លែងជាប្រធានាធិបតី ប៉ុន្តែ លោកដូណាល់ ត្រាំ នៅតែប្រឈមនឹងនីតិវិធីដកតំណែងនៅព្រឹទ្ធសភា
ចុះផ្សាយនៅថ្ងៃ៖
ស្តាប់ - ០៧:៥២
ជាង២ សប្តាហ៍ក្រោយចាកចេញពីសេតវិមាន អតីតប្រធានាធិបតី អាមេរិក លោកដូណាល់ ត្រាំ លេចមុខជាថ្មី នៅក្នុងប្រព័ន្ធផ្សព្វផ្សាយអាមេរិកាំង។ នៅថ្ងៃអង្គារ ទី ៩កុម្ភៈ ព្រឹទ្ធសភាត្រូវបើកនីតិវិធី ដកតំណែងលោកដូណាល់ ត្រាំ។ អតីតប្រធានាធិបតី អាមេរិកទី៤៥ត្រូវបានគណបក្សប្រជាធិបតេយ្យ ដាក់ពាក្យ ប្តឹង ក្នុងបទចោទប្រកាន់ថា បានញុះញង់ឲ្យមានការបះបោរ ចូលលុកលុយ វិមានកាពីតូល ដែលបានធ្វើឲ្យមនុស្សស្លាប់ ៥នាក់ កាលពីថ្ងៃទី ៦មករាកន្លងទៅ។
បន្ទាប់ពីក្រុមអ្នកតំណាងរាស្រ្តរបស់បក្សប្រជាធិបតេយ្យ បានដាក់ពាក្យជាផ្លូវការ ទៅព្រឹទ្ធសភា នៅថ្ងៃទី ២៥មករា ដើម្បី ប្តឹងលោកដូណាល់ ត្រាំ ពីបទ ញុះញង់ ឲ្យមានការបះបោរ សម្រុកចូលក្នុងវិមានកាពីតូល កាលពីថ្ងៃទី ៦មករា កន្លងទៅ ព្រឹទ្ធសភាអាមេរិកបានចាប់ផ្តើមបើកនីតិវិធីដកតំណែងរបស់លោកដូណាល់ ត្រាំ នៅថ្ងៃអង្គារទី ៩កុម្ភៈ ២០២១។
ក្រុមមេធាវីការពារក្តីឲ្យលោកដូណាល់ ត្រាំ ក៏បានចោទសំណួរនេះផងដែរ។ នៅក្នុងលិខិតមួយផ្ញើទៅកាន់ព្រឹទ្ធសភា កាលពីថ្ងៃចន្ទ មេធាវីទាំង៣រូបរបស់លោកដូណាល់ ត្រាំ នៅបានចាត់ទុកសវនាការនៅថ្ងៃអង្គារនេះ ថា មិនស្របច្បាប់ និងផ្ទុយពីរដ្ឋធម្មនុញ្ញ ព្រោះថា លោកដូណាល់ ត្រាំ លែងកាន់អំណាច ជាប្រធានាធិបតីអាមេរិកទៀតហើយ។
តើនីតិវិធីដកតំណែងលោកដូណាល់ត្រាំ សមស្របតាមរដ្ឋធម្មនុញ្ញអាមេរិកដែរឬទេ? សវនាការនៅព្រឹទ្ធសភា នៅថ្ងៃនេះ នឹងសម្រេចអារកាត់ថា តើនីតិវិធីដកតំណែងរបស់លោកដូណាល់ ត្រាំ ស្របតាមច្បាប់ធម្មនុញ្ញាដែរឬទេ។ បើសិនជាផ្ទុយនឹងរដ្ឋធម្មនុញ្ញ នោះសវនាការត្រូវបិទបញ្ចប់នៅថ្ងៃនេះ។ ប៉ុន្តែ បើសិនជាការបោះឆ្នោត នៅថ្ងៃអង្គារនេះ សម្រេចថា វាត្រឹមត្រូវ ស្របតាមរដ្ឋធម្មនុញ្ញ នោះសវនាការដេញដោលដើម្បីឈានទៅដកតំណែងរបស់លោកដូណាល់ ត្រាំ នឹងប្រព្រឹត្តទៅ ចាប់ពីថ្ងៃពុធស្អែក នៅព្រឹទ្ធសភា។
គេរំពឹងរួចទៅហើយ ថា ព្រឹទ្ធសភា នឹងបោះឆ្នោត ឲ្យបើកសវនាការ ព្រោះថា ព្រឹទ្ធសភា សព្វថ្ងៃគ្រប់គ្រងសំឡេងភាគច្រើនដោយគណបក្សប្រជាធិបតេយ្យ ដែលជាម្ចាស់បណ្តឹង ប្តឹងលោកដូណាល់ ត្រាំ។ តាមការយល់ព្រមព្រៀងរវាងគណបក្សទាំងពីរ បន្ទាប់ពីក្រុមការពារក្តីទាំងពីរ លើកអំណះអំណាងរៀងៗខ្លួន នៅរាល់ថ្ងៃ រសៀលពេញមួយសប្តាហ៍នេះ ព្រឹទ្ធសភា នឹងអាចសម្រេចពិភាក្សាបោះឆ្នោត នៅថ្ងៃចន្ទ ឬថ្ងៃអង្គារសប្តាហ៍ក្រោយ។
បក្សទាំងពីរ ចង់ឲ្យគេពន្លឿនសវនាការកាត់ទោសលោកត្រាំ ឲ្យបានឆាប់បំផុត ដើម្បីហេតុផលរៀងខ្លួន។ ខាងគណបក្សសាធារណរដ្ឋចង់ឲ្យបិទបញ្ចប់រឿងនេះ ឲ្យបានឆាប់ ដើម្បី បញ្ចប់ ការបែកបាក់ផ្ទៃក្នុងបក្ស និងរូបភាពមិនល្អរបស់បក្ស។ ចំណែកបក្សប្រជាធិបតេយ្យ ដែលជាបក្សកាន់អំណាច ចង់ឲ្យសវនាការ ប្រព្រឹត្តទៅឲ្យលឿនឆាប់ចប់ ដែរ ដើម្បីឲ្យព្រឹទ្ធសភា អាចពិភាក្សាបោះឆ្នោតសំណុំរឿងអាទិភាព ដូចជាច្បាប់ ថវិកាសម្រាប់វិបត្តិកូវីដ ឬការតែងតាំងមន្រ្តីរដ្ឋាភិបាល របស់លោកចូ បៃដិនជាដើម។
អំណះអំណាងរបស់គូភាគីការពារក្តីនៅ ព្រឹទ្ធសភាអាមេរិក
នៅមុនថ្ងៃបើកសវនាការទៅទៀត ទាំងរដ្ឋអាជ្ញា ដែលតំណាងអ្នកតំណាងរាស្រ្តទាំង ៩រូប ដែលជាម្ចាស់ដើមបណ្តឹង ហើយនិងមេធាវីការពារក្តីឲ្យលោកដូណាល់ ត្រាំ បានបើកសង្រ្គាមពាក្យសំដីរួចទៅហើយ។ នៅថ្ងៃចន្ទម្សិលមិញ មេធាវី ទាំង៣រូបរបស់លោកដូណាល់ ត្រាំបានចោទប្រកាន់ថា សវនាការកាត់ទោសលោកដូណាល់ ត្រាំ ធ្វើឡើងក្នុងហេតុផលនយោបាយ ប្រយោជន៍នយោបាយរបស់បក្សប្រជាធិបតេយ្យ។ ពួកគេបានទាមទារឲ្យព្រឹទ្ធសភា បញ្ឈប់សវនាការ ដែលពួកគេចាត់ទុកថា ជាសវនាការដែលមិនសមស្របតាមរដ្ឋធម្មនុញ្ញ។ ជាសវនាការខុសច្បាប់ ផ្ទុយពី រដ្ឋធម្មនុញ្ញ ពីព្រោះ លោកដូណាល់ ត្រាំ បានក្លាយជាប្រជាជនសាមញ្ញម្នាក់ លែងកាន់អំណាចជាប្រធានាធិបតីអាមេរិកទៀតហើយ។ នៅក្នុងលិខិតផ្ញើ ទៅកាន់ព្រឹទ្ធសភា មុនបើកសវនាការ មេធាវីរបស់លោកដូណាល់ ត្រាំ បានចំអកថា បើកនីតិវិធីដកតំណែងប្រធានាធិបតី ពីលោកដូណាល់ ត្រាំ នៅពេលនេះ គឺជារឿង គួរឲ្យអស់សំណើចខ្លាំងណាស់។
មួយវិញទៀត ក្រុមមេធាវីរបស់លោកដូណាល់ ត្រាំបានទាត់ចោលការចោទប្រកាន់ដែលថា លោកដូណាល់ ត្រាំបានញុះញង់ឲ្យមានការបះបោរសម្រុកចូលវិមានកាពីតូល។ សម្រាប់មេធាវីរបស់លោកដូណាល់ ត្រាំ លោកដូណាល់ ត្រាំមិនបានជំរុញ ឲ្យគេប្រព្រឹត្តអំពើហិង្សា សកម្មភាពខុសច្បាប់នោះទេ។ លោកដូណាល់ ត្រាំ មិនអាចទទួលខុសត្រូវលើអំពើហិង្សា ដែលប្រព្រឹត្តឡើងក្រុមឧក្រិដ្ឋជនមួយក្តាប់តូច ដែលមានចិត្តធ្វើ ដោយខ្លួនឯងនោះទេ។ មេធាវីរបស់លោកដូណាល់ ត្រាំ បាននិយាយយោងដល់ របាយការណ៍របស់ប៉ូលិសFBI ដែលថា គម្រោង លុកលុយចូលវិមានកាពីតូលរបស់ ក្រុមស្តាំនិយមជ្រុលធ្លាប់មានតាំងពីយូរហើយ។
ប៉ុន្តែ រដ្ឋអាជ្ញាមកពីគណបក្សប្រជាធិបតេយ្យ បានផាត់ចោល ការលើកឡើងរបស់ក្រុមមេធាវីការពារក្តី ឲ្យលោកដូណាល់ ត្រាំ ដោយបានអះអាងថា គេមានភស្តុតាងច្រើនអនេកសម្រាប់បញ្ជាក់ថា លោកដូណាល់ ត្រាំ បានញុះញង់ឲ្យមានអំពើហិង្សា វាយ សម្រុកចូលទៅក្នុងវិមានកាពីតូល ដែលបានធ្វើឲ្យមនុស្ស៥នាក់ស្លាប់ កាលពីថ្ងៃទី ៦មករា។
ទី១ លោកដូណាល់ ត្រាំ បាននិយាយបញ្ចុះបញ្ចូលឲ្យគេជឿថា លោកចាញ់ឆ្នោត ដោយសារមានការលួចបន្លំសន្លឹកឆ្នោត។ លោកដូណាល់ ត្រាំ និងក្រុមឃោសនារបស់លោកបាននិយាយអស់ជាច្រើនសប្តាហ៍ថា មានការលួចបន្លំសន្លឹកឆ្នោត និងបានបដិសេធមិនទទួលជ័យជំនះរបស់លោកចូ បៃដិន រហូតមក។
ទី ២ រដ្ឋអាជ្ញាមកពីបក្សប្រជាធិបតេយ្យ នឹងបង្ហាញរូបភាពវីដេអូដែលនៅក្នុងនោះ លោកដូណាល់ ត្រាំ បានថ្លែង នៅ មុខសេតវិមាន ដោយនិយាយប្រាប់ អ្នកគាំទ្ររបស់លោក ឲ្យលើកគ្នា ទៅ បញ្ចេញ សំឡេងតវ៉ា ទៅវិមានកាពីតូល ជាទីដែលសភាអាមេរិកកំពុងបោះឆ្នោត បញ្ជាក់ជ័យជំនះរបស់លោកចូ បៃដិន។
លោកដូណាល់ ត្រាំ អាចនឹងបាត់សិទ្ធិ មិនអាចឈរឈ្មោះ សម្រាប់ការបោះឆ្នោតប្រធានាធិបតី ឆ្នាំ ២០២៤
លោកដូណាល់ ត្រាំ បានក្លាយជាប្រធានាធិបតីដំបូងគេ ក្នុងប្រវត្តិសាស្រ្ត អាមេរិក ដែលត្រូវប្រឈមនឹងការដកតំណែងដល់ទៅ ២ដង។ រងចោទប្រកាន់ថា បានរំលោភអំណាច នៅក្នុងសំណុំរឿងអ៊ុយក្រែន លោកដូណាល់ ត្រាំ ត្រូវបានព្រឹទ្ធសភា សម្រេចឲ្យរួចខ្លួន នៅឆ្នាំ ២០២០។ ប៉ុន្តែ ព្រឹទ្ធសភាអាមេរិកដដែល ត្រូវបើកសវនាការថ្មីមួយនៅថ្ងៃនេះ ដែលនៅក្នុងនោះ លោកដូណាល់ ត្រាំ រងការចោទប្រកាន់ថា បានញុះញង់ឲ្យមានការបះបោរ សម្រុកចូលដោយហិង្សា ក្នុងវិមានកាពីតូល។
បើសិន លោកដូណាល់ ត្រាំ ត្រូវរកឃើញថា បានប្រព្រឹត្តកំហុសដូចការចោទប្រកាន់ នោះការបោះឆ្នោតរបស់ព្រឹទ្ធសភា ដើម្បី ថ្កោលទោសលោកដូណាល់ ត្រាំ នឹងមានសិទ្ធិអំណាច រារាំងមិនឲ្យលោកដូណាល់ ត្រាំ អាចឈរឈ្មោះ សម្រាប់មុខតំណែងសាធារណៈ ជាពិសេស នឹងហាមរារាំងមិនឲ្យលោកដូណាល់ ត្រាំអាចឈរឈ្មោះសាជាថ្មី សម្រាប់បេក្ខជនប្រធានាធិបតី នៅឆ្នាំ ២០២៤។ នេះហើយជាគោលដៅធំបំផុតរបស់ បក្សប្រជាធិបតេយ្យរបស់លោកចូ បៃដិន។
ដើម្បីឲ្យព្រឹទ្ធសភាបោះឆ្នោតប្រឆាំងលោកដូណាល់ ត្រាំ យ៉ាងដូច្នេះ បាន បក្សប្រជាធិបតេយ្យ ត្រូវការសំឡេង ចំនួន១៧ ពីខាង បក្សសាធារណរដ្ឋ ដើម្បីអាចឲ្យមានសំឡេងភាគច្រើនលើសលុប។ ប៉ុន្តែ គេរំពឹងថា លើកនេះ លោកដូណាល់ ត្រាំ ដូចលើកមុននឹងអាចរួចផុតពីការដាក់ទោស ព្រោះថា មានសមាជិកបក្សសាធារណរដ្ឋជាច្រើន នៅតែគាំទ្រ មិនចង់ឲ្យគេដាក់ទោសលោកដូណាល់ត្រាំនោះទេ៕
នៅមានសវនាការប្តឹងផ្តល់ច្រើនទៀតកំពុងរង់ចាំលោកដូណាល់ ត្រាំ
បើទោះជារួចខ្លួនពីនីតិវិធីដកតំណែងនៅព្រឹទ្ធសភា លើកនេះ ប៉ុន្តែ លោកដូណាល់ត្រាំ ត្រូវនៅប្រឈមនឹងសវនាការចោទប្រកាន់ជាច្រើនទៀត។
លោកដូណាល់ ត្រាំ ដែលនៅពេលនេះបានក្លាយជាប្រជាជនអាមេរិកាំងសាមញ្ញម្នាក់ កំពុងប្រឈមផងដែរនឹងការចោទប្រកាន់ រឿង ក្លែងបន្លំ ពន្ធ បោកប្រាស់ផ្នែកធានារ៉ាប់រង នៅតុលាការក្រុងManhatan ជាដើម។ រដ្ឋអាជ្ញាបានដាក់ពាក្យប្តឹងរួចហើយ លោកដូណាល់ ត្រាំ ពីបទបន្លំគេចមិនបង់ពន្ធ នៅក្រោយ គេរកឃើញថា លោកដូណាល់ ត្រាំ ចាប់តាំងពីចូលកាន់តំណែងជាប្រធានាធិបតីអាមេរិក បានបង់ពន្ធតែ ៧៥០ដុល្លារប៉ុណ្ណោះ ចំណែកការរកស៊ី រាប់សិបឆ្នាំកន្លងមក គឺលោកមិនដែលបានបង់ពន្ធទេក្នុងហេតុផលថា ធ្វើជំនួញខាតបង់។
នៅពេលលោកដូណាល់ ត្រាំ នៅធ្វើជាប្រធានាធិបតី លោកបានបដិសេធ មិនបង្ហាញ ឯកសារបង់ពន្ធជាផ្លូវការនោះទេ។ ប៉ុន្តែ ពេលនេះ លោកជាប្រជាជនសាមញ្ញ លោកពិបាកនឹងរកស្នៀត ប្រើអំណាច ដើម្បីអាចគេចពីសំណាញ់ច្បាប់បានទៀតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ