អាមេរិក៖លោកដូណាល់ ត្រាំប្រកាសពីកិច្ចព្រមព្រៀងជាប្រវត្តិសាស្រ្តរវាងអ៊ីស្រាអែល និងម៉ារ៉ុក
ចុះផ្សាយនៅថ្ងៃ៖
ស្តាប់ - ០៦:៣៣
នៅសហរដ្ឋអាមេរិក ប្រធានាធិបតីផុតអាណត្តិលោកដូណាល់ ត្រាំបានប្រកាសពីកិច្ចព្រមព្រៀងភ្ជាប់ទំនាក់ទំនងប្រក្រតីរវាងប្រទេសអ៊ីស្រាអែល និងប្រទេសម៉ារ៉ុក។ ទន្ទឹមគ្នានេះ លោកត្រាំក៏បានប្រកាសពីការចុះហត្ថលេខាទទួលស្គាល់តំបន់សាហារ៉ាខាងលិចជាដែនដីស្របច្បាប់របស់ប្រទេសម៉ារ៉ុក។ តែក្រុមអ្នកទាមទារផ្តាច់ទឹកដីនិយមក្នុងតំបន់សាហារ៉ាខាងលិចបានបរិហារ និងផ្តន្ទាទោសលើការសម្រេចចិត្តរបស់លោកត្រាំ។ សូមជម្រាបថា ម៉ារ៉ុកជាប្រទេសអារ៉ាប់ទី៤ ដែលបានយល់ព្រមភ្ជាប់ទំនាក់ទំនងប្រក្រតីជាមួយអ៊ីស្រាអែល បន្ទាប់ពីបារ៉ែន អេមីរ៉ាតអារ៉ាប់រួម និងប្រទេសស៊ូដង់។
គេអាចនិយាយបានទេថា ការដែលប្រទេសម៉ារ៉ុក និងប្រទេសអ៊ីស្រាអែលព្រមព្រៀងភ្ជាប់ទំនាក់ទំនងប្រក្រតីរវាងគ្នាឡើងវិញពេលនេះជាជោគជ័យនយោបាយការទូតថ្មីមួយទៀតរបស់រដ្ឋបាលលោកដូណាល់ណ ត្រាំ មុននឹងលោកប្រគល់តំណែងទៅឲ្យប្រធានាធិបតីជាប់ឆ្នោតថ្មីលោកចូ បៃដិននៅថ្ងៃទី២០ មករាខាងមុខ។ « ការចម្រើនមួយទៀតជាប្រវត្តិសាស្រ្តថ្ងៃនេះ។ មហាមិត្តរបស់យើង អ៊ីស្រាអែល និងម៉ារ៉ុកបានយល់ព្រមភ្ជាប់ទំនាក់ទំនងការទូតទាំងស្រុងឡើងវិញរវាងគ្នា។ ជាការបោះមួយជំហានយ៉ាងវែងសម្រាប់សន្តិភាពនៅតំបន់មជ្ឈិមបូព៌ា » នេះជាឃ្លាដែលលោកដូណាល់ ត្រាំបានសរសេរនៅក្នុងទំព័របណ្តាញសង្គម Twitter របស់លោក។
គួរបញ្ជាក់ថា ម៉ារ៉ុកជាប្រទេសអារ៉ាប់ទី៤ បន្ទាប់ពីបារ៉ែន អេមីរ៉ាតអារ៉ាប់រួម និងស៊ូដង់ដែលបានយល់ព្រមភ្ជាប់ទំនាក់ទំនងប្រក្រតីជាមួយអ៊ីស្រាអែលក្រោមគំនិតផ្តួចផ្តើម និងការជួយជ្រោមជ្រែងពីរដ្ឋបាលអាមេរិករបស់លោកដូណាល់ ត្រាំ។ តែមានការកត់សម្គាល់មួយជាមួយប្រទេសម៉ារ៉ុក គឺលោកត្រាំបានចុះហត្ថលេខាទទួលស្គាល់តំបន់សាហារ៉ាខាងលិចជាដែនដីស្របច្បាប់របស់ប្រទេសម៉ារ៉ុក។ គេអាចនិយាយបានថា កុំតែបានលោកត្រាំទទួលស្គាល់តំបន់សាហារ៉ាខាងលិចជាអធិបតេយ្យរបស់ម៉ារ៉ុក ម្ល៉េះម៉ារ៉ុកក៏មិនប្រញិបប្រញាប់យល់ព្រមភ្ជាប់ទំនាក់ទំនងប្រក្រតីជាមួយអ៊ីស្រាអែលដែរ។ គួររម្លឹកថា តំបន់សាហារ៉ាខាងលិចជាតំបន់មួយដែលកំពុងបន្តមានជម្លោះប្រទាញប្រទង់គ្នារវាងប្រទេសម៉ារ៉ុក និងក្រុមអ្នកទាមទារផ្តាច់ទឹកដីនិយម។
ម៉ារ៉ុក និងរណសិរ្សសាហារ៉ាខាងលិចដណ្តើមតំបន់សាហារ៉ាខាងលិចតាំងពីឆ្នាំ ១៩៧៦
តំបន់សាហារ៉ាខាងលិចដែលមានផ្ទៃក្រឡាដីទំហំ ២៦៦ ០០០គីឡូម៉ែត្រការ៉េជាអតីតដែនដីអាណានិគមរបស់ប្រទេសអេស្ប៉ាញ។ តែក្រោយការដកចេញរបស់អេស្ប៉ាញក្នុងឆ្នាំ ១៩៧៦ តំបន់សាហារ៉ាខាងលិចបានក្លាយជាចំណីដណ្តើមគ្នារវាងប្រទេសម៉ារ៉ុក និងក្រុមអ្នកទាមទារផ្តាច់ទឹកដីនិយមដឹកនាំដោយរណសិរ្សប៉ូលីសារីយ៉ូដែលគាំទ្រដោយប្រទេសអាល់ហ្សេរី។ បន្ទាប់ពីបានធ្វើសង្រ្គាមតទល់គ្នាអស់រយៈពេល ១៦ឆ្នាំ និងដោយមានការចូលរួមជួយអន្តរាគមន៍របស់អង្គការសហប្រជាជាតិ ភាគីជម្លោះទាំងពីរបានចុះកិច្ចព្រមព្រៀងឈប់បាញ់ក្នុងឆ្នាំ ១៩៩១។ តាមរយៈកិច្ចព្រមព្រៀងឈប់បាញ់មួយនេះ តំបន់សាហារ៉ាខាងលិចចំនួន ៨០% ស្ថិតក្រោមការគ្រប់គ្រងរបស់ម៉ារ៉ុក និង ២០% ស្ថិតក្រោមការគ្រប់គ្រងរបស់រណសិរ្សប៉ូលីសារីយ៉ូ។
រដ្ឋាភិបាលម៉ារ៉ុកបដិសេធយ៉ាងដាច់អហង្ការមិនផ្តល់ឯករាជ្យភាពឲ្យតំបន់សាហារ៉ាខាងលិចដែលស្ថិតក្នុងដៃរណសិរ្សប៉ូលីសារីយ៉ូ។ តែបានយល់ព្រមផ្តល់ឲ្យត្រឹមស្វ័យភាព។ តែរណសិរ្សប៉ូសារីយ៉ូមិនព្រម និងបន្តទាមទារឲ្យមានការរៀបចំបោះឆ្នោតប្រជាមតិមួយដើម្បីឲ្យពលរដ្ឋនៅក្នុងតំបន់នោះជាអ្នកសម្រេចជោគវាសនាអនាគតដោយខ្លួនឯង។ មួយវិញទៀត ការរៀបចំបោះឆ្នោតប្រជាមតិនេះក៏បានសន្យាដោយអង្គការសហប្រជាជាតិដែរ។ តែរដ្ឋាភិបាលម៉ារ៉ុកតែងចេញមុខប្រឆាំងជានិច្ច និងបានជ្រើសផ្លូវតវ៉ាដោយស្វែងរកការគាំទ្រពីក្រុមប្រទេសបស្ចិមលោក។ តាំងពីខែមីនា ឆ្នាំ ២០១៩ កិច្ចចរចារវាងភាគីជម្លោះទាំងពីរបានជាប់គាំង ហើយក្នុងថ្ងៃទី១៣ វិច្ឆិកា ឆ្នាំ ២០២០ ភាគីជម្លោះទាំងពីរបានប្រកាសពីការលែងគោរពកិច្ចព្រមព្រៀងឈប់បាញ់ចុះហត្ថលេខាឆ្នាំ ១៩៩១។
លោកអង់តូនីញ៉ូ ហ៊្គូទែរថា ការសម្រេចចិត្តរបស់លោកត្រាំមិនប្តូរជំហររបស់អ.ស.ប.
ការប្រកាសរបស់លោកដូណាល់ ត្រាំពីការភ្ជាប់ទំនាក់ទំនងប្រក្រតីរវាងអ៊ីស្រាអែល និងម៉ារ៉ុក រួមទាំងការសម្រេចចិត្តរបស់លោកដូណាល់ ត្រាំក្នុងការទទួលស្គាល់តំបន់សាហារ៉ាខាងលិចជាដែនដីរបស់ម៉ារ៉ុកបានធ្វើឲ្យមានអ្នកសប្បាយចិត្ត និងអ្នកមិនសប្បាយចិត្ត។ ភាគីដែលសប្បាយចិត្តខ្លាំង គឺអ៊ីស្រាអែល និងម៉ារ៉ុក។ បន្ទាប់មក គឺសហរដ្ឋអាមេរិកខ្លួនឯងដែលចំណេញបានសេដ្ឋកិច្ច និងយុទ្ធសាស្រ្ត។ ចំណេញយុទ្ធសាស្រ្ត ព្រោះលោកត្រាំបានបញ្ចូលម៉ារ៉ុកទៅក្នុងក្រុមប្រទេសដូចជាមហាអំណាចមួយនៅក្នុងតំបន់។ ចំណេញសេដ្ឋកិច្ច ព្រោះលោកត្រាំបានពង្រឹងបន្ថែមនូវទំនាក់ទំនងយោធារវាងអាមេរិក និងម៉ារ៉ុក។ សូមជម្រាបថា គ្រឿងសព្វាវុធចំនួន ៩១% ដែលម៉ារ៉ុកទិញពីបរទេស មានភាគច្រើនទិញពីសហរដ្ឋអាមេរិក។
ចំណែកអ្នកខកចិត្តខ្លាំង គឺគ្មាននរណាក្រៅក្រុមអ្នកទាមទារផ្តាច់ទឹកដីនិយមក្នុងតំបន់សាហារ៉ាខាងលិច។ រណសិរ្សប៉ូលីសារីយ៉ូបានបរិហារលើការសម្រេចចិត្តរបស់លោកត្រាំ និងបញ្ជាក់ជាថ្មីថា ការសម្រេចចិត្តរបស់លោកត្រាំនឹងគ្មានការផ្លាស់ប្តូរលើការប្តេជ្ញាចិត្តរបស់ពលរដ្ឋសាហារ៉ាខាងលិចដែលចង់បានឯករាជ្យ។ អ្នកខកចិត្តខ្លាំងមួយទៀត គឺប៉ាឡេស្ទីនដែលបានចាត់ទុកការភ្ជាប់ទំនាក់ទំនងរវាងម៉ារ៉ុក និងអ៊ីស្រាអែលថាមិនបានបម្រើឲ្យបុព្វហេតុប៉ាឡេស្ទីនទេ។ គួររម្លឹកថា ម៉ារ៉ុកតែងមានជំហរគាំទ្របុព្វហេតុប្រជាជនប៉ាឡេស្ទីន ពិសេសការបង្កើតរដ្ឋប៉ាឡេស្ទីនមួយរស់ក្បែររដ្ឋអ៊ីស្រាអែល។ ចំណែកប្រមុខអង្គការសហប្រជាជាតិលោកអង់តូនីញ៉ូ ហ៊្គូទែរបានថ្លែងថា ការសម្រេចចិត្តរបស់លោកត្រាំមិនបានផ្លាស់ប្តូរជំហររបស់អង្គការសហប្រជាជាតិទេ។ តាមលោកហ្គូទែរ ដំណោះស្រាយចំពោះតំបន់សាហារ៉ាខាងលិចអាចត្រូវធ្វើឡើងដោយផ្អែកលើសេចក្តីសម្រេចរបស់ក្រុមប្រឹក្សាសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ