លោកចូ បៃដិនទូរស័ព្ទ ទៅស្តេចអារ៉ាប៊ី សាអូឌីត នៅមុនចេញរបាយការណ៍ស្តីពីឃាតកម្មលើលោក កាស៊ូហ្ស៊ី
ចុះផ្សាយនៅថ្ងៃ៖
ស្តាប់ - ០៧:៤០
ប្រធានាធិបតីអាមេរិក លោកចូ បៃដិន បានទូរស័ព្ទ សន្ទនាជាលើកទី១ជាមួយ ព្រះចៅ អារ៉ាប៊ី សាអូឌីត សាល់ម៉ាន កាលពីថ្ងៃព្រហស្បតិ៍។ លោកចូ បៃដិនបានទូរស័ព្ទនិយាយជាមួយ ព្រះចៅសាលម៉ាន នៅ មួយថ្ងៃមុនដែលរដ្ឋបាលអាមេរិកត្រូវបញ្ចេញផ្សាយរបាយការណ៍ មួយដែលនៅក្នុងនោះ ទីភ្នាក់ងារស៊ើបការណ៍អាមេរិកអាចចោទប្រកាន់ រាជបុត្រស្នងរាជ ម៉ូហាម៉េដ បិនសាលម៉ាន ជាអ្នកនៅពីក្រោយ ឃាតកម្មទៅលើអ្នកកាសែត អារ៉ាប៊ី សាអូឌីត លោកកាស៊ូជី កាលពី ចុងឆ្នាំ ២០១៨។
នៅមួយថ្ងៃមុនដែលរដ្ឋបាលអាមេរិកគ្រោងចេញផ្សាយជាសាធារណៈ របាយការណ៍ ស្តីពីឃាតកម្មលើអ្នកកាសែត អារ៉ាប៊ី សាអូឌីត ប្រធានាធិបតីអាមេរិកលោកចូ បៃដិនបានទូរស័ព្ទទៅ និយាយជាមួយ ព្រះចៅ អារ៉ាប៊ី សាអូឌីត សាល់ម៉ាន។
តាមសេតវិមាន នៅក្នុងកិច្ចសន្ទនាតាមទូរស័ព្ទ កាលពី ថ្ងៃម្សិលមិញ លោកចូ បៃដិនបាននិយាយពី បញ្ហាសិទ្ធិមនុស្សជាទូទៅ និយាយពី នីតិរដ្ឋ។ លោកចូ បៃដិន បាននិយាយស្វាគមការដោះលែងអ្នកទោសនយោបាយនៅ អារ៉ាប៊ី សាអូឌីត ដែលនៅក្នុងនោះ មានផងដែរ សកម្មជនសិទ្ធិមនុស្ស លោកស្រីLoujain al Hathlou ហើយនិងសកម្មជនអាមេរិកាំងដើមកំណើតអារ៉ាប៊ី សាអូឌីតផ្សេងទៀត។
ក្រៅតែពីនោះ ប្រធានាធិបតី អាមេរិកបាននិយាយពី សារៈសំខាន់នៃទំនាក់ទំនងរវាងប្រទេសទាំងពីរ ដោយលោកបញ្ជាក់ផងដែរថា អាមេរិក នឹងនៅតែបន្ត ជួយ ការពារសន្តិសុខ អារ៉ាប៊ី សាអូឌីត ពីការវាយប្រហារពីខាងក្រុមប្រដាប់អាវុធដែលគាំទ្រអ៊ីរ៉ង់។
ជាមួយ ព្រះចៅ សាល់ម៉ាន លោកប្រធានាធិបតី អាមេរិក ចូបៃដិនបាននិយាយផងដែរពី ការរកច្រកចេញសន្តិភាព សម្រាប់ប្រទេសយេម៉ែន ជាទីដែលអារ៉ាប៊ី សាអូឌីតបានបើកការវាយប្រហារ ជាង ៥ឆ្នាំមកហើយ ទៅលើក្រុមហ៊ូទី គាំទ្រដោយអ៊ីរ៉ង់។
សេចក្តីថ្លែងការណ៍របស់រាជវាំង អារ៉ាប៊ី សាអូឌីត វិញបានចេញផ្សាយថា លោកចូ បៃដិនបានប្រាប់ព្រះចៅសាល់ម៉ានថា លោកនឹងធ្វើការយ៉ាងណាដើម្បី ពង្រឹងទំនាក់ទំនងទ្វេភាគីទាំងពីរ ឲ្យរឹងមាំ និងមានតម្លាភាពបំផុត។ ភាគីទាំងពីរសន្យាចាប់ដៃធ្វើការជាមួយគ្នា ដើម្បី ដោះស្រាយបញ្ហា និងផលប្រយោជន៍ របស់អាមេរិក និងអារ៉ាប៊ី សាអូឌីត។
ហេតុអ្វី ក៏លោកចូ បៃដិន និងព្រះចៅ សាល់ម៉ានមិននិយាយពីរបាយការណ៍របស់CIA ស្តីពីឃាតកម្ម លើអ្នកកាសែត អារ៉ាប៊ី សាអូឌីត?
លោកចូ បៃដិនផ្ទាល់បាននិយាយប្រាប់អ្នកកាសែត ថា លោកបានអានរួចហើយ របាយការណ៍របស់ទីភ្នាក់ងារស៊ើបការណ៍សម្ងាត់អាមេរិក ដែលនឹងអាចចេញផ្សាយនៅថ្ងៃនេះ។ បើលោកចូ បៃដិននិយាយពី បញ្ហាសិទ្ធិមនុស្សនៅអារ៉ាប៊ី សាអូឌីត ជាមួយព្រះចៅ សាលម៉ាន។
ការចេញផ្សាយជាសាធារណៈ របាយការណ៍ដែលអាចនិយាយពីការទទួលខុសត្រូវរបស់រាជបុត្រស្នងរាជ្យ ក្នុងឃាតកម្មលើអ្នកកាសែត អារ៉ាប៊ី សាអូឌីត លោកកាស៊ូហ្ស៊ី នឹងអាចធ្វើទំនាក់ទំនងអាមេរិក អារ៉ាប៊ី សាអូឌីតកាន់តែស្មុគស្មាញ។ លោកចូ បៃដិន ទើបតែចូលកាន់តំណែងជាប្រធានាធិបតីអាមេរិក បាន៥សប្តាហ៍ ហើយលោកទើបតែទូរស័ព្ទ ជាលើកដំបូង ទៅកាន់ ព្រះចៅ សាល់ម៉ាន ដែលសម្ព័ន្ធមិត្តរបស់អាមេរិក។ ដូច្នេះ លោកប្រហែល មិនចង់និយាយភ្លាម ពី របាយការណ៍ ដែលអាចដាក់បន្ទុករាជបុត្ររបស់ព្រះចៅ សាល់ម៉ាន នោះទេ។
ប៉ុន្តែ ដោយទូរស័ព្ទ ទៅព្រះចៅសាល់ម៉ាន នៅ មុនពេលរដ្ឋបាលរបស់លោកចេញផ្សាយរបាយការណ៍ ស្តីពីឃាតកម្មលើអ្នកកាសែត កាស៊ូហ្ស៊ី លោកចូ បៃដិន ចង់បញ្ជាក់ប្រាប់ទៅភាគី អារ៉ាប៊ី សាអូឌីត ថា រដ្ឋបាលអាមេរិកថ្មី បែងចែកច្បាស់លាស់ រវាងទំនាក់ទំនង មិត្តភាព ហើយនិងការទទួលខុសត្រូវ លើអំពើឧក្រិដ្ឋកម្ម។
លោកចូ បៃដិនចង់ សម្រិតសម្រាំងទំនាក់ទំនងថ្មីជាមួយអារ៉ាប៊ី សាអូឌីត ពោល គឺ អាមេរិកនៅតែជាសម្ព័ន្ធមិត្តរបស់អារ៉ាប៊ី សាអូឌីត ប៉ុន្តែ អាមេរិកនឹងឈប់គាំទ្រផ្នែកយោធា ដើម្បី ឲ្យអារ៉ាប៊ី សាអូឌីតធ្វើសង្រ្គាមយេម៉ែនតទៅទៀត។ ខុសពី រដ្ឋបាលលោកដូណាល់ ត្រាំ លោកចូ បៃដិនបានដកខ្លួនឃ្លាតឆ្ងាយពីរាជបុត្រ ស្នងរាជ្យ ដែលធ្លាប់តែល្អូកល្អឺនជាមួយអាមេរិក ក្រោមរដ្ឋបាលលោកដូណាល់ ត្រាំ។ នៅពេលលោកដូណាល់ ត្រាំ កាន់តំណែង គឺ រាជបុត្រស្នងរាជ្យដែលជាអ្នកតំណាងរដ្ឋាភិបាលអារ៉ាប៊ី សាអូឌីត។ ផ្ទុយពីរដ្ឋបាលលោកដូណាល់ ត្រាំ ដែលព្យាយាម ហាមឃាត់ មិនឲ្យគេចេញផ្សាយរបាយការណ៍ ស្តីពីឃាតកម្មលើអ្នកកាសែត កាស៊ូហ្ស៊ី ដើម្បី រក្សាទំនាក់ទំនងល្អជាមួយរាជបុត្រ ស្នងរាជ្យ និងដើម្បីផលប្រយោជន៍លក់អាវុធអាមេរិកទៅអារ៉ាប៊ី សអូឌីត លោកចូ បៃដិន បានអនុញ្ញាតឲ្យគេចេញផ្សាយរបាយការណ៍ដែលអាចដាក់បន្ទុក រាជបុត្រ ម៉ូហាម៉េដ បិន សាល់ម៉ាន។ គេអាចយល់ដែរថា ដោយនិយាយទូរស័ព្ទ ជាមួយ ស្តេចសាលម៉ាន កាលពីថ្ងៃព្រហស្បតិ៍ លោកចូ បៃដិន បានបដិសេធ មិនជ្រើសរើស រាជ្យបុត្រស្នងរាជ្យ ដើម្បីធ្វើជាភាគី ពិភាក្សា ក្នុងនាមមេដឹកនាំអារ៉ាប៊ី សាអូឌីតនោះទេ។ ការណ៍នេះបង្ហាញថា លោកចូ បៃដិន បានដាក់ខ្លួន ឃ្លាតឆ្ងាយពី រាជបុត្រ ស្នងរាជ្យ ពោលគឺមិនចូលឲ្យជិតស្និទ្ធគាំទ្រ ផ្កាប់មុខ រហូតដល់ភ្លេច ការរំលោភសិទ្ធិមនុស្ស និងឃាតកម្មសម្លាប់មនុស្ស លើអ្នកកាសែត អារ៉ាប៊ី សាអូឌីត ដូចក្នុងសម័យដឹកនាំរបស់លោកដូណាល់ ត្រាំនោះទេ។
តើអាមេរិកអាចដាក់ទណ្ឌកម្ម លើរាជបុត្រដែឬទេ?
នៅក្នុងរបាយការណ៍ ដែលប្រធានទីភ្នាក់ងារស៊ើបការណ៍សម្ងាត់អាមេរិក CIA ប្រុងនឹងចេញផ្សាយ ជាសាធារណៈ ក្នុងពេលឆាប់ៗ ឬអាចនៅថ្ងៃនេះ ហ្នឹង រាជ្យបុត្រស្នងរាជ្យអារ៉ាប៊ី សាអូឌីត ត្រូវបានភ្នាក់ងារ CIA វាយតម្លៃ ជាអ្នកទទួលខុសត្រូវធ្វើឲ្យមានឃាតកម្មសម្លាប់អ្នកកាសែត លោកចាម៉ាល់ កាស៊ូហ្ស៊ី នៅស្ថានទូតអារ៉ាប៊ី សាអូឌីត ក្នុងប្រទេសតួកគី កាលពីឆ្នាំ ២០១៨។ តាមCIA ភ្នាក់ងារ សម្ងាត់ ក្រោមការបញ្ជាររបស់មនុស្សដៃស្តាំរបស់រាជ្យបុត្រស្នងរាជ្យ ម៉ូហាម៉េដ បិនសាល់ម៉ាន បានសម្លាប់ បំបាត់សាកសព លោកកាស៊ូហ្សី ដែលជាអ្នកកាសែតធ្លាប់ចេញមុខសរសេររិះគន់ រាជបុត្រ បិនសាល់ម៉ាន។
បន្ទាប់ពី បដិសេធ ថា គ្មានឃាតកម្មលើអ្នកកាសែត រាជបុត្របិន សាល់ម៉ានធ្លាប់បានចេញមុខទទួលស្គាល់ ថា អារ៉ាប៊ី សាអូឌីតជាអ្នកទទួលខុសត្រូវលើករណីធ្វើឃាតលើអ្នកកាសែត លោកកាស៊ូហ្ស៊ី ប៉ុន្តែ ព្រះអង្គនៅតែនិយាយតែបដិសេធថា មិនបានដឹងរឿង ចេញបញ្ជាដោយគេធ្វើនោះទេ។
ប៉ុន្តែ តាមទូរទស្សន៍ CNN រាជបុត្រ ដឹងរឿងនេះព្រោះថា យន្តហោះដឹកភ្នាក់ងារសម្ងាត់អារ៉ាប៊ីសាអូឌីត ដើម្បី ទៅសម្លាប់អ្នកកាសែតនៅ ទឹកដី តួកគី ជាយន្តហោះរបស់ក្រុមហ៊ុនព្រះអង្គ។ រាជ្យបុត្រស្នងរាជ្យ ពិបាកនឹងដោះខ្លួនរួចពីការចោទប្រកាន់ណាស់ ប៉ុន្តែ បញ្ហានៅត្រង់ថា តើលោកចូ បៃដិននឹងដាក់ទណ្ឌកម្មទៅលើអ្នកទទួលខុសត្រូវលើឃាតកម្មលើអ្នកកាសែត អារ៉ាប៊ី សាអូឌីតដែរឬទេ? ចម្លើយនោះ គឺពិបាកបន្តិចហើយ ព្រោះថា លោកចូ បៃដិន ក៏ដូចជាមេដឹកនាំអាមេរិកទូទៅ គឺត្រូវរក្សាទំនាក់ទំនងល្អជាមួយអារ៉ាប៊ី សាអូឌីត ដែលជាសម្ព័ន្ធមិត្ត និងដៃគូសំខាន់របស់អាមេរិកសម្រាប់ ទប់ទល់នឹងអ៊ីរ៉ង់ ក្នុងតំបន់។ ម្យ៉ាង រាជបុត្រស្នងរាជ្យ បិន សាល់ម៉ាន ចង់ ឬមិនចង់ នឹងក្លាយជាមេដឹកនាំរបស់អារ៉ាប៊ី សាអូឌីត នៅថ្ងៃណាមួយ នាពេលខាងមុខ។ អាមេរិកគ្មានទម្លាប់ដាក់ទណ្ឌកម្មលើមេដឹកនាំបរទេសណាមួយនោះទេ។
នៅក្រោយចេញផ្សាយរបាយការណ៍លើកនេះ ដែលនឹងអាចដាក់បន្ទុកលើព្រះរាជបុត្រស្នងរាជ្យនោះ អាមេរិកប្រហែលជាគ្រាន់បានលេស ដាក់សម្ពាធឲ្យអនាគត ស្តេចអារ៉ាប៊ី សាអូឌីតឲ្យធ្វើកំណែទម្រង់តុលាការ និងប្រយ័ត្នប្រយែងគោរពសិទ្ធិមនុស្សឲ្យបានច្រើនជាងមុន។ ជាក់ស្តែង ឧក្រិដ្ឋជនដែល ជាប់ពាក់ព័ន្ធនឹងការសម្លាប់អ្នកកាសែត កាស៊ូហ្ស៊ី ត្រូវបានតុលាការបន្ថយទោស ពីទោសប្រហារជីវិត មកនៅត្រឹមជាប់ ពន្ធនាគារ ២០ឆ្នាំប៉ុណ្ណោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ