AIEA ថាអ៊ីរ៉ង់មិនគោរពកិច្ចព្រមព្រៀងនុយក្លេអ៊ែរ តែអ៊ីរ៉ង់ថាមិនពិត
អ៊ីរ៉ង់គោរពកិច្ចព្រមព្រៀងដែលបានចុះហត្ថលេខាជាមួយភ្នាក់ងារថាមពលបរមាណូអន្តរជាតិ AIEA កាលពីពីរសប្តាហ៍មុន បានតែមួយភាគប៉ុណ្ណោះ។ នេះបើតាមរបាយការណ៍របស់ភ្នាក់ងារថាមពលបរមាណូអន្តរជាតិ ដោយបញ្ជាក់ថា អ៊ីរ៉ង់បានបដិសេធមិនឱ្យក្រុមអធិការកិច្ចអង្គការប្រជាជាតិ ចូលទៅត្រួតពិនិត្យមជ្ឈមណ្ឌលនុយក្លេអ៊ែរនៅក្បែរក្រុងតេហេរ៉ង់ទេ។ ប៉ុន្តែអ៊ីរ៉ង់បានបញ្ចេញប្រតិកម្មបដិសេធនៅថ្ងៃចន្ទទី ២៧កញ្ញា២០២១ ថាជារបាយការណ៍មិនពិត។
ចុះផ្សាយនៅថ្ងៃ៖
ស្តាប់ - ០២:២៤
ក្រុមអធិការកិច្ចរបស់ទីភ្នាក់ងារថាមពលបរមាណូអន្តរជាតិ បានចូលទៅប្តូរផ្លាស់ គ្រឿងបរិក្ខារជាច្រើនក្នុងមជ្ឈមណ្ឌលនុយក្លេអ៊ែរអ៊ីរ៉ង់ ដូចមានចែងក្នុងកិច្ចព្រមព្រៀងថ្ងៃទី ១២កញ្ញា២០២១ ប៉ុន្តែអ៊ីរ៉ង់បានហាមឃាត់មិនឱ្យក្រុមភ្នាក់ងារចូលទៅត្រួតពិនិត្យមជ្ឈមណ្ឌល ការាច ដែលជាកន្លែងផលិតគ្រឿងបន្លាស់ម៉ាស៊ីនចម្រាញ់ធាតុអ៊ុយរ៉ានីញូមទេ។ យោលទៅលើកិច្ចព្រមព្រៀងរវាងអ៊ីរ៉ង់និងភ្នាក់ងារថាមពលបរមាណូ មជ្ឈមណ្ឌលការាច ជាកន្លែងតែមួយគត់ដែលអ្នកជំនាញអន្តរជាតិមិនទៅដល់។ នេះបើតាមបញ្ជាក់របស់លោកនាយកទីភ្នាក់ងារថាមពលបរមាណូ ទៅកាន់រដ្ឋជាសមាជិក។
គ្រាន់តែបានឃើញរបាយការណ៍របស់AIEAនេះភ្លាម សហភាពអឺរ៉ុបបានសម្តែងការខ្វល់ខ្វាយ យ៉ាងខ្លាំងនិងបានអំពាវនាវឱ្យអ៊ីរ៉ង់បើកទ្វារឱ្យក្រុមអធិការកិច្ចចូលទៅត្រួតពិនិត្យមជ្ឈមណ្ឌល ការាច ឱ្យបានឆាប់ៗបំផុត។
ប៉ុន្តែរបាយការណ៍របស់ភ្នាក់ងារថាមពលបរមាណូអន្តរជាតិ AIEA ចេញផ្សាយនៅថ្ងៃទី ២៦កញ្ញា មិនត្រឹមត្រូវទេ និងហួសដែននៃកិច្ចព្រមព្រៀង។បើតាមសាធារណរដ្ឋអ៊ីស្លាមអ៊ីរ៉ង់ មណ្ឌល Karaj គ្មានជាប់ពាក់ព័ន្ធនឹងកិច្ចព្រមព្រៀងស្តីពីការឃ្លាំមើលកម្មវិធីនុយក្លេអ៊ែរអ៊ីរ៉ង់ ចុះហត្ថលេខាកាលពីថ្ងៃទី ១២ កញ្ញានៅទីក្រុងវីយ៉ែនទេ។ នេះបើតាមសាររបស់លោក Kazem Gharibabadi ឯកអគ្គរដ្ឋទូតអ៊ីរ៉ង់ប្រចាំភ្នាក់ងារថាមពលបរមាណូអន្តរជាតិ ដោយឆ្លៀតបញ្ជាក់ថា មណ្ឌលKaraj ពេលនេះកំពុងស្ថិតក្រោមការអង្កេត និងការពារសុវត្ថិភាព ព្រោះមណ្ឌលបានរងការប៉ុនប៉ងធ្វើវិច្ឆេទកម្មមិនបានសម្រេច កាលពីថ្ងៃទី ២៣មិថុនា។
កិច្ចព្រមព្រៀងថ្ងៃទី ១២កញ្ញា២០២១ ជាលទ្ធផលនៃការពិភាក្សាតាំងពីខែមេសាមក នៅទីក្រុងវីយែន រវាងអ៊ីរ៉ង់ជាមួយប្រទេសមហាអំណាច៥ គឺ បារាំង អង់គ្លេស ចិនរុស្ស៊ី និងអាល្លឺម៉ង់ ដែលផ្តួចផ្តើមរបស់សហភាពអឺរ៉ុប។ តែការចរចាជាមួយក្រុមមហាអំណាច៥+១ ដោយមានសហរដ្ឋអាមេរិកផង ដើម្បីស្តារកិច្ចព្រមព្រៀងនុយក្លេអ៊ែរអន្តរជាតិឆ្នាំ២០១៥ ត្រូវជាប់គាំងទាំងស្រុងតាំងពីខែមិថុនា២០២១មក បើទោះបីជាលោកប្រធានាធិបតីអាមេរិក ចូបៃដិន បានសន្យាវិលមកប្រកាន់យកកិច្ចព្រមព្រៀងនុយក្លែអ៊ែរអ៊ីរ៉ង់ និងលើកទណ្ឌកម្មមួយភាគចេញពីអ៊ីរ៉ង់វិញក៏ដោយ។ ហេតុដូច្នេះហើយបានជារុស្ស៊ី ដែលគាំទ្រអ៊ីរ៉ង់ បានអំពាវនាវឱ្យសហរដ្ឋអាមេរិកស្វាហាប់ និងសកម្មឡើង ក្នុងការផ្តល់សន្ទុះដល់កិច្ចចរចាជាមួយអ៊ីរ៉ង់ឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ