ពាក្យចចាមអារ៉ាមថា លោកណេតាន់យ៉ាហ៊ូ ទៅជួបព្រះអង្គម្ចាស់បេនសាល់ម៉ាន់ ជាមួយលោកប៉ុមប៉េអូ
បណ្តាញព័ត៌មាន អ៊ីស្រាអែល ចុះផ្សាយថា លោក ណេតាន់យ៉ាហ៊ូ នាយករដ្ឋមន្ត្រីអ៊ីស្រាអែល បានធ្វើដំណើរទៅអារ៉ាប៊ីសាអូឌីតដោយស្ងាត់ៗ ដើម្បីជួបប្រជុំ ជាមួយព្រះអង្គម្ចាស់រាជទាយាទ ម៉ូហាម៉េដ បេនសាល់ម៉ាន់ កាលពីថ្ងៃអាទិត្យ ទី២២វិច្ឆិកា ដោយមានវត្តមានរបស់លោក ម៉ៃឃ៍ ប៉ុមប៉េអូ រដ្ឋមន្ត្រីការបរទេសអាមេរិកផង។ ដំណឹងនេះ ត្រូវបានរដ្ឋមន្ត្រីម្នាក់នៃរដ្ឋាភិបាលអ៊ីស្រាអែល អះអាងថាជាការពិតមែន។ តែយ៉ាងណា ភាគីអារ៉ាប៊ីសាអូឌីត បានប្រកែកថា គ្មានជំនួបនោះទេ។
ចុះផ្សាយនៅថ្ងៃ៖
យោងតាមបណ្តាញផ្សព្វផ្សាយព័ត៌មានអ៊ីស្រាអែល បានលើកឡើងថា លោកណេតាន់យ៉ាហ៊ូ បានធ្វើដំណើរទៅទីក្រុងណេអុំ Naom ដែលជាទីក្រុងបង្កើតថ្មីនៅភាគខាងជើងបង្អស់ នៃដែនដីអារ៉ាប៊ីសាអូឌីត កាលពីថ្ងៃអាទិត្យទី២២វិច្ឆិកា។ លោក ណេតាន់យ៉ាហ៊ូ ត្រូវបានអមដំណើរ ដោយលោក យ៉ូស៊ី កូអេន មេបញ្ជាការក្រុមចារកិច្ចសម្ងាត់អ៊ីស្រាអែល ថែមទៀតផង។ ប្រភពដដែលអះអាងថា លោកណេតាន់យ៉ាហ៊ូ បានទៅជួបប្រជុំ ជាមួយព្រះអង្គម្ចាស់រាជទាយាទ ម៉ូហាម៉េដ បេនសាល់ម៉ាន់ ដោយមានវត្តមានរបស់លោក ប្រមុខការទូតអាេមរិក ម៉ៃឃ៍ ប៉ុមប៉េអូ ផងដែរ។
នៅរសៀលថ្ងៃចន្ទ លោក Yohav Gallant រដ្ឋមន្ត្រីក្រសួងអប់រំអ៊ីស្រាអែល បានបញ្ជាក់នៅតាមតាមរលកធាតុអាកាសវិទ្យុយោធាអ៊ីស្រាអែល ថាលោកនាយករដ្ឋមន្ត្រី ណេតាន់យ៉ាហ៊ូ ពិតជាបានធ្វើដំណើរទៅ អារ៉ាប៊ីសាអូឌីត ពិតមែន។
ផ្ទុយទៅវិញ លោករដ្ឋមន្ត្រីក្រសួងការបរទេសអារ៉ាប៊ីសាអូឌីត Fayçal ben Farhane បានសរសេរលើ Twitter ថា ដំណឹងចចាមអារ៉ាមនេះ គឺជារឿងមិនពិតទេ។ គ្មានការប្រជុំណាមួយ រវាងព្រះអង្គម្ចាស់រាជទាយាទម៉ូហាម៉េដ បេនសាល់ម៉ាន់ ជាមួយនឹងលោកប៉ុមប៉េអូ និងលោកណេតាន់យ៉ាហ៊ូឡើយ។ វាក៏ពុំពុំមានការចុះផ្សាយ ឬការបញ្ជាក់ណាមួយ ពីសំណាក់ភ្នាក់ងារព័ត៌មានផ្លូវការរបស់អារ៉ាប៊ីសាអូឌីត ស្តីពីជំនួបនេះដែរ។
ដោយឡែក លោក ម៉ៃឃ៍ ប៉ុមប៉េអូ ពិតជាមានវត្តមាននៅអារ៉ាប៊ីសាអូឌីតពិតមែន ដោយបានជួបជាមួយព្រះអង្គម្ចាស់ មហាម៉េដ បេនសាល់ម៉ាន់។ នៅលើទំព័រ Twitter លោកប្រមុខការទូតអាមេរិក បានសរសេរថា « ការប្រជុំគ្នា គឺបានធ្វើទៅ ប្រកបដោយខ្លឹមសារស្ថាបនា។ លោកបន្ថែមថា « ចំណងសហប្រតិបត្តិការសន្តិសុខ និងសេដ្ឋកិច្ច របស់យើង គឺមានកម្លាំងរឹងមាំ ហើយយើងនឹងបន្តអភិវឌ្ឍន៍វា ដើម្បីប្រឆាំងជាមួយឥទ្ធិពលចង្រៃ របស់អ៊ីរ៉ង់នៅក្នុងតំបន់ »។
គួរបញ្ជាក់ថា ប្រមុខការបរទេសអាេមរិក កំពុងតែព្យាយាមបញ្ចុះបញ្ចូលអារ៉ាប៊ីសាអូឌីត ឲ្យចាប់ដៃ ទទួលស្គាល់អ៊ីស្រាអែល ដូចអេមៀរ៉ាត់អារ៉ាប់រួម និង បារ៉ែន ដើម្បីអនុវត្តយុទ្ធសាស្ត្ររួមគ្នា ទប់ទល់ជាមួយអ៊ីរ៉ង់។ តែយ៉ាងណា រហូតមកទល់ពេលនេះ អារ៉ាប៊ីសាអូឌីត នៅមិនទាន់បង្ហាញជំហរទន់ទោរណាមួយ ទៅរកអ៊ីស្រាអែលឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ