បារាំងនិងប្រទេសអឺរ៉ុបផ្សេងទៀតចាប់បើកព្រំដែនជាមួយអង់គ្លេសឡើងវិញ
ចុះផ្សាយនៅថ្ងៃ៖
ស្តាប់ - ០៦:៥៩
នៅប៉ុន្មានថ្ងៃចុងក្រោយនេះ បណ្តាប្រទេសអឺរុបជាច្រើនបាននាំគ្នាប្រកាសហាមឃាត់ និងផ្អាករាល់ការធ្វើដំណើរទាំងអស់ពីអង់គ្លេសដោយសារបារម្ភពីការបំប្លែងខ្លួនរបស់កូវីដ១៩។ ក៏ប៉ុន្តែ នៅថ្ងៃពុធ ទី២៣ ធ្នូនេះ បារាំងនិងប្រទេសអឺរ៉ុបផ្សេងទៀតចាប់ផ្តើមបើកព្រំដែនជាមួយអង់គ្លេសឡើងវិញ ស្របពេលដែលអង្គការសុខភាពពិភពលោកប្រចាំតំបន់អឺរ៉ុបក៏គ្រោងជួបជុំអ្នកជំនាញដែរដើម្បីពិភាក្សាគ្នាអំពីការបំប្លែងខ្លួនរបស់មេរោគកូវីដ។ ហេតុអ្វីបានជាបារាំងនិងបណ្តាប្រទេសអឺរ៉ុបដទៃទៀតសម្រេចដកបម្រាមលើការធ្វើដំណើរចូលមកពីអង់គ្លេស? តើកិច្ចប្រជុំរបស់អង្គការសុខភាពពិភពលោកប្រចាំតំបន់អឺរ៉ុបសម្រេចបានលទ្ធផលអ្វីខ្លះ?
ប្រទេសជាសមាជិកអឺរ៉ុបចាប់បើកព្រំដែនជាមួយអង់គ្លេសឡើងវិញ
ចាប់តាំងពីថ្ងៃអាទិត្យទី ២០ ធ្នូមក បារាំងនិងបណ្តាប្រទេសអឺរ៉ុបជាច្រើនទៀតបានប្រកាសជាបន្តបន្ទាប់គ្នាហាមឃាត់និងផ្អាករាល់ការធ្វើដំណើរចូលមកពីប្រទេសអង់គ្លេស មិនថាតែចរាចរជើងគោក ជើងទឹក ជើងអាកាស ឬជាចរាចរមនុស្ស ឬក៏ការដឹកជញ្ជូនទំនិញឡើយ។
ប្រទេសអឺរុបទាំងនោះបានដាក់ចេញវិធានការបែបនេះ ដោយសារពួកគេបារម្ភខ្លាចពីការឆ្លងរីករាលដាលពាសពេញអឺរ៉ុបនៃជំងឺកូវីដ១៩ដែលបានបំបែ្លងខ្លួន ពីព្រោះនៅអង់គ្លេស កាលពីសប្តាហ៍មុន គេបានរកឃើញថាមេរោគកូរ៉ូណាបានផ្លាស់ប្តូរប្លែងរូបរាងថ្មី ក្នុងចំណោមអ្នកជំងឺអង់គ្លេសរាប់រយនាក់។
ចាប់តាំងពីមានការបិទព្រំដែនគ្រប់ច្រកល្ហករយៈបីថ្ងៃមកនេះ គេឃើញមានរថយន្តច្រើនរាប់ពាន់គ្រឿង ទំនិញជាច្រើនតោនត្រូវជាប់គាំង។ រីឯមនុស្សម្នាវិញ ក៏មិនអាចធ្វើដំណើរចេញពីអង់គ្លេសបានដែរជាពិសេសនៅជិតពេលដែលមានការប្រារព្ធពិធីបុណ្យគ្រីសម៉ាសដែលជាពិធីបុណ្យដ៏ធំនៅអឺរ៉ុប។
ក៏ប៉ុន្តែ ដោយសារតែមានការខំខ្នះខ្នែងចរចាខ្លាំងពីអង់គ្លេស បូករួមទាំងនៅថ្ងៃអង្គារម្សិលមិញ គណៈកម្មការអឺរ៉ុបបានជំរុញឲ្យបណ្តារដ្ឋជាសមាជិកអឺរ៉ុបដកបម្រាមចេញវិញផង ទើបនៅទីបំផុតទៅ បារាំងនិងប្រទេសអឺរ៉ុបផ្សេងទៀតផ្តើមបើកព្រំដែនជាមួយអង់គ្លេសនៅថ្ងៃពុធនេះតែម្តង បើទោះបីជាអាជ្ញាធរសុខាភិបាលអង់គ្លេសនៅមិនអាចគ្រប់គ្រងលើមេរោគកូវីដ១៩ ដែលបំប្លែងខ្លួននោះក្តី។
ដោយឡែក បើទោះបីប្រទេសបារាំង ហូឡង់ និងបែលហ្ស៊ិកជាដើមបានឈានដល់កិច្ចព្រមព្រៀងជាមួយអង់គ្លេសដើម្បីបើកព្រំដែននឹងគ្នាហើយក្តី នៅមានប្រទេសរាប់សិបផ្សេងទៀតនៅមិនទាន់ហ៊ានបើកព្រំដែនជាមួយអង់គ្លេសវិញឡើយ។
ប្រទេសជាង ៥០ រួមមានអាល្លឺម៉ង់ អ៊ីតាលី ឥណ្ឌា និងប៉ាគីស្ថាន នៅបន្តហាមប្រាមអ្នកធ្វើដំណើរមកពីអង់គ្លេសនៅឡើយទេ។
បារាំងនិងប្រទេសអឺរ៉ុបដទៃទៀតយល់ព្រមបើកព្រំដែនជាមួយអង់គ្លេសសម្រាប់តែការធ្វើដំណើរចាំបាច់
បារាំងនិងប្រទេសអឺរ៉ុបជាច្រើនទៀតចាប់ផ្តើមបើកព្រំដែនជាមួយអង់គ្លេសឡើងវិញ សម្រាប់តែការធ្វើដំណើរចាំបាច់ និងក្រោមលក្ខខណ្ឌមួយចំនួនតែប៉ុណ្ណោះ។
ជាក់ស្តែង ស្របតាមកិច្ចព្រមព្រៀងរវាងបារាំងនិងអង់គ្លេស អ្នកដែលធ្វើដំណើរក្រោមហេតុផលចាំបាច់ណាមួយ រួមទាំងអ្នកធ្វើដំណើរជនជាតិបារាំង និងពលរដ្ឋអង់គ្លេសដែលមានសញ្ជាតិបារាំងនឹងត្រូវគេអនុញ្ញាតឲ្យចូលប្រទេសបារាំងបាន។
ប៉ុន្តែ ដើម្បីអាចធ្វើដំណើរចូលទឹកដីនៃប្រទេសបារាំង ពួកគេត្រូវធ្វើតេស្តអវិជ្ជមានកូវីដដែលមានរយៈពេលតិចជាង ៧២ម៉ោងមុនពេលចេញដំណើរ។ យ៉ាងណាមិញ វាទំនងជាយឺតពេលបន្តិចសម្រាប់ជនជាតិបារាំងនិងហូឡង់មួយចំនួនដែលរស់នៅក្នុងប្រទេសអង់គ្លេសក្នុងការទទួលបានការធ្វើតេស្តឲ្យទាន់ពេលវេលាដើម្បីទៅជួបជុំគ្រួសារក្នុងឱកាសបុណ្យណូអែលពីព្រោះថាពិធីបុណ្យេនះនឹងត្រូវចាប់ផ្តើមប្រារព្ធធ្វើនៅថ្ងៃព្រហស្បតិ៍ស្អែកនេះ។
ទាក់ទងចំណុចនេះ គួរជម្រាបជូនដែរថាក្រោយមានការព្រមព្រៀងរវាងបារាំងនិងអង់គ្លេស ចរាចរផ្លូវដែក ផ្លូវអាកាស និងផ្លូវទឹករវាងប្រទេសទាំងពីរបានចាប់ផ្តើមឡើងវិញនៅព្រឹកថ្ងៃពុធនេះតែម្តង។
ចំណែកបញ្ហាឡានដឹកទំនិញប្រមាណ ៣ ពាន់គ្រឿងដែលនៅកកស្ទះតាមព្រំដែនប្រទេសបារាំង-អង់គ្លេស ទំនងជានឹងត្រូវដោះស្រាយបានក្នុងរយៈពេល ២-៣ ថ្ងៃខាងមុខទៀត។ អ្នកបើកបររថយន្តដឹកទំនិញ ត្រូវរងចាំទទួលបានលទ្ធផលតេស្តអវិជ្ជមានកូវីដសិនមុននឹងអាចធ្វើដំណើរពីស្រុកខេនភាគអាគ្នេយ៍នៃប្រទេសអង់គ្លេសចូលទៅប្រទេសបារាំងបាន។
កិច្ចប្រជុំរបស់អង្គការសុខភាពពិភពលោកប្រចាំតំបន់អឺរ៉ុបអំពីការបំប្លែងខ្លួនរបស់កូវីដ
នៅខណៈពេលដែលព័ត៌មានស្តីអំពីការបំប្លែងខ្លួនរបស់មេរោគកូវីដត្រូវបានប្រកាសដោយរដ្ឋាភិបាលអង់គ្លេស គេមានការព្រួយបារម្ភជាខ្លាំងថាវត្តមានកោសិកាថ្មីដែលកើតចេញពីការបំប្លែងខ្លួនរបស់កូវីដនឹងកាន់តែជំរុញឲ្យការឆ្លងរាតត្បាតខ្លាំងនិងលឿនឆាប់រហ័ស ព្រមទាំងអាចបណ្តាលឲ្យមានជនរងគ្រោះកាន់តែច្រើនលើសមុន។
មួយវិញទៀត ការផ្លាស់ប្តូរនេះក៏នាំឲ្យមានការភ័យព្រួយខ្លាំង និងមានសំណួរលើកឡើងដែរពីប្រសិទ្ធភាពនៃវ៉ាក់សាំងបង្ការកូវីដដែលប្រទេសជាច្រើនមានដូចជាសហរដ្ឋអាមេរិក អង់គ្លេស និងកាណាដាជាដើម បានផ្តើមយុទ្ធនាការចាក់ថ្នាំវ៉ាក់សាំងឲ្យប្រជាជនប៉ុន្មានថ្ងៃនេះរួចទៅហើយនោះ។
ដោយសារតែមានការលើកឡើងពីក្តីបារម្ភច្រើនបែបនេះហើយទើបអង្គការសុខភាពពិភពលោកនៅអឺរ៉ុបបានសម្រច បើកកិច្ចប្រជុំពិភាក្សារវាងអ្នកជំនាញរបស់ខ្លួននៅថ្ងៃពុធនេះ ដើម្បីពិភាក្សារកដំណោះស្រាយដើម្បីទប់ស្កាត់ការឆ្លងរាតត្បាតពីមេរោគកូវីដដែលបានផ្លាស់ប្តូរប្រែប្លែងខ្លួនថ្មី។
នាខណៈពេលនះ កិច្ចប្រជុំរបស់អង្គការសុខភាពពិភពលោកប្រចាំតំបន់អឺរ៉ុប នៅមិនទាន់បិទបញ្ចប់នៅឡើយនោះទេ ហើយលទ្ធផលនៃកិច្ចប្រជុំយ៉ាងណានោះ ក៏នៅមិនទាន់មាននរណាដឹងនៅឡើយដែរ។
ប៉ុន្តែ បើតាមលោក ហាន់ ខ្លូហ្គឺ (Hans Kluge) នាយកអង្គការសុខភាពពិភពលោកប្រចាំតំបន់អឺរ៉ុប កិច្ចប្រជុំនៅថ្ងៃនេះ នឹងផ្តោតសំខាន់អំពីយុទ្ធសាស្ត្រសម្រាប់ការធ្វើតេស្តសាកល្បង ការកាត់បន្ថយការឆ្លលរាលដាលនៃមេរោគកូវីដ និងហានិភ័យនៃទំនាក់ទំនងរវាងមនុស្សនិងមនុស្ស។
យ៉ាងណាក៏ដោយ ដើម្បីទប់ស្កាត់ការឆ្លងរាលដាលខ្លាំងនៃជំងឺកូវីដ១៩ដែលទើបបានបំប្លែងខ្លួននេះ អង្គការសុខភាពពិភពលោកបានផ្តល់អនុសាសន៍ឲ្យកាត់បន្ថយការធ្វើដំណើរ និងបង្កើនការប្រុងប្រយ័ត្នខ្ពស់ជាងមុនរហូតដល់ក្រុមអ្នកជំនាញជូនព័ត៌មានថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ