អាមេរិក-រុស្ស៊ី៖លោកបៃដិនបោះដៃរកលោកពូទីន តែបង្ហាញជំហរម៉ឺងម៉ាត់ដាក់លោកពូទីន
ចុះផ្សាយនៅថ្ងៃ៖
ស្តាប់ - ០៦:៣៧
ប្រធានាធិបតីអាមេរិកលោកចូ បៃដិន និងសមភាគីរុស្ស៊ីលោកវ្ល៉ាឌីមៀរ ពូទីនបានជួបសន្ទនាគ្នាតាមទូរស័ព្ទនាថ្ងៃអង្គារ ទី២៦ មករា។ នេះជាការសារសងលើកទី១ រវាងមេដឹកនាំទាំងពីរ តាំងពីលោកចូ បៃដិនបានស្បថចូលកាន់តំណែងជាផ្លូវការកាលពីថ្ងៃទី២០ មករា។ នៅក្នុងកិច្ចសន្ទនា លោកបៃដិន និងលោកពូទីនបានជជែកគ្នាលើប្រធានរឿងជាច្រើន ក្នុងនោះមានប្រធានរឿងត្រជាក់ និងប្រធានរឿងក្តៅ។ តែអ្វីដែលលោកបៃដិន និងពូទីនហាក់មានការឯកភាពគ្នា គឺកិច្ចព្រមព្រៀងជាគោលការណ៍ស្តីពីការពន្យារសន្ធិសញ្ញាកាត់បន្ថយចំនួនអាវុធនុយក្លេអ៊ែរឬហៅ New Start រវាងប្រទេសទាំងពីររយៈពេល ៥ឆ្នាំបន្ថែមទៀត។ គួររម្លឹកថា សន្ធិសញ្ញា New Start នេះនឹងត្រូវអស់សុពលភាពនៅថ្ងៃទី៥ កុម្ភៈខាងមុខ។
New Start ជាសន្ធិសញ្ញាស្តីពីការកាត់បន្ថយ និងការកំណត់ចំនួនគ្រាប់ក្បាលនុយក្លេអ៊ែរដែលសហរដ្ឋអាមេរិក និងប្រទេសរុស្ស៊ីបានចុះហត្ថលេខាកាលពីឆ្នាំ ២០១០។ តាមរយៈសន្ធិសញ្ញាមួយនេះ អតីតគូប្រជែងក្នុងសម័យសង្រ្គាមត្រជាក់បានយល់ព្រមគ្រប់គ្រងចំនួនអាវុធនុយក្លេអ៊ែរ និងផ្តើមកាត់បន្ថយបន្តិចម្តងៗដោយអនុលោមតាមសន្ធិសញ្ញាមិនសាយភាយអាវុធនុយក្លេអ៊ែរចុះហត្ថលេខាក្នុងឆ្នាំ ១៩៦៨។ សន្ធិសញ្ញា New Strat បានតម្រូវឲ្យសហរដ្ឋអាមេរិក និងរុស្ស៊ីរក្សាទុកគ្រាប់ក្បាលនុយក្លេអ៊ែរក្នុងប្រទេសនីមួយៗយ៉ាងច្រើនបំផុតត្រឹម ១ ៥៥០គ្រាប់។ ចំនួននេះគឺមានតិចជាងជិត ៣០% បើធៀបនឹងចំនួនដែលប្រទេសទាំងពីរបានកំណត់ក្នុងឆ្នាំ ២០០២។
ក្រៅពីកំណត់ចំនួនគ្រាប់ក្បាលនុយក្លេអ៊ែរ សន្ធិសញ្ញា New Start ឆ្នាំ ២០១០ ក៏បានកំណត់ចំនួនជើងទ្រសម្រាប់បាញ់បង្ហោះគ្រាប់ក្បាលនុយក្លេអ៊ែរ និងចំនួនយន្តហោះទម្លាក់គ្រាប់បែកធុនធ្ងន់នៅត្រឹម ៨០០គ្រឿងសម្រាប់ប្រទេសនីមួយៗដែរ។ សន្ធិសញ្ញា New Start នឹងអស់សុពលភាពនៅថ្ងៃទី៥ កុម្ភៈខាងមុខ។ ដូច្នេះវាជារឿងបន្ទាន់បំផុតដែលប្រទេសទាំងពីរត្រូវពន្យារពេលបន្ថែម។ គួររម្លឹកថា បើយោងតាមរបាយការណ៍ចុងក្រោយនៃវិទ្យាស្ថានស្រាវជ្រាវសន្តិភាពអន្តរជាតិក្នុងទីក្រុងស្តុកខុលហៅកាត់ Sipri សហរដ្ឋអាមេរិក និងរុស្ស៊ីរួមគ្នាមានអាវុធនុយក្លេអ៊ែរក្នុងដៃជាង ៩០% នៃអាវុធនុយក្លេអ៊ែរសរុបក្នុងលោក។
លោកបៃដិន និងលោកពូទីនចង់បានទំនាក់ទំនងប្រក្រតីឡើងវិញរវាងរុស្ស៊ី និងសហរដ្ឋអាមេរិក
ការដែលរុស្ស៊ី និងរដ្ឋបាលអាមេរិកក្នុងជំនាន់លោកដូណាល់ ត្រាំនិយាយមិនត្រូវគ្នាក្នុងការពន្យារសុពលភាពសន្ធិសញ្ញា New Start ក៏ដោយសារលោកត្រាំបានដាក់លក្ខខណ្ឌមួយចំនួនលើរុស្ស៊ី។ ក្នុងចំណោមលក្ខខណ្ឌរបស់លោកត្រាំ មានលក្ខខណ្ឌមួយដែលបានធ្វើឲ្យការពន្យារសុពលភាពលើសន្ធិសញ្ញា New Start អូសបន្លាយមកដល់សព្វថ្ងៃ។ លក្ខខណ្ឌនោះ គឺលោកត្រាំចង់ទាញប្រទេសចិនឲ្យចូលរួមដែរដោយលើកយកហេតុផលទៅពន្យល់ថា សមត្ថភាពនុយក្លេអ៊ែររបស់ចិនកំពុងមានសន្ទុះកើនឡើងយ៉ាងលឿន។ អ្នកចរចាអាមេរិកលោក Marshall Billingslea បានបញ្ជាក់កាលពីខែមិថុនា ឆ្នាំ ២០២០ ថា លោកកត់សម្គាល់ឃើញពីល្បឿននៃកម្មវិធីអភិវឌ្ឍគ្រឿងសព្វាវុធរបស់ចិន ហើយបានបរិហារចិនពីបទបានលាក់ និងគ្មានតម្លាភាពនៅក្នុងសំណុំរឿងនេះ។
តាមពិតទៅ ចិនមិនបដិសេធលើការចរចាស្តីពីបញ្ហានុយក្លេអ៊ែរទេ គ្រាន់តែថា ចិនចង់បានកិច្ចចរចាមួយជាលក្ខណៈពហុភាគី ពោលមិនមែនទ្វេភាគី ឬត្រីភាគីដូចដែលអាមេរិកចង់បាននោះឡើយ។ ទន្ទឹមនឹងការចរចាស្តីពីការពន្យារសុពលភាពលើសន្ធិសញ្ញា New start បានជាប់គាំង លោកដូណាល់ ត្រាំក៏បានសម្រេចដកអាមេរិកចេញពីកិច្ចព្រមព្រៀង និងសន្ធិសញ្ញាអន្តរជាតិចំនួន ៣ គឺកិច្ចព្រមព្រៀងនុយក្លេអ៊ែរអ៊ីរ៉ង់ សន្ធិសញ្ញាស្តីពីគ្រាប់មីស៊ីលចម្ងាយមធ្យម និងសន្ធិសញ្ញាមេឃចំហ ឬ Open Skies។ សន្ធិសញ្ញាមេឃចំហនេះក៏ត្រូវបានរុស្ស៊ីដកខ្លួនចេញដែរ។
លោកបៃដិនបោះដៃរករុស្ស៊ី តែបង្ហាញជំហរម៉ឺនម៉ាត់ចំពោះរុស្ស៊ី
តាមពិត លោកបៃដិនបានស្នើតាំងពីថ្ងៃទី២១ មករា ពោលមួយថ្ងៃក្រោយពីលោកបានស្បថចូលកាន់តំណែងឲ្យមានការពន្យារសុពលភាពសន្ធិសញ្ញា New Start ចំនួន ៥ឆ្នាំបន្ថែមទៀត។ សំណើនេះក៏ត្រូវបានលោកពូទីនសាទរភ្លាមៗដោយគ្មានអល់អែក។ នេះស បញ្ជាក់ឲ្យឃើញថា លោកបៃដិនមិនបានដាក់លក្ខខណ្ឌដូចអតីតប្រធានាធិបតីអាមេរិកលោកដូណាល់ ត្រាំ។ លោកបៃដិនចង់ស្តារឡើងវិញនូវទំនាក់ទំនងរកាំរកូសដែលអាមេរិកក្នុងជំនាន់លោកត្រាំមានជាមួយរុស្ស៊ី។ នៅក្នុងកិច្ចសន្ទនាតាមទូរស័ព្ទជាមួយលោកបៃដិន លោកពូទីនក៏ចង់បានទំនាក់ទំនងប្រក្រតីឡើងវិញរវាងរុស្ស៊ីជាមួយរដ្ឋបាលអាមេរិករបស់លោកបៃដិនដោយលោកពូទីនយល់ថា គឺដើម្បីប្រយោជន៍រួមរវាងប្រទេសទាំងពីរផង និងសហគមន៍អន្តរជាតិផង។
មែនទែនទៅ លោកបៃដិនយល់មិនច្រឡំទេថា វាគ្មានខុសទាស់អីសោះឡើយដែលគ្រាន់តែពន្យារពេលបន្ថែមលើសន្ធិសញ្ញាមួយដែលមានស្រាប់តាំងពី ១០ឆ្នាំមកហើយនោះ។ បើគេពិនិត្យមើលឲ្យបានស៊ីជ្រៅបន្តិចទៅ លោកបៃដិនចង់ប្រើយន្តការណ៍ពន្យារសុពលភាពសន្ធិសញ្ញា New Start ជាមួយរុស្ស៊ីពេលនេះដើម្បីជជែកជាមួយរុស្ស៊ីលើសំណុំរឿងអន្តរជាតិផ្សេងទៀតដែលរុស្ស៊ីជាតួអង្គមិនអាចខ្វះបាន ពិសេសកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ដែលរុស្ស៊ីជាប្រទេសហត្ថលេខីម្នាក់។ បន្ទាប់មកនៅក្នុងកិច្ចសន្ទនាជាមួយលោកពូទីនដដែល លោកបៃដិនមិនភ្លេចនិយាយប្រធានរឿងចំនួន ៣ ដែលលោកពូទីនពិតជាមិនចង់ឮទេ។
ប្រធានរឿងទី១ ទាក់ទងនឹងមេប្រឆាំងរស្ស៊ីលោកអាឡិចសី ណាវ៉ាល់នីដែលរដ្ឋអំណាចរុស្ស៊ីបានចាប់ដាក់គុកនៅថ្ងៃដែលលោកណាវ៉ាល់នីបានត្រឡប់ចូលស្រុកវិញ បន្ទាប់ពីត្រូវបានគេដាក់ថ្នាំពុល និងសម្រាកព្យាបាលក្នុងប្រទេសអាល្លឺម៉ង់ ប្រធានរឿងទី២ ទាក់ទងនឹងការវាយប្រហារតាមអ៊ីធ័រនែតលើស្ថាប័នសហព័ន្ធអាមេរិកដែលរដ្ឋបាលអាមេរិកទម្លាក់ការទទួលខុសត្រូវលើរុស្ស៊ី និងប្រធានរឿងទី៣ ទាក់ទងនឹងការសង្ស័យលើរុស្ស៊ីដែលបានឲ្យលុយពួកឧទ្ទាមតាលីបង់ដើម្បីសម្លាប់ទាហានអាមេរិកនៅក្នុងប្រទេសអាហ្វហ្កានីស្ថាន។ ឃើញថានៅម្ខាង លោកបៃដិនបោះដៃរករុស្ស៊ី និងនៅម្ខាងទៀត លោកបៃដិនបង្ហាញជំហរម៉ឺងម៉ាត់ដាក់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ