កិច្ចព្រមព្រៀងដៃគូអន្តរប៉ាស៊ីហ្វិក ជាអ្វី ?
កិច្ចព្រមព្រៀងដៃគូអន្តរប៉ាស៊ីហ្វិក ត្រូវបានក្រុមប្រទេសជាសមាជិកទាំង១២ ចុះហត្ថលេខាហើយ នៅព្រឹកមិញ នៅក្រុងប្រទេសនូវែលហ្សេឡង់។ លោក បារ៉ាក់ អូបាម៉ា ប្រធានាធិបតីអាមេរិកដែលជាអ្នកផ្តួចផ្តើមគំនិត និងសម្រេចបង្កើតគម្រោងនេះឱ្យបានចេញជារូបរាងមុនផុតអាណត្តិ បានសម្តែងការអបអរ និងសា្វគមន៍ ដោយគ្មានបង្អង់មួយវិនាទីទេ។ ប៉ុន្តែតើសភាអាមេរិកគិតដូចលោក អូបាម៉ា និងព្រមផ្តល់សច្ចាប័ន នៅក្នុងឆ្នាំ២០១៦នេះដែរឬយ៉ាងណា ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៣៦
កិច្ចព្រមព្រៀងអន្តរប៉ាស៊ីហ្វិក (TTP) ដែលជាគម្រោងបង្កើតតំបន់ផ្តោះប្តូរពាណិជ្ជកម្មដ៏ធំជាងគេបង្អស់នៅលើពិភពលោក មានប្រទេសចំនួន១២ នៅជុំវិញមហាសមុទ្ទប៉ាស៊ីហ្វិក ជាសមាជិក ៖ សហរដ្ឋអាមេរិក អូស្ត្រាលី ជប៉ុន ព្រុយណេ កាណាដា ឈីលី ម៉ាឡេស៊ី ម៉ិចស៊ិក នូវែលហ្សេឡង់ ប៉េរ៉ូ និងសិង្ហបុរី។
កិច្ចព្រមព្រៀងបង្កើតតំបន់ផ្តោះប្តូរពាណិជ្ជកម្មសេរីអន្តរប៉ាស៊ីហ្វិកនេះ តំណាងឱ្យ៤០%នៃសេដ្ឋកិច្ចពិភពលោក និងមានកម្មវត្ថុលុបបំបាត់ចោលនៅរាល់ឧបសគ្គឬរនាំងពាណិជ្ជកម្ម វិនិយោគរវាងប្រទេសជាសមាជិក។ និយាយជារួម កិច្ចព្រមព្រៀងនេះ គ្របដណ្តប់លើវិស័យពាណិជ្ជកម្មអន្តរជាតិ ជាច្រើនផ្នែក រាប់ទាំងគម្រោងបើកទីផ្សារលក់ផលិតផលកសិកម្ម ស្រូវអង្ករអាមេរិកទៅលើនៅទីផ្សារជប៉ុន ស្ករ សាច់គោ ឬហ្វ្រូម៉ានូវែលហ្សេឡង់ទៅលក់នៅកាណាដា ... ថ្នាំពេទ្យអូស្ត្រាលីទៅលក់នៅប៉េរ៉ូ ខ្ចៅខ្ចងឡានជប៉ុនទៅអាមេរិក.. ការផ្តោះប្តូរទិន្ន័យ និងកម្មសិទ្ធិបញ្ញា ដែលមិនធ្លាប់មានបញ្ចូលក្នុងកិច្ចព្រមព្រៀងពហុភាគីគ្នាពីមុនៗមក ក៏មានចែងក្នុងកិច្ចព្រមព្រៀងអន្តរប៉ាស៊ីហ្វិកនេះដែរ។ រដ្ឋជាសមាជិកទាំង១២ ត្រូវបើកទូលាយទីផ្សារដោយគ្មានរើងអើងថាជាក្រុមហ៊ុនជាតិ ឬបរទេសឡើយ។
ក្នុងផ្នែកយុទ្ធសាស្ត្រវិញ តាមរយៈការចុះហត្ថលេខាលើកិច្ចព្រមព្រៀងនៅថ្ងៃនេះ សមាជិកជាដៃគូ TTP យល់ថានឹងអាចរុញច្រានចិន ឱ្យគិតគូរសម្របខ្លួនមើលច្បាប់ពាណិជ្ជកម្មរបស់ ច្បាប់វិនិយោគខ្លួនផង ទៅច្បាប់ពាណិជ្ជកម្មរៀបចំឡើងដោយដៃគូពាណិជ្ជកម្មអន្តរប៉ាស៊ីហ្វិក។
លោក អូបាម៉ា អបអរ តែអ្នកប្រជាធិបតេយ្យបដិសេធ
កិច្ចព្រមព្រៀងនេះ ជាគំនិតផ្តួចផ្តើមរបស់លោកអូបាម៉ា និងដែលលោកបានប្រឹងការពារ បញ្ចុះបញ្ចូល និងការពារគ្រប់បែបយ៉ាង ធ្វើយ៉ាងណាដើម្បីសម្រេចឱ្យបាននូវកិច្ចព្រមព្រៀងមួយ មុននឹងលោកបញ្ចប់អាណត្តិ។ លទ្ធផលជាក់ស្តែង គឺការចុះហត្ថលេខាលើកិច្ចព្រមព្រៀងនៅថ្ងៃនេះ ក្រោមអំណរយ៉ាងខ្លាំងរបស់លោកអូបាម៉ា ព្រោះកិច្ចព្រមព្រៀងនេះបានពង្រឹងភាពជាអ្នកដឹកនាំរបស់អាមេរិកនៅលើពិភពលោកផង និងជាការគាំទ្រទីផ្សារការងាររបស់អាមេរិកទៀត។
បន្ទាប់មកដើម្បីឱ្យកិច្ចព្រមព្រៀងនេះ អាចចូលជាធរមានបាន សភាប្រទេសជាសមាជិកនីមួយៗ មានពេលពីរឆ្នាំសម្រាប់ផ្តល់សច្ចាប័ន។ ប៉ុន្តែសភា ទំនងជាគ្មាននរណារួសរាន់ឡើយ។ ផ្ទុយទៅវិញ សភានិងព្រឹទ្ធសភាអាមេរិក មានតែការបង្កើនភាពប្រឆាំងខ្លាំងឡើង ព្រោះនេះជាល្បែងនយោបាយ ដែលពាក់ព័ន្ធនឹងការបោះឆ្នោតប្រធានាធិបតី នៅចុងឆ្នាំ។
ថ្វីបើជាគោលការណ៍ បក្សសាធារណរដ្ឋ ដែលជាបក្សប្រឆាំងនិងជាបក្សគ្រប់គ្រងសភាទាំងពីរ គាំទ្ររាល់វិធានការសេដ្ឋកិច្ចបែបសេរីនិយម និងធ្លាប់បានជួយរុញច្រានដំណើរការបង្កើតកិច្ចព្រមព្រៀងមែន តែនៅថ្ងៃនេះពួកគេគ្មានភាពបន្ទាន់អ្វីត្រូវប្រញាប់ទៅការបោះឆ្នោតគ្រាន់តែដើម្បីសម្តែងការគាំទ្រ ឬប្រឆាំង ឡើយ។
ប្រមុខបក្សសាធារណរដ្ឋនៅព្រឹទ្ធសភា ចង់តែពន្យឺតពេលវេលានៃការបោះឆ្នោតនេះ ដោយចាំឱ្យសម័យបោះឆ្នោតជ្រើសរើសប្រធានាធិបតីអាមេរិកថ្ងៃទី ៨ វិច្ឆិកា ២០១៦ កន្លងផុតទៅសិន។ គឺដូចជាប្រើវិធីសាស្ត្រម្យ៉ាង ទប់លោកអូបាម៉ា កុំឱ្យស្រែកឈ្នះបាន។
ខាងបក្សប្រជាធិបតេយ្យ ក៏មិនគ្រាន់បើប៉ុន្មានដែរ ! បក្សនេះធ្លាប់ប្រឆាំងកិច្ចព្រមពៀងតាំងពីដើមមក ដោយក្រុមសហជីពខ្លាចបាត់បង់ទីផ្សារការងារ។ លោក ប៊ែរនី សិនដឺ ដែលជាបេក្ខជនប្រធានាធិបតីកំពុងប្រកួតប្រជែងនឹងលោកស្រី គ្លីនតុន យ៉ាងប្រកិតនៅរដ្ឋIowa នោះ បានប្រឆាំងយ៉ាងស្វិតស្វាញនឹងគម្រោងនោះ។ សម្រាប់លោកសិនដឺ ធ្វើពាណិជ្ជកម្មជាប្រការល្អ តែត្រូវឱ្យជាពាណិជ្ជកម្មស្មើភាព ហើយTTP មានគ្រប់យ៉ាង តែមិនត្រឹមត្រូវ"។
ចំណែកលោកស្រី គ្លីនតុន ដែលធ្លាប់ការពារយ៉ាងមុះមុត កិច្ចព្រមព្រៀងនេះ ក្នុងសម័យជារដ្ឋមន្ត្រីក្រសួងការបរទេស តែនៅថ្ងៃនេះ ចង់មិនចង់ ក្នុងនាមជាបេក្ខនារីប្រធានាធិបតី លោកស្រី ក៏ត្រូវសម្តែងការប្រឆាំងយ៉ាងមុតមាំវិញដែរ។
បើតំណាងនៅក្រសួងពាណិជ្ជកម្មដែល ចង់ឃើញអាមេរិកផ្តល់សច្ចាប័ន ឱ្យបានឆាប់រហ័ស បានបញ្ជក់ថា ភាពយឺតយ៉ាវនៃការផ្តល់សច្ចាប័ន អាចនឹងធ្វើឱ្យអាមេរិកខាតបង់ការចំណេញដល់ជាង១០០ពាន់លានដុល្លារ។
ការរិះគន់កិច្ចព្រមព្រៀង
ការប្រឆាំងមាននៅគ្រប់ទិសទី និងនៅក្នុងគ្រប់ប្រទេសជាសមាជិកTTP ទាំងអស់ហ្នឹង ! ព្រោះថ្វីបើកិច្ចព្រមព្រៀងបង្កើតតំបន់ពាណិជ្ជកម្មអន្តរប៉ាស៊ីហ្វិក ត្រូវបានបង្អួតបង្ហាញថា ជាមធ្យោបាយបំប៉នកំណើនសេដ្ឋកិច្ចក្នុងតំបន់មែន ប៉ុន្តែសកម្មជន និងអង្គការក្រៅរដ្ឋាភិបាលជាច្រើន យល់ថា កិច្ចព្រមពៀងនេះ នឹងធ្វើឱ្យរលាយក្បួនច្បាប់ពាណិជ្ជកម្មជាទូទៅ ដោយផ្តល់ប្រយោជន៍ខ្លាំងទៅឱ្យក្រុមហ៊ុនធំថ្នាក់ពហុជាតិ តែប៉ុណ្ណោះ។
ប្រទេសតូចតាចជាច្រើនដូចជាម៉ាឡេស៊ី ក៏ធ្លាប់ធ្វើបាតុកម្មញយដង ហើយនៅថ្ងៃនេះ នៅនូវែលហ្សេឡង់ ដើម្បីប្រឆាំងនឹងការចុះកិច្ចព្រមពៀង បាតុករបាននាំបិទខ្ទប់ផ្លូវជាច្រើន ព្រោះបើតាមពួកគេ កិច្ចព្រមព្រៀងនេះនឹងធ្វើឱ្យបាត់បង់ការងារ បាត់បង់អធិបតេយ្យភាពជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ