អង់គ្លេសនឹងសុំចូលជាសមាជិកនៃកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក(CPTPP)
ចុះផ្សាយនៅថ្ងៃ៖
ស្តាប់ - ០៦:៥១
ក្រោយពីបំបែកចេញពីសហភាពអឺរ៉ុបបានមួយឆ្នាំ អង់គ្លេសងាកទៅរកដៃគូថ្មី។ នៅល្ងាចថ្ងៃសៅរ៍ទី ៣០មករាម្សិលមិញ រដ្ឋមន្ត្រីក្រសួងពាណិជ្ជកម្មអន្តរជាតិអង់គ្លេសបានចេញសេចក្តីថ្លែងការណ៍ប្រកាសថា អង់គ្លេសនឹងស្នើសុំ ជាផ្លូវការ ចូលជាសមាជិកនៃកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក។ បើតាមលោកស្រីរដ្ឋមន្ត្រី Liz Truss កិច្ចចរចាអាចចាប់ផ្តើមនៅក្នុងឆ្នាំនេះតែម្តងផង។ ការប្រកាសរបស់អង់គ្លេសនេះបានធ្វើឡើង ក្រោយពីអង់គ្លេសបានចាកចេញពីសហភាពអឺរ៉ុប និងទីផ្សារអឺរ៉ុបជាផ្លូវការ។
អង់គ្លេសនឹងស្នើសុំ ជាផ្លូវការនៅថ្ងៃចន្ទទី ១កុម្ភៈនេះ ចូលជាសមាជិកនៃកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក។បើតាមលោកស្រីរដ្ឋមន្ត្រីក្រសួងពាណិជ្ជកម្មអន្តរជាតិអង់គ្លេស កិច្ចចរចាអាចចាប់ផ្តើមនៅក្នុងឆ្នាំនេះតែម្តងផង។
សន្ធិសញ្ញាពាណិជ្ជកម្មអន្តរប៉ាស៊ីហ្វិក ហៅកាត់ថា CPTPP (Comprehensive and Progressive Agreement for Trans-Pacific Partnership) កើតចេញជារូបរាងនៅឆ្នាំ២០១៩ និងជាទម្រង់ថ្មីនៃកិច្ចព្រមព្រៀងផ្តោះប្តូរសេរីអន្តរប៉ាស៊ីហ្វិក ដែលរលាយទៅក្រោយពីសហរដ្ឋអាមេរិករបស់លោកដូណាល់ ត្រាំ បានដកខ្លួនចេញ។ កិច្ចព្រមព្រៀងពាណិជ្ជកម្មអន្តរប៉ាស៊ីហ្វិក CPTPP មានសមាជិកសរុបចំនួន១១ប្រទេស ដែលសុទ្ធតែមានទីតាំងនៅជាប់មហាសមុទ្ទប៉ាស៊ីហ្វិក ដូចជា អូស្ត្រាលី ព្រុយណេ កាណាដា ជប៉ុន ស៊ីលី ម៉ិចស៊ិក ម៉ាឡេស៊ី នូវែលហ្សេឡង់ ប៉េរ៉ូសិង្ហបុរី និង វៀតណាម។
កម្មវត្ថុនៃការបង្កើតកិច្ចព្រមព្រៀងនេះឡើង គឹ ដើម្បីលុបរនាំងពន្ធគយក្នុងតំបន់អាស៊ីប៉ាស៊ីហ្វិក ដែលតំណាងឱ្យការផ្តោះប្តូរពាណិជ្ជកម្មរបស់ប្រជាពលរដ្ឋជិត៥០០លាននាក់ និងពិសេសគឺដើម្បី ទប់ទល់នឹងឥទ្ធិពលពាណិជ្ជកម្មចិន ដែលរីកធំជាលំដាប់ ក្នុងតំបន់។
អង់គ្លេសជើងឯកផ្នែកផ្តោះប្តូរពាណិជ្ជកម្ម
អង់គ្លេសស្ថិតនៅជាប់មហាសមុទ្ទអាត្លង់ទិកសោះ ចង់ទៅចូលក្រុមប៉ាស៊ីហ្វិកដែរ ពិតជាមិនសមសោះ។ ប៉ុន្តែការចូលជាសមាជិកនៃកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក នឹងនាំមកនូវផលប្រយោជន៍ច្រើនណាស់សម្រាប់ប្រជាពលរដ្ឋអង់គ្លេស។ នេះបើតាមសំដីរបស់លោកនាយករដ្ឋមន្ត្រី បូរីស ចនស៊ុន ដែលអះអាងទៀតថា អង់គ្លេសចង់ក្លាយជាប្រទេសដំបូងគេដែលភ្ជាប់ខ្លួននឹងកិច្ចព្រមព្រៀង CPTPP។ អង់គ្លេស មានមហិច្ឆតារកស៊ី ជាមួយមិត្តល្អៗ ជាមួយគ្រប់ដៃគូនៅទូទាំងភពផែនដី។ អង់គ្លេសនឹងក្លាយជាជើងឯកពិភពលោកខាងផ្នែកផ្តោះប្តូរពាណិជ្ជកម្មសេរី។ នេះបើតាមលោកប្រសាសន៍របស់លោកចនស៊ុន។
ចំណែកលោកស្រីរដ្ឋមន្ត្រីក្រសួងពាណិជ្ជកម្មវិញបានលម្អិតថា ក្លាយជាសមាជិកនៃកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក នឹងផ្តល់សំណាងច្រើនដល់អង់គ្លេស ៖ មានពន្ធគយទាបសម្រាប់ឧស្សាហកម្មផលិតរថយន្ត ផលិតស្រាវីស្គី មានអ្នកផ្គត់ផ្គង់សេវាកម្មល្អៗ នាំការងារប្រកបដោយគុណភាព ពោលគឺប្រជាពលរដ្ឋអង់គ្លេសនឹងស្គាល់ភាពរុងរឿង។
ប្រតិកម្មរបស់គណបក្សប្រឆាំង
ក្រុមសហគមន៍ថៅកែ រីករាយអបអរ ថាអង់គ្លេសនឹងបើកទំព័រថ្មី មាននយោបាយពាណិជ្ជកម្មឯករាជ្យ និងបង្កើតឱកាសថ្មីឱ្យក្រុមហ៊ុនមែន តែសម្រាប់អ្នកទទួលខុសត្រូវផ្នែកពាណិជ្ជកម្មអន្តរជាតិ លោកស្រី Emily Thornberry ដែលជាសមាជិកគណបក្សប្រឆាំងវិញ បានចោទសួរខ្លាំងអំពីដំណើរការនិងសំណុំបែបបទនៃការសុំចូលជាសមាជិកនៃកិច្ចព្រមព្រៀងពាណិជ្ជកម្មអន្តរប៉ាស៊ីហ្វិកនេះ។ បើតាមលោកស្រី Thornberry គិតមកទល់ពេលម៉ោងនេះ លោកស្រីរដ្ឋមន្ត្រី Liz Truss មិនទាន់អាចធានាបានទេថាអង់គ្លេសនឹងមានសិទ្ធប្រឆាំងវេតូ ដូចចិន ដែរឬអត់នៅពេលបានក្លាយជាសមាជិកពេញលេញ។ ចិន បានប្រកាសកាលពីខែវិច្ឆិកា ២០២០ ថាកំពុងសិក្សាមើលលទ្ធភាពចូលជាសមាជិកនៃសន្ធិសញ្ញានេះដែរ តែជាមួយលក្ខខណ្ឌមានសិទ្ធប្រើវេតូ។
ម្យ៉ាងទៀត គំនិតផ្តួចផ្តើមទៅចូលជាសមាជិកសន្ធិសញ្ញាអន្តរប៉ាស៊ីហ្វិក ប្រព្រឹត្តទៅតែមួយឆ្នាំក្រោយពីអង់គ្លេសបានបំបែកចេញជាផ្លូវការពីសហភាពអឺរ៉ុប និងមួយខែក្រោយការរកឃើញកិច្ចព្រមព្រៀងផ្តោះប្តូរពាណិជ្ជកម្មក្រោយBrexitយ៉ាងត្រដាបត្រដួស។ ចន្លោះពេលនេះ អង់គ្លេសបានចុះកិច្ចព្រមព្រៀងផ្តោះប្តូរពាណិជ្ជកម្មពីរទៅហើយជាមួយប្រទេសនៅតំបន់អាស៊ី គឺជប៉ុន និងសិង្ហបុរី។
អង់គ្លេសបានប្រើពេល៥ឆ្នាំ និងឆ្លងកាត់ការសួរមតិប្រជាពលរដ្ឋផង មុននឹងចាកចេញពីសហភាពអឺរ៉ុប តែបានសម្រេចចិត្តយ៉ាងលឿនរហន់ទៅភ្ជាប់ខ្លួនជាមួយប្លុកថ្មីផ្សេង (ប្លុកពាណិជ្ជកម្ម) នៅជើងមេឃម្ខាងទៀត ដោយគ្មានការពិគ្រោះនយោបាយអ្វីច្បាស់លាស់គួរកត់សម្គាល់សោះ។ ហេតុអ្វីរដ្ឋាភិបាលដូចជាប្រញាប់ប្រញាល់ម្ល៉េះ? នេះជាចំណោទសួរបន្ថែមរបស់គណបក្សប្រឆាំង។
បារាំងចង់ដឹងជំហរច្បាស់លាស់របស់អង់គ្លេស
នៅក្នុងបទសម្ភាសន៍ជាមួយក្រុមសារព័ត៌មានបរទេស លោកប្រធានាធិបតីបារាំង បានអំពាវនាវឱ្យអង់គ្លេសបញ្ជាក់ ឱ្យបានច្បាស់លាស់អំពីជំហរ និងទំនាក់ទំនងរបស់អង់គ្លេសជាមួយសហភាពអឺរ៉ុប ទោះអង់គ្លេសលែងជាសមាជិកសហភាពក៏ដោយ។
ឆ្លើយនឹងសំណួររបស់អ្នកកាសែតស្តីពីនយោបាយអនាគតអង់គ្លេសជាទូទៅ -មិនមែនជាប្រតិកម្មតបក្រោយពីបានលើអង់គ្លេសប្រកាសចង់ចូលជាសមាជិកនៃកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក- លោក ម៉ាក្រុង បានអះអាងថា អង់គ្លេស ត្រូវតែជ្រើសរើសគំរូនយោបាយមួយដ៏ច្បាស់លាស់។ សម្រាប់លោកប្រធានាធិបតីបារាំង អង់គ្លេសមិនអាចជាសម្ព័ន្ធមិត្តដ៏ល្អបំផុតរបស់អាមេរិកផង របស់សហភាពអឺរ៉ុបផង និងជាសិង្ហបុរីបែបថ្មីបានទេ។ តើអង់គ្លេសចង់ជ្រើសរើសនយោបាយបែបណា ? បើអង់គ្លេសសម្រេចប្រកាន់យកនយោបាយអន្តរអាត្លង់ទិកពេញទំហឹងនោះ នោះអង់គ្លេសត្រូវបំភ្លឺឱ្យច្បាស់ ព្រោះច្បាប់រកស៊ីខុសគ្នា។ ដូច្នេះការប្រើទីផ្សារក៏ខុសគ្នាដែរ។
យ៉ាងណាក៏ដោយ ក៏លោកម៉ាក្រុងចង់បានតែម្យ៉ាង គឺឱ្យអង់គ្លេសនិងសហភាពអឺរ៉ុប ដែលធ្លាប់មានប្រវត្តិរួមរស់ជាមួយគ្នាជាយូរលង់មកហើយ បន្តសម្រេចជោគវាសនាជាមួយគ្នាទៀត និងបន្តមានទំនាក់ទំនងល្អ សន្តិនិយម និងបែបស្ថាបនាគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ