មន្ត្រីអ៊ីរ៉ាក់អះអាងថា តំណាងរដ្ឋាភិបាលអ៊ីរ៉ង់ និងអារ៉ាប៊ីសាអូឌីត ពិតជាបានជួបនិយាយគ្នាមែន
២ថ្ងៃក្រោយការចុះផ្សាយ របស់សារព័ត៌មានអង់គ្លេស The Financial Times ដែលថា តំណាងរដ្ឋាភិបាលអ៊ីរ៉ង់ និងអារ៉ាប៊ីសាអូឌីត បានជួបនិយាយគ្នាដើម្បីស្តារទំនាក់ទំនងឡើងវិញនោះ គឺនៅថ្ងៃចន្ទទី១៩មេសាម្សិលមិញ មន្ត្រីរដ្ឋាភិបាលអ៊ីរ៉ាក់ បានអះអាងថា ពិតជាមានជំនួបនោះមែន កាលពីដើមខែមេសា នៅទីក្រុងបាកដាដ។ ជាជំនួប ដែលរដ្ឋាភិបាលអ៊ីរ៉ាក់ ជាអ្នកដើរតួជាអ្នកសម្របសម្រួល រៀបចំឲ្យអារ៉ាប៊ីសាអូឌីត និងអ៊ីរ៉ង់អាចភ្ជាប់ទំនាក់ទំនងនឹងគ្នាវិញ ហើយវាក៏អាចហុចផលវិជ្ជមានមកឲ្យអ៊ីរ៉ាក់ដែរ។
ចុះផ្សាយនៅថ្ងៃ៖
ស្តាប់ - ០២:៥៤
មន្ត្រីរដ្ឋាភិបាលអ៊ីរ៉ាក់ម្នាក់ បានបញ្ជាក់ប្រាប់អ្នកយកព័ត៌មានបារាំង AFP ថាពិតជាមានជំនួបស្ងាត់ៗ រវាងតំណាងរដ្ឋាភិបាលអ៊ីរ៉ង់ និងតំណាងអារ៉ាប៊ីសាអូឌីតពិតមែន កាលពីដើមខែមេសា នៅឯទីក្រុងបាកដាដ។ គណប្រតិភូអារ៉ាប៊ីសាអូឌីត ដឹកនាំដោយលោកប្រធានក្រុមស៊ើបការសំងាត់ Khalid ben Ali al-Humaidan។ ចំណែកភាគីអ៊ីរ៉ង់វិញ ត្រូវបានបញ្ជូនមកដោយ រដ្ឋលេខាធិការអ៊ីរ៉ង់ ទទួលបន្ទុកសន្តិសុខជាតិ Ali Chamkhani។ ដោយឡែក មន្ត្រីទូតបញ្ចឹមប្រទេសម្នាក់ ក៏បានទទួលដំណឹងនេះជាមុនដែរ។
ប្រភពដដែលអះអាងថា ជំនួបនេះ គឺជាការបោះជំហាន ដើម្បីឈានទៅភ្ជាប់ស្ពានទំនាក់ទំនងការទូតឡើងវិញ បន្ទាប់ពីបានកាត់ផ្តាច់ទាំងស្រុង នៅឆ្នាំ២០១៦។ វាក៏ជាឱកាស ដែលបានបើកផ្លូវឲ្យភាគីទាំង២ និយាយគ្នាត្រង់ទៅត្រង់មក ទាក់ទិននឹងដំណោះស្រាយសង្រ្គាមនៅយេម៉ែន។
សូមបញ្ជាក់ថា ដំណឹងនេះ គឺជាពន្លឺនៃក្តីសង្ឃឹមមួយ សម្រាប់តំបន់ដើមបូព៌ា និងជាពិសេសសម្រាប់អ៊ីរ៉ាក់ផ្ទាល់តែម្តង។ ជាច្រើនទសវត្សមកហើយ ដែលអ៊ីរ៉ាក់ ត្រូវមហាអំណាចតំបន់ទាំង២ នេះ ប្រទាញដណ្តើមគ្នាជះឥទ្ធិពល។ ការខិតចូលផ្តើមនិយាយគ្នានេះ គឺជាលទ្ធផល នៃការប្រឹងប្រែងរបស់រដ្ឋាភិបាលថ្មីអ៊ីរ៉ាក់ ដឹកនាំដោយ លោក Moustafa al-Kazimi។ លោក Moustafa al-Kazimi ត្រូវគេដឹងថា មានទំនាក់ទំនងល្អជាមួយមន្ត្រីអ៊ីរ៉ង់ខ្លះ។ តែទន្ទឹមនឹងនេះ លោកជាអ្នកស្គាល់គ្នាស្និទស្នាល នឹងព្រះអង្គម្ចាស់ ម៉ូហាម៉េដ បេនសាល់មាន់។ ដោយសារទំនាក់ទំនងនេះ អារ៉ាប៊ីសាអូឌីត បានសន្យាចំណាយប្រាក់៣ពាន់លានដុល្លារ ដើម្បីវិនិយោគនៅអ៊ីរ៉ាក់ ក្នុងវិស័យអគ្គិសនី ទឹកស្អាត មន្ទីរពេទ្យ សាលារៀន និងផ្លូវថ្នល់ជាដើម។
ទាក់ទិននឹងបញ្ហាសង្រ្គាមយេម៉ែនវិញ លោក Adel Bakawan អ្នកជំនាញនៅវិទ្យាស្ថានសិក្សាស្រាវជ្រាវតំបន់មេឌីទែរ៉ាណេ និងមជ្ឈឹមបូព៌ា (iReMMO) បានលើកឡើងថា អារ៉ាប៊ីសាអូដីត ដឹងខ្លួន ថាកំពុងទាល់ច្រក មិនអាចយកឈ្នះក្រុមឧទ្ទាមហ៊ូីទី នៅយេម៉ែនទេ។ អារ៉ាប៊ីសាអូឌីត ដឹងច្បាស់ថា អ៊ីរ៉ង់ អាចជួយឲ្យមានសន្តិភាពនៅយេម៉ែន ហើយក៏អាចធ្វើឲ្យសង្រ្គាមនៅតែបន្តដែរ។ ហេតុដូច្នេះហើយ បានជាអារ៉ាប៊ីសាអូឌីត គ្មានជំរើសផ្សេង ក្រៅពីចរចាជាមួយអ៊ីរ៉ង់ដោយផ្ទាល់នោះទេ។
យ៉ាងណាក៏ដោយ លោក Adel Bakawan បានទទួលស្គាល់ថា ផ្លូវដើរនៅវែងឆ្ងាយទៀតណាស់ ទំរាំអារ៉ាប៊ីសាអូឌីត និងអ៊ីរ៉ង់ អាចមើលមុខគ្នាឲ្យចំ ដោយក្តីទុកចិត្តគ្នាទៅវិញទៅមក។ មានសំណុំរឿងរសើបជាច្រើន ដែលម្នាក់ៗទាមទារ។ សម្រាប់អ៊ីរ៉ង់គឺបញ្ហាអាយុជីវិតអ្នកកាន់សាសនាអ៊ីស្លាមឈីអ៊ីត រស់នៅអារ៉ាប៊ីសាអូឌីត។ សម្រាប់អារ៉ាប៊ីសាអូឌីតវិញ គឺបញ្ហានុយក្លេអ៊ែរ បញ្ហាកងកម្លាំងដៃជើងអ៊ីរ៉ង់ នៅលីបង់ នៅយេម៉ែន និងស៊ីរីជាដើម។ គឺចំណុចរសើបច្រើនទាំងនេះហើយ ដែលបានធ្វើឲ្យភាគីទាំង២ លាក់លៀម មិនសូវចង់បើកចំហរការជួបនិយាយគ្នានេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ