០១១ នេះជាលើកទី១ ដែលមានកិច្ចប្រជុំរបៀបនេះ ពិសេសជំនួបផ្លូវការក្នុងកម្រិតប្រមុខការពារជាតិរវាងស៊ីរី និងតួកគី។ នៅក្នុងខែមករាឆ្នាំថ្មី ២០២៣ នេះ ស៊ីរី និងតួកគីគ្រោងជួបគ្នាជាថ្មីដែលលើកនេះក្នុងកម្រិតថ្នាក់រដ្ឋមន្រ្តីការបរទេស។ តើមានហេតុផលអ្វីខ្លះដែលបានជំរុញឲ្យស៊ីរី និងតួកគីផ្តើមរំកិលរកគ្នាជាថ្មី និងថា តើអ្នកណាជាអ្នករងគ្រោះពីការរំកិលរកគ្នានេះ?។
នៅមុនស៊ីរីធ្លាក់ក្នុងសង្រ្គាមហែកហួរផ្ទៃក្នុងកាលពីឆ្នាំ ២០១១ ស៊ីរី និងតួកគីដែលជាប្រទេសជិតខាងភូមិផង របងជាមួយមានទំនាក់ទំនងយ៉ាងល្អ និងយ៉ាងរលូនរវាងគ្នា។ លើសពីនេះ ទីក្រុងអង់ការ៉ាថែមទាំងជាដៃគូនយោបាយ និងសេដ្ឋកិច្ចផ្តាច់មុខរបស់ទីក្រុងដាម៉ាស់ទៀតផង។ តែក្នុងរយៈពេលជាង ១០ឆ្នាំដែលស៊ីរីបានអូសជើងនៅក្នុងសង្រ្គាមស៊ីវិល ទំនាក់ទំនង និងដៃគូរបៀបនេះបានដាំក្បាលចុះយ៉ាងគំហុកហៅមិនឮ។ នេះក៏ដោយសារថាតួកគីបានបែរខ្នងដាក់រដ្ឋាភិបាលស៊ីរីរបស់ប្រធានាធិបតីលោកអាសាដ និងងាកទៅកាន់ជើងកម្លាំងប្រជាធិបតេយ្យស៊ីរីដែលជាក្រុមប្រឆាំងលោកអាសាដ។ ទន្ទឹមគ្នានេះ តួកគីបានបើកទ្វារទទួលជនភៀសខ្លួនស៊ីរីជិត ៤លាននាក់ឲ្យជ្រកកោននៅលើទឹកដីខ្លួន។
ជម្រើសគាំទ្រកម្លាំងប្រជាធិបតេយ្យស៊ីរីរបស់តួកគីក៏ជាជម្រើសរបស់ក្រុមបស្ចិមលោកដែរ ព្រោះអ្វីដែលពួកគេចង់បាន និងចង់ឃើញ គឺការដួលរលំរបបផ្តាច់ការរបស់លោកអាសាដ។ ប្រធានាធិបតីតួកគីលោកអ៊ែរដូហ្កានធ្លាប់បានចាត់ទុកលោកអាសាដជាឃាតករស្រេកឃ្លានឈាមដែលបានសម្លាប់រង្គាលពលរដ្ឋខ្លួនឯងដោយមិនរើសមុខ។ តែគេមិនត្រូវភ្លេចនិយាយទេថា ខណៈដែលតួកគី និងបស្ចិមលោកនាំគ្នាគាំទ្រក្រុមប្រឆាំងនឹងលោកអាសាដ រុស្ស៊ី និងអ៊ីរ៉ង់បាននាំគ្នាគាំទ្រលោកអាសាដ។ គឺជំហររបស់រុស្ស៊ី និងអ៊ីរ៉ង់របៀបនេះហើយដែលបានធ្វើឲ្យរដ្ឋាភិបាលស៊ីរី និងលោកអាសាដអាចបន្តឈរជើងមកដល់សព្វថ្ងៃ។
ក្រៅពីនេះនៅក្នុងជម្លោះស៊ីរី មានតួអង្គសំខាន់ទី៣ មួយទៀតដែលគេមិនអាចមិននិយាយបានឡើយ គឺកម្លាំងប្រដាប់អាវុធគួដឌីស្ថាននៅប៉ែកខាងជើងស៊ីរី។ កម្លាំងគួដឌីស្ថានស៊ីរីនេះបានរួមដៃគ្នាជាមួយកម្លាំងប្រជាធិបតេយ្យស៊ីរីដើម្បីត តាំងទល់នឹងលោកអាសាដ។ តែក្នុងពេលជាមួយគ្នា កម្លាំងគួដឌីស្ថានស៊ីរីដដែលនេះក៏បានចូលរួមជាមួយកម្លាំងសម្ព័ន្ធមិត្តដឹកនាំដោយអាមេរិកដើម្បីប្រឆាំងនឹងពួកជីហាតអង្គការរដ្ឋអ៊ីស្លាមនៅស៊ីរីដែរ។ តែសម្រាប់តួកគី កម្លាំងគួដឌីស្ថានស៊ីរីនេះជាពួកភេរវជនដែលត្រូវកំចាត់ ព្រោះពួកនេះបានស៊ុម គ្រលំ ឃុបឃិតជាមួយចលនាគួដឌីស្ថាន PKK នៅក្នុងទឹកដីតួកគី។
ឃើញថានៅទីបំផុត ប្រធានាធិបតីស៊ីរីលោកអាសាដ និងសមភាគីតួកគីលោកអ៊ែរដូហ្កានកំពុងមានសត្រូវរួមដូចគ្នា គឺកម្លាំងគួដឌីស្ថានស៊ីរី។ ចុះសម្រាប់រុស្ស៊ីវិញ តើមានជាប់ពាក់ព័ន្ធអ្វីដែរជាមួយនឹងកម្លាំងគួដឌីស្ថានស៊ីរីនេះ។ ប្រហែលជាជាប់ពាក់ព័ន្ធដោយប្រយោល ព្រោះសម្រាប់ទីក្រុងមូស្គូ ការកំចាត់កម្លាំងគួដីស្ថានស៊ីរីប្រៀបដូចជាការកំចាត់សម្ព័ន្ធមិត្តម្នាក់របស់អាមេរិកអ៊ីចឹងដែរ។ តែសួរថា ហេតុអ្វីបានជារុស្ស៊ីទើបខ្នះខ្នែងរៀបចំឲ្យមានជំនួបផ្លូវការថ្នាក់ក្រសួងការពារជាតិរវាងតួកគី និងស៊ីរីនៅពេលនេះ និងថា ហេតុអ្វីបានជាតួកគី និងស៊ីរីយល់ព្រមអង្គុយជជែកគ្នាដើម្បីស្វែងការរំកិលរកគ្នាជាថ្មីនៅពេលនេះ?។
តាមពិតទៅ រដ្ឋាភិបាលតួកគី និងរដ្ឋាភិបាលស៊ីរីបានផ្តើមសំឡឹងបញ្ឆិតបញ្ឆៀងដាក់គ្នាតាំងពីឆ្នាំ ២០២១ មកម្ល៉េះ។ ក្នុងខែសីហា ឆ្នាំ ២០២២ តួកគី និងស៊ីរីបានទទួលស្គាល់ពីការមានទំនាក់ទំនងកម្រិតទីភ្នាក់ងារស៊ើបការណ៍សម្ងាត់រវាងគ្នា។ បន្ទាប់មកក្នុងខែវិច្ឆិកា ឆ្នាំ ២០២២ ដដែល ប្រធានាធិបតីតួកគីលោកអ៊ែរដូហ្កានដែលបានចាត់ទុកសមភាគីស៊ីរីលោកអាសាដជាឃាតករបានលើកឡើងពីលទ្ធភាពនៃការមានជំនួបជាមួយលោកអាសាដ។ ដូច្នេះសម្រាប់រុស្ស៊ី វាជាឱកាសមួយដែលគេត្រូវជួយផ្តល់សន្ទុះបន្ថែមទៀតនៅក្នុងនីតិវិធីនៃការរំកិលរកគ្នាជាថ្មីរវាងតួកគី និងស៊ីរី។ ចំណែកអ្នកដែលកំពុងរងគ្រោះកាន់តែខ្លាំងពីការរំកិលរកគ្នារវាងតួកគី និងស៊ីរីពេលនេះ គឺគ្មាននរណាក្រៅពីពួកគួដឌីស្ថានស៊ីរី។
សរុបមក រុស្ស៊ី តួកគី និងស៊ីរីសុទ្ធតែទទួលបានផលចំណេញដូចគ្នាពីភាពល្អូកល្អឺនជាថ្មីរវាងតួកគី និងស៊ីរី។ ទីក្រុងអង់ការ៉ាចង់បណ្តេញពួកគួដឌីស្ថានស៊ីរីឲ្យឆ្ងាយពីព្រំដែនខ្លួនដើម្បីកុំពួកនេះអាចបន្តពង្រឹងទំនាក់ទំនងជាមួយចលនាគួដឌីស្ថាន PKK។ តាំងពីថ្ងៃទី២០ វិច្ឆិកា តួកគីបានបង្កើនការទម្លាក់គ្រាប់បែកលើទីតាំងរបស់ពួកគួដឌីស្ថានស៊ីរី និងបានគំរាមបើកការវាយប្រហារផ្លូវគោក។ ចំណែកទីក្រុងដាម៉ាស់មិនចង់ឃើញដែនដីខ្លួននៅប៉ែកខាងជើងដែលជាជង្រុកប្រេងក្លាយជាតំបន់ស្វយ័តកាន់កាប់ដោយពួកគួដឌីស្ថាន។ រីឯរុស្ស៊ីវិញចង់ប្រាប់ពិភពលោកតាមរយៈការរៀបចំឲ្យមានជំនួបផ្លូវការរវាងតួកគី និងស៊ីរីថា ខ្លួននៅបន្តមានឥទ្ធិពល និងបន្តដើរតួនាទីស្នូលនៅក្នុងបញ្ហាស៊ីរី ទោះបីជាកំពុងជាប់ដៃ និងផុងជើងទៅក្នុងសង្រ្គាមអ៊ុយក្រែនក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ