កូវីដ១៩៖អង់គ្លេសជាប្រទេសទី១ ក្នុងលោកដែលបានអនុញ្ញាតឲ្យប្រើវ៉ាក់សាំងបង្ការកូវីដ១៩
ចុះផ្សាយនៅថ្ងៃ៖
ស្តាប់ - ០៧:១៧
នៅថ្ងៃពុធ ទី២ ធ្នូ ប្រទេសអង់គ្លេសបានអនុញ្ញាតឲ្យប្រើវ៉ាក់សាំងបង្ការកូវីដ១៩ ដែលផលិតដោយមន្ទីរពិសោធន៍អាមេរិក អាល្លឺម៉ង់ Pfizer/ BioNTech។ អង់គ្លេសនឹងទទួលវ៉ាក់សាំងចាប់ពីសប្តាហ៍ក្រោយទៅ នេះជាការបញ្ជាក់របស់អ្នកនាំពាក្យរដ្ឋាភិបាលអង់គ្លេស។ លោកអាល់ប៊ែរ បូឡា ប្រធានមន្ទីរពិសោធន៍ Pfizer បានសាទរចំពោះការអនុញ្ញាតរបស់អង់គ្លេសដោយចាត់ទុកជាការបោះជំហានជាប្រវត្តិសាស្រ្តនៅក្នុងយុទ្ធនាការប្រយុទ្ធប្រឆាំងនឹងកូវីដ១៩។ គួរបញ្ជាក់ថា អង់គ្លេសជាប្រទេសអឺរ៉ុបដែលបានរងគ្រោះខ្លាំងជាងគេដោយកូវីដ១៩ ជាមួយនឹងអ្នកស្លាប់ជាង ៥៩ ០០០នាក់។ ក្រៅពីអង់គ្លេស នៅមានប្រទេសផ្សេងទៀត ពិសេសសហរដ្ឋអាមេរិក និងប្រទេសអឺរ៉ុបកំពុងបន្តពិនិត្យលើសំណើសុំរបស់មន្ទីរពិសោធន៍ Pfizer/ BioNTech និងមន្ទីរពិសោធន៍អាមេរិក Moderna។
ការអុនញ្ញាតឲ្យប្រើវ៉ាក់សាំងបង្ការកូវីដ១៩ របស់ប្រទេសអង់គ្លេសពេលនេះបានធ្វើឡើង ក្រោយពីក្រុមអ្នកជំនាញនៃទីភ្នាក់ងារឱសថអង់គ្លេសបានសិក្សា និងវិភាគយ៉ាងស៊ីជ្រៅអស់ពេលជាច្រើនខែលើទិន្នន័យវ៉ាក់សាំងបង្ការកូវីដ១៩ របស់មន្ទីរពិសោធន៍អាមេរិក អាល្លឺម៉ង់Pfizer/ BioNTech។ លទ្ធផលនៃការសិក្សា វិភាគរបស់ទីភ្នាក់ងារឱសថអង់គ្លេសបានបង្ហាញថា វ៉ាក់សាំងបង្ការកូវីដ១៩ ផលិតដោយមន្ទីរពិសោធន៍អាមេរិក អាល្លឺម៉ង់Pfizer/ BioNTech ពិតជាបានឆ្លើយតបត្រឹមត្រូវទៅនឹងបទដ្ឋានសុវត្ថិភាព គុណភាព និងប្រសិទ្ធិភាព។ តែទីភ្នាក់ងារឱសថអង់គ្លេសមិនបានបញ្ជាក់ពីអត្រាសុវត្ថិភាព គុណភាព និងប្រសិទ្ធិភាពរបស់វ៉ាក់សាំងបង្ការកូវីដ១៩ ផលិតដោយPfizer/ BioNTech ទេ។
មន្ទីរពិសោធន៍អាមេរិក អាល្លឺម៉ង់មួយនេះធ្លាប់បានបញ្ជាក់ក្នុងខែវិច្ឆិកាថា វ៉ាក់សាំងរបស់ខ្លួនមានប្រសិទ្ធិភាពដល់ទៅ ៩៥%។ គួរបញ្ជាក់ថា មុននឹងមន្ទីរពិសោធន៍ណាមួយដាក់ពាក្យសុំប្រទេសណាមួយដើម្បីប្រើ និងចែកចាយវ៉ាក់សាំងរបស់ខ្លួន មន្ទីរពិសោធន៍នោះត្រូវបញ្ជូនទិន្នន័យវ៉ាក់សាំងទៅឲ្យរដ្ឋអំណាចសុខាភិបាលក្នុងប្រទេសនោះសិក្សា វិភាគជាមុនសិនដើម្បីចង់ដឹងពីគុណភាព សុវត្ថិភាព និងប្រសិទ្ធិភាពរបស់វ៉ាក់សាំង រួមទាំងផលវិបាលដែលអាចកើតមានចំពោះអ្នកដែលត្រូវគេចាក់វ៉ាក់សាំងក្នុងរយៈពេលខ្លី និងរយៈពេលយូរ។
រដ្ឋាភិបាលអង់គ្លេសបានបញ្ជាក់ថា ខ្លួននឹងទទួលវ៉ាក់សាំងចាប់ពីសប្តាហ៍ក្រោយទៅ ហើយយុទ្ធនាការចាក់វ៉ាក់សាំងក៏អាចចាប់ផ្តើមពីសប្តាហ៍ក្រោយទៅដែរ។ តែយុទ្ធនាការចាក់វ៉ាក់សាំងនឹងត្រូវធ្វើជាដំណាក់ការដោយផ្តើមចាក់មុនគេលើក្រុមបុគ្គលិកពេទ្យ ក្រុមមនុស្សចាស់ស្នាក់នៅអាគារមនុស្សចាស់ និងប្រភេទមនុស្សដែលងាយរងគ្រោះខ្លាំង។ ជំហានបន្ទាប់ គឺសម្រាប់ពលរដ្ឋអង់គ្លេសទូទៅ។
បារាំងផ្តើមយុទ្ធនាការចាក់វ៉ាក់សាំងជាសាធារណៈនៅចន្លោះខែមេសា និងមិថុនា ឆ្នាំ ២០២១
នៅសហរដ្ឋអាមេរិក ទីភ្នាក់ងារឱសថកំពុងពិនិត្យលើសំណើសុំឲ្យប្រើ និងចែកចាយវ៉ាក់សាំងបង្ការកូវីដ១៩ ពីមន្ទីរពិសោធន៍ចំនួនពីរ គឺមនី្ទរពិសោធន៍អាមេរិក អាល្លឺម៉ង់ Pfizer/ BioNTechនិងមន្ទីរពិសោធន៍អាមេរិក Moderna។ បើមានការអនុញ្ញាតពីទីភ្នាក់ងារឱសថអាមេរិកនាប៉ុន្មានថ្ងៃខាងមុខ វ៉ាក់សាំងបង្ការកូវីដ១៩ របស់មន្ទីរពិសោធន៍ទាំងពីរអាចមានចាប់ពីខែធ្នូ ឆ្នាំ ២០២០ទៅ ហើយយុទ្ធនាការចាក់វ៉ាក់សាំងក៏អាចចាប់ផ្តើមភ្លាមដែរ។ ក៏ដូចជាប្រទេសអង់គ្លេស យុទ្ធនាការចាក់វ៉ាក់សាំងបង្ការកូវីដ១៩ អាចនឹងធ្វើឡើងជាដំណាក់ការ។
ក្រុមអ្នកជំនាញនៃមជ្ឈមណ្ឌលបង្ការ និងប្រឆាំងជំងឺបានផ្តល់អនុសាសន៍ឲ្យ ចាក់លើក្រុមបុគ្គលិកពេទ្យ និងក្រុមមនុស្សចាស់ដែលស្នាក់នៅតាមអាគារមនុស្សចាស់មុនគេ។ តែអ្នកដែលសម្រេចចុងក្រោយ គឺរដ្ឋនីមួយៗ។ នៅអាមេរិក ក្រុមបុគ្គលិកពេទ្យ និងក្រុមមនុស្សចាស់ដែលស្នាក់នៅតាមអាគារមនុស្សចាស់បូកបញ្ចូលគ្នាមានគ្នាប្រមាណជា ២៤លាននាក់។ ជាមួយនឹងវ៉ាក់សាំងរបស់Pfizer/ BioNTechនិង Modernaសហរដ្ឋអាមេរិកមានបរិមាណវ៉ាក់សាំងគ្រប់គ្រាន់សម្រាប់ចាក់ទៅលើមនុស្សទាំង ២៤លាននាក់មុនគេនៅក្នុងខែធ្នូ ឆ្នាំ ២០២០ នេះ។
នៅអឺរ៉ុបវិញ ទីភ្នាក់ងារឱសថអឺរ៉ុបនឹងប្រកាសនៅថ្ងៃទី២៩ ធ្នូលើសំណើសុំរបស់មនី្ទរពិសោធន៍អាមេរិក អាល្លឺម៉ង់ Pfizer/ BioNTechនិងយ៉ាងយូរបំផុតត្រឹមថ្ងៃទី ១២ មករាឆ្នាំ ២០២១ សម្រាប់សំណើសុំរបស់មន្ទីរពិសោធន៍អាមេរិក Moderna។ ទោះជាយ៉ាងនេះក្តី ប្រទេសអឺរ៉ុបនីមួយៗកំពុងត្រៀមខ្លួន និងត្រៀមខ្លួនរួចរាល់ដើម្បីបើកយុទ្ធនាការចាក់វ៉ាក់សាំងបង្ការកូវីដ១៩ ចាប់ពីដើមឆ្នាំ ២០២១ ទៅ។ ជាក់ស្តែងបារាំង ប្រធានាធិបតីលោកម៉ាក្រុងបានបញ្ជាក់ថា នៅក្នុងជំហានដំបូងចាប់ពីដើមខែមករា ឆ្នាំ ២០២១ ទៅ គឺចាក់លើក្រុមបុគ្គលិកពេទ្យ ក្រុមមនុស្សចាស់ និងក្រុមមនុស្សងាយរងគ្រោះ។ បន្ទាប់មកនៅចន្លោះខែមេសា និងខែមិថុនា គឺចាក់ក្រោមទ្រង់ទ្រាយធំសម្រាប់ពលរដ្ឋទាំងអស់។ តែលោកម៉ាក្រុងបានបញ្ជាក់រួចហើយថា ការចាក់វ៉ាក់សាំងបង្ការកូវីដ១៩ នេះមិនមែនជាកាតព្វកិច្ចទេ មានន័យថា អ្នកណាចង់ចាក់ក៏បាន មិនចង់ចាក់ក៏បាន៕
មានវ៉ាក់សាំងមិនមែនមានន័យស្មើនឹងការរលាយបាត់កូវីដ១៩
លោក Tedrons អគ្គនាយកអង្គការសុខភាពពិភពធ្លាប់បានបញ្ជាក់ច្បាស់ៗថា វ៉ាក់សាំងតែមួយមុខមិនគ្រប់គ្រាន់ដើម្បីបញ្ចប់ជំងឺកូវីដ១៩ ទេ។ លោក Tedros បានរម្លឹកកាលពីថ្ងៃទី១៦ វិច្ឆិកាថា មនុស្សទាំងអស់ត្រូវធ្វើតេស្តិ៍ ដាក់នៅដាច់ពីគេឯង និងព្យាបាល។ ទាំងអស់គ្នាត្រូវមានការប្រយ័ត្នប្រយែងជានិច្ច ហើយបើមានករណីទាក់ទងជាមួយអ្នកមានកូវីដ១៩ គឺត្រូវធ្វើតេស្តិ៍រកកូវីដ១៩ និងត្រូវធ្វើចត្តាឡីសក។ ជារួម មានវ៉ាក់សាំងមិនមែនមានន័យស្មើនឹងការរលាយបាត់កូវីដ១៩ ឡើយ។
មេរៀនដែលគេធា្លប់ប្រទះកន្លងមក គឺទាក់ទងនឹងវ៉ាក់សាំងបង្ការជំងឺកញ្ជ្រិលដែលត្រូវបានគេចាត់ទុកជាវ៉ាក់សាំងមួយមានប្រសិទ្ធិភាពខ្ពស់។ តែគេបានកត់សម្គាល់ឃើញពីការបន្តមានផ្ទុះជំងឺកញ្រ្ជិលនៅក្នុងប្រទេសជាច្រើន។ ម្យ៉ាងទៀត វ៉ាក់សាំងបង្ការកូវីដ១៩ ដែលទើបរកឃើញពេលនេះនៅមិនទាន់អាចបំពេញតម្រូវការឲ្យមនុស្សលោកទាំងអស់ក្នុងពេលតែមួយបានទេ។ ក្នុងពេលបន្តរង់ចាំមានវ៉ាក់សាំងសម្រាប់មនុស្សលោកគ្រប់រូប វីរុសកូវីដ១៩ កំពុងបន្តធ្វើចរាចរណ៍។ ដូច្នេះវិធានការនៅចំពោះមុខដែលកំពុងបន្តមានប្រសិទ្ធិភាព គឺពាក់ម៉ាស់ លាងដៃញឹកញាប់ រក្សាគម្លាតសុវត្ថិភាព ឬការចៀសវាងជួបជុំគ្នាច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ