រឿងអាស្រូវ ចាប់កៀងយន្តហោះRyanair ៖ អឺរ៉ុបបិទដែនអាកាសមិនឲ្យយន្តហោះបេឡារុសហោះកាត់
ខឹងសម្បារនឹងរដ្ឋាភិបាលបេឡារុស ដែលចាប់កៀងបង្ខំឲ្យយន្តហោះRyanair ចុះចត នៅទីក្រុងMinks ដើម្បីចាប់អ្នកកាសែតប្រឆាំងបេឡារុស មេដឹកនាំប្រទេសអឺរ៉ុបដែលបានជួបប្រជុំគ្នា កាលពីយប់ថ្ងៃចន្ទម្សិលមិញ បានសម្រេច ថា អឺរ៉ុបនឹងបិទដែនអាកាស មិនឲ្យ យន្តហោះរបស់ក្រុមហ៊ុនបេឡារុស ហោះកាត់ ចំណែក ក្រុមហ៊ុនហោះហើរអឺរ៉ុប ត្រូវគេអំពាវនាវឲ្យលែងហោះឆ្លងកាត់ប្រទេស បេឡារុស តទៅទៀត។ នៅយប់ថ្ងៃចន្ទដែរ ប្រព័ន្ធផ្សព្វផ្សាយគាំទ្រ រដ្ឋាភិបាល បេឡារុសបានបញ្ចេញវីដេអូមួយ ដែលនៅក្នុងនោះ អ្នកកាសែតប្រឆាំង Roman Protassevitch បាននិយាយថា លោកកំពុងស្ថិតនៅមន្ទីរឃុំឃាំង ក្នុងទីក្រុងMinks និងកំពុងសហការ ជាមួយ ប៉ូលិសស៊ើបអង្កេតបេឡារុស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៥
នៅក្រោយបាត់ខ្លួន ពីក្នុងយន្តហោះអឺរ៉ុប Ryanair ដែលអាជ្ញាធរបេឡារុស បានកៀង បង្ខំឲ្យចុះចត នៅទីក្រុងMinks កាលពីថ្ងៃអាទិត្យ គេបានឃើញ ជាលើកទី ១ អ្នកាសែតប្រឆាំង បេឡារុស លោក Roman Protassevitch នៅក្នុងខ្សែវីដេអូដ៏ខ្លី ដែលបង្ហោះ តាមTelegram របស់ប្រព័ន្ធផ្សព្វផ្សាយ គាំទ្ររដ្ឋាភិបាលបេឡារុស។
នៅក្នុងវីដេអូ រយៈពេល ២៨វីនាទី អ្នកកាសែតប្រឆាំង បេឡារុស ដែលមានទឹកមុខស្លេកស្លាំង និងមានស្នាមជាំនៅលើថ្ងាស បាននិយាយជាភាសារុស្ស៊ី ថា លោកកំពុងជាប់ក្នុងមន្ទីរឃុំឃាំង នៅទីក្រុងMinks និងថា លោកគ្មានបញ្ហាសុខភាពអ្វីនោះទេ។ នៅចុងបញ្ចប់ លោកបានបញ្ជាក់ថា លោកសហការជាមួយប៉ូលិសស៊ើបអង្កេត បេឡារុស និងទទួលស្គាល់ថា លោកបានចូលរួម រៀបចំ បាតុកម្មដែលបង្កអសណ្តាប់ធ្នាប់ នៅទីក្រុងMinks កាលពីឆ្នាំមុន។ ចម្លើយសារភាពរបស់លោក Protassevitch នឹងអាចធ្វើឲ្យលោកប្រឈមនឹងទោសជាប់ពន្ធនាគារ ១៥ឆ្នាំ នៅបេឡារុស។
នៅថ្ងៃអង្គារ មិត្តភក្តិរួមការងារជាមួយលោកRoman Protassevitch បានបរិហារ រូបភាពវីដេអូបោកប្រាស់ និងថា អ្នកកាសែត ប្រឆាំង បេឡារុស កំពុងស្ថិតក្រោម គំនាបចាប់បង្ខំ ឲ្យផ្តល់ចម្លើយសារភាព។ ម្តាយរបស់អ្នកកាសែត ប្រឆាំង ដែលកំពុងរស់នៅប្រទេសប៉ូឡូញ ក៏បាននិយាយប្រាប់ក្រសួងការបរទេសប៉ូឡូញដែរថា លោក Roman Protassevitch មានបញ្ហាសុខភាព។ ប៉ុន្តែ ក្រសួងការមហាផ្ទៃ បេឡារុស វិញ អះអាង សកម្មជនប្រឆាំង រូបនេះ មិនបានថ្ងូរថា មានបញ្ហាសុខភាពអ្វីនោះទេ។
នៅយប់ថ្ងៃចន្ទ ប្រតិកម្ម ទៅនឹងរឿងអាស្រូវ ចាប់ជំរិត កៀងបង្ខំឲ្យយន្តហោះអឺរ៉ុប ចុះចត នៅទឹកដី បេឡារុស មេដឹកនាំប្រទេសអឺរ៉ុបទាំង២៧ បានមូលមតិ សម្រេច ហាមមិនឲ្យយន្តហោះក្រុមហ៊ុន បេឡារុស ប្រើប្រាស់ ដែនអាកាសអឺរ៉ុប។ អង់គ្លេស និងសហភាពអឺរ៉ុបបានអំពាវនាវផងដែរកុំឲ្យយន្តហោះ របស់ក្រុមហ៊ុនខ្លួន ហោះឆ្លងកាត់ទឹកដីបេឡារុសតទៅទៀត។
នៅក្រោយ ក្រុមហ៊ុនប្រទេសលីទុយអានី ក្រុមហ៊ុនហោះហើរ បារាំង អាល្លឺម៉ង់ និងអង់គ្លេស បានប្រកាសនៅថ្ងៃអង្គារនេះ ផ្អាក លែងហោះហើរកាត់ដែនអាកាសបេឡារុស។
ដោយហោះវាងមិនឆ្លងកាត់ បេឡារុស ដែលជាច្រកឆ្លងកាត់សំខាន់រវាងប្រទេសសមាជិកអឺរ៉ុប និងអឺរ៉ុបជាមួយអាស៊ី ការធ្វើដំណើរតាមរយៈយន្តហោះក្រុមហ៊ុនអឺរ៉ុប នឹងត្រូវចំណាយពេលវែង និងថ្លៃជាងមុន។
ក្រៅតែពីប្រកាសបិទដែនអាកាស សម្រាប់ក្រុមហ៊ុនហោះហើរ បេឡារុស មេដឹកនាំអឺរ៉ុបបានយល់ស្របគ្នាផងដែរ ដើម្បី បន្ថែមឈ្មោះមន្រ្តីបេឡារុស ដែលជាប់ពាក់ព័ន្ធនឹងគម្រោងការចាប់ជំរិតយន្តហោះលើកនេះ ទៅក្នុងបញ្ជីជាប់ទណ្ឌកម្ម ដែលអឺរ៉ុប បានបង្កើតឡើង នៅក្រោយ មានការបង្រ្កាបហិង្សាទៅលើបាតុករ បេឡារុស កាលពីឆ្នាំមុន។ ប្រធានគណៈកម្មការអឺរ៉ុបវិញ បានប្រកាសថា នឹងបង្កក គម្រោងវិនិយោគតម្លៃ៣ពាន់លានដុល្លារ នៅបេឡារុស។
នៅថ្ងៃអង្គារ រដ្ឋាភិបាល បេឡារុស បានអះអាងសាជាថ្មីថា ខ្លួនមិនបានចាប់បង្ខំ ឲ្យយន្តហោះចុះចត ដើម្បីចាប់អ្នកកាសែតនោះទេ។ ប៉ុន្តែ យន្តហោះរបស់ក្រុមហ៊ុន Ryanair ត្រូវចុះចត ដោយសារមានព័ត៌មានថា មានគ្រាប់ផ្ទុះក្នុងនោះ។ ដោយទាមទារថា ខ្លួនឈ្នះឆ្នោត កាលពីឆ្នាំ ២០២០ លោកប្រធានាធិបតី លូកាឈិនកូបានប្រឈមនឹងបាតុកម្មប្រឆាំង ភ្លូកទឹកភ្លូកដី នៅបេឡារុស។ ដោយសារការបង្រ្កាប គាបសង្កត់ គ្រប់បែបយ៉ាង សកម្មជនប្រឆាំង បេឡារុស ត្រូវប្រឈមនឹងការចាប់ខ្លួន ឬត្រូវនិរទេសខ្លួនទៅបរទេស។ ក្រុមប្រឆាំងបេឡារុសវាយតម្លៃថា មានមនុស្សជាង ៣៥០០០ នាក់ ដែលត្រូវអាជ្ញាធរបេឡារុស ចាប់ឃុំខ្លួន និងធ្វើទារុណកម្ម ដោយសារបានចូលរួមក្នុងបាតុកម្ម ប្រឆាំងលទ្ធផលឆ្នោតប្រធានាធិបតី នៅឆ្នាំ ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ