ចិន៖ហេតុអ្វីបានជាកំណើនពលរដ្ឋក្នុងរយៈពេល ១០ឆ្នាំចុងក្រោយបានធ្លាក់ចុះ?
ចុះផ្សាយនៅថ្ងៃ៖
ស្តាប់ - ០៦:៥៥
នៅក្នុងប្រទេសចិន រដ្ឋាភិបាលបានប្រកាសនាថ្ងៃអង្គារ ទី១១ ឧសភានូវលទ្ធផលជំរឿនពលរដ្ឋកាលពីឆ្នាំ ២០២០ សម្រាប់រយៈពេល ១០ឆ្នាំពីឆ្នាំ ២០១០ ដល់ឆ្នាំ ២០២០។ លទ្ធផលបានបង្ហាញថា កំណើនចំនួនពលរដ្ឋក្នុងរយៈពេល ១០ឆ្នាំមានតែ ៥,៣៨%។ នេះជាកំណើនទាបខ្លាំងដែលចិនមិនធា្លប់ស្គាល់គិតតាំងពីឆ្នាំ ១៩៦០។ ជាសរុបគិតត្រឹមដំណាច់ឆ្នាំ ២០២០ ចិនមានចំនួនពលរដ្ឋ ១ ៤១១លាននាក់។ គួររម្លឹកថាក្នុងឆ្នាំ ២០១៦ ចិនបានបិទបញ្ចប់នយោបាយកូនទោដោយអនុញ្ញាតឲ្យគ្រួសារចិនអាចយកកូនទី២ បានដោយគ្មានលក្ខខណ្ឌ។ តែនយោបាយមួយនេះនៅមិនទាន់អាចជំរុញឲ្យពលរដ្ឋចិនបង្កើតកូនបន្ថែមនៅឡើយទេ។
នៅក្នុងលទ្ធផលជំរឿនពលរដ្ឋ រដ្ឋាភិបាលចិនមិនបានបញ្ជាក់ពីមូលហេតុនៃការធ្លាក់ចុះកំណើនចំនួនពលរដ្ឋក្នុងរយៈពេល ១០ឆ្នាំចុងក្រោយពីឆ្នាំ ២០១០ ដល់ឆ្នាំ ២០២០ ទេ។ តែគេអាចសំអាងលើហេតុផលមួយចំនួន រួមមាន ការធ្លាក់ចុះនៃចំនួនអ្នករៀបការ កំណើននៃការចំណាយលើការបង់ថ្លៃលំនៅដ្ឋាន និងការសិក្សារៀនសូត្ររបស់កូនដែលកាន់តែឡើងថ្លៃ ឬមួយក៏ការពន្យារពេលយកកូនរបស់ស្រ្តីដោយពួកគេចង់បន្តផ្តោតការយកចិត្តទុកដាក់បន្ថែមទៀតលើជីវិតការងារ។ នៅមានហេតុផលមួយទៀតដែលគេមិនអាចទាត់ចោលបាន គឺការផ្ទុះជំងឺកូវីដ១៩ នៅចុងឆ្នាំ ២០១៩ ដើមឆ្នាំ ២០២០។
អ្នកនាំពាក្យការិយាល័យស្ថិតិជាតិចិនបានទទួលស្គាល់ថា កូវីដ១៩ បានបង្កើនភាពមិនប្រាកដប្រជានៃជីវិតប្រចាំថ្ងៃ និងក្តីបារម្ភនៃកំណើតទារកថ្មី។ គួររម្លឹកថាក្នុងឆ្នាំ ២០១៩ ចំនួនកំណើតទារកថ្មីមាន ១៤លាន ៦សែន ៥ម៉ឺននាក់ តែនៅក្នុងឆ្នាំ ២០២០ កំណើតទារកមានចំនួនតែ ១២លាននាក់ប៉ុណ្ណោះ ពោលធ្លាក់ចុះជាង ២លាននាក់។ អត្រាកំណើតទារកថ្មីក្នុងឆ្នាំ ២០២០ ឬ ឆ្នាំ ២០១៩ ជាអត្រាមួយទាបខ្លាំងដែលចិនមិនធ្លាប់ស្គាល់ទេគិតចាប់តាំងពីថ្ងៃកំណើតគណបក្សកុម្មុយនិស្តក្នុងឆ្នាំ ១៩៤៩។ តាមពិត អត្រាកំណើតទារកថ្មីបានធ្លាក់ចុះជាលំដាប់តាំងពីឆ្នាំ ២០១៧ ពោលក្រោយពីរដ្ឋាភិបាលបានបិទបញ្ចប់នយោបាយកូនទោដោយអនុញ្ញាតឲ្យគ្រួសារចិនអាចយកកូនទី២ បានដោយគ្មានលក្ខខណ្ឌ។
ហេតុអ្វីបានជាគ្រួសារចិនភាគច្រើនមិនចង់បានកូនទី២?
មិនមែនមកពីគ្រួសារចិនមិនចង់បានកូនទី២ ទេ តែអាចថាមកពីគ្រួសារខ្លះមានទម្លាប់ជាមួយនឹងនយោបាយកូនទោលអស់ជាច្រើនទសវត្ស ហើយគ្រួសារខ្លះទៀតគិតថា ពួកគេគ្មានមធ្យោបាយចិញ្ចឹមកូនទី២ ឲ្យបានដូចកូនទី១ ពិសេសការអប់រំឲ្យបានខ្ពង់ខ្ពស់ដោយបញ្ជូនទៅឲ្យរៀនសូត្រនៅសាលាអន្តរជាតិល្បីៗដែលត្រូវចំណាយលុយច្រើន។ បន្ទាប់ពីការចំណាយរឿងរៀនសូត្រក៏នៅមានការចំណាយផ្សេងៗទៀត ពិសេសលើបញ្ហាសុខភាព។ មួយវិញទៀត រឿងយកកូនទី២ ឬមិនយកក៏អាស្រ័យលើរូបស្រ្តីជាភរិយាផងដែរ។
ស្រ្តីចិនក្នុងសម័យឥឡូវមិនមែនដូចស្រ្តីចិនសម័យមុនដែលម្ង៉ៃៗវិលនៅជុំវិញតែចង្រ្កានទេ។ ស្រ្តីចិនសម័យថ្មីចេញទៅធ្វើការងារដូចបុរស និងមានសិទ្ធិស្មើបុរសដែលត្រូវជួយគ្នាទៅវិញទៅមកនៅក្នុងការងារផ្ទះ ដូចជាធ្វើម្ហូប និងមើលកូន។ ស្រ្តីចិនភាគច្រើនសម័យឥឡូវបានបញ្ជាក់ច្បាស់ៗថា បើធ្វើការនៅតែផ្ទះ ទោះបីជាយកកូនមួយ ឬពីរមិនសូវជាចំណោតប៉ុន្មានទេ។ តែបើចេញទៅធ្វើការរកលុយផង និងរ៉ាប់រងការងារនៅផ្ទះតែម្នាក់ឯងទៀតនោះ យកកូនមួយអាចទៅរួច តែបើយកថែមមួយទៀត ប្រហែលជាពិបាកបន្តិច ឬទៅមិនរួចតែម្តង។
ឥណ្ឌាដណ្តើមកន្លែងចិននាពេលខាងមុខ?
ការធ្លាក់ចុះចំនួនពលរដ្ឋដោយសារតែការធ្លាក់ចុះចំនួនកំណើតទារកថ្មី គឺមានន័យស្មើនឹងការធ្លាក់ចុះចំនួនពលរដ្ឋសកម្មដែលពេញកម្លាំងពលកម្ម និងការកើនឡើងចំនួនមនុស្សចាស់ចូលនិវត្តន៍។ យោងតាមលទ្ធផលជំរឿន ចិនមានមនុស្សចាស់វ័យពី ៦០ឆ្នាំឡើងទៅជាង ២៦៤លាននាក់ក្នុងឆ្នាំ ២០២០។ ចាប់ពីពេលនេះតទៅ ពលរដ្ឋប្រភេទនេះតំណាងឲ្យ ១៨,៧% នៃចំនួនពលរដ្ឋចិនសរុប ពោលមានការកើនឡើងចំនួន ៥,៤៤% បើធៀបនឹងជំរឿនពលរដ្ឋធ្វើឡើងក្នុងឆ្នាំ ២០១០។ ទន្ទឹមនឹងកំណើនមនុស្សចាស់វ័យពី ៦០ឆ្នាំឡើងទៅ ចំនួនពលរដ្ឋសកម្មក្នុងអាយុចន្លោះ ១៥ឆ្នាំ និង ៥៩ឆ្នាំដែលតំណាងឲ្យតែ ៦៣,៣៥% នៃចំនួនពលរដ្ឋសរុបបានធ្លាក់ចុះចំនួន ៦,៧៩%។
កំណើនចំនួនមនុស្សចាស់ចូលនិវត្តន៍ និងការធ្លាក់ចុះចំនួនមនុស្សសកម្មនាំឲ្យធ្លាក់ចុះកម្លាំងពលកម្ម។ ប្រឈមនឹងចរន្តមួយនេះ សភាចិនបានអនុម័តក្នុងខែមីនា ឆ្នាំ ២០២១ លើសេចក្តីព្រាងច្បាប់មួយស្តីពីការដំឡើងអាយុចូលនិវត្តន៍នៅ ៥ឆ្នាំខាងមុខ។ ដោយឡែក ការិយាល័យស្ថិតិជាតិចិនបានទទួលស្គាល់ថាពីវិសមភាពប្រជាសាស្រ្តសម្រាប់រយៈពេលវែងដោយមូលហេតុសំខាន់ចំនួនពីរ ទី១ កំណើនចំនួនមនុស្សចាស់ និងទី២ កំណើនចំនួនពលរដ្ឋចំណាកស្រុកពីទីជនបទទៅធ្វើការនៅក្នុងទីក្រុង។ ជាក់ស្តែងក្នុងឆ្នាំ ២០២០ មានចំនួនពលរដ្ឋចំណាកស្រុកជិត ៣៧៦លាននាក់ ពោលមានការកើនឡើងជិត ៧០% ក្នុងរយៈពេល ១០ឆ្នាំ។
គិតត្រឹមដំណាច់ឆ្នាំ ២០២០ ចិនមានពលរដ្ឋសរុបចំនួន ១ ៤១១លាននាក់ទល់ ១ ៣៤០លាននាក់នៅដំណាច់ឆ្នាំ ២០១០ មានន័យថាក្នុងរយៈពេល ១០ឆ្នាំចុងក្រោយនេះ ចិនមានកំណើនពលរដ្ឋតែចំនួន ៧២លាននាក់ប៉ុណ្ណោះ។ រដ្ឋាភិបាលបានព្យាករថា កំណើនចំនួនពលរដ្ឋនឹងឡើងដល់ចំណុចកំពូលនៅឆ្នាំ ២០២៧ តែមិនបានបញ្ជាក់ពីចំនួនពិតប្រាកដទេ។ បន្ទាប់មក ចំនួនពលរដ្ឋចិននឹងផ្តើមធ្លាក់ចុះនៅត្រឹម ១ ៣២០លាននាក់នាឆ្នាំ ២០៥០។ ដោយឡែក ឥណ្ឌាដែលមានចំនួនពលរដ្ឋច្រើនលំដាប់ទី២ បន្ទាប់ពីចិននឹងអាចវ៉ាចិននាពេលខាងមុខ។ តាមតួលេខរបស់អង្គការសហប្រជាជាតិ ឥណ្ឌាមានពលរដ្ឋសរុបចំនួន ១ ៣៨០លាននាក់ក្នុងឆ្នាំ ២០២០។ តែបើតាមរបាយការណ៍ផ្សព្វផ្សាយដោយក្រុងញូដែលីក្នុងឆ្នាំ ២០២០ ឥណ្ឌាបានស្គាល់កំណើនចំនួនពលរដ្ឋជាមធ្យម ១% ក្នុងមួយឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ