កូវីដ១៩ ៖ ឆ្លងជំងឺ ឬ ថ្នាំបង្ការ អាចបង្កផលប៉ះពាល់ដល់សុខភាពបន្តពូជ ?
ចុះផ្សាយនៅថ្ងៃ៖
ស្តាប់ - ០៨:៥៥
មិនព្រមចាក់ថ្នាំបង្ការប្រឆាំងនឹងកូវីដ១៩ មិនមែនព្រោះមានគំនិតប្រឆាំងនឹងការរកឃើញវ៉ាក់សាំង ឬប្រឆាំងនឹងការចាក់វ៉ាក់សាំងទេ។ ប៉ុន្តែជួនកាលគូស្រករខ្លះខ្លាចការថ្នាំបង្ការបង្កផលរំខានដល់សុខភាពបន្តពូជ របស់ពួកគេ។តើថ្នាំបង្ការកូវីដមានទំនាក់ទំនងនឹងការមានកូនយ៉ាងណា? ការឆ្លងជំងឺកូវីដ ឬការចាក់វ៉ាក់សាំងប្រឆាំងកូវីដ ពិតជាអាចធ្វើឱ្យស្វាមីភរិយា ពិបាកមានកូនមែនឬ ?
វ៉ាក់សាំងប្រឆាំងកូវីដ នឹងធ្វើឱ្យគូស្រករ អារ គ្មានកូន ! នេះជាពាក្យចចាមអារាម ជាការភ័យព្រួយ និងជាមូលហេតុចំបងមួយ នៃការមិនទៅ ចាក់ថ្នាំបង្ការប្រឆាំងនឹងកូវីដ១៩ ដែលមានផ្សព្វផ្សាយយ៉ាងទូលំទូលាយ តាមប្រព័ន្ធសង្គម តាំងពីឆ្នាំ២០២១មក។
ដើម្បីបកស្រាយបំភ្លឺពាក្យចចាមអារាម និងការព្រួយបារម្ភនេះ អ្នកស្រាវជ្រាវវិទ្យាសាស្ត្របានធ្វើការសិក្សាពីរ។ ការសិក្សាទីមួយ ជារបស់អ្នកស្រាវជ្រាវនៃសាកលវិទ្យាល័យបូស្តុន ដែលបានចេញផ្សាយលទ្ធផលសិក្សានៅថ្ងៃទី ២០មករា ២០២២ នៅក្នុងទស្សនាវដ្តីវិទ្យាសាស្ត្រ American Journal of Epidemiology។ ការតាមដានសិក្សាជីវិតប្តីប្រពន្ធចំនួន២១២៦គូ ដែលចង់បានកូន រយៈពេលមួយឆ្នាំ បានបង្ហាញលទ្ធផលគួរជាទីគាប់ចិត្តថា ថ្នាំបង្ការកូវីដ១៩ មិនបង្កឱ្យមានផលប៉ះពាល់ដល់ការបង្កកំណើតកូនទេ។
អ្វីជាការកត់សម្គាល់ដំបូងគេបង្អស់ គឺគូស្វាមីភរិយាជាអ្នកបានចាក់ថ្នាំបង្ការ និងគូស្វាមីមិនចាក់ថ្នាំបង្ការ មានអត្រាបង្កកំណើតប្រហាក់ប្រហែលគ្នា។ អ្នកស្រាវជ្រាវរកមើលមិនឃើញភាពខុសគ្នាទេ ទោះបីជាគូស្វាមីភរិយា បានចាក់ថ្នាំបង្ការប៉ុន្មានដូសក៏ដោយ ចាក់ប្រភេទថ្នាំបង្ការអ្វីក៏ដោយ (Pfizer Moderna ឬ Johnson&Johnson) ក៏ដោយ និងក្នុងពេលវេលាណាក៏ដោយចុះ។
ស្ត្រីបានចាក់ថ្នាំបង្ការប្រឆាំងនឹងកូវីដ និងស្ត្រីមិនបានចាក់ថ្នាំបង្ការ មានឱកាសបង្កកំណើត និងអាចធ្លាក់ខ្លួនមានគភ៌បានដោយចៃដន្យដូចគ្នា ប្រសិនបើមិនបានការពារ គ្រាន់តែថា ការចាក់ថ្នាំបង្ការកូវីដអាចធ្វើឱ្យស្ត្រីមានវិបត្តិវដ្តរដូវបន្តិច។ ក្រោយពីបានទទួលថ្នាំបង្ការ ស្ត្រីអាចមានរដូវមិនទៀង មួយរយៈ និងជាអាការៈបណ្តោះអាសន្នមួយសំណើរ តែមិនប៉ះពាល់ដល់សមត្ថភាពបង្កកំណើតទេ។
“លទ្ធផលនេះជាការបំពេញទិន្នន័យដែលប្រមូលពីការសិក្សាលើសត្វ ពីការសិក្សាលើអ្នកដែលមានប្រវត្តិអារ និងការសាកល្បងគ្លីនិកនៃវ៉ាក់សាំងប្រឆាំងកូវីដ ឱ្យកាន់តែពេញលេញថាវ៉ាក់សាំងកូវីដ គ្មានពាក់ព័ន្ធនឹងសុខភាពបន្តពូជធ្លាក់ចុះទេ” នេះជាការគូសបញ្ជាក់របស់ក្រុមអ្នកវិទ្យាសាស្ត្រដដែល។
ឆ្លងកូវីដ បុរសចុះថយសមត្ថភាពបង្កកំណើត
ជាទូទៅ អ្នកស្រាវជ្រាវក៏ពុំរកឃើញមានទំនាក់ទំនង រវាងការឆ្លងជំងឺកូវីដ១៩ និងការបង្កកំណើតទេ។ គូស្វាមីភរិយាបានកើតកូវីដ មានឱកាសនិងសំណាងដូចគូស្វាមីភរិយាគ្មានជំងឺនិងគ្មានអង់ទីក័រកូវីដដែរ។ ប៉ុន្តែចំពោះគូស្វាមីភរិយា ដែលមានបុរសជាប្តីបានឆ្លងនិងកើតជំងឺកូវីដ សំណាងបង្កកំណើតបានធ្លាក់ចុះអស់១៨% ក្នុងរយៈពេល៦០ថ្ងៃ គិតចាប់ពីថ្ងៃដែលភាគីបុរសវិជ្ជមានកូវីដ១៩។ លើសពី៦០ថ្ងៃទៅ អត្រាបង្កកំណើតបានវិលមកដូចដើម និងដូចបុរសដែលពុំបានឆ្លងកូវីដវិញហើយ។ នេះសបញ្ជាក់ឱ្យឃើញថា ការឆ្លងកូវីដអាចប៉ះពាល់ដល់ការបង្កកំណើតរបស់បុរសភេទមែន តែជាផលវិបាកក្នុងរយៈពេលខ្លីមួយតែប៉ុណ្ណោះ។ បើតាមអ្នកស្រាវជ្រាវ ផលវិបាករយៈពេលខ្លីនេះ អាចបណ្តាលមកពី ពេលឆ្លងមេរោគ និងពេលមានការបង្ករោគកូវីដ ដែលស្តែងឡើងដោយអាការៈក្តៅខ្លួន មេជីវិតឈ្មោល ស្ពែម៉ាតូហ្សូអ៊ីត ចុះខ្សោយទាំងបរិមាណនិងគុណភាព។ ក្តៅខ្លួនខ្លាំងពេក អាចនឹងធ្វើឱ្យមានការរលាកពងស្វាស និងលិង្គបុរសលែងសូវរឹងល្អ ក៏អាចជាមូលហេតុបន្ទាប់បន្សំមួយទៀត នាំឱ្យអត្រាបង្កកំណើតធ្លាក់ចុះ។
ចំពោះភាគីស្ត្រីវិញ ផលវិបាកបង្កឡើងដោយការឆ្លងកូវីដ លើការបង្កកំណើតមានតិចតួចណាស់ គឺបានត្រឹមធ្វើឱ្យស្ត្រីអ្នកចង់បានកូននោះមានវដ្តរដូវប្រែប្រួលបន្តិចបន្តួច លែងសូវទៀង អាចយឺតជាងធម្មតាមួយថ្ងៃជាមធ្យម ឬមានការធ្លាក់រដូវច្រើនខុសប្លែកពីធម្មតា តែមិនប៉ះពាល់ដល់សមត្ថភាពបង្កកំណើតទេ។ ការប្រែប្រួលវដ្តរដូវបែបនេះ ទំនងជាមិនពាក់ព័ន្ធនឹងថ្នាំបង្ការទេ តែដោយសារកម្លាំងស្ត្រេសច្រើនជាង។ រាល់ការប្រែប្រួលវដ្តរដូវ ក្រោមនិងលើស ៨ថ្ងៃ ត្រូវបានក្រុមអ្នកវេជ្ជសាស្ត្រចាត់ទុកជាករណីធម្មតា។
ការសិក្សាទីពីរ ផ្តោតទៅលើគូស្វាមីភរិយា ដែលចង់បានកូន តែត្រូវការជំនួយវេជ្ជសាស្ត្រក្នុងការបង្កកំណើតកូន។ ចេញផ្សាយនៅថ្ងៃទី២៥មករា ក្នុងទស្សនាវដ្តីសុខភាព Obstetrics & Gynecology ការសិក្សារបស់អ្នកស្រាវជ្រាវនៃសាលាវេជ្ជសាស្ត្រ Icahn នៅមន្ទីរពេទ្យស៊ីណៃក្រុងញូវយ៉ក បានប្រៀបធៀបអត្រាមានកូន ពរពោះ និងរលូតកូនរបស់ប្តីប្រពន្ធចំនួន៤០០គូ បានចាក់ថ្នាំបង្ការកូវីដ នឹងក្រុមអ្នកមិនចាក់ថ្នាំចំនួន ១៧០០គូ។ គូស្វាមីភរិយាចំនួនពាក់កណ្តាលប្រើជំនួយមេជីវិតបង្កក បូកនឹងការប្រើថ្នាំព្យាបាលបំប៉នមេជីវិតឱ្យលូតលាស់ល្អ។ ជាលទ្ធផល អត្រាបង្កកំណើតរបស់ក្រុមទាំងពីរមានកំរិតប្រហាក់ប្រហែលគ្នា។ ការសិក្សារកពុំឃើញភាពខុសគ្នាអ្វីគួរសម្គាល់ឡើយ ទាំងខាងគុណភាពមេជីវិត ទាំងនៅពេលបំប៉នមេជីវីត ឬនៅពេលអំប្រីយ៉ុងកូនចាប់លូតលាស់ និងពេលពរពោះ។ លទ្ធផល នេះជាការផ្តល់ទំនុកចិត្តនេះបន្ថែមលើការសិក្សាមុនៗដែលបង្ហាញការចាក់វ៉ាក់សាំងប្រឆាំងកូវីដ១៩ មិនបង្កើនហានិភ័យនៃការរលូតកូនទេ។
ផ្ទុយទៅវិញប្រសិនបើស្ត្រីមានផ្ទៃពោះ បានឆ្លងកូវីដ នោះទើបមានហានិភ័យកើតកូនមុនខែ កូនកើតមកស្លាប់ភ្លាម ឬបានតែប៉ុន្មានថ្ងៃក៏ស្លាប់ទៅវិញ។
ចំណេញទាំងម្តាយទាំងកូន
ស្ត្រីមានផ្ទៃពោះ ត្រូវបានគេចាត់ទុកជាជំពូកអ្នកមានហានិភ័យខ្ពស់។ ស្ត្រីមានផ្ទៃពោះមិនចាក់វ៉ាក់សាំងប្រឆាំងកូវីដ ងាយធ្លាក់ខ្លួនឈឺធ្ងន់ចូលព្យាបាលក្នុងមន្ទីរពេទ្យខ្លួនឯងហើយ អាចប្រឈមនឹងគ្រោះកើតកូនមុនខែទៀត។ អ្នកស្រាវជ្រាវសូមណែនាំហើយណែនាំទៀត ឱ្យស្ត្រីមានគភ៌ ចាក់ថ្នាំបង្ការ។ បើតាមទិន្នន័យសិក្សារបស់ក្រុមគ្រូពេទ្យបារាំង ថ្នាំបង្ការគ្មានគ្រោះថ្នាក់សម្រាប់ស្ត្រីអ្នកពរពោះ និងចំពោះទារកក្នុងផ្ទៃទេ ហើយក៏គ្មានបន្សល់ទុកនូវផលរំខានបន្ទាប់បន្សំទៀត។ គឺមានតែការផ្តល់ផលល្អវិជ្ជមានសម្រាប់ម្តាយនិងកូនតែប៉ុណ្ណោះ។
ថ្នាំបង្ការប្រភេទ ARN មិនអាចឆ្លងរនាំងទឹកភ្លោះទេ។ ទារកក្នុងផ្ទៃមិនទទួលវ៉ាក់សាំងដោយផ្ទាល់ឡើយ។ តែប្រព័ន្ធអង់ទីក័ររបស់ម្តាយអាចឆ្លងរនាំងទឹកភ្លោះ។ ដូច្នេះ ទារកក្នុងផ្ទៃបានទទួលការការពារ និងផលល្អ ដោយមានប្រព័ន្ធការពារខ្លួនពីជំងឺកូវីដបាន ពីម្តាយដែលបានចាក់ថ្នាំបង្ការ។ បន្ថែមពីលើការពារម្តាយនិងទារក ក្នុងពេលពរពោះ អង់ទីក័រម្តាយបានមកពីការចាក់វ៉ាក់សាំង នឹងបន្តការពារទារកនៅពេលកើតមកបានជាច្រើនសប្តាហ៍ទៀត។ ហើយការការពារបានកាន់តែវែងប្រសិនបើម្តាយបំបៅដោះកូន។ នេះគឺជាការពន្យល់លម្អិតរបស់លោកវេជ្ជបណ្ឌិត Paul Guerby គ្រូពេទ្យឯកទេសសម្ភពនិងរោគស្ត្រី នៅ មន្ទីរពេទ្យក្រុងទូលូ ប្រទេសបារាំង។ មន្ទីរពេទ្យដែលបានទទួលស្ត្រីមានផ្ទៃពោះកើតកូវីដដល់ទៅ៣០នាក់ កាលពីខែធ្នូចុងឆ្នាំ២០២១ និងដែលសុទ្ធតែមិនបានចាក់វ៉ាក់សាំង ដោយយល់ខុសខ្លាចប៉ះពាល់ដល់សុខភាពទារកក្នុងផ្ទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ