អង់គ្លេសនិងអឺរ៉ុប បង្ហាញទស្សនៈផ្ទុយគ្នាក្នុងការចរចា
គណៈកម្មការអឺរ៉ុប បានអនុម័តនៅព្រឹកថ្ងៃចន្ទទី ៣ កុម្ភៈ ឆ្នាំ២០២០ ចំណុចគោលដែលសហភាពអឺរ៉ុបត្រូវលើកទៅចរចាជាមួយនឹងអង់គ្លេស ដើម្បីសម្រេចកិច្ចព្រមព្រៀងថ្មីមួយស្តីពីទំនាក់ទំនងអង់គ្លេស-អឺរ៉ុប ក្រោយBrexit។ ចំណែកខាងអង់គ្លេសវិញ លោកនាយករដ្ឋមន្ត្រី បូរីស ចនសុន (Boris Johnson) ក៏បានបង្ហាញលក្ខខណ្ឌចរចារបស់ខ្លួនដែរ និងបដិសេធមិនសម្របខ្លួនតាមសហភាពអឺរ៉ុបទេ។
ចុះផ្សាយនៅថ្ងៃ៖
ស្តាប់ - ០២:១២
គណៈកម្មការអឺរ៉ុបបានស្នើគម្រោងបីចំណុចសម្រាប់យកទៅចរចាជាមួយអង់គ្លេស។ ទីមួយ និងសំខាន់ជាងគេ គឺចរចារកកិច្ចព្រមព្រៀងពាណិជ្ជកម្ម ដោយត្រូវកំណត់ឱ្យបានជាក់លាក់ថា តើត្រូវធ្វើដូចម្តេច ដើម្បីបន្តការផ្តោះប្តូរទំនិញ និងផលិតផលគ្នា។ តើត្រូវធ្វើដូចម្តេចទើបអាចធានាផ្នែកទីផ្សារសេវាកម្ម។ តើត្រូវចាត់ចែងបញ្ហាពន្ធគយយ៉ាងណា ? ... តើធ្វើយ៉ាងណាដើម្បីឱ្យគ្រប់ភាគីគោរពច្បាប់គ្នាទៅវិញទៅមក បញ្ចៀសការប្រកួតប្រជែងមិនស្មោះត្រង់។
ចំណុចពីរទៀតដែលអឺរ៉ុបនឹងលើកទៅចរចាដែរ គឺកិច្ចសហប្រតិបត្តិការក្នុងវិស័យការពារជាតិ សន្តិសុខ នគរបាល និងយុត្តិធម៌ និងចុងក្រោយបង្អស់ អឺរ៉ុបចង់ពិភាក្សាអំពីអភិបាលកិច្ចសម្រាប់ផ្ទៀងផ្ទាត់ការគោរពកិច្ចព្រមព្រៀងអនាគត។
តំណាងអឺរ៉ុប ទទួលបន្ទុកចរចាBrexit លោក មីស្ហែល បានីញ៉េ (Michel Barnier) បានអះអាងថារយៈពេលអន្តរកាល១១ខែ ពិតជាខ្លីណាស់។ វិស័យខ្លះ ដូចជាពាណិជ្ជកម្មនិងនេសាទ ទំនងជាមិនអាចចរចាបានលទ្ធផលនៅថ្ងៃទី ៣១ធ្នូ២០២០ឡើយ។
នៅក្នុងសុន្ទរកថា ជាលើកដំបូងក្រោយBrexit លោកចនសុន បានបង្ហាញលក្ខខណ្ឌដ៏តឹងរ៉ឹងនៃការព្រមចុះកិច្ចព្រមព្រៀងផ្តោះប្តូរសេរីជាមួយសហភាពអឺរ៉ុប ថាលោកសុខចិត្តគ្មានកិច្ចព្រមព្រៀង ជាជាងចុះហត្ថលេខាលើក្រដាសដែលបង្ខំអង់គ្លេសឱ្យបន្ទន់ខ្លួនទៅគោរពតាមច្បាប់របស់សហគមន៍។ សម្រាប់លោក ចនសុន គ្មានហេតុផលអ្វីដែលអង់គ្លេសត្រូវទម្លាក់ខ្លួនទៅគោរពតាមបទដ្ឋានសុខភាព បរិស្ថាន និងសង្គម របស់អឺរ៉ុប ដែលអន់ជាងអង់គ្លេសឡើយ។ ប៉ុន្តែលោកនាយករដ្ឋមន្ត្រីមិនបានលើកឡើងអំពីផលប៉ះពាល់ដល់សេដ្ឋកិច្ចនៅពេលមានរនាំងពន្ធគយជាមួយអឺរ៉ុបទេ។
សូមបញ្ជាក់ថាប្រសិនបើការចរចាបរាជ័យ គ្មានកិច្ចព្រមព្រៀង នៅចុងឆ្នាំ២០២០ទេ ទំនាក់ទំនងពាណិជ្ជកម្មអង់គ្លេស-សហភាពអឺរ៉ុប នឹងត្រូវរំពឹងលើច្បាប់របស់អង្គការពាណិជ្ជកម្មពិភពលោក ដែលមិនសូវអំណោយផលទេសម្រាប់អង់គ្លេស។ ការចរចាត្រូវចាប់ផ្តើមនៅខែមីនា។ នៅចុងខែមិថុនា គេនឹងអាចធ្វើការសន្និដ្ឋានបឋមថាតើអង់គ្លេសនិងអឺរ៉ុបអាចសម្រេចកិច្ចព្រមព្រៀងនឹងគ្នាឬក៏អត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ