សមាជិកសភាគណបក្សសាធារណរដ្ឋគាំទ្រការបោះឆ្នោតដកតំណែងលោកដូណាល់ត្រាំ
ក្រោយពីលោកម៉ៃ ផិន បដិសេធមិនដកតំណែងលោកដូណាល់ ត្រាំ តាមនីតិវិធីចែងក្នុងវិសោធនកម្មទី២៥នៃរដ្ឋធម្មនុញ្ញ រដ្ឋសភាអាមេរិកនឹងបោះឆ្នោតនៅថ្ងៃពុធនេះ ដើម្បីអនុម័តលើបទចោទប្រកាន់ ឈានទៅដកតំណែងលោកដូណាល់ ត្រាំ តាមនីតិវិធី Impeachment។ នៅមុនការបោះឆ្នោតនេះ សមាជិករដ្ឋសភាមកពីគណបក្សសាធារណរដ្ឋយ៉ាងតិចចំនួន ៣រូប ក្នុងនោះមានទាំងមន្រ្តីក្នុងជួរថ្នាក់ដឹកនាំម្នាក់ផង បានឲ្យដឹងថា ពួកគេនឹងបោះឆ្នោតគាំទ្រការដកតំណែងលោកដូណាល់ ត្រាំ។
ចុះផ្សាយនៅថ្ងៃ៖
នៅក្នុងលិខិតផ្លូវការផ្ញើទៅប្រធានរដ្ឋសភា កាលពីថ្ងៃអង្គារ លោកម៉ៃ ផិន បានបដិសេធមិនដកតំណែងលោកដូណាល់ ត្រាំ ទៅតាមនីតិវិធី ចែងក្នុងវិសោធនកម្មទី២៥នៃរដ្ឋធម្មនុញ្ញ (25th Amendment) ដូចជាការទាមទាររបស់រដ្ឋសភានោះទេ។
ហេតុដូច្នេះហើយបានជា ដូចការគ្រោងទុក រដ្ឋសភានឹងបោះឆ្នោតថ្ងៃពុធនេះ ដើម្បីអនុម័តលើបទចោទប្រកាន់ ឈានទៅដកតំណែងលោកដូណាល់ ត្រាំ តាមនីតិវិធីមួយទៀត ដែលគេហៅថា Impeachment ដោយការបោះឆ្នោតនេះត្រូវគេគ្រោងធ្វើនៅម៉ោង ៣រសៀលថ្ងៃពុធ ម៉ោងនៅរដ្ឋធានីវ៉ាស៊ីងតោន ត្រូវនឹងម៉ោង ៣រំលងអធ្រាតឈានចូលថ្ងៃព្រហស្បតិ៍ នៅក្នុងប្រទេសកម្ពុជា។
ការចោទប្រកាន់លើលោកដូណាល់ ត្រាំ ពីបទថា បានញុះញង់ឲ្យប្រព្រឹត្តអំពើបះបោរ នៅវិមានកាពីតូល ដែលគេគ្រោងអនុម័តនេះ បានទទួលនូវការគាំទ្រជាទូទៅពីសំណាក់សមាជិករដ្ឋសភាមកពីគណបក្សប្រជាធិបតេយ្យ ហើយក្នុងពេលជាមួយគ្នា ក៏មានដែរការគាំទ្រពីសំណាក់សមាជិកខ្លះមកពីគណបក្សសាធារណរដ្ឋ ជាពិសេស គឺលោកស្រី លីស ឆេនី (Liz Cheney) កូនស្រីលោកអតីតអនុប្រធានាធិបតី ឌីក ឆេនី និងជាមេដឹកនាំជាន់ខ្ពស់លំដាប់ទី៣ នៃក្រុមសមាជិករដ្ឋសភាមកពីគណបក្សសាធារណរដ្ឋ។
គួររំឭកឡើងវិញថា លោកដូណាល់ ត្រាំ ត្រូវបានរដ្ឋសភាបោះឆ្នោតចោទប្រកាន់ ក្នុងនីតិវិធី Impeachment នេះម្តងរួចមកហើយ កាលពីឆ្នាំ២០១៩កន្លងទៅ ក៏ប៉ុន្តែ នៅពេលនោះ ព្រឹទ្ធសភា ដែលកាន់កាប់ដោយគណបក្សសាធារណរដ្ឋបោះឆ្នោតបដិសេធមិនដកតំណែង។
នៅពេលនេះ គឺជាលើកទី២ ដែលលោកដូណាល់ ត្រាំ ត្រូវប្រឈមនឹងការដកតំណែងតាមនីតិវិធី Impeachment ដែលជារឿងមិនធ្លាប់មាន នៅក្នុងប្រវត្តិសាស្រ្តអាមេរិក។ ក៏ប៉ុន្តែ បើទោះជាគណបក្សប្រជាធិបតេយ្យមានសំឡេងភាគច្រើននៅរដ្ឋសភាអាចអនុម័តបទចោទប្រកាន់លើលោកដូណាល់ ត្រាំ ដោយគ្មានបញ្ហា តែគេនៅតែមិនទាន់ដឹងនៅឡើយទេថា តើព្រឹទ្ធសភាពិតជានឹងអាចរកសំឡេងគ្រប់គ្រាន់ ដើម្បីអនុម័តដកតំណែងលោកដូណាល់ ត្រាំបានដែរឬក៏យ៉ាងណា? ដោយគេដឹងថា យោងតាមចំនួនអាសនៈនៅព្រឹទ្ធសភានៅពេលនេះ គណបក្សប្រជាធិបតេយ្យត្រូវការសំឡេងគាំទ្រពីសមាជិកព្រឹទ្ធសភាគណបក្សសាធារណរដ្ឋយ៉ាងតិច ១៧រូប ទើបបានសំឡេង ២ភាគ៣ អាចដកតំណែងលោកដូណាល់ ត្រាំបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ