Brexit៖សហភាពអឺរ៉ុប និងអង់គ្លេសបានពន្យារពេលចរចាដើម្បីស្វែងរកកិច្ចព្រមព្រៀងពាណិជ្ជកម្ម
សហភាពអឺរ៉ុប និងប្រទេសអង់គ្លេសកំពុងបន្តនិយាយមិនចុះសម្រុងគ្នាក្នុងការស្វែងរកកិច្ចព្រមព្រៀងពាណិជ្ជកម្មនៅក្រោយ Brexit។ ភាគីទាំងពីរបានព្រមព្រៀងពន្យារពេលចរចាចំនួន ២ថ្ងៃបន្ថែមទៀតដោយចាប់ផ្តើមក្នុងថ្ងៃអាទិត្យ ទី៦ ធ្នូនៅក្នុងទីក្រុងព្រុចសែល ប្រទេសបែលហ្ស៊ិក។ នៅក្នុងកិច្ចសន្ទនាតាមទូរសព្ទក្នុងយប់ថ្ងៃសៅរ៍ ទី៥ ធ្នូ ប្រធានគណៈកម្មការអឺរ៉ុបលោកស្រីអួរស៊ូឡា វ៉ុនឌែរ ឡេយែន និងនាយករដ្ឋមន្រ្តីអង់គ្លេសលោកបូរីស ចនសុនបានកត់សម្គាល់ឃើញពីសំណុំរឿងចម្រូងចម្រាសមួយចំនួន។
ចុះផ្សាយនៅថ្ងៃ៖
លោកស្រីអួរស៊ូឡា វ៉ុនឌែរ ឡេយែន និងលោកបូរីស ចនស៊ុនបានកត់សម្គាល់ឃើញមានសំណុំរឿងចម្រូងចម្រាសសំខាន់ចំនួន ៣ គឺទាក់ទងនឹងនេសាទ ការប្រកួតប្រជែង និងច្បាប់មួយចំនួន។ « ភាគីទាំងពីរយល់ឃើញថា កិច្ចព្រមព្រៀងមួយនឹងមិនអាចទៅរួច បើភាពមិនចុះសម្រុងគ្នានៅមិនទាន់បានដោះស្រាយចប់សព្វគ្រប់ » នេះជាការបញ្ជាក់របស់លោកស្រី វ៉ុនឌែរ ឡេយែន។ នៅទីបំផុត អ្នកចរចាអង់គ្លេស និងសហភាពអឺរ៉ុបបានយល់ព្រមពន្យារពេលចរចាគ្នាចំនួន ២ថ្ងៃបន្ថែមទៀត គឺថ្ងៃអាទិត្យ ទី៦ ធ្នូ និងថ្ងៃចន្ទ ទី៧ ធ្នូនៅក្នុងទីក្រុងព្រុចសែល ប្រទេសបែលហ្ស៊ិក។ ចំណែកលោកស្រីវ៉ុនឌែរ ឡេយែន និងលោកចនសុនគ្រោងជួបគ្នាតាមទូរសព្ទជាថ្មីនៅយប់ថ្ងៃចន្ទ ទី៧ ធ្នូ។
គួររម្លឹកថា តាំងពីអង់គ្លេសបានចាកចេញពីសហភាពអឺរ៉ុបជាផ្លូវការក្នុងថ្ងៃទី៣១ មករាឆ្នាំ ២០២០ អង់គ្លេសកំពុងបន្តអនុវត្តច្បាប់ពាណិជ្ជកម្ម និងពន្ធគយរបស់សហភាពអឺរ៉ុបរហូតដល់ថ្ងៃទី៣១ ធ្នូ ឆ្នាំ ២០២០ នេះ។ បើពីពេលនេះដល់ដំណាច់ខែធ្នូ ឆ្នាំ ២០២០ អង់គ្លេស និងសហភាពអឺរ៉ុបមិនអាចរកបាននូវកិច្ចព្រមព្រៀងពាណិជ្ជកម្មរវាងគ្នាទេ ការដោះដូរពាណិជ្ជកម្មរវាងអង់គ្លេស និងសហភាពអឺរ៉ុបនឹងត្រូវធ្វើឡើងដោយផ្អែកតាមច្បាប់របស់អង្គការពាណិជ្ជកម្មពិភពលោកចាប់ពីថ្ងៃទី១ មករា ឆ្នាំ ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ