បេឡារុស និងរុស្ស៊ីបរិហាររិះគន់ទណ្ឌកម្មរបស់សហភាពអឺរ៉ុបលើបេឡារុស
បេឡារុស និងសហភាពអឺរ៉ុបបានយកទណ្ឌកម្មសេដ្ឋកិច្ច ជាអាវុធវាយប្រហារគ្នាទៅមកទៅមក។ ទីក្រុងមីនស្ក៍ កាលពីថ្ងៃសុក្រម្សិលមិញ បានប្រកាសទណ្ឌកម្ម ឆ្លើយតបវិញ នឹងទណ្ឌកម្មសេដ្ឋកិច្ចដែលសហភាពអឺរ៉ុបបានប្រកាសដាក់ទៅលើមន្រ្តីបេឡារុសណាដែលជាប់ពាក់ព័ន្ធនឹងការបង្រ្កាប លើក្រុមប្រឆាំង នៅទឹកដីបេឡារុស។ ទីក្រុងម៉ូស្គូ សម្ព័ន្ធមិត្តរបស់ប្រធានាធិបតី បេឡារុសបានប្រតិកម្មរិះគន់ទណ្ឌកម្មរបស់សហភាពអឺរ៉ុប។
ចុះផ្សាយនៅថ្ងៃ៖
ស្តាប់ - ០២:៤៨
សម្រាប់ម៉ូស្គូ ទណ្ឌកម្មរបស់សហភាពអឺរ៉ុបទៅលើរដ្ឋាភិបាលបេឡារុស ស្តែងឲ្យឃើញ ពីចំណុចខ្សោយរបស់សហភាពអឺរ៉ុប។ យ៉ាងណាក៏ដោយ អ្នកនាំពាក្យរបស់វិមានក្រេមឡាំង ឃើញចំនុចវិជ្ជមានមួយ ព្រោះថា បញ្ជីឈ្មោះ ទណ្ឌកម្មសេដ្ឋកិច្ចរបស់សហភាពអឺរ៉ុប គ្មានឈ្មោះរបស់លោកប្រធានាធិបតី បេឡារុស អាឡិចសង់ដ្រឺ លូកាឆិនកូនោះទេ។
ទៅតាមការប្រកាសរបស់ប្រធានក្រុមប្រឹក្សាអឺរ៉ុប លោក Charles Michel មេដឹកនាំរបស់ប្រទេសសមាជិកទាំង២៧ របស់សហភាពអឺរ៉ុប បានយល់ព្រមព្រៀងគ្នា ដាក់ទណ្ឌកម្មសេដ្ឋកិច្ចលើមន្រ្តីបេឡារុសជាង ៤០នាក់ ដែលជាប់ពាក់ព័ន្ធនឹងការបង្រ្កាបលើក្រុមប្រឆាំង ក្នុងពេលធ្វើបាតុកម្ម ឬការបន្លំសន្លឹកឆ្នោត នៅបេឡារុស។ ទណ្ឌកម្មរបស់សហភាពអឺរ៉ុបនឹងចូលជាធរមាន ចាប់ពីថ្ងៃសុក្រ។ ទៅតាមទណ្ឌកម្មរបស់អឺរ៉ុប មន្រ្តីបេឡារុស ដែលមានឈ្មោះ ក្នុងបញ្ជីទណ្ឌកម្មរបស់អឺរ៉ុប មិនអាចធ្វើដំណើរចូលទឹកដីអឺរ៉ុប ចំណែក ទ្រព្យសម្បត្តិពួកគេ នៅទឹកដីអឺរ៉ុប នឹងត្រូវគេបង្កកទុក មិនឲ្យប្រើប្រាស់។
ប្រធានាធិបតីបារាំង លោកអេម៉ានុយអែល ម៉ាក្រុង ដែលបានជួបសន្ទនាជាមួយមេបក្សប្រឆាំងបេឡារុស កាលពីថ្ងៃអង្គារ វាយតម្លៃថា លោកប្រធានាធិបតីលូកាឆិនកូ នឹងអាចចាត់បញ្ចូល ក្នុងបញ្ជី ទណ្ឌកម្មរបស់អឺរ៉ុប ប្រសិនបើ នៅតែមាន ការបង្រ្កាបលើក្រុមអ្នកប្រឆាំងនៅបេឡារុស។
សម្រាប់អ្នកជំនាញ ដោយដាក់ទណ្ឌកម្មតែទៅលើមន្រ្តីរដ្ឋាភិបាល ប៉ុន្តែ មិនមែនប្រធានាធិបតី បេឡារុស លោកលូកាឆិនកូ សហភាពអឺរ៉ុបចង់សំដែងការគាំទ្រ សាមគ្គីភាពជាមួយក្រុមប្រឆាំង ដែលកំពុងធ្វើបាតុកម្មទាមទារឲ្យលោកប្រធានាធិបតី ចុះចេញពីតំណែង។ សហភាពអឺរ៉ុបមិនដាក់ទណ្ឌកម្មដោយផ្ទាល់ លើលោកប្រធានាធិបតី លូកាឆិនកូ ក៏ព្រោះតែ មិនចង់ញុះញង់ឲ្យរុស្ស៊ីខឹងប្រតិកម្មខ្លាំង។ ម្យ៉ាង ទណ្ឌកម្ម តែទៅលើមន្រ្តីតូចតាច គ្រាន់តែ ជាការដាក់សម្ពាធ ដើម្បីជំរុញឲ្យមានការចរចា ឈាន ទៅរកការរៀបចំបោះឆ្នោត សាជាថ្មី ប៉ុន្តែ មិនមែន ប្រកាស បើកសង្រ្គាមដោយផ្ទាល់ជាមួយ បេឡារុស ឬរុស្ស៊ីនោះទេ។
យ៉ាងណាក៏ដោយ នៅក្រោយការដាក់ទណ្ឌកម្មរបស់សហភាពអឺរ៉ុប បេឡារុស តាមរយៈក្រសួងការបរទេសបានប្រកាសទណ្ឌកម្មប្រឆាំងតបវិញ ប៉ុន្តែ មិនបានលម្អិតជាសាធារណៈនោះទេ។ នៅថ្ងៃសុក្រដដែល លោកប្រធានាធិបតី លូឡាឆិនកូដែលកំពុងប្រឈមនឹងមហាបាតុកម្ម ទាមទារឲ្យចុះចេញពីតំណែង ចាប់តាំងពីមានការបោះឆ្នោត កាលពីខែសីហា បានទូរស័ព្ទ ស្វែង រកជំនួយគាំទ្រពីប្រធានាធិបតីរុស្ស៊ី លោកវ្លាឌីមៀរ ពូទីន។ លោកពូទីនដែលបានសន្យាផ្តល់ជំនួយផ្នែកសន្តិសុខ និងហិរញ្ញវត្ថុ ប្រមាណ១៥០០លានដុល្លារ ដល់បេឡារុស។
ចង់ ឬមិនចង់ ទណ្ឌកម្មរបស់អឺរ៉ុបកំពុងរុញច្រាន មេដឹកនាំបេឡារុស ឲ្យចូលកៀកកាន់តែជិតស្និទ្ធ ម៉ូស្គូ ដែល មេដឹកនាំបេឡារុស ធ្លាប់ព្យាយាម នៅឆ្ងាយ និងចោទប្រកាន់ថា បានចូលរំលោភ ដែនអធិបតេយ្យភាពរបស់បេឡារុស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ