សហរដ្ឋអាមេរិក៖នីតិវិធីចោទប្រកាន់លើលោកដូណាល់ ត្រាំបានបើកជាផ្លូវការ
នៅសហរដ្ឋអាមេរិក បទចោទប្រកាន់លើអតីតប្រធានាធិបតីលោកដូណាល់ ត្រាំត្រូវបានក្រុមអ្នកតំណាងរាស្រ្តបញ្ជូនទៅឲ្យព្រឹទ្ធសភាជាផ្លូវការនាយប់ថ្ងៃចន្ទ ទី២៥ មករា។ បន្ទាប់មកក្នុងថ្ងៃអង្គារ ទី២៦ មករា ក្រុមសមាជិកព្រឹទ្ធសភាត្រូវស្បថចូលកាន់តំណែងជាអ្នកវិនិច្ឆ័យនៅក្នុងនីតិវិធីជាប្រវត្តិសាស្រ្តមួយនេះ។ តាមគម្រោង ព្រឹទ្ធសភានឹងកោះហៅលោកត្រាំទៅសួរ នាំនៅថ្ងៃទី៩ កុម្ភៈខាងមុខ។ គួររម្លឹកថា មិនដែលមានទេនៅក្នុងប្រវត្តិសហរដ្ឋអាមេរិកដែលមានប្រធានាធិបតីម្នាក់បានប្រឈមនឹងការដកតំណែងដល់ទៅ ២ដង។
ចុះផ្សាយនៅថ្ងៃ៖
ស្តាប់ - ០២:៣៧
គឺនៅក្នុងបរិយាកាសស្ងៀមស្ងាត់ដែលសមាជិកសភាអ្នកប្រជាធិបតេយ្យចំនួន ៩រូបបានធ្វើដំណើរថ្មើរជើងចេញពីវិមានកាពីតូលនាំយកបទចោទប្រកាន់លើលោកដូណាល់ ត្រាំទៅឲ្យព្រឹទ្ធសភាដែលស្ថិតមិនឆ្ងាយប៉ុន្មានពីវិមានកាពីតូល។ ចំណែកច្រកផ្លូវក្នុងវិមានកាពីតូលដែលពួកគេបានធ្វើដំណើរទៀតសោត គឺច្រកផ្លូវដែលក្រុមអ្នកគាំទ្រលោកត្រាំបានចូលលុកលុយវិមានកាពីតូលកាលពីជិត ៣សប្តាហ៍មុន។ នៅពេលទៅដល់ព្រឹទ្ធសភា បទចោទប្រកាន់លើលោកត្រាំត្រូវបានអានដោយលោក Jamie Raskin ប្រធានក្រុមសមាជិកសភាអ្នកប្រជាធិបតេយ្យទាំង ៩រូបដែលប្រធានរដ្ឋសភាលោកស្រី Nancy Pelosi បានតែងតាំងជារដ្ឋអាជ្ញាសម្រាប់សំណុំរឿងមួយនេះ។
នៅក្នុងបទចោទប្រកាន់ លោកត្រាំបានជាប់ចោទពីបទញុះញង់ឲ្យមានអំពើហិង្សា បង្កគ្រោះថ្នាក់ដល់សន្តិសុខរបស់សហរដ្ឋអាមេរិក និងស្ថាប័នរបស់ប្រទេស។ បន្ទាប់មក សុន្ទរកថាដែលលោកត្រាំបានថ្លែងនៅប៉ុន្មាននាទីមុននឹងក្រុមសកម្មជនរបស់លោកចូលលុកលុយវិមានកាពីតូល និងការហៅទូរស័ព្ទរបស់លោកត្រាំទៅកាន់ចៅហ្វាយរដ្ឋ Georgia ដើម្បីឲ្យចៅហ្វាយរដ្ឋរូបនេះរកសំឡេងឆ្នោតបន្ថែមក៏មាននៅក្នុងបទចោទប្រកាន់ដែរ។ ខណៈនេះ បាល់កំពុងស្ថិតក្នុងជើងក្រុមសមាជិកព្រឹទ្ធសភា ហើយសមាជិកព្រឹទ្ធសភាអ្នកប្រជាធិបតេយ្យលោក Patrick Leahy ជាអ្នកដឹកនាំនីតិវិធីដែលនឹងត្រូវចាប់ផ្តើមនៅថ្ងៃទី៩ កុម្ភៈខាងមុខ។
ជម្រើសយកថ្ងៃទី៩ កុម្ភៈជាជម្រើសមួយដែលទទួលបានពីការចរចាដើម្បីទុកពេលឲ្យលោកត្រាំ និងក្រុមមេធាវីរបស់លោករៀបចំយុទ្ធសាស្រ្តដើម្បីការពារខ្លួន។ នីតិវិធីនេះនឹងប្រព្រឹត្តិទៅដោយមានការការពារសន្តិភាពខ្ពស់បំផុត។ មានសមាជិកសភាអ្នកប្រជាធិបតេយ្យច្រើននាក់បានទទួលការគំរាមសម្លាប់ ហើយ FBI បានព្រមានពីវត្តមានក្បួនបាតុកម្មរបស់ក្រុមអ្នកគាំទ្រលោកត្រាំនាសប្តាហ៍ខាងមុខ។ ក្រុមឆ្មាំជាតិជាច្រើនពាន់នាក់នឹងបន្តស្ថិតក្នុងទីក្រុងវ៉ាស៊ីនតោនរហូតដល់ពាក់កណ្តាលខែមីនា។
គួរបញ្ជាក់ថា នេះជាលើកទី២ ដែលលោកត្រាំបានប្រឈមនឹងការដកតំណែង ហើយជាលើកទី១ នៅក្នុងប្រវត្តិសហរដ្ឋអាមេរិកដែលមានប្រធានាធិបតីម្នាក់បានប្រឈមនឹងការដកតំណែងដល់ទៅ ២ដង។ ពិតណាស់ លោកត្រាំលែងមានតំណែងដើម្បីឲ្យគេដកទៀតឡើយ។ តែបើនីតិវិធីនេះត្រូវបានអនុម័តដោយសភាទាំងពីរមែន នោះជាការបិទផ្លូវលោកត្រាំមិនឲ្យត្រឡប់ចូលឆាកនយោបាយ ពិសេសមិនឲ្យឈរឈ្មោះជាថ្មីសម្រាប់ការបោះឆ្នោតប្រធានាធិបតីនៅឆ្នាំ ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ