សហរដ្ឋអាមេរិកស្នើសុំចិនឱ្យកាត់បន្ថយបរិមាណនាំប្រេងពីអ៊ីរ៉ង់
សហរដ្ឋអាមេរិកបានស្នើសុំទៅចិន តាមផ្លូវការទូត ឱ្យប៉េកាំងបន្ថយការទិញប្រេងពីប្រទេសអ៊ីរ៉ង់។ សំណើនេះធ្វើឡើងក្នុងខណៈដែលសហរដ្ឋអាមេរិកកំពុងរិះរកគ្រប់មធ្យោបាយបញ្ចុះបញ្ចូលអ៊ីរ៉ង់ឱ្យចូលមកចរចា ស្តីពីកិច្ចព្រមព្រៀងនុយក្លេអ៊ែរអន្តរជាតិឆ្នាំ២០១៥ឡើងវិញ។
ចុះផ្សាយនៅថ្ងៃ៖
ស្តាប់ - ០១:៥៩
អាមេរិកបានដាក់ទណ្ឌកម្មលើអ៊ីរ៉ង់ យ៉ាងធ្ងន់ធ្ងរដើម្បីឱ្យប្រទេសនេះបោះបង់នុយក្លេអ៊ែរ តែសេដ្ឋកិច្ចអ៊ីរ៉ង់នៅតែអាចត្រដររស់បាន ដោយសារមានក្រុមហ៊ុនចិនទិញប្រេងពីអ៊ីរ៉ង់។ ហេតុដូច្នេះហើយបានជាសហរដ្ឋអាមេរិកលើកសំណើសុំឱ្យចិនឱ្យកាត់បន្ថយការទិញប្រេងពីអ៊ីរ៉ង់ តាមផ្លូវការទូត ក្នុងក្របខ័ណ្ឌការពិភាក្សានយោបាយស្តីពីបញ្ហាអ៊ីរ៉ង់ និងជាទូទៅ ដំណោះស្រាយតាមមធ្យោបាយនេះ មានប្រសិទ្ធភាពខ្លាំងជាង។ នេះបើតាមតំណាងជាន់ខ្ពស់អាមេរិកម្នាក់សុំមិនបញ្ចេញឈ្មោះ ដោយសង្កត់ធ្ងន់ថា សហរដ្ឋអាមេរិកមានវិធីច្រើនសម្រាប់តបនឹងការពង្វាងទណ្ឌកម្មអាមេរិកលើអ៊ីរ៉ង់ និងបន្តប្រើគ្រប់មធ្យោបាយបើចាំបាច់។ ប៉ុន្តែតំណាងអាមេរិកដដែលបានព្រលយថា ដោយចិនការពារអ៊ីរ៉ង់ ទើបក្រុមបស្ចិមលោក ចង់ត្រឹមកំរិតបរិមាណប្រេងដែលចិននាំចូលពីអ៊ីរ៉ង់។ បើតាមការប៉ាន់ស្មាន ចិនទិញប្រេងឆៅពីអ៊ីរ៉ង់ជាមធ្យម ៥៥៣០០០ធុងបារីល ក្នុងមួយថ្ងៃៗ គិតចាប់តាំងពីខែមករាដល់ខែសីហា ២០២១នេះ។
តំណាងអឺរ៉ុបម្នាក់ ក៏បានបញ្ជាក់ ដាច់ដោយឡែកដែរថា សំណើសុំឱ្យចិនកាត់បន្ថយការនាំចូលប្រេងពីអ៊ីរ៉ង់ ជាប្រធានបទសំខាន់មួយ នៃទស្សនកិច្ចរបស់អនុរដ្ឋមន្ត្រីការបរទេសអាមេរិក លោកស្រី Wendy Sherman នៅទីក្រុងប៉េកាំង កាលពីចុងខែកក្កដា២០២១។ តែក្រសួងការបរទេសអាមេរិក មិនធ្វើអត្ថាធិប្បាយអ្វីទាំងអស់។
មិនដឹងថាតើចិនទទួលស្តាប់អាមេរិកកំរិតណាបើទំនាក់ទំនងរវាងប្រទេសទាំងពីរ ស្ទើរគ្រប់វិស័យ ធ្លាក់ដុនដាបខ្លាំងមិនធ្លាប់មានដូច្នេះ។ ប៉ុន្តែសំណើនេះធ្វើឡើងក្នុងខណៈដែលអាមេរិកំពុងល្បួងអ៊ីរ៉ង់ឱ្យត្រលប់មកចរចាលើកិច្ចព្រមព្រៀងនុយក្លេអ៊ែរអន្តរជាតិចុះហត្ថលេខាកាលពីឆ្នាំ២០១៥។ កាលពីខែមេសា សហរដ្ឋអាមេរិកនិងអ៊ីរ៉ង់បានជួបចរចាគ្នាដោយមិនផ្ទាល់ម្តង នៅទីក្រុងវីយ៉ែន តែត្រូវជាប់គាំងរហូតតាំងពីខែមិថុនាមក នៅពេលអ៊ីរ៉ង់មានប្រធានាធិបតីថ្មី។ លោកប្រធានាធិបតីអ៊ីរ៉ង់ថ្មី អេប្រាហ៊ីម រ៉ៃស៊ី បានប្រកាសឆន្ទៈចូលចរចាជាមួយក្រុមមហាអំណាចនិងសហរដ្ឋអាមេរិកវិញដែរ ដើម្បីឈានដល់ការលើកទណ្ឌកម្មទាំងស្រុងចេញពីអ៊ីរ៉ង់ ប៉ុន្តែពុំបានកំណត់ថ្ងៃទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ