នុយក្លេអ៊ែរអ៊ីរ៉ង់៖ អាមេរិកនឹងប្រើជម្រើសផ្សេង រួមទាំងការប្រើកម្លាំងទ័ព បើការចរចាផ្លូវទូតបរាជ័យ
ចុះផ្សាយនៅថ្ងៃ៖
ស្តាប់ - ០៦:៤៥
នៅថ្ងៃព្រហស្បតិ៍ ទី ១៤តុលា ប្រេសិតរបស់សហភាពអឺរ៉ុប ដែលដើរតួជាអាជ្ញាកណ្តាល រវាងអាមេរិក និងអ៊ីរ៉ង់ បានធ្វើដំណើរទៅ ទីក្រុងតេហេរ៉ង់ ដើម្បីចង់ដឹងថា តើពេលណាទើបអ៊ីរ៉ង់សម្រេចចិត្តត្រលប់ចូលតុចរចាឡើងវិញ។ ប៉ុន្តែ នៅថ្ងៃដដែល ភាគីអ៊ីរ៉ង់ តាមរយៈ អនុរដ្ឋមន្រ្តីការបរទេសបានប្រកាសថា អ៊ីរ៉ង់និងភាគីអឺរ៉ុបនឹងបន្តជជែកគ្នា នៅទីក្រុងព្រុចសែល ដើម្បីរកចំណុចព្រមព្រៀងគ្នាមួយ ដែលបញ្ចុះបញ្ចូលឲ្យអ៊ីរ៉ង់ សម្រេចចិត្តត្រលប់ចូលតុចរចា។ តើអ៊ីរ៉ង់កំពុងអូសបន្លាយពេលវេលាដូចការលើកឡើងរបស់អាមេរិក?
លោក Enrique Mora មន្រ្តីសហភាពអឺរ៉ុប ទទួលបន្ទុកការចរចាលើសំណុំរឿងនុយក្លេអ៊ែរអ៊ីរ៉ង់បានទៅជួបពិភាក្សា ជាមួយ ភាគីអ៊ីរ៉ង់ នៅទីក្រុងតេហេរ៉ង់ កាលពីថ្ងៃព្រហស្បតិ៍។ ជំនួបចរចាអ៊ីរ៉ង់ និងភាគីអឺរ៉ុបធ្វើឡើង នៅក្នុងបរិយាកាសដ៏តានតឹង បន្ទាប់ពីអាមេរិក ព្រមានរួចហើយថា ត្រៀមប្រើជម្រើសផ្សេង ដែលមានទាំងការប្រើកម្លាំងទ័ព បើសិន ការចរចាការទូតបរាជ័យ។
ពាក្យគំរាមប្រើជម្រើសផ្សេង ដែលអាចជាការប្រើកម្លាំងយោធា ក្នុងករណីការចរចាការទូតបរាជ័យ កើតចេញមុនដំបូងគេ ពីមាត់របស់ប្រធានាធិបតីអាមេរិកអាមេរិក លោកចូ បៃដិន កាលពីខែសីហាកន្លងទៅ។ នៅសប្តាហ៍នេះ ប្រេសិត អាមេរិកទទួលបន្ទុកការចរចា នុយក្លេអ៊ែរអ៊ីរ៉ង់ ហើយនិងប្រមុខការបរទេសលោកអង់តូនី ប្លីងកិនក៏បានពន្លយប្រើពាក្យគំរាមនេះដែរ ក្នុងហេតុផលថា អាមេរិកមិនបានសង្កេតឃើញ មានសញ្ញាគួរឲ្យលើកទឹកចិត្ត ពីខាងភាគីអ៊ីរ៉ង់សោះ។
នៅពេលអាមេរិកបង្ហាញចេតនាចង់ត្រលប់ទៅក្នុងកិច្ចព្រមព្រៀងឡើងវិញ ការចរចា ដើម្បីស្តារកិច្ចព្រមព្រៀងនុយក្លេអ៊ែរអ៊ីរ៉ង់ក៏ត្រូវជាប់គាំង ចាប់តាំងពីខែ មិថុនាមក នៅពេលអ៊ីរ៉ង់ ត្រូវផ្លាស់ប្តូរប្រធានាធិបតីថ្មី។ ក្រោមការដឹកនាំរបស់ប្រធានាធិបតីថ្មី ដែលមកពីក្រុមអភិរក្សនិយមជ្រុល អ៊ីរ៉ង់ក៏មិនបានបង្ហាញចេតនា ចង់ត្រលប់ចូលតុចរចា ឲ្យបានឆាប់ដែរ។ អ៊ីរ៉ង់នៅតែមិនព្រមកំណត់ថ្ងៃ ដើម្បី បើកឲ្យមានការជួបចរចា គ្រប់ភាគីឡើងវិញ នៅក្រោយជាប់គាំងអស់ជាច្រើនខែ។
ជាក់ស្តែង នៅក្រោយ ជំនួបជាមួយអ្នកចរចាអឺរ៉ុបដែលដើរតួជាអ្នកសម្របសម្រួល ឲ្យអ៊ីរ៉ង់ និងអាមេរិក កាលពីថ្ងៃព្រហស្បតិ៍ម្សិលមិញ អនុរដ្ឋមន្រ្តីការបរទេសអ៊ីរ៉ង់ លោក Ali Bagheri ដែលទទួលបន្ទុកការចរចានុយក្លេអ៊ែរអ៊ីរ៉ង់បានត្រឹមតែ ប្រកាសថា គេនឹងបន្តចរចា តទៅទៀត នៅទីក្រុងព្រុចស៊ែល នៅប៉ុន្មានថ្ងៃខាងមុខ។
ពាក្យនេះ អាចឲ្យគេជឿថា អ៊ីរ៉ង់កំពុងធ្វើដូចការវាយតម្លៃកន្លងមករបស់អាមេរិកដែលថា អ៊ីរ៉ង់គ្មានចេតនាចង់ចរចាពិតប្រាកដ និងកំពុងចង់អូសបន្លាយពេលវេលា ដើម្បីបានឱកាសធ្វើសកម្មភាព ដែលផ្ទុយពីកិច្ចព្រមព្រៀង នុយក្លេអ៊ែរអ៊ីរ៉ង់។ ឧទាហរណ៍ នៅសប្តាហ៍មុននេះ អ៊ីរ៉ង់បានប្រកាសចម្រើនសារធាតុអ៊ុយរ៉ាញ៉ូម ក្នុងកម្រិតមួយខ្ពស់ ដែលតាមពិត ត្រូវហាមដោយកិច្ចព្រមព្រៀងនុយក្លេអ៊ែរឆ្នាំ២០១៥។
តើអាមេរិកកំពុងប្តូរយុទ្ធសាស្រ្ត ដាក់សម្ពាធលើអ៊ីរ៉ង់?
រដ្ឋបាលលោកចូ បៃដិនធ្លាប់បានសន្យាថា ប្រើផ្លូវចរចាការទូតដើម្បី រារាំងអ៊ីរ៉ង់មិនឲ្យមានអាវុធនុយក្លេអ៊ែរប្រល័យលោក។ ទាំង រដ្ឋមន្រ្តីការបរទេស និងប្រេសិតអាមេរិកទទួលបន្ទុកការចរចា នុយក្លេអ៊ែរអ៊ីរ៉ង់ ក៏បញ្ជាក់ដូចគ្នានេះដែរថា ដំណោះស្រាយការទូតជាមធ្យោបាយដ៏ល្អ ដើម្បីដោះស្រាយវិបត្តិនុយក្លេអ៊ែរអ៊ីរ៉ង់។ ប៉ុន្តែ នៅថ្ងៃព្រហស្បតិ៍ នៅក្នុងសន្និសីទកាសែតជាមួយ រដ្ឋមន្រ្តីការបរទេសអ៊ីស្រាអែល ប្រមុខការបរទេសអាមេរិកដដែលបាននិយាយថា អាមេរិកត្រៀមប្រើជម្រើសថ្មី បើសិនអ៊ីរ៉ង់ មិនផ្លាស់ប្តូរទិសដៅរបស់ខ្លួន។
ប៉ុន្តែ ដោយប្រើប្រើពាក្យ ថា អាមេរិកត្រៀមនឹងប្រើជម្រើសថ្មី ផែនការB ដែលអាចជាការប្រើកម្លាំងទ័ព បើសិនការចរចាការទូត ត្រូវបរាជ័យ អាមេរិកបានផ្លាស់ប្តូរជំហរនយោបាយរបស់ខ្លួន ដោយបាននិយាយជាលើកទី១ ពី បរាជ័យក្នុងការចរចាជាមួយអ៊ីរ៉ង់។
សួរថា តើអាមេរិកនឹងអាចប្រើកម្លាំងទ័ព វាយប្រហារទៅលើអ៊ីរ៉ង់ ក្នុងករណីដែលការចរចាផ្លូវទូតបរាជ័យដែរឬទេ? គេមិនច្បាស់នោះទេ ព្រោះថា បើសិនជាកើតមានរឿងយ៉ាងដូច្នេះមែន សង្រ្គាមដ៏ធំមួយនឹងអាចផ្ទុះឡើងមិនខាន។ គេជឿថា អាមេរិកនឹងចាត់វិធានការប្រឆាំងអ៊ីរ៉ង់តាមផ្លូវមធ្យោបាយផ្សេង ដោយមិនចាំបាច់ប្រឈមមុខផ្ទាល់ជាមួយអ៊ីរ៉ង់។ ជាក់ស្តែង ប្រេសិតទទួលបន្ទុកចរចានុយក្លេអ៊ែរអ៊ីរ៉ង់បានធ្វើដំណើរទៅបណ្តាប្រទេសអារ៉ាប់ ដូចជា កាតារ អេមីរ៉ាត់ អារ៉ាប់រួម និងអារ៉ាប៊ីសាអូឌីតដើម្បីពិភាក្សាពីជម្រើសថ្មី ដែលអនុញ្ញាតឲ្យគេអាចគ្រប់គ្រង កម្មវិធីនុយក្លេអ៊ែររបស់អ៊ីរ៉ង់ ក្នុងករណីការចរចាការទូតបរាជ័យ។
ជាមួយសម្ព័ន្ធមិត្តរបស់អាមេរិក មន្រ្តីអាមេរិកមិនបានលម្អិត ថា តើគេអាចចូលគ្រប់គ្រងកម្មវិធីនុយក្លេអ៊ែរយ៉ាងម៉េចនោះទេ។ ប៉ុន្តែ នៅក្នុងលិខិតផ្ញើទៅកាន់ ប្រធានក្រុមប្រឹក្សាសន្តិសុខអង្គការសហប្រជាជាតិ ដែលទីភ្នាក់ងារព័ត៌មានផ្លូវរដ្ឋអ៊ីរ៉ង់ ចុះផ្សាយនៅថ្ងៃ ព្រហស្បតិ៍ម្សិលមិញ ឯកអគ្គរដ្ឋទូតអ៊ីរ៉ង់ ប្រចាំអង្គការសហប្រជាជាតិបានព្រមានរាល់ការប៉ុនប៉ងរបស់យោធាអ៊ីស្រាអែល ដើម្បីប្រឆាំង កម្មវិធីនុយក្លេអ៊ែរអ៊ីរ៉ង់។
អ៊ីស្រាអែលដែលជាសត្រូវសួរពូជរបស់អ៊ីរ៉ង់ ធ្លាប់លួចវាយប្រហារផលប្រយោជន៍របស់អ៊ីរ៉ង់ ដូចជា វាយប្រហារទៅលើទីតាំងយោធារបស់អ៊ីរ៉ង់ នៅទឹកដីស៊ីរី និងវាយប្រហារអ៊ីនធ័រនែត ទៅលើកម្មវិធីនុយក្លេអ៊ែរអ៊ីរ៉ង់។ នៅក្នុងសន្និសីទកាសែត ជាមួយ ប្រមុខការបរទេសអាមេរិក រដ្ឋមន្រ្តីការបរទេសអ៊ីស្រាអែលបានអះអាងថា អ៊ីស្រាអែលរក្សាសិទ្ធិដើម្បី ការពារខ្លួន ដែលនៅក្នុងមានផងដែរ ការប្រើកម្លាំងយោធា។
ទះដៃតែម្ខាងមិនលឺនោះទេ
រដ្ឋមន្រ្តីការបរទេសអាមេរិក ផ្ទាល់បាននិយាយថា ការចរចាត្រូវការ ភាគី ២។ ដូច្នេះ បើសិន ការចរចាស្តីពីកិច្ចព្រមព្រៀងនុយក្លេអ៊ែរត្រូវបរាជ័យធ្លាក់ទឹក នោះមិនមែនជាកំហុសរបស់អ៊ីរ៉ង់តែម្នាក់ឯងទេ។
រហូតមក ការជជែកតឹងសរសៃ ក កើតមានតែរវាងអាមេរិក និងអ៊ីរ៉ង់។ ភាគីទាំងពីរ បានដាក់លក្ខខណ្ឌ ទាមទារគ្នា ទៅវិញ ទៅមក ដោយភាគី ម្ខាងៗ រឹងទទឹងមិនព្រមចាញ់គ្នានោះទេ។ ឧទាហរណ៍ អ៊ីរ៉ង់ បានទាមទារឲ្យអាមេរិក បន្ធូរទណ្ឌកម្មសេដ្ឋកិច្ច ជាមុនសិន ដូចជា អនុញ្ញាតឲ្យធនាគារកូរ៉េខាងត្បូង ផ្ទេរលុយសងប្រេងឲ្យអ៊ីរ៉ង់ តម្លៃ ៨ពាន់លានដុល្លារជាមុនសិន ទើបអ៊ីរ៉ង់ អាចយល់ព្រមបើកការចរចា ស្តីពីកិច្ចព្រមព្រៀងនុយក្លេអ៊ែរជាមួយ អាមេរិក។ អាមេរិកវិញ មិនព្រមនោះទេ ដោយអះអាងថា អ៊ីរ៉ង់ ត្រូវត្រលប់មកគោរពកិច្ចព្រមព្រៀងនុយក្លេអ៊ែរជាមុនសិន បើសិនចង់ឲ្យអាមេរិកដកទណ្ឌកម្មសេដ្ឋកិច្ច។
ដរាបណាភាគីទាំងពីរ និយាយមិនចុះសម្រុងគ្នា គ្មានធ្វើសម្បទានឲ្យគ្នាសោះនោះ ការចរចា ដើម្បីស្រោចស្រង់ កិច្ចព្រមព្រៀង នុយក្លេអ៊ែរអ៊ីរ៉ង់ ដែលអាមេរិកដកខ្លួនកាលពីឆ្នាំ ២០១៨ រហូតធ្វើឲ្យអ៊ីរ៉ង់ លែងគោរពធ្វើតាម តទៅទៀត នឹងត្រូវដួលរលំ គ្មានថ្ងៃវិលត្រលប់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ