លោកពូទីន ទៅអ៊ីរ៉ង់ ដើម្បីជជែកពីសំណុំរឿងស៊ីរី និងអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:០៤
តាំងពីបើកប្រតិបត្តិការយោធានៅអ៊ុយក្រែនមក លោកប្រធានាធិបតីរុស្ស៊ី វ្លាដេមៀ ពូទីន កម្រធ្វើដំណើរទៅបរទេសណាស់។ ថ្ងៃអង្គារទី ១៩ កក្កដានេះ ជាលើកពីរ លោក ពូទីន បានចាកចេញពីប្រទេសទៅជួបសម្ព័ន្ធមិត្តអ៊ីរ៉ង់ និងចូលរួមក្នុងជំនួបត្រីភាគី រុស្ស៊ី អ៊ីរ៉ង់ តួកគី ស្តីពីស៊ីរី។ ប៉ុន្តែសង្គ្រាមអ៊ុយក្រែន និងផលរំខានចំពោះសេដ្ឋកិច្ចពិភពលោក បានជ្រៀតចូលមកគ្របជំនួបត្រីភាគីនេះដែរ។
ថ្ងៃអង្គារទី ១៩ កក្កដានេះ ជាលើកពីរ លោក ពូទីន បានចាកចេញពីប្រទេស ដើម្បីបានជួបប្រមុខដឹកនាំអ៊ីរ៉ង់ជាសម្ព័ន្ធមិត្ត និងដើម្បីចូលរួមក្នុងជំនួបត្រីភាគី រុស្ស៊ី អ៊ីរ៉ង់ តួកគី នៅទីក្រុងតេហេរ៉ង់។ ទស្សនកិច្ចរបស់លោកពូទីននៅអ៊ីរ៉ង់ ប្រព្រឹត្តទៅតែប៉ុន្មានថ្ងៃក្រោយទស្សនកិច្ចរបស់ប្រធានាធិបតីអាមេរិកចូបៃដិន នៅអារ៉ាប៊ីសាអូឌីត និងអ៊ីស្រាអែល ដែលជាសត្រូវសួរពូជរបស់អ៊ីរ៉ង់។
លោកបៃដិនទៅដើមបូព៌ា ដើម្បីពង្រឹងសន្តិសុខឱ្យសម្ព័ន្ធមិត្តប្រឈមនឹងការគំរាមកំហែងរបស់អ៊ីរ៉ង់ និងរកវិធីបញ្ចុះផលវិបាកបង្កឡើងដោយសង្គ្រាមនៅអ៊ុយក្រែន។ ឯលោកពូទីន ស្វែងស្វះអភិវឌ្ឍដៃគូសេដ្ឋកិច្ចថ្មីបន្ទាប់ពីរងទណ្ឌកម្មយ៉ាងខ្លាំងពីក្រុមបស្ចិមលោក។ សម្រាប់រុស្ស៊ី ទណ្ឌកម្មរបស់ក្រុមលោកខាងលិចដាក់លើរុស្ស៊ីដែលធ្វើសង្គ្រាមនៅអ៊ុយក្រែន ជាសេចក្តីប្រកាសសង្គ្រាមសេដ្ឋកិច្ចរបស់បស្ចិមលោក ដូច្នេះមូស្គូត្រូវងាកទៅរកដៃគូថ្មីដែលគ្មាននរណាក្រៅពីចិន ឥណ្ឌា និងអ៊ីរ៉ង់នេះទេ។
ក្នុងខណៈដែលចំណងទំនាក់ទំនងរបស់ក្រុមប្រទេសអារ៉ាប់ក្នុងតំបន់ជាមួយអ៊ីស្រាអែល កាន់តែប្រសើរឡើងៗ តាមរយៈសហរដ្ឋអាមេរិក ការខិតខំពង្រឹងចំណងជាយុទ្ធសាស្ត្ររវាងរុស្ស៊ី អ៊ីរ៉ង់ និងតួកគី ក៏ចាប់មានល្បឿនដែរ និងស្តែងឱ្យឃើញតាមរយៈជំនួបត្រីភាគី ដែល ប្រធានាធិបតីរុស្ស៊ី អ៊ីរ៉ង់ និងតួកគី ជួបប្រជុំគ្នានៅថ្ងៃនេះ។
តាមគម្រោង ជំនួបត្រីភាគី ត្រូវផ្តោតជាចម្បង លើវិបត្តិនៅស៊ីរី ព្រោះ រុស្ស៊ី តួកគី និងអ៊ីរ៉ង់ ជាតួអង្គដ៏សំខាន់នៃសង្គ្រាមដែលឆាបឆេះនៅស៊ីរីតាំងពីឆ្នាំ២០១១មក។ មូស្គូនិងតេហេរ៉ង់ គាំទ្ររដ្ឋាភិបាលស៊ីរីរបស់លោក បាស្ហា អែលអាសាដ។ ចំណែកអង់ការ៉ា កាន់ជើងពួកឧទ្ទាមប្រឆាំងនឹងក្រុងដាម៉ាស។ បីប្រទេសនេះធ្លាប់បានផ្តួចផ្តើមនៅឆ្នាំ២០១៧ ឱ្យមានដំណើរការស្វែងរកសន្តិភាពឱ្យស៊ីរី ឬហៅថាកិច្ចព្រមព្រៀង Astana។ ប៉ុន្តែតាំងពីខែឧសភាមក តួកគី បានគំរាមបើកប្រតិបត្តិការយោធានៅភាគខាងជើងស៊ីរី ដើម្បីបង្កើតតំបន់សន្តិសុខ ឱ្យបានចម្ងាយ៣០គីឡូម៉ែត្រពីព្រំដែនរបស់ខ្លួន។ ដោយសំអាងខ្លាចការវាយប្រហារយោធានឹងធ្វើឱ្យស្ថានភាពស៊ីរីកាន់តែដុនដាប រុស្ស៊ីនិងអ៊ីរ៉ង់ជំទាស់តួកគី។ ប្រមុខសាសនាអ៊ីរ៉ង់ អាយ៉ះតូឡា អាលី ខាមេណី បានព្រមានតួកគីមិនឱ្យធ្វើប្រតិបត្តិការយោធានៅស៊ីរីទេ។ តាមពិត តួកគីអាចជំនះ បាន ដូចប្រតិបត្តិការយោធាពីរលើកមុន ប៉ុន្តែតួកគីចង់បានការព្រមព្រៀងជាតាកតិចមួយ ពីដៃគូជាង ដូច្នេះទើបពួកគេត្រូវជួបពិភាក្សានៅថ្ងៃនេះ។
ការនាំចេញធញ្ញជាតិអ៊ុយក្រែន
ប៉ុន្តែដោយគ្មានការភ្ញាក់ផ្អើល សំណុំរឿងអ៊ុយក្រែន ក៏បានចូលមកគ្របជំនួបត្រីភាគី ដោយចៀសមិនរួច។
ជំនួបត្រីភាគីនៅអ៊ីរ៉ង់ថ្ងៃនេះ ជាឱកាសដែល លោកប្រធានាធិបតីតួកគី អ៊ែរដូហ្កាន បានជួបជជែកដោយផ្ទាល់ជាមួយលោកប្រធានាធិបតីរុស្ស៊ី ជាលើកទីមួយ គិតចាប់តាំងពីសង្គ្រាមនៅអ៊ុយក្រែនបានផ្ទុះឡើងនៅថ្ងៃទី ២៤ កុម្ភៈ២០២២។ ជាសមាជិកអង្គការអូតង់ លោកប្រធានាធិបតីតួកគី អ៊ែរដូហ្កាន ប្រឹងរក្សាទំនាក់ទំនងល្អជាមួយរុស្ស៊ី និងបានព្យាយាមដើរតួនាទីជាអន្តរការី ដោះស្រាយវិបត្តិអ៊ុយក្រែន ជាច្រើនលើកច្រើនសា។
បន្តពីអ្វីដែលបានសម្រេចកាលពីថ្ងៃទី ១៣កក្កដា ប្រធានាធិបតីទាំងពីរ គឺលោកអ៊ែរដូហ្កាន និងលោកពូទីន ត្រូវជជែកគ្នាអំពីយន្តការនាំចេញធញ្ញជាតិអ៊ុយក្រែនចំនួន២០លានតោន ដែលជាប់គាំងនៅក្នុងប្រទេសដោយហេតុតែប្រតិបត្តិការយោធារបស់រុស្ស៊ី។ ការចរចា រវាងរុស្ស៊ី អ៊ុយក្រែន តួកគី និងអង្គការសហប្រជាជាតិ ស្តីពីការនាំចេញស្រូវនិងគ្រាប់ធញ្ញជាតិអ៊ុយក្រែន នឹងប្រព្រឹត្តទៅនៅប៉ុន្មានថ្ងៃ ខាងមុខនេះ នៅក្រុងអ៊ីស្តង់ប៊ូលប្រទេសតួកគី។ សម្រួលការនាំចេញធញ្ញជាតិនិងជីររុស្ស៊ី ក៏មានចែងក្នុងកិច្ចចរចាដែរ។ ផលិតផលកសិកម្ម និងធញ្ញជាតិអ៊ុយក្រែននិងរុស្ស៊ី សុទ្ធតែសំខាន់ ក្នុងការបញ្ចៀសវិបត្តិស្បៀងអាហារពិភពលោក។
បើតាមក្រសួងការពារជាតិរុស្ស៊ី គម្រោងកិច្ចព្រមព្រៀងនាំចេញធញ្ញជាតិអ៊ុយក្រែន នឹងចេញជារូបរាងនៅក្នុងពេលឆាប់ៗនេះ។ ហើយមជ្ឈមណ្ឌលសម្របសម្រួលការនាំចេញតាមច្រកសមុទ្ទខ្មៅនឹងបើកទ្វារនៅអ៊ីស្តង់ប៊ូល។
តួកគីកំពុងមានជំហរល្អជាងគេ ក្នុងសំណុំរឿងអ៊ុយក្រែន ដោយអាចដាក់សម្ពាធលើរុស្ស៊ីបានផង លើក្រុមបស្ចិមលោកបានទៀត។ ជាក់ស្តែង មុនចេញទៅអ៊ីរ៉ង់ លោកប្រធានាធិបតីអ៊ែរដូហ្កាន បានគំរាមអូតង់ ថាអាចនឹងមកជំទាស់បេក្ខភាពន័រវែសនិងស៊ុយអែតមិនឱ្យចូលជាសមាជិកអង្គការអូតង់។ ការគំរាមនេះជាការបំពេញចិត្តរុស្ស៊ីនិងអ៊ីរ៉ង់?!
រុស្ស៊ីទិញដ្រូនអ៊ីរ៉ង់ ?
ក្នុងឱកាសបំពេញទស្សនកិច្ចនៅអ៊ីរ៉ង់ លោកពូទីននឹងចូលជួបប្រមុខសាសនា អាយ៉ះតូឡា អាលី ខាមេណី ដ៏មានអំណាចបំផុតនៅអ៊ីរ៉ង់។ ហើយបើតាមអ្នកវិភាគ នៅពេលមានជំនួបទ្វេភាគីរុស្ស៊ី-អ៊ីរ៉ង់ ប្រទេសទាំងពីរច្បាស់ជានឹងជជែកគ្នាអំពីកិច្ចព្រមព្រៀងនុយក្លេអ៊ែរអ៊ីរ៉ង់។ រុស្ស៊ីជាសមាជិកអចិន្ត្រៃយ៍អង្គការសហប្រជាជាតិម្នាក់ដែលបានបង្ហាញវត្តមានក្នុងការចរចារវាងអ៊ីរ៉ង់និងក្រុមមហាអំណាចកាលពីមួយឆ្នាំកន្លះមុន ដើម្បីផ្តល់សន្ទុះដល់កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥។ ម្យ៉ាងវិញទៀត បើតាមសហរដ្ឋអាមេរិក សំណុំរឿងដ៏សំខាន់បំផុតនៃជំនួបទ្វេភាគីរុស្ស៊ីអ៊ីរ៉ង់ ក្រៅក្របខ័ណ្ឌជំនួបត្រីភាគី គឺការលក់ដ្រូនអ៊ីរ៉ង់ទៅឱ្យរុស្ស៊ី។ អ៊ីរ៉ង់បានបដិសេធព័ត៌មាននេះ ឯរុស្ស៊ីវិញសុំមិនធ្វើអត្ថាធិប្បាយ។ ប៉ុន្តែអ្នកវិភាគ អ្នកស្រាវជ្រាវយុទ្ធសាស្ត្រ ជឿថា មានការទិញលក់ដ្រូន ព្រោះអ៊ីរ៉ង់មានបច្ចេកវិទ្យាដែលរុស្ស៊ីពុំទាន់អាចធ្វើកើត។ ដ្រូនអ៊ីរ៉ង់ មានតម្លៃថោក ស្រួលប្រើ និងច្រើន ដែលអាចទាក់ទាញរុស្ស៊ី។ រុស្ស៊ីមានដ្រូនដែរ តែជាដ្រូនសង្កេតការណ៍។ រុស្ស៊ីនៅយឺតយ៉ាវខ្លាំង មិនទាន់មានលទ្ធភាពផលិតដ្រូនសង្កេតការណ៍ផង ប្រយុទ្ធផងបានទេ។ មានតែអ៊ីរ៉ង់ទើបអាចជួយបាន។ បើចង់បានដ្រូនទំនើប គឺត្រូវទិញដ្រូនពីអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ