Facebook Instagram Messenger និង WhatsApp បានដំណើរការជាថ្មី ក្រោយពីបានជាប់គាំងអស់រយៈពេលជាង ៦ម៉ោង
ចុះផ្សាយនៅថ្ងៃ៖
ស្តាប់ - ០៦:២៩
នៅល្ងាចថ្ងៃចន្ទ ទី៤ឆ្លងចូលថ្ងៃអង្គារ ទី៥ តុលា បណ្តាញសង្គមចំនួនពីរ គឺFacebook និង Instagram រួមទាំងកម្មវិធីចំនួនពីរ គឺ Messenger និង WhatsApp បានជាប់គាំងអស់រយៈពេលជាង ៦ម៉ោង។ ព្រឹត្តិការណ៍មួយនេះបានកើតមានឡើង ខណៈដែលក្រុមហ៊ុន Facebook កំពុងឆ្លងកាត់វិបត្តិមួយទៀតតាមរយៈការទម្លាយឯកសាររបស់លោកស្រីហ្វ្រាន់សេស ហោហ្កិន (Frances Haugen) កាលពី ២សប្តាហ៍កន្លងទៅ។
បើតាមហេតុផលលើកឡើងដោយក្រុមហ៊ុន Facebook នៅក្នុងសេចក្តីប្រកាសព័ត៌មានមួយ ភាពជាប់គាំងបណ្តាលមកពីការធ្វើបច្ចុប្បន្នភាពលើប្រព័ន្ធព័ត៌មានវិទ្យា និងការផ្លាស់ប្តូរប្រព័ន្ធខួរក្បាលនៅក្នុងម៉ាស៊ីនកុំព្យូទ័រ។ កុំថាឡើយតែអ្នកប្រើFacebook Instagram Messenger និង WhatsApp ដែលមានជាង ៣ ០០០លាននាក់ក្នុងមួយខែៗនៅទូទាំងពិភពលោកជួបបញ្ហា សូម្បីតែក្រុមហ៊ុន Facebook ខ្លួនឯងក៏មិនអាចប្រើបណ្តាញទាំងនេះបានដែរ និងបានបង្ខំចិត្តប្រើបណ្តាញរបស់គូប្រជែងខ្លួនគឺ Twitter ដើម្បីបញ្ជាក់ពីមូលហេតុ និងធ្វើការសុំទោសជាផ្លូវការ។
សំណួរដែលកំពុងចោទ តើអ្វីដែលក្រុមហ៊ុន Facebook បានបញ្ជាក់នេះជារឿងពិត ឬមួយក៏បណ្តាញសង្គមដ៏មានប្រជាប្រិយភាពមួយនេះបានរងការវាយប្រហារពីខាងក្រៅ?។ តាមពិតទៅ បញ្ហាបច្ចេកទេស ឬមួយក៏បញ្ហាសន្តិសុខតាមអ៊ីនធ័រនែតដែលនាំឲ្យមានភាពរអាក់រអួល ឬការជាប់គាំងក្នុងការប្រើអ៊ីធ័រនែត បណ្តាញសង្គម ឬកម្មវិធីផ្សេងៗមិនមែនជារឿងថ្មី និងក៏ឧស្សាហ៍កើតមានដែរ។ តែបើយោងតាមថ្នាល Downdetector ដែលជាអ្នកតាមដានលើការជាប់គាំងសេវាឌីជីថល ការជាប់គាំងរបស់ Facebook Instagram Messenger និង WhatsApp ជាង ៦ម៉ោងជាព្រឹត្តិការណ៍មួយដែលមិនធ្លាប់ឃើញកើតមានចំពោះក្រុមហ៊ុន Facebook។
អ្វីជាការកត់សម្គាល់ រឿងអភ័ព្វរបស់ក្រុមហ៊ុន Facebook ពេលនេះបានផ្តល់សំណាងឲ្យក្រុមហ៊ុនគូប្រជែងរបស់ខ្លួន ពិសេសក្រុមហ៊ុន Telegram។ កម្មវិធីមួយនេះបានលោតពីលំដាប់ទី៥៦ ទៅលំដាប់ទី៥ ជាកម្មវិធីដែលមានការទាញយកច្រើនជាងគេក្នុងរយៈពេលតែ ១ថ្ងៃ នៅអាមេរិក។ តែអ្វីដែល Facebook បានទទួលថ្មបាក់ពីការជាប់គាំងរយៈពេលជាង ៦ម៉ោង គឺការបាត់បង់ចំណូលផ្សាយពាណិជ្ជកម្មដែលមានទឹកប្រាក់ ៥៤៥ ០០០ដុល្លារក្នុងមួយម៉ោង។ ចំណែកតម្លៃភាគហ៊ុនរបស់ក្រុមហ៊ុន Facebook បានដាំក្បាលចុះចំនួន ៤,៨៩% នៅផ្សារភាគហ៊ុន Wall Street ដែលបានធ្វើឲ្យប្រធានក្រុមហ៊ុន Facebook លោក Mark Zuckerberg ខាតលុយអស់ជាង ៦ ០០០លានដុល្លារ។
វិបត្តិជាន់លើវិបត្តិចំពោះក្រុមហ៊ុន Facebook
ភាពជាប់គាំងរបស់ក្រុមហ៊ុន Facebook ពេលនេះបានកើតមានឡើង ២សប្តាហ៍ក្រោយពីលោកស្រីហ្វ្រាន់សេស ហោហ្កិន (Frances Haugen) បានទម្លាយឯកសារផ្ទៃក្នុងជាច្រើនរបស់ Facebook។ មានអាយុ ៣៧ឆ្នាំ និងមានសញ្ញាប័ត្រចេញពីសាកលវិទ្យាល័យ Harvard លោកស្រីហ្វ្រាន់សេស ហោហ្កិនបានចូលធ្វើការនៅក្នុងក្រុមហ៊ុន Facebook កាលពីឆ្នាំ ២០១៩ ក្នុងនាមជានាយិកាម្នាក់។ តែមុននឹងធ្វើការឲ្យ Facebook អ្នកជំនាញបណ្តាញសង្គមរូបនេះធ្លាប់ធ្វើការឲ្យក្រុមហ៊ុន Google Pinterest និង Yelp។ គឺទើបតែនៅក្នុងខែឧសភាកន្លងទៅដែលលោកស្រីហ្វ្រាន់សេសបានលាឈប់ពីការងារនៅក្រុមហ៊ុន Facebook។ តែលោកស្រីបានដើរចេញពី Facebook ដោយនាំយកទៅជាមួយនូវឯកសារសម្ងាត់ផ្ទៃក្នុងជាច្រើនរបស់ Facebook។
ការដែលគេនាំគ្នានិយាយពីលោកស្រីហ្វ្រាន់សេសពេលនេះក៏ដោយសារតែលោកស្រីបានសម្រេចចិត្តបង្ហាញមុខជាសាធារណៈនៅលើកញ្ចក់ទូរទស្សន៍ CBS ដើម្បីបកអាក្រាតរឿងរ៉ាវរបស់ Facebook។ តាមលោកស្រីហ្វ្រាន់សេស Facebook ជាអ្នកដែលបានលើកទឹកចិត្តឲ្យមានការវាយប្រហារលើវិមានកាពីតូលនៅអាមេរិកកាលពីថ្ងៃទី ៦ មករា ឆ្នាំ ២០២០។ លោកស្រីហ្វ្រាន់សេសបានបញ្ជាក់ដោយមិនលាក់លៀមថា មានជម្លោះផលប្រយោជន៍នៅផ្ទៃក្នុង Facebook រវាងអ្វីដែលល្អសម្រាប់អ្នកប្រើ Facebook និងអ្វីដែលល្អសម្រាប់ Facebook។ តាមលោកស្រីហ្វ្រាន់សេស អ្វីដែលល្អសម្រាប់ Facebook គឺជម្រើសដើម្បីផលប្រយោជន៍ក្រុមហ៊ុន មានន័យថា ធ្វើម៉េចឲ្យតែក្រុមហ៊ុនចំណេញលុយបានច្រើន។
គួរបញ្ជាក់ថា លោកស្រីហ្វ្រាន់សេសបានប្រគល់ឯកសារសម្ងាត់ដែលលោកស្រីយកពី Facebook ទៅឲ្យកាសែត Wall Street Journal និងសភាអាមេរិក។ លទ្ធផលនៃការសិក្សាផ្ទៃក្នុងរបស់ Facebook ដែលបង្ហាញថា ការដែលក្មេងស្រីបានប្រើកម្មវិធី Instagram បានធ្វើឲ្យប៉ះពាល់ដល់រូបភាព និងសុខភាពក៏លោកស្រីហ្វ្រាន់សេសជាអ្នកទម្លាយ។ នៅថ្ងៃអង្គារ ទី៥ តុលានេះ លោកស្រីហ្វ្រាន់សេសត្រូវចូលឆ្លើយនឹងសំណួររបស់គណៈកម្មការព្រឹទ្ធសភាអាមេរិកជុំវិញរឿងរ៉ាវទាំងអស់នេះ។
Facebook ញ័រជើងដោយសារលោកស្រីហ្វ្រាន់សេសជាងការជាប់គាំង
គោលដៅនៃការទម្លាយឯកសារផ្ទៃក្នុង Facebook របស់លោកស្រីហ្វ្រាន់សេស គឺលោកស្រីចង់ឲ្យមានការពិនិត្យមើលឡើងវិញលើច្បាប់សម្រាប់បណ្តាញសង្គម និយាយជារួម និងសម្រាប់ Facebook និយាយដោយឡែក។ លោកស្រីហ្វ្រាន់សេសបានបញ្ជាក់ថា នៅក្នុងអាជីពរបស់លោកស្រី និងតាមរយៈបទពិសោធន៍ដែលលោកស្រីធ្លាប់ធ្វើការនៅកន្លែងផ្សេង លោកស្រីមិនដែលឃើញរបៀបធ្វើការងារដូចនៅក្នុងក្រុមហ៊ុន Facebook ទេ។ អ្វីដែលលោកស្រីបានលាតត្រដាងរឿងរ៉ាវរបស់ Facebook ពេលនេះ គឺលោកស្រីចង់ផ្តល់ជាព័ត៌មានដល់អ្នកប្រើ Facebook ទាំង ២ ៨០០លាននាក់ ចង់ព្យាយាមឲ្យមានការកែប្រែច្បាប់ថ្មីសម្រាប់ក្រុមហ៊ុនបណ្តាញសង្គម និងចង់ការពារឲ្យមានសិទ្ធិបញ្ចេញមតិត្រឹមត្រូវដោយគ្មានការញុះញង់ កេងបន្លំ និងគិតប្រយោជន៍ក្រុមហ៊ុនជាធំ។
បើតាមមើលទៅ គឺរឿងអាស្រូវទម្លាយឯកសាររបស់លោកស្រីហ្វ្រាន់សេសដែលបាន និងកំពុងធ្វើឲ្យក្រុមហ៊ុន Facebook ភ័យញ័រជើងខ្លាំងជាងគេ ពោលប្រហែលមិនមែនរឿងជាប់គាំងជាង ៦ម៉ោងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ