វ៉ាក់សាំងកូវីដ១៩៖ អាជ្ញាធរឱសថអង់គ្លេស ប្រើនីតិវិធីបន្ទាន់ ដើម្បីពន្លឿនការអនុញ្ញាត
អាជ្ញាធរគ្រប់គ្រងឱសថអង់គ្លេស បានចាប់ផ្តើមប្រើនីតិវិធីបន្ទាន់ ដើម្បីផ្ទៀងផ្ទាត់ទិន្នន័យ និងលទ្ធផលនៃការសាកល្បងថ្នាំវ៉ាក់សាំងប្រឆាំងកូវីដ១៩ របស់មន្ទីរពិសោធន៍ AstraZeneca។ ការសម្រេចធ្វើបែបនេះ គឺដើម្បីពន្លឿនពេលវេលា ឈានទៅអនុញ្ញាតភ្លាមៗ ឲ្យចាប់ផ្តើមផលិតវ៉ាក់សាំង ក្នុងករណីដែលមានលទ្ធផលគាប់ប្រសើរ។ សូមបញ្ជាក់ថា គិតមកទល់ពេលនេះ គម្រោងវ៉ាក់សាំងប្រឆាំងកូវីដ១៩ ដែលផលិតដោយពិសោធន៍AstraZeneca សហការជាមួយសកលវិទ្យាល័យ Oxford កំពុងស្ថិតក្នុងដំណាក់កាលសាកល្បងចុងក្រោយ ហើយដែលកំពុងផ្តល់ក្តីសង្ឃឹមខ្លាំងជាងគេ ក្នុងចំណោមវ៉ាក់សាំងផ្សេងទៀត។
ចុះផ្សាយនៅថ្ងៃ៖
ស្តាប់ - ០៣:០០
អាជ្ញាធរត្រួតពិនិត្យឱសថអង់គ្លេស បានចាប់ផ្តើមប្រើនីតិវិធីបន្ទាន់ ដើម្បីឈានទៅសម្រេច អនុញ្ញាតការផលិតថ្នាំវ៉ាក់សាំងប្រឆាំងកូវីដ១៩ ឲ្យបានឆាប់បំផុត។ នេះបើផ្អែកតាមការអះអាង របស់អ្នកនាំពាក្យនៃមន្ទីរពិសោធន៍AstraZeneca ដែលជាសហគ្រាសផលិតឱសថដ៏ធំរបស់អង់គ្លេស។ នីតិវិធីនេះ នឹងអនុញ្ញាតិឲ្យ អាជ្ញាធរឱសថ អាចតាមដានទិន្ន័យ និងលទ្ធផលសាកល្បងវ៉ាក់សាំង ស្របពេលជាមួយគ្នា នឹងក្រុមអ្នកជំនាញរបស់មន្ទីរពិសោធន៍ផ្ទាល់តែម្តង។
គួររំលឹកថា បច្ចុប្បន្ននេះ វ៉ាក់សាំង ដែលស្រាវជ្រាវដោយមន្ទីរពិសោធន៍ AstraZeneca សហការជាមួយសកលវិទ្យាល័យ Oxford កំពុងស្ថិតក្នុងដំណាក់កាលសាកល្បងទី៣ ដែលជាដំណាក់ចុងក្រោយ មុននឹងធ្វើការសន្និដ្ឋានបញ្ចប់ ស្តីពីប្រសិទ្ធិភាព។ ដំណាក់កាលសាកល្បងទី៣នេះ ធ្លាប់ត្រូវបានផ្អាកមួយរយៈ កាលពីប្រមាណ៦សប្តាហ៍កន្លងទៅ បន្ទាប់ពីគេបានសង្កេតឃើញអ្នកដែលទទួលវ៉ាក់សាងសាកល្បងនេះម្នាក់ មានចេញជាអាការៈរោគជំងឺចម្លែកម្យ៉ាង។
កាលពីថ្ងៃទី២៦តុលា មន្ទីរពិសោធន៍នេះអះអាងថា លទ្ធផលសាកល្បងនៅដំណាក់កាលទី២ បានបង្ហាញថា វ៉ាក់សាំងបានបង្កើតជាប្រព័ន្ធអង្គបដិធាតុ ការពារខ្លួន មានកម្លាំងប្រហាក់ប្រហែលគ្នា រវាងមនុស្សវ័យក្មេង និងមនុស្សវ័យចំណាស់។ ដែលនេះគឺជាដំណឹងល្អ គួរជាទីសង្ឃឹម។
នៅថ្ងៃដដែលនោះដែរ លោក Matt Hancock រដ្ឋមន្ត្រីក្រសួងសុខាភិបាលអង់គ្លេស បានអះអាងថា រដ្ឋាភិបាលនឹងពន្លឿនការអនុញ្ញាត ការផលិតថ្នាំវ៉ាក់សាំង នៅពេលណាមានទិន្នន័យវិទ្យាសាស្ត្រគ្រប់គ្រាន់ អាចទុកចិត្តបាន។ លោកអះអាងថា នៅរវាងចុងឆ្នាំនេះ ក្រុមមនុស្សមួយចំនួនអាចនឹងទទួលការចាក់វ៉ាក់សាំងប្រឆាំងកូវីដ១៩ មុនគេបង្អស់។ ចំណែកយុទ្ធនាការចាក់វ៉ាក់សាំង ទ្រង់ទ្រាយធំនៅទូទាំងប្រទេស នឹងធ្វើទៅនៅរវាងពាក់កណ្តាលឆ្នាំ២០២១។
គួរកត់សំគាល់ថា អង់គ្លេស ក៏ដូចជាប្រទេសសឹងតែទាំងអស់នៅអឺរ៉ុប កំពុងឆ្លងកាត់ស្ថានភាពឆ្លងរាលដាលកូវីដ១៩ យ៉ាងខ្លាំងបំផុត។ រដ្ឋាភិបាលខ្លះ បានសម្រេចបិទខ្ទប់ប្រទេសទាំងស្រុង និងខ្លះបានចាត់វិធានតឹងតែងបំផុត ដើម្បីបង្អាក់ការឆ្លងរាលដាល។ តែវិធានការទាំងនោះ បានធ្វើបាបសេដ្ឋកិច្ច ឲ្យធ្លាក់ទៅក្នុងវិបត្តិកាន់តែជ្រៅ។ ក្តីសង្ឃឹមតែមួយគត់ គឺការស្រាវជ្រាវផលិតថ្នាំវ៉ាក់សាំង ឲ្យបានឆាប់ជាទីបំផុត។
បច្ចុប្បន្ននេះ ក្រៅពីវ៉ាក់សាំងរបស់មន្ទីរពិសោធន៍ AstraZeneca គឺមានវ៉ាក់សាំងជាច្រើន ផ្សេងទៀត ដែលកំពុងស្ថិតក្នុងដំណាក់កាលសាកល្បងទី៣ដែរ ក្នុងនោះមានដូចជាវ៉ាក់សាំងរបស់មន្ទីរពិសោធន៍អាមេរិក Moderna និង Pfizer មន្ទីរពិសោធន៍អាល្លឺម៉ង់ BioNTech មន្ទីរពិសោធន៍ចិន និងរុស្ស៊ីផងដែរ។ តែយ៉ាងណា វ៉ាក់សាំងរបស់មន្្ទីរពិសោធន៍អង់គ្លេស AstraZeneca ត្រូវបានគេផ្តល់ក្តីសង្ឃឹមច្រើនជាងគេ។ បើទោះបីជាមិនទាន់សាកល្បងចប់ ហើយមិនទាន់អាចផលិតបានក្តី តែមន្ទីរពិសោធន៍ AstraZeneca បានទទួលការបញ្ជាទិញ រាប់រយលានដូស ពីប្រទេសជាច្រើនរួចទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ