ហេតុអ្វី រដ្ឋបាលអាមេរិក លូកដៃ ដាក់ទណ្ឌកម្មសេដ្ឋកិច្ចលើរដ្ឋាភិបាលបេឡារុស?
ចុះផ្សាយនៅថ្ងៃ៖
ស្តាប់ - ០៧:៥៣
រឿងអាស្រូវកៀងយន្តហោះ អឺរ៉ុប ឲ្យចុះចត នៅបេឡារុស ដើម្បី ស្ទាក់ចាប់អ្នកកាសែតប្រឆាំង បានជំរុញ ឲ្យអាមេរិកចាត់វិធានការដាក់ទណ្ឌកម្មសេដ្ឋកិច្ច ប្រឆាំង រដ្ឋាភិបាលបេឡារុស។ នៅថ្ងៃសុក្រម្សិលមិញ រដ្ឋបាលរបស់លោកចូ បៃដិនបានប្រកាសថា ខ្លួនកំពុងពិភាក្សាជាមួយសហភាពអឺរ៉ុប ដើម្បីបង្កើតបញ្ជីឈ្មោះ មន្រ្តី រដ្ឋាភិបាល បេឡារុស ដែលត្រូវជាប់ទណ្ឌកម្មថ្មី ដោយសាររឿង ដែល បេឡារុស បានស្ទាក់ចាប់យន្តហោះ អឺរ៉ុប Ryanair ដើម្បីចាប់អ្នកកាសែតប្រឆាំងបេឡារុស កាលពីថ្ងៃ អាទិត្យកន្លងទៅ។ អាមេរិកសម្រេចចាត់វិធានការប្រឆាំងបេឡារុស នៅចំថ្ងៃ ដែល ប្រធានាធិបតី បេឡារុស ចូលជួបសន្ទនាជាមួយប្រធានាធិបតីរុស្ស៊ី នៅទីក្រុងSotchi។
ប្រតិកម្មថ្កោលទោស បេឡារុស ដែលបានកៀងស្ទាក់ចាប់យន្តហោះ អឺរ៉ុប Ryanair កាលពីថ្ងៃ រដ្ឋបាលលោកចូ បៃដិន បានសម្រេចផ្អាក កិច្ចព្រមព្រៀង ឆ្នាំ ២០១៩ រវាងទីក្រុងវ៉ាស៊ីនតោន និងទីក្រុងMinks ដែលបានអនុញ្ញាតឲ្យប្រទេសទាំងពីរ ប្រើប្រាស់ដែនអាកាសគ្នាទៅវិញ ទៅមក។ ដោយផ្អាកកិច្ចព្រមព្រៀង ឆ្នាំ ២០១៩ អាមេរិកបានសម្រេច តាម ប្រទេសសមាជិកអឺរ៉ុប ជាច្រើន ដែលបានហាមមិនឲ្យយន្តហោះរបស់ក្រុមហ៊ុនបេឡារុស ប្រើប្រាស់ដែនអាកាសរបស់ខ្លួនតទៅទៀត។ ក្រៅតែពីណែនាំមិនឲ្យជនជាតិអាមេរិកធ្វើដំណើរទៅប្រទេសបេឡារុស រដ្ឋបាលលោកចូ បៃដិន បានអំពាវនាវឲ្យប្រជាជនអាមេរិកាំង មានការប្រុងប្រយ័ត្នខ្ពស់ បើសិនត្រូវជិះយន្តហោះ ដែលត្រូវហោះឆ្លងកាត់ដែនអាកាសបេឡារុស។
តាមអ្នកនាំពាក្យរបស់សេតវិមាន លោកស្រី ជេន សាគី (Jen Psaki) ក្រៅតែពីផ្អាកមិនអនុវត្តកិច្ចព្រមព្រៀងស្តីពីចរាចរណ៍ដែនអាកាសជាមួយ ប្រទេសបេឡារុស រដ្ឋបាលលោកចូ បៃដិនបានចាត់វិធានការដាក់ទណ្ឌកម្មផ្សេងទៀត ប្រឆាំងរដ្ឋាភិបាលបេឡារុស ដឹកនាំដោយលោកប្រធានាធិបតី លូកាឆេនកូ។ តាមអ្នកនាំពាក្យ របស់សេតវិមាន លោកស្រីជេន សាគី អាមេរិក សហភាពអឺរ៉ុប និង ប្រទេសមួយចំនួនទៀត កំពុងរៀបចំបញ្ជីឈ្មោះ ដើម្បីសំដៅ ដាក់ទណ្ឌកម្មសេដ្ឋកិច្ច លើមនុស្សសំខាន់ៗ របស់រដ្ឋាភិបាលលោកលូកាឈិនកូ ដែលមានជាប់ពាក់ព័ន្ធនឹងការរំលោភសិទ្ធិមនុស្ស ការប្រព្រឹត្តអំពើពុករលួយ ការបន្លំឆ្នោត ឆ្នាំ ២០២០ និងចុងក្រោយ គឺការកៀង យន្តហោះ ដើម្បីចាប់អ្នកកាសែតប្រឆាំង កាលពីថ្ងៃទី ២៣ឧសភា សប្តាហ៍មុននេះ។
នៅមុនចេញបញ្ជីឈ្មោះ មន្រ្តីសំខាន់ៗរបស់រដ្ឋាភិបាលបេឡារុស ដែលត្រូវជាប់ទណ្ឌកម្មសេដ្ឋកិច្ច ក្រសួង ហិរញ្ញវត្ថុអាមេរិកបានបញ្ជាក់រួចហើយថា ទណ្ឌកម្មទៅលើក្រុមហ៊ុនរដ្ឋបេឡារុស ចំនួន ៩ ដែលអាមេរិកបានសម្រេច កាលពីថ្ងៃ ខែមេសាកន្លងទៅ នឹងចាប់អនុវត្តជាផ្លូវការ ចាប់ពីថ្ងៃទី ៣ មិថុនាសប្តាហ៍ក្រោយនេះ។ មានន័យថា ចាប់ពីថ្ងៃអាទិត្យសប្តាហ៍ក្រោយ ប្រជាជនអាមេរិកាំង នឹងគ្មានសិទ្ធិ បោះទុនវិនិយោគ ធ្វើមុខជំនួញ ជាមួយ ក្រុមហ៊ុនរដ្ឋបេឡារុសទាំង ៩ខាងលើនោះទេ។
អាមេរិកបានសម្រេចដាក់ទណ្ឌកម្មទៅលើក្រុមហ៊ុនរដ្ឋបេឡារុស នៅក្នុងគោលដៅដាក់សម្ពាធសេដ្ឋកិច្ច ទៅលើលោកប្រធានាធិបតីបេឡារុស ដែលក្រុមបក្សប្រឆាំង បេឡារុស និងក្រុមប្រទេសលោកខាងលិច ចោទថា បានបង្រ្កាប ហិង្សា ចាប់ខ្លួន និងធ្វើទារុណកម្ម សកម្មជនប្រឆាំង ដែលបានធ្វើបាតុកម្មតវ៉ាប្រឆាំង លទ្ធផលឆ្នោតប្រធានាធិបតី កាលពីឆ្នាំ ២០២០ កន្លងទៅ។
ហេតុអ្វី បានជាអាមេរិកមកលូកដៃ ដាក់ទណ្ឌកម្ម បេឡារុស ធ្វើអ្វីដែរ បុប្ផា?
សំណុំរឿងអាស្រូវ កៀងចាប់បង្ខំ ឲ្យយន្តហោះអឺរ៉ុប ចុះចតនៅទឹកដីបេឡារុស ដើម្បីចាប់អ្នកកាសែត ប្រឆាំង មិនត្រឹមជាកង្វល់របស់សហភាពអឺរ៉ុបតែម្នាក់នោះទេ ប៉ុន្តែ វាពាក់ព័ន្ធផងដែរ នឹងសហរដ្ឋអាមេរិក ព្រោះត្រូវដឹងថា នៅពីក្រោយ បេឡារុស ដែលជាអ្នកសម្រេចចាប់ស្ទាក់ យន្តហោះអឺរ៉ុប គឺមានឥទ្ធិពល របស់រុស្ស៊ី ដែលជាប្រទេសសត្រូវ របស់អាមេរិក និងជាគូប្រជែង ប្រទេសគំរាមកំហែងសន្តិសុខ សម្រាប់សហភាពអឺរ៉ុប។
ដោយដាក់ទណ្ឌកម្មទៅលើបេឡារុស អាមេរិក ចង់បញ្ជូនសញ្ញាទៅខាងភាគី រុស្ស៊ី ដែលជាសម្ព័ន្ធមិត្ត គាំទ្រ របបប្រធានាធិបតី បេឡារុស ថា អាមេរិក និងសម្ព័ន្ធមិត្តអឺរ៉ុប មានមធ្យោបាយ ដើម្បី ដាក់សម្ពាធលើប្រទេស រដ្ឋ ដែលស្ថិតក្រោម ឥទ្ធិពលរបស់ប្រទេសរុស្ស៊ី។
ទណ្ឌកម្មរបស់អាមេរិក និងសហភាពអឺរ៉ុប នឹងគ្មានប្រសិទ្ធិភាព ដាក់គំនាប ឲ្យប្រធានាធិបតីបេឡារុសខ្លបខ្លាច
នៅពេលទទួលជួបប្រធានាធិបតីបេឡារុស លោក អាឡិចសង់ លូកាឆេនកូ កាលពីថ្ងៃសុក្រ ម្សិលមិញ នៅគេហដ្ឋាន វិស្សមកាល នៅទីក្រុងសុតឈី លោកប្រធានាធិបតីរុស្ស៊ីបាននិយាយថា លោកត្រេកអរ ដែលបានជួបប្រធានាធិបតីបេឡារុស។ លោកថែមទាំងបានបញ្ជាក់ថា លោកយល់ស្របជាមួយប្រធានាធិបតីបេឡារុស ដែលថា ប្រទេសលោកខាងលិច មានប្រតិកម្ម បែបអារម្មណ៍ជ្រុលហួស ព្រោះមិនបានពិនិត្យពិច័យ ស្តាប់ រកហេតុឲ្យបានច្បាស់លាស់ មុនដាក់ទណ្ឌកម្មនោះទេ។
គេអាចនិយាយបានថា ទណ្ឌកម្ម ប្រតិកម្មថ្កោលទោស ប្រធានាធិបតីបេឡារុស មិនត្រឹមតែគ្មានប្រសិទ្ធិភាព ដាក់សម្ពាធធ្វើឲ្យប្រធានាធិបតីបេឡារុស ចុះចាញ់ តែប៉ុណ្ណោះទេ ប៉ុន្តែ ផ្ទុយទៅវិញ វារឹតតែ រុញច្រាន ប្រទេស បេឡារុស ឲ្យធ្លាក់កាន់តែជ្រៅ ទៅក្នុងអន្លង់ជីករបស់រុស្ស៊ី ដែលប្រាថ្នា ចង់បានបេឡារុសឲ្យមកស្ថិតក្រោមអំណាច ឥទ្ធិពលរបស់ខ្លួន តាំងពីយូរមកហើយ ដើម្បី ទប់ទល់ ប្រទេសលោកខាងលិច។
ត្រូវដឹងថា នៅក្រោយ សហភាពសូវៀត ដួលរលំ នៅខែ ធ្នូ ឆ្នាំ ១៩៩១ បេឡារុស បានក្លាយជារដ្ឋឯករាជ្យ គ្មានទាក់ទងអ្វីនឹង សហព័ន្ធរុស្ស៊ីនោះទេ។ បេឡារុស ស្ថិតនៅចន្លោះ រុរុស្ស៊ី នឹងប្រទេសសមាជិកអូតង់ ដែលមាន ដូចជាប៉ូឡូញ លីទុយអានី ជាដើម។ ដោយចុះហត្ថលេខាលើសន្ធិសញ្ញា បង្កើតសហភាពរដ្ឋថ្មី រុស្ស៊ី បេឡារុស នៅឆ្នាំ ១៩៩៩ រុស្ស៊ី បានប្រាថ្នា អូសទាញ បេឡារុស ឲ្យមកនៅខាងខ្លួន។ រុស្ស៊ី មិនចង់ឲ្យបេឡារុស ទៅ ជិតស្និទ្ធ ជាមួយ សហភាពអឺរ៉ុប នោះទេ ព្រោះរុស្ស៊ី មិនចង់ឃើញ បេឡារុស ក្លាយជាប្រទេសសមាជិករបស់អូតង់ នៅជាប់ព្រំដែនផ្ទាល់របស់រុស្ស៊ី។
កាលពីប៉ុន្មានឆ្នាំមុន ទោះជាបេឡារុស បានចុះសន្ធិសញ្ញា បង្កើតសហភាពរដ្ឋថ្មីជាមួយ រុស្ស៊ី ប៉ុន្តែ លោកប្រធានាធិបតី លូកាឆេនកូ បានបង្ហាញអរិភាព មិនទុកចិត្ត និងចេះតែ ខ្លាចរុស្ស៊ី កាត់យកទឹកដីបេឡារុស ដូចរុស្ស៊ីបានធ្វើទៅលើទឹកដីគ្រីមេរបស់ប្រទេសអ៊ុយក្រែន។ លោកលូកាឆេនកូ ចង់ ឲ្យបេឡារុសស្ថិតនៅជាប្រទេសឯករាជ្យ រក្សាទំនាក់ទំនងល្អជាមួយគ្រប់ភាគី មិនថា ជាមួយរុស្ស៊ី ឬប្រទេសលោកខាងលិច។ ប៉ុន្តែ ព្រឹត្តិការណ៍ នៅឆ្នាំ ២០២០ ពោលគឺនៅពេលមានសន្ទុះធ្វើបាតុកម្ម ប្រឆាំងលទ្ធផលឆ្នោត និងទាមទារឲ្យលោកចុះចេញពីតំណែង និងការដាក់ទណ្ឌកម្មរបស់ប្រទេសលោកខាងលិច មក លោកប្រធានាធិបតី បេឡារុស បានចាប់ប្តូរជំហរ និងងាករេ មករករុស្ស៊ី កាន់តែខ្លាំង។ ឆ្លៀតឱកាសនេះ រុស្ស៊ី ដែលបានចងសម្ព័ន្ធជាមួយ បេឡារុស ក្នុងសន្ធិសញ្ញាឆ្នាំ ១៩៩៩ បានព្យាយាម ជំរុញ ឲ្យបេឡារុស ធ្វើសមាហរកម្ម ចុះចូលជាមួយ រុស្ស៊ី បន្ថែមទៀត។ គម្រោងការនេះ បានធ្វើឲ្យក្រុមប្រឆាំងបេឡារុស ព្រួយបារម្ភមែនទែន។ ព្រួយបារម្ភ ពីព្រោះថា ដើម្បី ក្រាញចង់កាន់អំណាចតែមួយមុខគត់ លោកប្រធានាធិបតី លូកាឆេនកូ សុខចិត្ត ជ្រមុជក្បាល ទៅសុំជំនួយពីរុស្ស៊ី ដោយមិនគិតខ្វល់ថា បេឡារុស ត្រូវបាត់បង់ ដែនអធិបតេយ្យភាព ឯករាជ្យភាព ទៅស្ថិតក្រោម បង្គាប់ គ្រប់គ្រង របស់រុស្ស៊ីនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ