នាយករដ្ឋមន្ត្រីអ៊ីរ៉ាក់រួចជីវិតពីការប៉ុនប៉ងធ្វើឃាតដោយយន្តដ្រូនលើគេហដ្ឋានរបស់លោក
ចុះផ្សាយនៅថ្ងៃ៖
ស្តាប់ - ០៦:២៦
យន្តដ្រូនដែលមានបំពាក់គ្រឿងផ្ទុះមួយគ្រឿងបានហោះសំដៅវាយប្រហារលើគេហដ្ឋានរបស់នាយករដ្ឋមន្ត្រីអ៊ីរ៉ាក់លោក ម៉ូស្តាហ្វា អាល់ កាដហ៊ីមី (Mustafa al-Kadhimi) ក្នុងទីក្រុងបាកដាដនៅព្រឹកថ្ងៃអាទិត្យ ទី៧ វិច្ឆិកា។ ទន្ទឹមពេលចាត់ទុកការវាយប្រហារនេះជាការប៉ុនប៉ងធ្វើឃាត យោធាអ៊ីរ៉ាក់បានប្រកាសឲ្យដឹងដែរថាលោកនាយករដ្ឋមន្ត្រីកាដហ៊ីមី មានសុវត្ថិភាពនិងគ្មានរងរបួសឡើយ។ តើអ្នកណាជាអ្នកនៅពីក្រោយការវាយប្រហារលើគេហដ្ឋានរបស់នាយករដ្ឋមន្ត្រីអ៊ីរ៉ាក់? ក្រោយហេតុការណ៍នេះ លោកនាយករដ្ឋមន្ត្រីកាដហ៊ីមីបាននិយាយអ្វីខ្លះ?
តើគេបានដឹងអ្វីខ្លះពីការវាយប្រហារនេះ?
ការវាយប្រហារដោយយន្តដ្រូនបំពាក់ដោយគ្រឿងផ្ទុះនៅថ្ងៃអាទិត្យ ទី៧ វិច្ឆិកានេះ គឺជាការវាយប្រហារលើកទី១ហើយសំដៅទៅលើគេហេដ្ឋានរបស់លោកនាយករដ្ឋមន្ត្រីអ៊ីរ៉ាក់ ម៉ូស្តាហ្វា អាល់ កាដហ៊ីមី ចាប់តាំងពីលោកឡើងកាន់អំណាចក្នុងខែឧសភា ឆ្នាំ ២០២០មក។ គេហដ្ឋានរបស់លោកមានទីតាំងស្ថិតនៅក្នុងតំបន់បៃតង (Green Zone) ដែលត្រូវបានការពារយាមកាមយ៉ាងតឹងរ៉ឺងក្នុងរដ្ឋធានីបាកដាដ។
ហេតុការណ៍នេះបានកើតឡើងនៅជួនចំពេលដែលគណបក្សនយោបាយជាច្រើនរបស់ប្រទេសអ៊ីរ៉ាក់កំពុងខ្វែងគំនិតគ្នាសម្រេចតើថាអ្នកណាដែលនឹងត្រូវឡើងគ្រប់គ្រងរដ្ឋាភិបាលបន្ទាប់ពីការបោះឆ្នោតកាលពីខែមុន។
បើតាមអាជ្ញាធរអ៊ីរ៉ាក់ មានដ្រូនគ្មានមនុស្សបើកចំនួន៣គ្រឿងត្រូវបានគេបញ្ជាឲ្យបើកការវាយប្រហារទៅលើគេហដ្ឋានរបស់នាយករដ្ឋមន្ត្រីនៅព្រឹកថ្ងៃអាទិត្យនេះ។ ក៏ប៉ុន្តែមានដ្រូន២គ្រឿងត្រូវបានបាញ់ទម្លាក់ដោយកងកម្លាំងរក្សាសន្តិសុខអ៊ីរ៉ាក់។
ចំណែកដ្រូនមួយចុងក្រោយគេបានវាយប្រហារលើគេហដ្ឋានរបស់លោកនាយករដ្ឋមន្ត្រីអ៊ីរ៉ាក់ធ្វើឲ្យខូតខាតផ្នែកខ្លះនៃអគារ។ មានឆ្មាំការពារន្តិសុខនៅផ្ទះលោកនាយករដ្ឋមន្ត្រីចំនួន ៧ នាក់បានរងរបួសក្នុងការវាយប្រហារខាងលើ។
ប៉ុន្តែជាសំណាងល្អ លោកកាដហ៊ីមី អាចគេចផុតពីការវាយប្រហារដោយសុវត្ថិភាពនិងគ្មានរងរបួសនោះទេ។ ក្រោយរួចផុតពីការវាយប្រហារ លោកនាយករដ្ឋមន្ត្រីបានចេញមុខអំពាវនាវតាមកញ្ចក់ទូរស្សន៍រដ្ឋឲ្យមានការរក្សាភាពស្ងៀមស្ងាត់ដើម្បីកុំឲ្យស្ថានការណ៍នៅក្នុងប្រទេសកាន់តែធ្លាក់ក្នុងភាពច្របូកច្របល់ខ្លាំងបន្ថែមទៀត។
ចំណែកយោធាអ៊ីរ៉ាក់ដែលហៅការវាយប្រហារខាងលើថាជាការប៉ុនប៉ងធ្វើឃាតនោះ បានប្រមូលយកបំបែកដ្រូនដែលនៅសេសសល់យកទៅធ្វើការស៊ើបអង្កេត។ ក៏ប៉ុន្តែរហូតមកទល់នឹងពេលនេះ គេនៅមិនដឹងនោះទេថាតើអ្នកណាឬក្រុមណាជាអ្នកនៅពីក្រោយការវាយប្រហារខាងលើ។
ការវាយប្រហារនេះកើតឡើងនៅចំពេលមានចលាចលក្នុងរដ្ឋធានីបាកដាដ
ការវាយប្រហារដោយដ្រូនទៅលើគេហដ្ឋានរបស់នាយករដ្ឋមន្ត្រីអ៊ីរ៉ាក់បានកើតឡើងក្នុងអំឡុងពេលដែលភាពតានតឹងកំពុងកើនឡើងខ្លាំងពាក់ព័ន្ធលទ្ធផលនៃការបោះឆ្នោតកាលថ្ងៃទី១០ ខែតុលា ឆ្នាំ ២០២១។ ជាការបោះឆ្នោតលើកទី៥ បន្ទាប់ពីការឈ្លានពានដឹកនាំដោយសហរដ្ឋអាមេរិកក្នុងឆ្នាំ ២០០៣ បានទម្លាក់មេដឹកនាំផ្តាច់ការ សាដាម ហ្វូសេន ជាមួយនឹងការសន្យានាំមកនូវសេរីភាពនិងលទ្ធិប្រជាធិបតេយ្យសម្រាប់អ៊ីរ៉ាក់។
កាលពីថ្ងៃសុក្រម្សិលម្ងៃមានបាតុករចំនួនរាប់រយនាក់បានប៉ះទង្គិចគ្នាជាមួយប៉ូលិស ខណៈពេលកំពុងតវ៉ានៅជិតតំបន់បៃតងដើម្បីបញ្ចេញកំហឹងរបស់ពួកគេចំពោះលទ្ធផលបឋមនៃការបោះឆ្នោត។
ភាពតានតឹងបានកើនឡើងខ្លាំងនៅពេលដែលបាតុករម្នាក់បានស្លាប់បន្ទាប់ពីព្យាយាមដើរចូលតំបន់បៃតងដែលជាតំបន់មានការយាមកាមតឹងតែងពីអាជ្ញាធរ។ នៅក្នុងការប៉ះទង្គិចគ្នាខាងពីថ្ងៃសុក្រ កងកម្លាំងរក្សាសន្តិសុខអ៊ីរ៉ាក់ជាច្រើននាក់ ក៏បានទទួលរងរបួសដែរ។
កាលពីថ្ងៃសៅរ៍ម្សិលមិញ បាតុករជាច្រើនរយនាក់ដែលសុទ្ធជាអ្នកគាំទ្រអ្នកនយោបាយអ៊ីរ៉ាក់មានទំនោរទៅរកអ៊ីរ៉ង់ បានត្រលប់ទៅកាន់តំបន់បៃតងជាថ្មីម្តងទៀតដើម្បីធ្វើបាតុកម្ម។ ក្រុមអ្នកតវ៉ាខ្លះបានដុតរូបភាពលោកនាយករដ្ឋមន្ត្រី កាដហ៊ីមី ដែលពួកគេចាត់ទុកថាជាក្រិដ្ឋជនមួយរូប។
នៅត្រង់ចំណុចនេះ គួរបញ្ជាក់ជូនថាក្នុងការបោះឆ្នោតកាលពីខែតុលាកន្លងទៅ គណបក្សចលនា ម៉ុកតាដា សាដ (Moqtada Sadr) ដែលមានថ្នាក់ដឹកនាំកាន់និកាយស្ហ៊ីអ៊ីត ជាអ្នកជាតិនិយមនិងជាអ្នករិះគន់អ៊ីរ៉ង់ ទទួលបានអាសនៈយ៉ាងច្រើនរហូតដល់ ៧០ អាសនៈ។ ចំណែកគណបក្សនយោបាយអ៊ីរ៉ាក់ដែលមានទំនោរទៅរកអ៊ីរ៉ង់វិញទទួលបរាជ័យជាខ្លាំងក្នុងការបោះឆ្នោតលើកនេះ។
សហគមន៍អន្តរជាតិបានសាទរចំពោះលទ្ធផលនៃការបោះឆ្នោតនៅអ៊ីរ៉ាក់ ប៉ុន្តែក្រុមបាតុករអ៊ីរ៉ាក់ដែលគាំទ្រអ្នកនយោបាយមានទំនោរទៅខាងអ៊ីរ៉ង់ស្រែកតវ៉ាថាមានការក្លែងបន្លំសន្លឹកឆ្នោត។ ពួកគេបានចេញធ្វើបាតុកម្មនិងទាមទារឲ្យមានការរាប់សន្លឹកឆ្នោតឡើងវិញ។
សហរដ្ឋអាមេរិកថ្កោសទោសការវាយប្រហារ
សហរដ្ឋអាមេរិកបានថ្កោលទោសការវាយប្រហារដោយយន្តដ្រូនទៅលើគេហដ្ឋានរបស់នាយករដ្ឋមន្ត្រីអ៊ីរ៉ាក់នៅថ្ងៃអាទិត្យនេះ ដោយចាត់ទុកវាថាជាអំពើភេរវកម្មជាក់ស្តែងមួយ។
នៅក្នុងសេចក្តីថ្លែងការណ៍មួយ អ្នកនាំពាក្យក្រសួងការបរទេសអាមេរិកលោក Ned Price បានបង្ហាញពីអារម្មណ៍ធូរស្រាលក្រោយទទួលបានដំណឹងថានាយករដ្ឋមន្ត្រីអ៊ីរ៉ាក់ កាដហ៊ីមី រួចផុតពីការវាយប្រហារនិងមានសុវត្ថិភាពនាខណៈពេលនេះ។
លោក Ned Price បានបង្ហាញពីជំហរគាំទ្ររបស់សហរដ្ឋអាមេរិកចំពោះរដ្ឋាភិបាលអ៊ីរ៉ាក់ ហើយបានប្រាប់ដែរថាអាមេរិកបានបោះដៃចូលជួយអាជ្ញាធរអ៊ីរ៉ាក់ក្នុងដំណើរការស៊ើបអង្កេតទាក់ទងការវាយប្រហារនេះ។
ចំណែកប្រទេសអ៊ីរ៉ង់វិញ ក៏បានថ្កោសទោសចំពោះការវាយប្រហារខាងលើដែរ។ ទន្ទឹមនេះ មន្ត្រីសន្តិសុខជាន់ខ្ពស់អ៊ីរ៉ង់ម្នាក់ បានចេញមុខស្តីបន្ទោសចំពោះការជ្រៀតជ្រែករបស់បរទេសនៅក្នុងកិច្ចការផ្ទៃក្នុងអ៊ីរ៉ាក់រហូតធ្វើឲ្យមានអសន្តិសុខ ជម្លោះ និងអស្ថិរភាព។ យ៉ាងណាក៏ដោយ មន្ត្រីអ៊ីរ៉ង់រូបនេះមិនបាននិយាយឲ្យចំឈ្មោះប្រទេសណាឲ្យប្រាកដនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ