ហ្វេសប៊ុក និងយូធូបរងការចោទប្រកាន់ថា បិទខ្ទប់ខ្លឹមសារបញ្ចេញមតិដែលរិះគន់រដ្ឋវៀតណាម
ចុះផ្សាយនៅថ្ងៃ៖
ស្តាប់ - ០៧:២០
អង្គការការពារសិទ្ធិមនុស្ស Amnesty International បានបរិហារបណ្តាញសង្គមហ្វេសប៊ុក និងក្រុមហ៊ុនGoogle ថា បានក្លាយជាតំបន់គ្មានសិទ្ធិមនុស្ស នៅប្រទេសវៀតណាម។ នៅក្នុងរបាយការណ៍ កម្រាស ៧៨ទំព័រ ដែលចុះផ្សាយនៅថ្ងៃអង្គារទី ១ ធ្នូ អង្គការបានចោទប្រកាន់ក្រុមហ៊ុនហ្វេសប៊ុក និងGoogle ថា បានចូលដៃ ចូលជើងជាមួយអាជ្ញាធរកុម្មុយនិស្តវៀតណាម ក្នុងការបិទខ្ទប់ សេរីភាពបញ្ចេញមតិរបស់ក្រុមអ្នកប្រឆាំង វៀតណាម។
ធ្លាប់ជាក្តីសង្ឃឹមក្នុងជំរុញ សេរីភាព បញ្ចេញមតិនៅ ប្រទេសកុម្មុយនិស្តវៀតណាម ហ្វេសប៊ុក និងGoogle ត្រូវបានអង្គការការពារសិទ្ធិមនុស្ស ចោទប្រកាន់នៅថ្ងៃអង្គារនេះថា បានក្លាយជាតំបន់គ្មានសិទ្ធិមនុស្ស។
នៅក្នុងរបាយការណ៍ ដែលបានមកពីការជួបសម្ភាសន៍ជាមួយ សកម្មជនសិទ្ធិមនុស្សវៀតណាម ជាង ១០នាក់ ដែលមានតាំងពីអ្នកកាសែត មេធាវី អតីតអ្នកទោសនយោបាយ អង្គការការពារសិទ្ធិមនុស្ស Amnesty International បានចោទប្រកាន់ក្រុមហ៊ុន ហ្វេសប៊ុក និងGoogle ថា បានយល់ព្រម ឱនក្បាល ធ្វើតាមការចង់បានរបស់រដ្ឋអំណាចផ្តាច់ការ វៀតណាម។
តាមអង្គការការពារសិទ្ធិមនុស្ស ក្រុមហ៊ុនហ្វេសប៊ុកបានសន្យា ប្រែក្លាយបណ្តាញ សង្គមជាកន្លែងកន្លែងបញ្ចេញមតិដោយសេរី។ ប៉ុន្តែ នៅ ប្រទេសវៀតណាម ជាទីដែលអាជ្ញាធររឹតបន្តឹងលើសំឡេងអ្នកប្រឆាំងហើយនោះ ក្រុមហ៊ុនហ្វេសប៊ុក និងGoogle មិនបានតស៊ូ នឹងការដាក់សម្ពាធរបស់រដ្ឋអំណាចប៉ុន្តែ ផ្ទុយទៅវិញ បែរជាបានចូលរួមជាមួយ អាជ្ញាធរវៀតណាមទៅវិញ។
សកម្មជនវៀតណាម ជាច្រើននាក់បាននិយាយប្រាប់អង្គការការពារសិទ្ធិមនុស្សថា អត្ថបទ ពាក្យ Comment របស់ពួកគេ ត្រូវបានក្រុមហ៊ុនហ្វេសប៊ុក និងយូធូប ដែលជាកម្មសិទ្ធិរបស់Google បិទខ្ទប់មិនឲ្យចុះផ្សាយ មើលឃើញ នៅវៀតណាម។ ឧទាហរណ៍ អ្នកកាសែត វៀតណាមម្នាក់ បានបង្ហោះអត្ថបទរបស់ខ្លួន ស្តីពីរឿងអាស្រូវពុករលួយ នៅវៀតណាម ប៉ុន្តែ ក្រោយមក គេបានទទួលសារ បញ្ជាក់ពីហ្វេសប៊ុកថា អត្ថបទរបស់គាត់ ត្រូវ បិទខ្ទប់ មិនអាចអាន បាន នៅប្រទេសវៀតណាម ដោយសារតែច្បាប់រឹតបន្តឹងក្នុងស្រុក។ ក្រុមហ៊ុនចង់និយាយយោងដល់មាត្រាទី ១១៧ នៃច្បាប់ ដែលបានហាមមិនឲ្យប្រជាជនវៀតណាម បង្កើតរឿង ផ្សព្វផ្សាយឃោសនា ប្រឆាំងរដ្ឋាភិបាល។
នៅក្នុងការចុះផ្សាយរបស់កាសែតរដ្ឋវៀតណាម កាលពីខែមុន រដ្ឋមន្រ្តីក្រសួងព័ត៌មានវៀតណាម បានបង្ហាញថា ក្រុមហ៊ុនបច្ចេកវិទ្យា បានអនុវត្ត តាមការទាមទាររបស់រដ្ឋាភិបាល ដែលចង់ ឲ្យដកចោល ខ្លឹមសារ ព័ត៌មានអាក្រក់ ការឃោសនាប្រឆាំងគណបក្ស និងរដ្ឋអំណាចវៀតណាម។ ហ្វេសប៊ុក បានអនុវត្តធ្វើតាមដល់ទៅ៩៥% ចំណែក យូធូបរបស់Google គោរពបានប្រមាណ ៩០%។
តាមរបាយការណ៍តម្លាភាពរបស់ក្រុមហ៊ុនហ្វេសប៊ុក គិតត្រឹមពាក់កណ្តាលឆ្នាំ ២០២០ ក្រុមហ៊ុនបានបិទខ្ទប់ខ្លឹមសារចុះផ្សាយ ប្រមាណ ៨៣៤។ ក្រុមហ៊ុនGoogle វិញ ធ្លាប់អះអាងថា នៅ៦ខែចុងឆ្នាំ មុន ក្រុមហ៊ុនបានទទួលពាក្យទាមទារ ចំនួន ៧៤ ពីរដ្ឋាភិបាល ដើម្បី លុបចោល ខ្លឹមសារដែលរិះគន់ រដ្ឋាភិបាលវៀតណាម ដែលនៅក្នុងនោះមានផងដែរវីដេអូយូធូបជាង ៣ពាន់ដែលរិះគន់បក្សកុម្មុយនិស្ត និងរដ្ឋាភិបាល វៀតណាម។ សម្រាប់Google ការទាមទាររបស់រដ្ឋាភិបាលវៀតណាម បានកើនឡើងជិតពាក់កណ្តាល បើប្រៀបធៀបនឹងរយៈពេល ៦ខែដើមឆ្នាំ ២០១៩។
ហ្វេសប៊ុករកបានប្រាក់ចំណូល១ពាន់លានដុល្លារ ពី សេវារបស់ខ្លួននៅ វៀតណាម
អ្នកនាំពាក្យរបស់ក្រុមហ៊ុនហ្វេសប៊ុក បាននិយាយប្រាប់ទីភ្នាក់ងារព័ត៌មានបារាំងAFP នៅថ្ងៃនេះថា ក្រុមហ៊ុនបានប្រឹងប្រែងធ្វើអស់សមត្ថភាព ដើម្បីការពារសេរីភាពបញ្ចេញមតិនៅ ក្នុងពិភពលោក។ ប៉ុន្តែ នៅក្នុងករណីវៀតណាម ក្រុមហ៊ុនបានទទួលការដាក់សម្ពាធកាន់តែខ្លាំងពីរដ្ឋាភិបាលវៀតណាម នៅ ប៉ុន្មានខែមកនេះ។
ទីភ្នាក់ងារព័ត៌មានអង់គ្លេស បានចុះផ្សាយនៅខែមុនថា អាជ្ញាធរវៀតណាម ធ្លាប់បានគំរាមបិទហ្វេសប៊ុក មិនឲ្យមាននៅវៀតណាម បើសិនក្រុមហ៊ុន មិនព្រម គោរពច្បាប់ក្នុងស្រុក ដោយរឹតបន្តឹង បិទខ្ទប់សារនយោបាយ ដែលរិះគន់រដ្ឋាភិបាលវៀតណាម នៅលើបណ្តាញសង្គម។
នៅ ខែមេសា កន្លងទៅ ហ្វេសប៊ុកបានប្រកាសយល់ព្រម ធ្វើតាមការទាមទាររបស់រដ្ឋាភិបាលវៀតណាម ដោយបង្កើន ការទប់ស្កាត់ លុបចោលព័ត៌មានអាក្រក់ ដែលមានគោលដៅ ឃោសនា ប្រឆាំង គណបក្ស និងរដ្ឋវៀតណាម។ ជារួម ហ្វេសប៊ុកបានទទួលស្គាល់ថា ខ្លួនបានបិទខ្ទប់ មិនចុះផ្សាយ ខ្លឹមសារជាច្រើន ដែលអាជ្ញាធរវៀតណាមចាត់ទុក ថា ខុសច្បាប់។
ហ្វេសប៊ុក Google ដែលជាម្ចាស់របស់យូធូបបានយល់ព្រម ធ្វើតាមអាជ្ញាធរវៀតណាម ដោយបំភ្លេចចោល សេរីភាពបញ្ចេញមតិ ដើម្បី ជាថ្នូរនឹងប្រយោជន៍សេដ្ឋកិច្ចដែលបានមកអ្នកប្រើប្រាស់វៀតណាម។ នៅ វៀតណាម ជាទីដែលអ្នកប្រើប្រាស់ហ្វេសប៊ុក មានចំនួន ៥៣លាននាក់ គឺច្រើនជាងពាក់កណ្តាលចំនួនប្រជាជនសរុប ហ្វេសប៊ុករកប្រាក់ចំណូល បាន ១ពាន់លានដុល្លារ នៅ ឆ្នាំ ២០១៨ ពោលគឺស្មើនឹង ១ភាគ៣នៃប្រាក់ចំណូលសរុបដែលហ្វេសប៊ុករកបានពីតំបន់អាស៊ីអាគ្នេយ៍។ ក្នុងរយៈពេលដូចគ្នា Google វិញ រកប្រាក់ចំណេញបាន៤៧៥លានដុល្លារ។ ដោយសារតែទីផ្សារវៀតណាមជាកន្លែងដែលក្រុមហ៊ុនរកលុយបានច្រើនពីសេវាផ្សាយពាណិជ្ជកម្ម ដូច្នេះ ហ្វេសប៊ុក ក៏ដូចជា Google មិនងាយនឹង ព្រលែងចោល ផលចំណេញរបស់ខ្លួន ដើម្បីបុព្វហេតុការពារ ជំរុញ សិទ្ធិសេរីភាពបញ្ចេញមតិអ្វីនោះទេ។
Amnesty International អ្នកទោសមនសិការវៀតណាម កើនឡើងដល់កម្រិតមួយខ្ពស់
សម្រាប់អង្គការការពារសិទ្ធិមនុស្ស Amnesty International បើទោះជាប្រកាសធ្វើកំណែទម្រង់ សេដ្ឋកិច្ច និងបើកចំហរ សម្រាប់ការសន្ទនាក្នុងសង្គម ប៉ុន្តែ បក្សកុម្មុយនិស្តវៀតណាម នៅតែក្តោបក្តាប់ជាប់ ប្រព័ន្ធផ្សព្វផ្សាយ បិទសិទ្ធសេរីភាព មិនឲ្យមានក្រុមប្រឆាំង និងបង្រ្កាប សកម្មជន អ្នកប្រឆាំង។ គេវាយតម្លៃថា អាជ្ញាធរវៀតណាមបានបង្កើនការបង្រ្កាប លើអ្នកប្រឆាំង រិះគន់ នៅមុនពេលដែលបក្សកុម្មុយនិស្តត្រូវជួបប្រជុំធ្វើមហាសន្និបាត នៅឆ្នាំក្រោយ។តាមអង្គការការពារសិទ្ធិមនុស្ស ដែលបានចាប់សិក្សាបញ្ហាសិទ្ធិមនុស្សនៅ វៀតណាម នៅ ឆ្នាំ ១៩៩៦ ចំនួន អ្នកទោសនយោបាយ ឬអ្នកទោសមនសិការនៅ វៀតណាមបានកើនឡើងដល់កម្រិតមួយខ្ពស់។ របាយការណ៍របស់អង្គការ Amnesty International បានបង្ហាញ អ្នកទោសមនសិកាចំនួន ១៧០នាក់ ដែលនៅក្នុងនោះ ៧០នាក់កំពុង ជាប់ទោសក្នុងពន្ធនាគារ ដោយសារតែសារចុះផ្សាយរបស់ពួកគេនៅលើហ្វេសប៊ុក និង យូធូបរបស់Google។
សកម្មជនដើម្បី សិទ្ធិមនុស្សនៅ វៀតណាមបាននិយាយថា ពួកគេ រងការវាយប្រហារ យាយី ទាំងនៅក្នុងជីវិតពិត និង នៅ ក្នុងបណ្តាញសង្គម។ នៅក្នុងជីវិតពិត ពួកគេត្រូវ ប៉ូលិស ឬជនមិនស្គាល់មុខ វាយធ្វើបាប។ ចំណែកនៅក្នុងបណ្តាញសង្គមវិញ ពួកគេ ត្រូវ ដៃជើង របស់រដ្ឋាភិបាល ចាំតែសរសេរ ជេរ វាយប្រហារ បណ្តុះបង្អាប់។ សកម្មជននៅ វៀតណាម ចង់សំដៅ ដល់មនុស្ស ប្រមាណ ១ម៉ឺននាក់ ដែលកងទ័ពវៀតណាមបានរើសបញ្ចូលសម្រាប់អង្គភាព កងទ័ពលេខ ៤៧ ដែលមាននាទី តាមដានការសរសេរបង្ហោះផ្សាយទាំងឡាយណាដែលរិះគន់រដ្ឋាភិបាល បក្សកុម្មុយនិស្តវៀតណាម។
បើតាម អង្គការការពារសិទ្ធិមនុស្ស រដ្ឋាភិបាលវៀតណាមបានបើកការបង្រ្កាបមានកាន់តែខ្លាំង នៅលើបណ្តាញសង្គម គឺចាប់តាំងពីផ្ទុះកើតមាន ជម្លោះដីធ្លី នៅ Dong Tam ជាទីដែលប្រជាជនងើបតវ៉ាប្រឆាំង កងទ័ពវៀតណាមដែលបានសម្រេចសាងសង់ព្រលានយន្តហោះយោធានៅលើដីប្រជាជន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ