របាយការណ៍ផ្លូវការចិន ៖ ពលរដ្ឋចិនជាងពាក់កណ្តាល ធាត់ជ្រុល
បើតាមរបាយការណ៍ផ្លូវការរបស់ក្រសួងសុខាភិបាលចិន ចេញផ្សាយនៅថ្ងៃពុធទី ២៣ធ្នូ ២០២០នេះ ប្រជាពលរដ្ឋពេញវ័យចិនបច្ចុប្បន្ន ចំនួនដល់ទៅជាងពាក់កណ្តាល មានរូបរាងកាយធាត់លើសទម្ងន់។ កំរិតជីវភាពធូរធារជាងមុន កង្វះសកម្មភាពកីឡា ព្រមទាំងសម្ពាធការងារ ជាកត្តាដែលជំរុញឱ្យពលរដ្ឋចិនកាន់តែច្រើនឡើងៗ ធាត់។
ចុះផ្សាយនៅថ្ងៃ៖
ស្តាប់ - ០២:២៦
ពលរដ្ឋចិនអាយុលើស១៨ឆ្នាំឡើងទៅ ចំនួន ៣៤,៣% ធាត់លើសទម្ងន់ និង ១៦,៤% ធាត់ជ្រុលចុកខ្លាញ់ ពោលគឺជាងពាក់កណ្តាល (៥០,៣%) នៃប្រជាជនចិនជាមនុស្សធាត់។ នេះបើតាមរបាយការណ៍ឆ្នាំ២០២០ ស្តីពីរបបអាហារនិងជំងឺរ៉ាំរ៉ៃ របស់ក្រសួងសុខាភិបាលចិន ដែលបញ្ជាក់ថាចំនួនមនុស្សធាត់បានកើនឡើង ៤,២ (ធាត់លើសទម្ងន់) និង៤,៥% (ធាត់ចុកខ្លាញ់) បើប្រៀបទៅនឹងឆ្នាំ២០១២។ ហើយកាលពីឆ្នាំ២០០២ ចិនមានពលរដ្ឋធាត់តែប្រមាណ២៩,៩%។
ចំណែកកុមារ និងយុវជនចិន អាយុពី៦ទៅ១៧ឆ្នាំវិញ ក៏មានបញ្ហាលើសទម្ងន់កាន់តែច្រើនឡើងដែរ។ ក្មេងជិត២០%មានអាការៈធាត់ជ្រុលលើសទម្ងន់នៅឆ្នាំ២០២០នេះទល់នឹង១៦%ប៉ុណ្ណោះ កាលពីឆ្នាំ២០១២។
ពលរដ្ឋចិន ធាត់ ហើយ ធំ ទៀត។ របាយការណ៍ចិនដដែលបានបង្ហាញថា បុរសចិនមានទម្ងន់ជាមធ្យម៦៩,៩គីឡូក្រាម និងមានកម្ពស់ជាមធ្យម ១៦៩,៧សង់ទីម៉ែត្រ ពោលគឺលូតខ្ពស់ ២,៦សង់ទីម៉ែត្រក្នុងរយៈពេល១០ឆ្នាំ។ ចំណែកស្ត្រីវិញក៏ដូចគ្នា ស្ត្រីមានទម្ងន់ជាមធ្យម ៥៩គីឡូក្រាម និងកម្ពស់ ១៥៨សង់ទីម៉ែត្រ (ខ្ពស់ជាងមធ្យមភាគកាលពីឆ្នាំ២០១២ចំនួន២,២ស.ម.)។
ហេតុអ្វីចិនស្គាល់កំណើនចំនួនមនុស្សធាត់លឿនខ្លាំងដូច្នេះ ? តាំងពី៤០ឆ្នាំចុងក្រោយនេះ ចិនមានការអភិវឌ្ឍលូតលាស់យ៉ាងលឿនស្លេវ ទម្លាប់រស់នៅនិងរបបអាហារក៏បានប្តូរផ្លាស់ច្រើន ហើយចំណីអាហារនៅលើទីផ្សារក៏កាន់តែសម្បូរបែប និងតម្លៃក៏សមរម្យទៀត។ ដូច្នេះបើមានជីវភាពធូរធារហើយ ចិនមិនសំចៃនឹងរឿងទទួលទានទេ ព្រោះសម្រាប់ដូនតាចិន ញ៉ាំកាន់តែច្រើនកាន់តែល្អ។ ទទួលទានអាហារច្រើនសម្បូរវីតាមីន ប្រូតេអ៊ីនហើយ ពលរដ្ឋចិនមិនសូវបញ្ចេញកម្លាំងកាយធ្វើកីឡាហាត់ប្រាណទេ ហើយថែមទាំងមានសម្ពាធច្រើន ដូចជាសម្ពាធការងារ សម្ពាធគ្រួសារ ពេលវេលាការងារមិនទៀងទាត់ និងគ្មានលំនឹងរវាងរយៈពេលម៉ោងធ្វើការនិងការសម្រាកកម្លាំងទេ។ នេះបើតាមការពន្យល់របស់អ្នកជំនាញផ្នែកអាហារូបត្ថម្ភ Wang Dan នៅក្រុងHarbin។
ការធាត់លើសទម្ងន់ ជាកត្តាហានិភ័យនាំឱ្យមានគ្រោះកើតជំងឺសរសៃឈាមបេះដូង ទឹកនោមផ្អែម ឬជំងឺមហារីក។ សម្រាប់អាជ្ញាធរវិញ មានពលរដ្ឋធាត់កាន់តែច្រើន ប្រព័ន្ធសុខភាពអាចត្រូវរងសម្ពាធខ្លាំងនាថ្ងៃអនាគត។ តាំងពីប៉ុន្មានឆ្នាំចុងក្រោយមកនេះ ធាត់ជ្រុលលើទម្ងន់ ឬជំងឺធាត់ចុកខ្លាញ់ មានកើនឡើងនៅទូទាំងពិភពលោក រាប់ទាំងក្នុងប្រទេសកំពុងអភិវឌ្ឍន៍ផង ដល់ទៅប្រមាណជាង២ពាន់លាននាក់។ សហរដ្ឋអាមេរិកជាប្រទេសមានអ្នកធាត់ជ្រុលច្រើនជាងគេបំផុត។ ក្នុងរយៈពេលតែ៤ទសវត្សរ៍ ចំនួនអ្នកធាត់ចុកខ្លាញ់ បានកើនឡើងមួយទ្វេជាពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ