អង់គ្លេស និងសហភាពអឺរ៉ុប ស៊ើបអង្កេតលើហ្វេសប៊ុក ទាក់ទិននឹងការបំពានការប្រកួតប្រជែងដោយស្មោះត្រង់
សហភាពអឺរ៉ុប និង ប្រទេសអង់គ្លេស បានប្រកាសកាលពីថ្ងៃសុក្រ ទី៤មិថុនា ថាគេបានបើកការស៊ើបអង្កេត លើក្រុមហ៊ុនបណ្តាញសង្គមហ្វេសប៊ុក ទាក់ទិននឹងការបំពានវិធាននៃការប្រកួតប្រជែងដោយស្មោះត្រង់។ ហ្វេសប៊ុក ត្រូវបានគេសង្ស័យថា បានប្រមូលទិន្នន័យ ពីក្រុមហ៊ុនដែលផ្សាយពាណិជ្ជកម្មលើហ្វេសប៊ុក យកទៅប្រើប្រាស់ ដើម្បីពង្រឹងការលក់ដូរដាច់ដោយឡែក របស់ខ្លួន នៅលើ Facebook Marketplace។
ចុះផ្សាយនៅថ្ងៃ៖
ស្តាប់ - ០២:២១
លោកស្រី Margrethe Vestager ស្នងការអឺរ៉ុប ទទួលបន្ទុកការប្រកួតប្រជែង បានលើកឡើងថា ហ្វេសប៊ុក កើបប្រមូលទិន្នន័យយ៉ាងច្រើនសន្ធឹកសន្ធាប់ ពីអ្នកប្រើប្រាស់ទូទៅ ព្រមទាំងអាចកើបប្រមូលទិន្នន័យពាណិជ្ជកម្ម របស់ក្រុមហ៊ុននានា ដែលចូលមកផ្សាយពាណិជ្ជកម្ម នៅលើហ្វេសប៊ុក។ ក្នុងន័យនេះ គឺហ្វេសប៊ុក អាចមានលទ្ធភាព ប្រើប្រាស់ទិន្នន័យទាំងនេះ ដើម្បីវាយលុក ឲ្យចំអតិថិជន នៅលើបណ្តាញមួយទៀតរបស់ខ្លួន ឈ្មោះ Facebook Marketplace។
សូមបញ្ជាក់ថា Facebook Marketplace គឺជាបណ្តាញសង្គមមួយទៀត របស់ក្រុមហ៊ុនហ្វេសប៊ុក តែបណ្តាញនេះ គឺជាទីកន្លែងដែលដាក់លក់សម្ភារៈ ទំនិញ សព្វសារពើ។ គណកម្មការអឺរ៉ុប កំពុងតែសង្ស័យថា ក្រុមហ៊ុនហ្វេសប៊ុក បានបំពានអំណាច នៅក្នុងបទវិធានប្រកួតប្រជែងដោយស្មោះត្រង់ ព្រោះក្រុមហ៊ុននានា ដែលមកផ្សាយពាណិជ្ជកម្ម លក់ផលិតផលលើហ្វេសប៊ុក បានផ្តល់ទិន្នន័យពាណិជ្ជកម្មទៅឲ្យហ្វេសប៊ុក។ ហ្វេសប៊ុក អាចយកទិន្នន័យទាំងនោះ ទៅប្រើប្រាស់ ដើម្បីប្រកួតប្រជែង ជាមួយក្រុមហ៊ុនទាំងនោះវិញ។
ដោយឡែក អាជ្ញាធរគ្រប់គ្រងការប្រកួតប្រជែង របស់ប្រទេសអង់គ្លេស ក៏បានបើកការស៊ើបអង្កេតមួយដែរ លើក្រុមហ៊ុនហ្វេសប៊ុក ដោយផ្តោតលើបណ្តាញមួយទៀត របស់ហ្វេសប៊ុក ឈ្មោះ Facebook Dating ដែលជាបណ្តាញ រកគូស្រករតាមអនឡាន។ អាជ្ញាធរអឺរ៉ុប និងអង់គ្លេស អះអាងថា គេនឹងសហការគ្នា នៅក្នុងការស៊ើបអង្កេតទាំងនេះ។
គណកម្មការអឺរ៉ុប បានជូនដំណឹងពីការបើកការស៊ើបអង្កេតនេះ ទៅកាន់អាជ្ញាធរប្រកួតប្រជែង តាមប្រទេសសមាជិកទាំងអស់។ មិនមានកាលបរិច្ឆេទកំណត់ណាមួយ ថាត្រូវបិទបញ្ចប់ការស៊ើបអង្កេតនេះនៅពេលណាទេ។ យូរឬឆាប់ គឺវាអាស្រ័យ លើការសហការរបស់ក្រុមហ៊ុនហ្វេសប៊ុក។
គួរបញ្ជាក់ថា ហ្វេសប៊ុកគឺជាបណ្តាញសង្គមដ៏ធំបំផុត។ ក្នុងមួយខែៗ មានអ្នកប្រើប្រាស់យ៉ាងហោច ៣ពាន់លាននាក់។ ក្រុមហ៊ុនតូចធំ យ៉ាងហោច ៧លានក្រុមហ៊ុន មានវត្តមានផ្សាយពាណិជ្ជកម្មលើហ្វេសប៊ុក។ ក្រុមហ៊ុនបណ្តាញអ៊ីនធ័រណិតធំៗ ដូចជា ហ្វេសប៊ុក Google តែងត្រូវបានប្រទេសអឺរ៉ុប និងសហរដ្ឋអាមេរិក ចោទប្រកាន់ជាញឹកញាប់ ទាក់ទិននឹងបញ្ហាបំពានសិទ្ធិ ក្នុងបទវិធានប្រកួតប្រជែងដោយស្មោះត្រង់។ កាលពីខែវិច្ឆិកា ឆ្នាំ២០២០ សហភាពអឺរ៉ុប បានប្តឹងក្រុមហ៊ុន Amazon ថាបានប្រមូលទិនន្ន័យ ពីអ្នកលក់តូចតាចនៅលើ Amazon ដើម្បីពង្រឹងការលក់ដូរផលិតផល ដែលជារបស់ Amazonខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ