កងទ័ពជើងទឹកអង់គ្លេសត្រៀមការពារដែនសមុទ្រ ករណីគ្មានកិច្ចព្រមព្រៀងពាណិជ្ជកម្មអង់គ្លេស អឺរ៉ុប
ចុះផ្សាយនៅថ្ងៃ៖
តើអង់គ្លេស និងអឺរ៉ុប នឹងមានកិច្ចព្រមព្រៀង ឬក៏គ្មានកិច្ចព្រមព្រៀង? ការចរចារវាងភាគីទាំងពីរ បានឈានចូលដល់ដំណាក់កាលចុងក្រោយ នៅថ្ងៃអាទិត្យ ទី ១៣ធ្នូ ថ្ងៃដែលកំណត់ថា តើអង់គ្លេស និងអឺរ៉ុបនឹងអាចចុះកិច្ចព្រមព្រៀងពាណិជ្ជកម្ម នៅក្រោយ ការផ្តាច់ខ្លួនទាំងស្រុង របស់អង់គ្លេស ពីសហភាពអឺរ៉ុបដែរឬទេ។ អ្នកតំណាងអឺរ៉ុប និងអង់គ្លេស បានព្យាយាមចរចាគ្នា រហូតដល់យប់ថ្ងៃសៅរ៍ មុននឹងចាប់ផ្តើមបន្ត នៅព្រឹកថ្ងៃអាទិត្យនេះទៀត នៅទីក្រុងព្រុចស៊ែល។
នៅថ្ងៃអាទិត្យនេះ ជាថ្ងៃចុងក្រោយដែលអង់គ្លេស និងអឺរ៉ុបត្រូវចរចា ដើម្បីរកកិច្ចព្រមព្រៀងពាណិជ្ជកម្ម នៅក្រោយ អង់គ្លេស បានដកខ្លួន លែងជាសមាជិករបស់សហភាពអឺរ៉ុបតទៅទៀត។ ប៉ុន្តែ រហូតមកដល់យប់ថ្ងៃសៅរ៍ម្សិលមិញ ក្បែរនឹងថ្ងៃចុងក្រោយ នេះទៅហើយ អង់គ្លេស និងសហភាពអឺរ៉ុប នៅតែមិនទាន់ ចរចារកឃើញកិច្ចព្រមព្រៀងនឹងគ្នាទៀត។
នៅពេលការចរចានៅមិនទាន់បញ្ចេញពន្លឺ ជាវិជ្ជមានអ្វីសោះនោះ នាយករដ្ឋមន្រ្តីអង់គ្លេស ត្រូវជួបសន្ទនាតាមទូរស័ព្ទ ជាមួយប្រធានគណៈកម្មការអឺរ៉ុប។ អ្នកទាំងពីរ នឹងសម្រេចថា តើគួរបន្តចរចាទៅមុខទៀត ឬក៏បោះបង់ចោលការចរចា នៅត្រឹមណេះ។ នៅថ្ងៃអាទិត្យ ទី ១៣ធ្នូ លោកស្រី ប្រធានគណៈកម្មការអឺរ៉ុបបានប្រកាសថា ភាគីទាំងពីរបាននិយាយព្រមព្រៀងថា នឹងពន្យារការចរចា នៅក្រោយ ថ្ងៃអាទិត្យ នេះ។
អង់គ្លេសបានដើរចេញពីរង្វង់សហភាពអឺរ៉ុប ជាផ្លូវការ តាំងពីថ្ងៃទី ៣១មករា ដើមឆ្នាំ២០២០។ ប៉ុន្តែ អង់គ្លេសនៅបន្តសិទ្ធិប្រើប្រាស់ទីផ្សារអឺរ៉ុបរួម និងគ្មានរបាំងពន្ធគយរបស់អឺរ៉ុប រហូតដល់ថ្ងៃទី ៣១ធ្នូចុងឆ្នាំនេះ។ ប៉ុន្តែ ដោយសារតែទំនាក់ទំនងពាណិជ្ជកម្មពិសេសរវាងអង់គ្លេស និងអឺរ៉ុប ត្រូវចប់នៅចុងឆ្នាំនេះ ភាគីទាំងពីរបានបើកចរចា គ្នាតាំងពីខែមីនា មកដើម្បីរកកិច្ចព្រមព្រៀងពាណិជ្ជកម្មថ្មី សម្រាប់ទំនាក់ទំនងថ្មី ក្នុងនាមដែលអង់គ្លេស លែងជាសមាជិករបស់សហភាពអឺរ៉ុបតទៅទៀត។
កាលកំណត់ ដែលអង់គ្លេស ត្រូវចាកចេញពីទីផ្សារអឺរ៉ុប និងអនុគ្រោះពន្ធគយរបស់អឺរ៉ុប គឺនៅថ្ងៃទី ៣១ធ្នូខាងមុខ។ ប៉ុន្តែ នាយករដ្ឋមន្រ្តីអង់គ្លេស និងប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរ ឡេយែន បានកំណត់យកថ្ងៃអាទិត្យ ទី ១៣ធ្នូនេះជាថ្ងៃចរចាចុងក្រោយ។ ដូចស្រីពេជ្របានលើកខាងដើម នៅថ្ងៃនេះ នៅក្នុងកិច្ចសន្ទនាតាមទូរស័ព្ទ មេដឹកនាំអង់គ្លេស និងមេដឹកនាំអឺរ៉ុបនឹងសម្រេចថា គេបន្តការចរចា ទៅមុខទៀត ឬមួយក៏បោះបង់ចោលត្រឹមនេះ។ មន្រ្តីបារាំង សម្រាប់កិច្ចការអឺរ៉ុប បានបញ្ជាក់ហើយថា ទីក្រុងឡុងដ៍ និងព្រុចស៊ែល អាចបន្ត ការចរចា ប៉ុន្តែ មិនច្រើននោះទេ ព្រោះថា ពេលវេលាកាន់តែខើចណាស់ទៅហើយ។ នៅពេលតែប៉ុន្មានថ្ងៃទៀតទេ ថ្ងៃទី ៣១ធ្នូ នឹងឈានមកដល់ ប៉ុន្តែ ភាគី ទាំងពីរបានពន្លយឲ្យដឹងពីលទ្ធភាព គ្មានកិច្ចព្រមព្រៀង ច្រើនជាង មានកិច្ចព្រមព្រៀង។
ទូកនេសាទអឺរ៉ុបក្នុងដែនទឹកអង់គ្លេស ជាចំណុចជាប់គាំងខ្លាំងក្នុងការចរចាអង់គ្លេស អឺរ៉ុប
ការចរចា រកកិច្ចព្រមព្រៀងពាណិជ្ជកម្ម អង់គ្លេស អឺរ៉ុប នៅក្រោយ Brexit នៅតែទ័លច្រក ជាប់គាំង លើចំណុចសំខាន់មួយចំនួន ដែល អង់គ្លេស និងអឺរ៉ុប ហាក់ដូចជា គ្មានចង់ធ្វើសម្បទាន ឲ្យគ្នាទាល់តែសោះ។
ចំណុចគាំងទី ១ គឺ លើសិទ្ធិរបស់អ្នកនេសាទអឺរ៉ុប ក្នុងដែនទឹករបស់អង់គ្លេស។ រឿងនេសាទ នេះជាការទាមទារចង់បានខ្លាំងរបស់ប្រទេសសមាជិកមួយចំនួនដូចជា បារាំង ហូឡង់ បែលហ្ស៊ិក ឬអេស្ប៉ាញជាដើម ព្រោះថា ដែនទឹកសមុទ្រអង់គ្លេស មានសំបូរត្រីច្រើន។
ភាគីអឺរ៉ុបចង់បន្ត ចូលទៅនេសាទក្នុងដែនទឹករបស់អង់គ្លេស ដូចមុន ជាថ្នូរនឹងការដែលអង់គ្លេស អាចបញ្ជូន លក់ផលិតផលគ្រឿងសមុទ្រ ក្នុងទីផ្សារអឺរ៉ុប។ ប៉ុន្តែ អង់គ្លេស វិញ មិនឯកភាពនោះទេ ក្នុងហេតុផលថា អង់គ្លេសមានអធិបតេយ្យភាព ត្រូវគ្រប់គ្រង ការពារដែនទឹកសមុទ្ររបស់ខ្លួន ឲ្យប្រទេសអឺរ៉ុប មានសិទ្ធិចូលនេសាទដូចមុន។
ចំណុចជាប់គាំងទី២ គឺរឿង ប្រកួតប្រជែងពាណិជ្ជកម្ម ទៅថ្ងៃអនាគត។ ភាគីអឺរ៉ុបបានយល់ព្រម ឲ្យអង់គ្លេស អាចបន្តប្រើប្រាស់ទីផ្សារអឺរ៉ុប ហើយនិងគ្មានរនាំងពន្ធគយដូចមុន គឺដូចពេលដែលអង់គ្លេស នៅជាសមាជិករបស់អឺរ៉ុប ប៉ុន្តែ ជាថ្នូវិញ អង់គ្លេស ត្រូវ គោរពតាមក្បួនខ្នាត ច្បាប់ផ្ទៃក្នុងរបស់អឺរ៉ុប ទាក់ទងនឹងកម្លាំងពលកម្ម ការយកពន្ធ ឬសង្គមបរិស្ថាន ជាដើម។ សម្រាប់អឺរ៉ុប វាមិនមែនជារឿងយុត្តិធម៌ទេ ដែលអង់គ្លេសអាចចូលប្រើប្រាស់ទីផ្សារអឺរ៉ុបដោយសេរី និងគ្មានរបាំងពន្ធគយ ប៉ុន្តែ អង់គ្លេស កំណត់ស្តង់ដា ច្បាប់ផ្ទាល់ខ្លួន អង់គ្លេសនោះ។ ដើម្បី បន្តប្រើប្រាស់ទីផ្សារអឺរ៉ុប ដោយសេរីដូចមុន អឺរ៉ុបបានទាមទារឲ្យអង់គ្លេសបន្តគោរពច្បាប់ជំនួញអឺរ៉ុប។ អឺរ៉ុប ខ្លាចថា អង់គ្លេស អាចធ្វើការប្រកួតប្រជែងមិនស្មោះត្រង់ ដូចជាអាចលួចផ្តល់ជំនួយឧបត្ថម្ភដល់ក្រុមហ៊ុនអង់គ្លេស ដែលនឹងធ្វើឲ្យក្រុមហ៊ុនអឺរ៉ុបពិបាកនឹងប្រកួតប្រជែងជាមួយ នៅក្នុងទីផ្សារអឺរ៉ុប។
ក្នុងករណីដែលអង់គ្លេសមិនគោរព តាមក្បួនច្បាប់អឺរ៉ុប អឺរ៉ុបចង់ ប្រើសិទ្ធិដើម្បី ចាត់វិធានការឯកតោភាគី តាមរយៈ ការអនុវត្តយកពន្ធ និងកំណត់ចំនួនកូតា ទំនិញរបស់អង់គ្លេស ក្នុងទីផ្សារអឺរ៉ុប ដើម្បី ការពារក្រុមហ៊ុនអឺរ៉ុប ទល់នឹងក្រុមហ៊ុនអង់គ្លេស ដែលធ្វើជំនួញ មិនស្មោះត្រង់។
គ្មានកិច្ចព្រមព្រៀងនឹងគ្នា អង់គ្លេស និងសហភាពអឺរ៉ុប ត្រូវគោរពគោលការណ៍របស់អង្គការពាណិជ្ជកម្មពិភពលោក
បើគ្មានកិច្ចព្រមព្រៀង មុនថ្ងៃទី ៣១ធ្នូទេ នោះ ចាប់ពីថ្ងៃទី ១ មករា២០២១ទៅ រាល់គ្រប់ទំនាក់ទំនងពាណិជ្ជកម្មអង់គ្លេសនិងអឺរ៉ុប នឹងត្រូវប្រព្រឹត្តទៅតាមគោលការណ៍នៃច្បាប់របស់អង្គការពាណិជ្ជកម្មពិភពលោក WTO ដែលមានន័យថា ការកំណត់កូតា ហើយនិងអត្រាពន្ធគយ នឹងត្រូវគេអនុវត្ត ដោយស្វ័យប្រវត្តិរវាងភាគី អង់គ្លេស ហើយនិងអឺរ៉ុប។
ដោយសារតែមានកំណត់កូតា ហើយនិងតម្លៃពន្ធគយ ទំនិញនឹងឡើងថ្លៃ ដែលជះផលអាក្រក់ដល់អ្នកប្រើប្រាស់របស់អង់គ្លេស និងអឺរ៉ុប ចំណែកការត្រួតពិនិត្យ ដំណើរចេញចូល ឆ្លងដែនរវាង អង់គ្លេស ហើយនិងអឺរ៉ុប ក៏ត្រូវចាប់ផ្តើម មានឡើងវិញ ជាលើកទី១ នៅក្រោយ អវត្តមានអស់ជាច្រើនទសវត្សរ៍ នៅពេលអង់គ្លេស ធ្លាប់ជាសមាជិករបស់អឺរ៉ុប។
រឿងទាំងអស់នេះ នឹងទៅប៉ះពាល់ដល់សេដ្ឋកិច្ចរបស់ភាគី ទាំងពីរ ជាពិសេស អង់គ្លេសតែម្តង ដែលនៅឯកោតែម្នាក់ឯង ហើយកំពុងមានសេដ្ឋកិច្ចចុះទន់ខ្សោយដោយសារតែវិបត្តិកូវីដរួចហើយនោះ។
នៅភាគីអឺរ៉ុប ប្រឈមនឹងលទ្ធភាព គ្មានកិច្ចព្រមព្រៀង ច្រើនជាងមានកិច្ចព្រមព្រៀង គណៈកម្មការអឺរ៉ុប បានបង្ហាញវិធានការមួយចំនួន ដើម្បីទប់ទល់កុំឲ្យការលែងលះជាមួយ អង់គ្លេស ប៉ះពាល់ខ្លាំងពេកដល់វិស័យ ដឹកជញ្ជូន ការធ្វើដំណើរតាមផ្លូវអាកាស ហើយ និងការនេសាទ។ ជារួម គណៈកម្មការអឺរ៉ុបចង់ឲ្យគេបន្តរក្សា កិច្ចព្រមព្រៀងស្តីពីការដឹកជញ្ជូន រវាងអង់គ្លេស និងអឺរ៉ុប ក្នុងរយៈពេល ៦ខែទៅមុខទៀត ចំណែក អង់គ្លេស និងអឺរ៉ុប នៅតែអាចបន្ត ចូលទៅនេសាទ ក្នុងដែនទឹកគ្នាទៅវិញ ទៅមក រហូតដល់ចុងឆ្នាំ ២០២១។ បើសិនការចរចា នៅថ្ងៃចុងក្រោយនេះ គ្មានលទ្ធផលវិជ្ជមានទេ នោះ សភាអឺរ៉ុបនឹងបោះឆ្នោត លើវិធានការបន្ទាន់ របស់អឺរ៉ុប នៅថ្ងៃទី ១៨ធ្នូខាងមុខ។
អង់គ្លេសត្រៀមកប៉ាល់ចម្បាំងសម្រាប់ល្បាត ហាមមិនឲ្យទូកនេសាទបរទេសចូលក្នុងដែនទឹកអង់គ្លេស
កងទ័ពអង់គ្លេស បានប្រកាសកាលពីថ្ងៃសៅរ៍ម្សិលមិញ ថា ខ្លួនត្រៀម រួចជាស្រេចដើម្បីចាប់ផ្តើមល្បាតព្រំដែន សមុទ្រ ជាមួយសហភាពអឺរ៉ុប។ អង់គ្លេស និងសហភាពអឺរ៉ុបធ្លាប់សហការគ្នា និងជាសម្ព័ន្ធមិត្ត នៅក្នុងអង្គការអូតង់។
សម្រាប់មន្រ្តីរដ្ឋាភិបាលអង់គ្លេស រាល់កិច្ចព្រមព្រៀងត្រូវតែស្មើភាព និងគោរពជំហរជាមូលដ្ឋានគ្រឹះ របស់អង់គ្លេស ដែលក្នុងនោះ អង់គ្លេសជារដ្ឋអធិបតេយ្យ ក្នុងរយៈពេល ៣សប្តាហ៍ខាងមុខ។ ក្នុងន័យនេះ អង់គ្លេស នឹងមិនបណ្តែតបណ្តោយ ឲ្យទូកបរទេស ចូលទៅនេសាទ ក្នុងដែនទឹករបស់ខ្លួន ទៀតនោះទេ។
នៅប៉ុន្មានម៉ោង មុន ថ្ងៃចរចាចុងក្រោយ ក្រសួងការពារជាតិអង់គ្លេស បានបង្កើនភាពតានតឹង មួយជាន់ ថែមទៀត ដោយបានអះអាងថា កងទ័ពអង់គ្លេសបានត្រៀមកប៉ាល់ចម្បាំង ៤គ្រឿង សម្រាប់ចេញ ទៅការពារដែនទឹក របស់អង់គ្លេស ទល់នឹងកប៉ាល់បរទេស នៅក្នុងករណី គ្មានកិច្ចព្រមព្រៀង អង់គ្លេស អឺរ៉ុប។ សម្រាប់ អតីតមេបញ្ជាការកងទ័ពជើងទឹកអង់គ្លេសលោក Alan West វាជារឿងសមគួរ ដែលកងទ័ពជើងទឹកអង់គ្លេស ចេញមុខការពារដែនទឹកសមុទ្រអង់គ្លេស បើសិន រដ្ឋាភិបាល មិនចង់ឲ្យទូកនេសាទបរទេស ចូលក្នុងដែនទឹកអង់គ្លេសនោះ។
ក្រសួងការពារជាតិអង់គ្លេសបានបញ្ជាក់ថា គេបានត្រៀមកងទ័ព ប្រមាណ ១៤ ០០០នាក់ សម្រាប់ត្រៀម ជួយ រដ្ឋាភិបាល ក្នុងការការពារដែនទឹកអង់គ្លេស ក្នុងដំណាក់កាលអន្តរកាល ក្រោយ Brexit ដែលនៅក្នុងនោះ មានផងដែរឧទ្ធម្ភាគចក្រ សម្រាប់តាមដានឆ្នេរសមុទ្រ អង់គ្លេស។
អតីតរដ្ឋមន្រ្តីការពារជាតិអង់គ្លេស និងជាអតីតមន្រ្តីរបស់គណៈកម្មការអឺរ៉ុប លោក Chris Patten បានចោទប្រកាន់លោកនាយករដ្ឋមន្រ្តីបូរីស ចនសុនថា កំពុងធ្វើខ្លួនជាជនជាតិអង់គ្លេសជាតិនិយម។ ជារួម កងទ័ពអង់គ្លេសដែលកំពុងជាប់រវល់ដោយសាររឿងផ្សេងហើយនោះ មិនអាចទៅ រវល់ ហើយនិងចេញមុខប្រឈមដាក់ប្រទេសអឺរ៉ុប ដែលជាសម្ព័ន្ធមិត្តរបស់អង់គ្លេស នៅក្នុងអង្គការអូតង់ដោយសារតែរឿងនេសាទ នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ