នាយករដ្ឋមន្រ្តីប៉ាគីស្ថានព្រមានពីផលវិបាក បើសិនសភាបោះឆ្នោតបណ្តេញឯកអគ្គរដ្ឋទូតបារាំងពីប្រទេស
ចុះផ្សាយនៅថ្ងៃ៖
ស្តាប់ - ០៨:៣០
សភាប៉ាគីស្ថាន ត្រូវបោះឆ្នោតនៅ ថ្ងៃអង្គារទី ២០មេសា លើសំណើរបស់រដ្ឋាភិបាល ដើម្បី បណ្តេញឯកអគ្គរដ្ឋទូតបារាំងចេញពី ប្រទេស។ បណ្តេញឯកអគ្គរដ្ឋទូតបារាំងចេញពីប្រទេសជាការទាមទារចង់បានខ្លាំងរបស់គណបក្សអ៊ីស្លាមជ្រុលនិយម មួយ នៅ ប៉ាគីស្ថាន ដែលជាអ្នកជំរុញឲ្យមានកុបកម្ម បាតុកម្ម ប្រឆាំង បារាំង នៅទឹកដី ប៉ាគីស្ថាន។ នៅ សប្តាហ៍មុន រដ្ឋាភិបាលបារាំងបានអំពាវនាវឲ្យប្រជាជនរបស់ខ្លួនចាកចេញមួយរយៈ នៅខណៈពេលដែល បាតុកម្មហិង្សាប្រឆាំងបារាំងបានកើនឡើង កាន់តែខ្លាំង នៅទូទាំងប្រទេសប៉ាគីស្ថាន។ តើអ្វី ជាដើមហេតុដែលធ្វើឲ្យកើតមានភាពតានតឹង រវាងបារាំង និងប៉ាគីស្ថាន នៅពេលនេះ
នៅថ្ងៃអង្គារទី ២០ មេសានេះ សភាប៉ាគីស្ថានត្រូវបោះឆ្នោត សម្រេចថា តើគេត្រូវបណ្តេញ ឯកអគ្គរដ្ឋទូតបារាំង ចេញពីប្រទេសដែរឬទេ។ បណ្តេញឯកអគ្គរដ្ឋទូតបារាំង ចេញពីប្រទេសប៉ាគីស្ថាន គឺ ការទាមទារចង់បានរបស់គណបក្ស អ៊ីស្លាមជ្រុលនិយម តេរីក អ៊ី ឡាប៊េក (TLP) ដែលជាអ្នកអំពាវនាវឲ្យមានចលនាបាតុកម្មប្រឆាំង បារាំង នៅប៉ាគីស្ថាន។
សភាប៉ាគីស្ថានត្រូវបោះឆ្នោតបណ្តេញឯកអគ្គរដ្ឋទូតបារាំង ចេញពីប្រទេសនៅពេលនេះ ជាលទ្ធផលនៃភាពតានតឹង បារាំង ប៉ាគីស្ថាន ដែលចាប់កើតមាន ប៉ុន្មានខែមកហើយ។ ដើម្បីអាចយល់ពី ស្ថានភាពសព្វថ្ងៃនេះ គេត្រូវត្រលប់ទៅមើលរឿងរ៉ាវកើតដំបូង កាលពីប៉ុន្មានខែមុន។ នៅថ្ងៃទី ៣កញ្ញា នៅចំថ្ងៃដែលតុលាការបារាំង បើកសវនាការ កាត់ទោស ក្រុមជីហាត ដែលពាក់ព័ន្ធ នឹងភេរវកម្ម នៅទីក្រុងប៉ារីស ឆ្នាំ ២០១៥ ទស្សនាវដ្តី បារាំង ឆាលី អ៊ិបដូ បានបោះពុម្ពផ្សាយសាជាថ្មី រូបត្លុក ព្យាការី មហាម៉េត។ រូបត្លុកនោះបានបង្កឲ្យមានបាតុកម្មប្រឆាំង នៅ បណ្តាប្រទេសកាន់សាសនាអ៊ីស្លាម ដែលនៅក្នុងនោះមានផងដែរ ប៉ាគីស្ថាន។
ប៉ុន្តែ ទើបនៅ ២ខែក្រោយ ដែលកើតមានចលនាស្អប់បារាំង និងបាតុកម្ម នៅទូទាំងប្រទេសប៉ាគីស្ថាន ពោលគឺបន្ទាប់ពី ប្រធានាធិបតី បារាំង លោកអេម៉ានុយអែល ម៉ាក្រុង បានចេញមុខនិយាយការពារ សិទ្ធិសេរីភាព គូរ បង្ហាញ រូបត្លុក ព្យាការី មហាម៉េត។ នៅថ្ងៃ ទី ២១តុលា ឆ្នាំមុន នៅថ្ងៃបុណ្យគោរពវិញ្ញាណក្ខន្ធគ្រូបង្រៀនដែលត្រូវឧក្រិដ្ឋជនសម្លាប់ដោយសារបង្ហាញរូបត្លុក មហាម៉េត លោកប្រធានាធិបតីបារាំង បាននិយាយថា បារាំង នឹងមិនបោះបង់ចោល ទម្លាប់ គូររូបត្លុកនោះទេ។ សំដីរបស់លោកប្រធានាធិបតី បារាំង បានទៅដុតកំហឹងនៅបណ្តាប្រទេសកាន់សាសនាអ៊ីស្លាម ជាទី ដែល ការគូរ បង្ហាញរូបព្យាការី មហាម៉េត ត្រូវចាត់ទុកជាការជេរប្រមាថសាសនាអ៊ីស្លាម។ នៅប៉ាគីស្ថាន ប្រទេសអ៊ីស្លាមធំទី ២ ក្នុងពិភពលោក ដែលមានប្រជាជនរស់នៅ ជិត ២០០លាននាក់ ការជេរប្រមាថសាសនាអ៊ីស្លាម គឺជារឿងដ៏រសើប និង អាចធ្វើឲ្យគេប្រឈមនឹងការព្រួតវាយសម្លាប់របស់មហាជន។ នៅ ក្រោយ ប្រធានាធិបតីបារាំង ថ្លែងការពារជំហររបស់បារាំង ដើម្បីបន្ត គូររូបត្លុកព្យាការី មហាម៉េត នាយករដ្ឋមន្រ្តី ប៉ាគីស្ថានក៏បានចេញមុខថ្កោលទោស និងបានរិះគន់ លោកម៉ាក្រុង ថា កំពុងវាយប្រហារអ៊ីស្លាម នៅក្រោមលេស ការពារសិទ្ធិសេរីភាពបញ្ចេញមតិ។ ទោះជាប្រមុខរដ្ឋាភិបាលប៉ាគីស្ថានចេញមុខ រិះគន់បារាំង ពីរឿងគូររូបត្លុកព្យាការី មហាម៉េត ប៉ុន្តែ វាមិនបានទៅ បន្ថយកំហឹងស្អប់បារាំងនៅប៉ាគីស្ថាននោះទេ។ ជាង ៦ខែមកនេះ គណបក្ស អ៊ីស្លាមជ្រុលនិយមតូចមួយ គឺ គណបក្ស តេរីក អ៊ី ឡាប៊េក (TLP) បានញុះញង់ឲ្យគេស្អប់ និង ធ្វើបាតុកម្ម ប្រឆាំងបារាំង ដែលក្រុមនេះចោទថា បានជេរប្រមាថព្យាការី មហាម៉េត តាមរយៈ ការគូរបង្ហាញរូបត្លុក។
ដោយសារតែបាតុកម្ម និងកូដកម្ម អំពាវនាវដោយគណបក្សអ៊ីស្លាមជ្រុលនិយមមួយនេះ ទីក្រុង ធំៗបីរបស់ប៉ាគីស្ថាន ត្រូវជាប់គាំង ស្ទះសេដ្ឋកិច្ចមួយផ្នែក។ ដើម្បី បញ្ចុះបញ្ចូល ឲ្យគណបក្សអ៊ីស្លាមជ្រុលនិយម ឈប់ធ្វើបាតុកម្ម រដ្ឋាភិបាលប៉ាគីស្ថានបានចរចាជាមួយក្រុមនេះ កាលពីខែតុលាម្តងហើយ ដោយប្រកាសសុខចិត្តធ្វើពហិកាមិនទិញទំនិញបារាំង។ តាមគណបក្សអ៊ីស្លាមជ្រុលនិយមតេរីក អ៊ី ឡាប៊េក រដ្ឋាភិបាលរបស់អ៊ីមរ៉ាន់ ខាន់ បានសន្យាផងដែរថា នឹងបណ្តេញឯកអគ្គរដ្ឋទូត បារាំង ចេញពី ប្រទេសយ៉ាងយូរ នៅខែមេសានេះ។
រដ្ឋាភិបាល ប៉ាគីស្ថាន ចាប់ខ្លួន មេបក្សតេរីក អ៊ី ឡាប៊េក ដែលទាមទារឲ្យគេបណ្តេញឯកអគ្គរដ្ឋទូតបារាំងពីប្រទេស
មេបក្សតេរីក អ៊ី ឡាប៊េក គឺលោក សាអាដ ហ៊ូសាំង រីហ្សវី ដែលជាអ្នកទាមទារចង់ឲ្យគេបណ្តេញ ឯកអគ្គរដ្ឋទូតបារាំង ពី ប្រទេស ត្រូវអាជ្ញាធរប៉ាគីស្ថានចាប់ខ្លួន កាលពី ថ្ងៃពុធទី ១២មេសា ពោលគឺ នៅបន្ទាប់ពីលោកបានអំពាវនាវឲ្យគេធ្វើបាតុកម្មនៅ ថ្ងៃទី ២០មេសានេះតែម្តង ដើម្បី ទាមទារឲ្យរដ្ឋាភិបាលប៉ាគីស្ថានគោរពតាមការសន្យារបស់ខ្លួន ដើម្បី ដាក់ពាក្យស្នើឲ្យសភា បោះឆ្នោត បណ្តេញអ្នកតំណាងបារាំងចេញពីប្រទេស។
ការចាប់ខ្លួន មេបក្សអ៊ីស្លាមជ្រុលនិយមបានបង្កឲ្យមានកុបកម្ម បាតុកម្ម ហិង្សា រហូតសម្លាប់ប៉ូលិសប៉ាគីស្ថាន ៤នាក់ ហើយនិងការចាប់ចំណាប់ខ្មាំងប៉ូលិសពីសំណាក់សកម្មជនរបស់បក្ស តេរីក អ៊ី ឡាប៊ែក នៅទីក្រុងអ៊ីស្លាម៉ាបាដ កាលពី សប្តាហ៍មុន។
ក្រៅតែពីចាប់ខ្លួនមេបក្សអ៊ីស្លាមជ្រុលនិយមហើយ ក្រសួងមហាផ្ទៃ ប៉ាគីស្ថានបានចេញលិខិត នៅ ថ្ងៃទី ១៤ មេសា ហាមឃាត់ មិនឲ្យគណបក្សតេរីក អ៊ី ឡាប៊េក ធ្វើនយោបាយតទៅទៀត។ សម្រាប់នាយករដ្ឋមន្រ្តី ប៉ាគីស្ថាន គេត្រូវប្រើច្បាប់ ប្រឆាំង ភេរវនិយម សម្រាប់បិទខ្ទប់ គណបក្ស អ៊ីស្លាមជ្រុលនិយម ព្រោះថា គណបក្សនេះ បានញុះញង់ឲ្យមានបាតុកម្ម សកម្មភាព ហិង្សា ដែលកំពុងបំផ្លាញមុខមាត់របស់ប៉ាគីស្ថាននៅ ឆាកអន្តរជាតិ។
តាមអ្នកជំនាញ រដ្ឋាភិបាល ប៉ាគីស្ថាន ទំនងចង់បិទបញ្ចប់ វិបត្តិធ្វើបាតុកម្មលើកនេះ តាមរយៈ ការចាប់ខ្លួនមេបក្ស និង ហាមឃាត់គណបក្ស តេរីក អ៊ី ឡាប៊េកមិនឲ្យធ្វើនយោបាយតែម្តង។ ប៉ុន្តែ លោកនាយករដ្ឋមន្រ្តី ប៉ាគីស្ថាន យល់ច្រលំធំ ព្រោះថា គណបក្សតេរីក អ៊ី ឡាប៊េក មានអ្នកគាំទ្រច្រើន និងទទួលបានសមានចិត្តគាំទ្រពីអ្នកកាន់សាសនាអ៊ីស្លាមជាច្រើននៅ ប៉ាគីស្ថាន ដោយសារតែ គណបក្សនេះ មានជំហរដាច់ណាត់ ការពារ សាសនាអ៊ីស្លាម។
ដោយយល់ថា ទោះជា ចាប់ខ្លួន មេបក្ស ហើយ និងហាមឃាត់គណបក្ស មិនឲ្យធ្វើនយោបាយ នៅតែមិនអាចទៅ បិទបញ្ចប់ មហាបាតុកម្មប្រឆាំងបារាំង នៅទូទាំងប្រទេស រដ្ឋាភិបាលរបស់លោកអ៊ីមរ៉ាន់ ខាន់ ក៏បានប្តូរជំហរមកវិញ ដោយបានងាកទៅចរចា ឡើងវិញ ជាមួយ មន្រ្តី គណបក្សតេរីក អ៊ី ឡាប៊េក កាលពី យប់ថ្ងៃចន្ទទី ១៩ មេសា។ គឺនៅក្រោយការចរចានេះ ឯង ហើយនិងក្រោយ ក្រុមអ៊ីស្លាមជ្រុលនិយម យល់ព្រម ដោះលែង ប៉ូលិស ប៉ាគីស្ថាន ទើប រដ្ឋាភិបាលប៉ាគីស្ថាន បាន យល់ព្រម ដាក់ពាក្យស្នើមែនទែន ទៅឲ្យសភា ប៉ាគីស្ថាន បោះឆ្នោត បណ្តេញ ឯកអគ្គរដ្ឋទូតបារាំង នៅថ្ងៃអង្គារទី ២០មេសានេះ។ ក្រៅតែពី ទាមទារឲ្យសភា បោះឆ្នោត បណ្តេញឯកអគ្គរដ្ឋទូតបារាំង គណបក្ស តេរីក អ៊ី ឡាប៊េក (TLP)បានទាមទារផងដែរ ឲ្យគេដោះលែង មេគណបក្ស អាយុ ២៦ឆ្នាំ និងអនុញ្ញាតឲ្យគណបក្សចាប់ដំណើរការឡើងវិញ។ ចុងក្រោយ គេបានទាមទារផងដែរ ឲ្យរដ្ឋមន្រ្តីក្រសួងមហាផ្ទៃ ចុះចេញពីតំណែង។
នាយករដ្ឋមន្រ្តីប៉ាគីស្ថាន៖ បណ្តេញឯកអគ្គរដ្ឋទូតបារាំងនឹងមិនទៅប៉ះពាល់ប្រយោជន៍បារាំងនោះទេ
នៅក្នុងសុន្ទរកថា ថ្លែងតាមទូរទស្សន៍នៅថ្ងៃចន្ទម្សិលមិញ នាយករដ្ឋមន្រ្តីប៉ាគីស្ថាន លោកអ៊ីមរ៉ាន់ ខាន់ បានអំពាវនាវ ឲ្យប្រទេសលោកខាងលិច ឈប់ ជេរប្រមាថ ព្យាការី មហាម៉េត ក្រោមលេស សិទ្ធិសេរីភាពបញ្ចេញមតិ។ ប៉ុន្តែ ជាមួយគ្នានោះ លោកបានព្រមានផងដែរ ពីផលវិបាក ដែលអាចកើតឡើង ដោយសារតែរឿងបណ្តេញឯកអគ្គរដ្ឋទូតបារាំង។ សម្រាប់នាយករដ្ឋមន្រ្តី ប៉ាគីស្ថាន គេមិនអាចចេះតែបណ្តេញឯកអគ្គរដ្ឋទូត នៅរាល់ពេលមានបាតុកម្មប្រឆាំង រូបគំនូត្លុកព្យាការី មហាម៉េតនោះទេ។
តាមលោកអ៊ីមរ៉ាន់ ខាន់ បើសិនគេនៅតែបន្ត ធ្វើបាតុកម្មតវ៉ា ពេញមួយជីវិត នោះ វាមិនត្រឹមតែធ្វើឲ្យខាតប្រយោជន៍របស់ប៉ាគីស្ថានប៉ុណ្ណោះទេ ប៉ុន្តែ វា នឹងគ្មានជះផលអាក្រក់លើប្រទេសលោកខាងលិចសូម្បីបន្តិច។
សម្រាប់ប្រមុខរដ្ឋាភិបាលប៉ាគីស្ថាន បាតុកម្ម ប្រឆាំង បារាំង ឬបណ្តេញអ្នកតំណាងទូតបារាំង នឹងមិនធ្វើឲ្យប៉ះពាល់ ដល់ប្រយោជន៍របស់បារាំង នោះទេ។ ផ្ទុយទៅវិញ វានឹងប៉ះពាល់ដោយផ្ទាល់ដល់សេដ្ឋកិច្ច ឆ្នាំងបាយ របស់ប៉ាគីស្ថាន ផ្ទាល់តែម្តង ដែល ត្រូវពឹងអាស្រ័យខ្លាំងលើការនាំចេញទំនិញវាយនភ័ណ្ឌទៅកាន់ទីផ្សារអឺរ៉ុប។
រដ្ឋាភិបាលប៉ាគីស្ថានផ្ទាល់បារម្ភថា បើសិន គេបណ្តេញឯកអគ្គរដ្ឋទូត បារាំងលើកនេះ នោះ ប៉ាគីស្ថាននឹងអាចមានទំនាក់ទំនង កាន់តែចុះអាក្រក់ ជាមួយ បារាំង ហើយនិងធ្វើឲ្យប៉ាគីស្ថាន មានមុខមាត់មិនល្អ នៅឆាកអន្តរជាតិ។ នេះមិនមែនជារឿងល្អនោះទេ ជាពិសេស នៅពេល បារាំង កំពុងខិតចូលទៅជិតស្និទ្ធកាន់តែខ្លាំងជាមួយ ឥណ្ឌា ដែលជាបងប្អូនសត្រូវរបស់ប៉ាគីស្ថាននោះ។
នៅតែ៣ខែមុនការបោះឆ្នោត សភាប៉ាគីស្ថាន លោកនាយករដ្ឋមន្រ្តី អ៊ីមរ៉ាន់ ខាន់ ដែលចង់បន្តកាន់តំណែងនាយករដ្ឋមន្រ្តីមួយអាណត្តិទៀត បានព្យាយាមយកចិត្ត ស្វែងរកការគាំទ្រ ពីអ្នកកាន់តែសាសនាអ៊ីស្លាម ដែលនៅក្នុងនោះ មានផងដែរ គណបក្សអ៊ីស្លាមជ្រុលនិយម តេរីក អ៊ី ឡាប៊េក តាមរយៈ ចេញមុខថ្កោលទោស រដ្ឋាភិបាលបារាំង ក្នុងរឿងគូររូបត្លុក ព្យាការី មហាម៉េត។ ប៉ុន្តែ អ្នកជំនាញវាយតម្លៃថា លោកនាយករដ្ឋមន្រ្តី បានលង់ក្នុងអន្ទាក់របស់ក្រុមអ៊ីស្លាមជ្រុលនិយម ព្រោះថា ក្រុមនេះ តែងតែ ទាមទារ ចង់បានកាន់តែច្រើន ដែលនឹងអាចធ្វើឲ្យក្រុមអ៊ីស្លាមជ្រុលនិយម មានសំឡេង កាន់តែធំ និងពង្រីកឥទ្ធិពល អនុវត្តិ ការគោរព សាសនាអ៊ីស្លាមកាន់តែតឹងរ៉ឹងនៅ ប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ