អ្នកជំនាញ ៖ មិនទាន់ហួសពេល ខ្ទប់ការបំប្លែងខ្លួនរបស់កូវីដ១៩ទេ !
ការបំប្លែងខ្លួននៃមេរោគកូវីដ១៩ បានជំរុញឱ្យប្រទេសជាច្រើនដកខ្លួនឱ្យឆ្ងាយពីអង់គ្លេសមួយរយៈ ដើម្បីជាកិច្ចការពារកុំឱ្យមានការឆ្លងរាតត្បាតខ្លាំង។ ប៉ុន្តែបើតាមលោកស្រី អេម៉ា ហុដក្រុហ្វ Emma Hodcroft បណ្ឌិតផ្នែករោគរាតត្បាត ឯកទេសខាងមេរោគបំផ្លែង គេអាចកំរិតការបំប្លែងខ្លួនរបស់កូវីដ១៩ បាន ព្រោះនៅមិនទាន់ហួសពេលទេ។
ចុះផ្សាយនៅថ្ងៃ៖
ស្តាប់ - ០២:១០
នៅក្នុងបទសម្ភាសន៍ជាមួយភ្នាក់ងារសារព័ត៌មានបារាំង AFP លោកស្រី អេម៉ា ហុដក្រុហ្វ Emma Hodcroft បណ្ឌិតផ្នែករោគរាតត្បាត នៅសាកលវិទ្យាល័យក្រុង ប៊ែនប្រទេសស្វ៊ីស បានអំពាវនាវឱ្យពិភពលោកអភិវឌ្ឍវិធីកត់ត្រាតាមលំដាប់លំដោយនៃការប្រែប្រួលហ្សែនរបស់វីរុស Sars-CoV-2 បង្កជំងឺកូវីដ១៩ ដើម្បីងាយតាមដានការបំប្លែងខ្លួនរបស់មេរោគ។ លោកស្រីបានសហការបង្កើតកម្មវិធី Nextstrain ដែលមានកម្មវត្ថុប្រមូលព័ត៌មាននិងទិន្នន័យទាក់ទងនឹងការប្រែប្រួលហ្សែនរបស់មេរោគ ដោយជាក់ស្តែងភ្លាមៗ គ្រប់ពេល។ ធ្វើដូច្នេះទើបគេបានដឹងថាតើវីរុសកូវីដ១៩ បំប្លែងខ្លួន នៅទីណា ? តើវីរុសបំប្លែងខ្លួនក្នុងទម្រង់ណា ? ហើយទម្រង់មួយណាអាចបង្កគ្រោះថ្នាក់ ដូចជាឆ្លងខ្លាំង ឬធុននឹងថ្នាំវ៉ាក់សាំង ឬ បង្កឱ្យមានជំងឺធ្ងន់ធ្ងរ។
គ្មានអ្វីអាចឃាត់វីរុសមិនឱ្យបំប្លែងខ្លួនបានទេ តែយើងកំរិតការចម្លងពីមនុស្សម្នាក់ទៅមនុស្សម្នាក់បាន តាមរយៈការគោរពក្បួនការពារ រារាំងការចម្លងមេរោគ ដូចជា ពាក់ម៉ាស់ រក្សាគម្លាត កាត់បន្ថយការជួបជុំ ... នេះបើតាមការពន្យល់របស់លោកស្រី អេម៉ា ហុដក្រុហ្វ Emma Hodcroft ដោយបញ្ជាក់ថាមេរោគបំប្លែងអាចមានហានិភ័យបង្កគ្រោះថ្នាក់ជាងមេរោគដើម តែមេរោគនឹងមិនសូវបំប្លែងខ្លួន បើមិនសូវមានការចម្លងមេរោគទៅមនុស្សផ្សេង។ ដូច្នេះ គេត្រូវចាត់វិធានការទប់ស្កាត់កុំឱ្យមេរោគកូវីដ១៩បំប្លែងនៅអង់គ្លេស ឆ្លងមករាលដាលកំរិតអន្តរជាតិនិងអឺរ៉ុបទាន់ ព្រោះនៅមិនទាន់ហួសពេលទេពេលនេះ។ លោកស្រី យល់ថា យើងនៅមានឱកាសខ្ទប់ការបំប្លែងខ្លួនរបស់កូវីដ១៩បាន ដោយត្រូវចូលរួមធ្វើទាំងអស់គ្នា និងភ្លាមៗ ដោយមិនអាចបង្អង់បានឡើយ។
កាដូដ៏ប្រសើរបំផុតសម្រាប់គ្រួសារនាឱកាសបុណ្យណូអែល និងដាច់ឆ្នាំនេះ គ្មានអ្វីក្រៅអំពីប្រកាន់ឥរិយាបថណាដែលទប់កុំឱ្យមេរោគកូវីដ១៩បំប្លែងខ្លួនរីករាលដាលទេ។ កាត់បន្ថយការធ្វើដំណើរ ជាការកាត់បន្ថយការចម្លងនៃវីរុស និងការបំប្លែងខ្លួននៃវីរុស ! ការធ្វើដំណើរពេលវិស្សមកាលរដូវក្តៅ បាននាំកូវីដ១៩ និងវីរុសបំប្លែងនៅអេស្ប៉ាញ មកចែកចាយចម្លងពេញអឺរ៉ុប។ នេះជាមេរៀនជាក់ស្តែងដែលមិនត្រូវឱ្យកើតមានជាលើកទីពីរទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ