វិបត្តិជនអន្តោប្រវេសន៍៖ ប៉ូឡូញព្រមានពីការផ្ទុះអាវុធនៅព្រំដែនជាប់បេឡារុស
ចុះផ្សាយនៅថ្ងៃ៖
ស្តាប់ - ០៩:១០
ប៉ូឡូញ និងបេឡារុសបានដំឡើងសំឡេងដាក់គ្នាកាន់តែខ្លាំង ដោយសារវិបត្តិជនអន្តោប្រវេសន៍។ នៅថ្ងៃចន្ទ ទាហាន ឆ្មាំព្រំដែនប៉ូឡូញបានទប់ស្កាត់ មិនឲ្យជនអន្តោប្រវេសន៍រាប់រយនាក់ សម្រុកឆ្លងចូលទឹកដីប៉ូឡូញ តាមរយៈទឹកដីបេឡារុស។ នាយករដ្ឋមន្រ្តីប៉ូឡូញ នៅថ្ងៃអង្គារទី ៩ វិច្ឆិកា បានព្រមានថា វិបត្តិជនអន្តោប្រវេសន៍នៅព្រំដែនប៉ូឡូញជាមួយបេឡារុសកំពុងគំរាមដល់សន្តិសុខរបស់សហភាពអឺរ៉ុបទាំងមូល។
រូបភាពនៅលើបណ្តាញសង្គមបានបង្ហាញ ជនអន្តោប្រវេសន៍រាប់រយនាក់ នៅប្រមូលផ្តុំ កកកុញ នៅខាងទឹកដីបេឡារុស នៅក្រោយ ពួកគេត្រូវទាហាន និងឆ្មាំព្រំដែនប៉ូឡូញ រុញច្រាន មិនឲ្យឆ្លងចូលទឹកដីប៉ូឡូញ។
វិបត្តិជនអន្តោប្រវេសន៍ នៅព្រំដែនបេឡារុស ជាមួយប្រទេសជិតខាង ដូចជាប៉ូឡូញ កើតមានតាំងពីខែសីហាមកម្ល៉េះ ប៉ុន្តែ វាទើបតែចាប់រីករាលកាន់តែធំ នៅខែតុលាកន្លងទៅ បន្ទាប់ពីជនអន្តោប្រវេសន៍កាន់តែច្រើន បានសម្រុកធ្វើដំណើរទៅព្រំដែន បេឡារុស ដើម្បីឆ្លងចូលទឹកដីប៉ូឡូញ។ ប្រឈមនឹងលំហូរដ៏គំហុក ជនអន្តោប្រវេសន៍ ដែលប៉ុនប៉ងឆ្លងចូលទឹកដី ប៉ូឡូញ តាមរយៈប្រទេសបេឡារុស រដ្ឋាភិបាលប៉ូឡូញ កាលពី ប៉ុន្មានសប្តាហ៍មុន បានប្រកាសដាក់ប្រទេសក្នុងស្ថានភាពអាសន្ន និងបានបញ្ជូនកងទ័ព ប៉ូលិសជាង ១២០០០នាក់ ទៅ កាន់ព្រំដែនប៉ូឡូញ បេឡារុស។ ដូចជា ប្រទេសលីទុយអានី ប៉ូឡូញ បានសាងសង់របងលួសបន្លា នៅតាមព្រំដែន ជាប់បេឡារុស ដើម្បី ទប់ស្កាត់ កុំឲ្យជនអន្តោប្រវេសន៍ធ្វើដំណើរឆ្លងចូលទឹកដីប៉ូឡូញ។ តាមរដ្ឋាភិបាលប៉ូឡូញ ក្នុងរយៈពេលតែមួយខែតុលា ប៉ូឡូញ បានចាប់បញ្ជូនជនអន្តោប្រវេសន៍ ដែលឆ្លងដែនខុសច្បាប់ ជាង ១៦៨០០នាក់ ឲ្យត្រលប់ចូលទឹកដីបេឡារុសវិញ។
នៅថ្ងៃចន្ទ ប៉ូលិសយាមព្រំដែនប៉ូឡូញបានបង្ហោះរូបភាពវីដេអូនៅលើបណ្តាញ ទ្វីតធ័រ ដែលបង្ហាញ ជនអន្តោប្រវេសន៍ដែលភាគច្រើនមានដើមកំណើតមកពី ដើមបូព៌ា ប្រើកាំបិត និងមែកឈើ ដើម្បីវាយបំផ្លាញ កាត់បំផ្លាញ របងលួសបន្លារ ដើម្បីឆ្លងចូលទឹកដីប៉ូឡូញ។ ប៉ុន្តែ ការប៉ុនប៉ងរបស់ពួកគេត្រូវបរាជ័យទៅវិញ នៅក្រោយប៉ូលិសទាហានប៉ូឡូញ ប្រើកម្លាំងរុញច្រានឲ្យត្រលប់ចូលទឹកដីបេឡារុសវិញ។ តាមអ្នកនាំពាក្យរដ្ឋាភិបាលប៉ូឡូញ នៅក្រោយរុញច្រាន ឲ្យត្រលប់ចូលទៅទឹកដីបេឡារុស ជនអន្តោប្រវេសន៍ពី ៣ពាន់ ទៅ ៤ពាន់នាក់ កំពុង ប្រមូលផ្តុំគ្នា នៅព្រំដែន នៅឡើង គិតរហូតដល់យប់ថ្ងៃចន្ទម្សិលមិញនេះ។
ប៉ូឡូញ និងសហភាពអឺរ៉ុបបានចោទប្រកាន់ ប្រធានាធិបតីបេឡារុស ថា ប្រើជនអន្តោប្រវេសន៍ ជាអាវុធសម្រាប់សងសឹកអឺរ៉ុប
បេឡារុសមិនមែនជាផ្លូវ ឆ្លងកាត់ជាប្រចាំ របស់ជនអន្តោប្រវេសន៍ ដែលធ្វើដំណើរចេញពីតំបន់ដើមបូព៌ា សំដៅ ទឹកដីអឺរ៉ុប។ កន្លងមក ជនអន្តោប្រវេសន៍មកពីស៊ីរី អ៊ីរ៉ាក់ និងតំបន់អាហ្វ្រិក ប្រើប្រាស់ទឹកដីតួកគី លីប៊ី សម្រាប់ឆ្លងចូលអឺរ៉ុប។ បើមើលផែនទីពិភពលោក បេឡារុស មិនសមជាច្រកងាយស្រួល សម្រាប់ចូលទឹកដី អឺរ៉ុបនោះទេ ព្រោះវាស្ថិតនៅឆ្ងាយពេកពីប្រទេសដើមរបស់ជនអន្តោប្រវេសន៍ ដូចជាស៊ីរី អ៊ីរ៉ាក់ ប៉ាគីស្ថាន ដែលស្ថិតក្នុងចំណោមជនអន្តោប្រវេសន៍ ដែលកំពុងកកកុញ នៅព្រំដែនប៉ូឡូញ និងបេឡារុស សព្វថ្ងៃ។
វិបត្តិជនអន្តោប្រវេសន៍ នៅព្រំដែនប៉ូឡូញ និងបេឡារុស នៅពេលនេះ កើតឡើងដោយបញ្ហានយោបាយសុទ្ធសាធ។ វាកើតឡើងមកពីជម្លោះរវាងបេឡារុស និងសហភាពអឺរ៉ុប នៅក្រោយសហភាពអឺរ៉ុបដាក់ទណ្ឌកម្មលើរដ្ឋាភិបាលក្រុងមីងស្ក៍ក្នុងរឿងប្រើអំណាចផ្តាច់ការ បង្រ្កាបលើបក្សប្រឆាំង។
សហភាពអឺរ៉ុប និងប៉ូឡូញ ក៏ដូចជាលីទុយអានីជាដើម ដែលស្ថិតនៅជាប់ព្រំដែនបេឡារុស បានចោទប្រកាន់ ប្រធានាធិបតីបេឡារុស ថា បានយកអាយុជីវិតរបស់ជនអន្តោប្រវេសន៍ មកធ្វើជាឈ្នាន់ ជាអាវុធសម្រាប់សងសឹក សហភាពអឺរ៉ុបដែលបានដាក់ទណ្ឌកម្ម លើរដ្ឋាភិបាលបេឡារុស។
តាមមន្រ្តីសហភាពអឺរ៉ុប គឺរដ្ឋាភិបាលបេឡារុស ដែលបានលើកទឹកចិត្ត ញុះញង់ឲ្យប្រជាជននៅតំបន់ដើមបូព៌ា ធ្វើដំណើរសំដៅទឹកដីអឺរ៉ុប ដោយឆ្លងកាត់ប្រទេសបេឡារុស។ តាមកាសែតប៉ូឡូញ រដ្ឋាភិបាលបេឡារុស បានផ្តល់ទិដ្ឋាការជាភ្ញៀវទេសចរ ដល់ប្រជាជនស៊ីរី និងប្រទេសចំនួន៧៥ផ្សេងទៀត ដើម្បីអាចធ្វើដំណើរចូលទឹកដីបេឡារុស ជាមុនសិន មុននឹងធ្វើដំណើរបន្តទៅកាន់ ព្រំដែនបេឡារុស ប៉ូឡូញ។ ពួកគេភាគច្រើនបានជិះយន្តហោះ ពីស៊ីរី តួកគី ទៅដល់ទីក្រុងមីងស្ក៍ មុននឹងធ្វើដំណើរតាមឡានទាហានឬឡានតាក់ស៊ី ទៅកាន់ព្រំដែនជាមួយប៉ូឡូញ។
ជាក់ស្តែង ជនអន្តោប្រវេសន៍អ៊ីរ៉ាក់ម្នាក់បាននិយាយប្រាប់អ្នកកាសែតប៉ូឡូញថា ក្រុមគ្រួសារជនអន្តោប្រវេសន៍ជាច្រើន ត្រូវឡានទាហានបេឡារុស ដឹកទៅទម្លាក់ នៅព្រំដែនប៉ូឡូញ។ ទាហានបេឡារុស បានចាប់បង្ខំឲ្យពួកគេត្រូវតែឆ្លងកាត់ព្រំដែនប៉ូឡូញ ដោយមិនឲ្យវិលត្រលប់ក្រោយវិញនោះទេ។
សម្រាប់ភាគីអឺរ៉ុប ដោយដឹកជញ្ជូនជនអន្តោប្រវេសន៍ ឲ្យទៅសម្រុក ចូលប្រទេសលីទុយអានី និងប៉ូឡូញ ប្រធានាធិបតីបេឡារុស កំពុងចង់សងសឹក លីទុយអានីដែលផ្តល់កន្លែងជ្រកកោន ដល់មេបក្សប្រឆាំងបេឡារុស និងចង់សងសឹកសហភាពអឺរ៉ុប ដែលបានដាក់ទណ្ឌកម្មលើរដ្ឋាភិបាលរបស់លោក ក្នុងរឿងបង្រ្កាបលើក្រុមអ្នកប្រឆាំង នៅបេឡារុស។
អាមេរិក តាមរយៈអ្នកនាំពាក្យរបស់ក្រសួងការពារជាតិ និងអង្គការអូតង់បានអំពាវនាវឲ្យរដ្ឋាភិបាលបេឡារុសឈប់ប្រើជនអន្តោប្រវេសន៍ជាអាវុធនយោបាយ។
រដ្ឋាភិបាលបេឡារុស តាមរយៈ រដ្ឋមន្រ្តីការពារជាតិ បានទាត់ចោលការចោទប្រកាន់ ដែលថា បេឡារុសជាអ្នករៀបចំ ឲ្យមានលំហូរជនអន្តោប្រវេសន៍ ទៅកាន់ទឹកដីអឺរ៉ុប។ បេឡារុសបានចោទប្រកាន់ផងដែររដ្ឋាភិបាលប៉ូឡូញ ថា មានចេតនាចង់ឲ្យមានភាពតានតឹង តាមរយៈ ការបញ្ជូនទ័ព ជាង ១ម៉ឺននាក់ទៅកាន់ព្រំដែន ដោយគ្មានជូនដំណឹងដល់បេឡារុសដែលជាប្រទេសជិតខាង។ រដ្ឋាភិបាលបេឡារុសបានវាយតម្លៃថា អាជ្ញាធរប៉ូឡូញ អមនុស្សធម៌ ដោយបានរុញច្រាន មិនទទួលយក ជនអន្តោប្រវេសន៍ ដែលតាមពិត គ្មានអាវុធក្នុងដៃ និងគ្មានគ្រោះថ្នាក់ទាល់តែសោះសម្រាប់ប៉ូឡូញ។
ប្រធានគណៈកម្មការអឺរ៉ុបទាមទារឲ្យបង្កើនការដាក់ទណ្ឌកម្មបន្ថែមលើរដ្ឋាភិបាលរបស់លោកលូកាឆិនកូ
នៅយប់ថ្ងៃចន្ទទី ៨វិច្ឆិកា ប្រធានគណៈកម្មការអឺរ៉ុប លោកស្រីវ៉ុនឌែរ ឡេយែន បានអំពាវនាវឲ្យសហភាពអឺរ៉ុប បង្កើនការដាក់ទណ្ឌកម្មបន្ថែមលើរដ្ឋាភិបាលបេឡារុសរបស់លោកប្រធានាធិបតីលូកាឆិនកូ ដែលបានប្រើជនអន្តោប្រវេសន៍ ជាអាវុធ សម្រាប់សងសឹកសហភាពអឺរ៉ុប។
ជនអន្តោប្រវេសន៍ភាគច្រើន ប្រើប្រាស់ទឹកដីប៉ូឡូញ ដើម្បីសំដៅ គោលដៅ ចុងក្រោយគឺអាល្លឺម៉ង់។ រដ្ឋមន្រ្តី មហាផ្ទៃអាល្លឺម៉ង់វិញបានអំពាវនាវឲ្យសហភាពអឺរ៉ុប ត្រូវតែជួយអាល្លឺម៉ង់ និងប៉ូឡូញ ព្រោះថា វិបត្តិជនអន្តោប្រវេសន៍ នៅព្រំដែនបេឡារុស មិនមែនជាបញ្ហាតែសម្រាប់ប៉ូឡូញ និងអាល្លឺម៉ង់តែប៉ុណ្ណោះទេ ប៉ុន្តែ សម្រាប់សហភាពអឺរ៉ុបទាំងមូល។ អាល្លឺម៉ង់ ដែលចាប់ផ្តើមប្រឈមនឹងមតិប្រឆាំងនយោបាយអន្តោប្រវេសន៍ក្នុងប្រទេស ធ្លាប់បានបង្ហាញជំហរ គាំទ្រ នយោបាយសាងសង់ របងលួសបន្លារបស់ប៉ូឡូញ ដើម្បីទប់ស្កាត់លំហូរជនអន្តោប្រវេសន៍ពីប្រទេសបេឡារុស។
នៅដើមសប្តាហ៍នេះ រដ្ឋមន្រ្តីការពារអាល្លឺម៉ង់វិញ បាននិយាយប្រាប់កាសែតក្នុងស្រុកថា អាល្លឺម៉ង់នឹងអាចបញ្ជូនទាហានទៅកាន់ព្រំដែនប៉ូឡូញ បេឡារុស បើសិនប៉ូឡូញត្រូវការ។
នៅសហភាពអឺរ៉ុប អនុប្រធានគណៈកម្មការអឺរ៉ុបនឹងធ្វើដំណើរទៅកាន់ប្រទេសដើមរបស់ជនអន្តោប្រវេសន៍ ដើម្បីនិយាយប្រាប់រដ្ឋាភិបាលរបស់ប្រទេសទាំងនោះ ឲ្យព្យាយាមពន្យល់ប្រជាជនរបស់ពួកគេកុំឲ្យចាញ់បោក ធ្លាក់ចូលក្នុងអន្ទាក់ឃោសនារបស់រដ្ឋាភិបាលបេឡារុស ដែលចង់ប្រើបញ្ហាជនអន្តោប្រវេសន៍ សម្រាប់សងសឹកអឺរ៉ុប។
រដ្ឋាភិបាលអ៊ីរ៉ាក់ជាដើមបានសហការជាមួយអឺរ៉ុប ដោយបានសម្រេចបិទជើងហោះហើរជាមួយប្រទេសបេឡារុស។ ប្រធានគណៈកម្មការអឺរ៉ុបបានអំពាវនាវផងដែរ ឲ្យគេដាក់ទណ្ឌកម្មក្រុមហ៊ុនហោះហើរណាដែលចូលរួមដឹកជនអន្តោប្រវេសន៍ ទៅកាន់ប្រទេសបេឡារុស។
ដីព្រៃនៅព្រំដែនប៉ូឡូញ និងបេឡារុសអាចក្លាយជាកន្លែងកប់ខ្មោចជនអន្តោប្រវេសន៍
ទុកមុខ ក៏មិនរួច ព្រោះត្រូវទាហាន និងឆ្មាំប៉ូឡូញ នៅឈរតម្រៀបគ្នា ទប់ស្កាត់មិនឲ្យធ្វើដំណើរចូលក្នុងទឹកដីប៉ូឡូញ។ ទៅក្រោយក៏មិនរួច ព្រោះត្រូវទាហានបេឡារុស ទប់មិនឲ្យធ្វើដំណើរត្រលប់ក្រោយ ទៅកាន់ ទីក្រុងមីងស្ក៍វិញ។ ជនអន្តោប្រវេសន៍ នៅព្រំដែន ប៉ូឡូញ និងបេឡារុស គឺដូចជាគ្រាប់បាល់ ដែលបេឡារុស និងប៉ូឡូញបោះឲ្យគ្នាទៅវិញ ទៅមក។ ដោយសារតែជម្លោះសងសឹក គ្នា រវាងបេឡារុស និងសហភាពអឺរ៉ុបសោះ ជនអន្តោប្រវេសន៍រាប់រយនាក់ ត្រូវមកជាប់គាំង រស់នៅក្នុងជំរំអត្តខាត់ នៅក្នុងព្រៃ នៅព្រំដែន ប៉ូឡូញ និងបេឡារុស។
អង្គការសង្គមស៊ីវិលនៅប្រទេសប៉ូឡូញ បានព្រមានពីគ្រោះមហន្តរាយបាត់បង់ជីវិតមនុស្ស ព្រោះថា គ្មានចំណីអាហារគ្រប់គ្រាន់ ជនអន្តោប្រវេសន៍ទាំងនោះ ក៏ត្រូវប្រឈមនឹងអាកាសធាតុត្រជាក់ខ្លាំង។
សូមបញ្ជាក់ថា ដោយសារតែច្បាប់ប្រកាសអាសន្នរបស់រដ្ឋាភិបាលប៉ូឡូញ ក្រុមអង្គការការពារសិទ្ធិមនុស្ស និងអ្នកកាសែតត្រូវបានគេហាមមិនឲ្យធ្វើដំណើរទៅកាន់ព្រំដែននោះទេ។
អង្គការការពារសិទ្ធិមនុស្សនៅប៉ូឡូញ បានអំពាវនាវសុំឲ្យរដ្ឋាភិបាលប៉ូឡូញ ប្រញាប់អនុញ្ញាតឲ្យបើកផ្លូវឲ្យគេនាំយកជំនួយមនុស្សធម៌សម្រាប់ជនអន្តោប្រវេសន៍ មុននឹងកើតមានគ្រោះមហន្តរាយជីវិតមនុស្ស។
ប៉ូឡូញ និងសហភាពអឺរ៉ុប កំពុងប្រឈមនឹងវិបត្តិជនអន្តោប្រវេសន៍ ដែលបង្កឡើង ដោយសារគំនុំសងសឹករបស់ប្រទេសបេឡារុស ប៉ុន្តែ នៅពេលអ្នកនយោបាយ កំពុងឈ្លោះ ទម្លាក់កំហុសដាក់គ្នា គេក៏ត្រូវគិតគូរដល់អាយុជីវិត របស់មនុស្សសិនដែរ ជាពិសេស ស្រ្តីនិងកុមារដែលមិនអាចនៅតស៊ូបានយូរ នឹងភាពត្រជាក់ គ្មានចំណីអាហារនោះទេ។ តាមកាសែតប៉ូឡូញ Gazeta Wyborcza យ៉ាងតិច ជនអន្តោប្រវេសន៍ ១០នាក់ស្លាប់នៅក្នុងតំបន់ជាប់ព្រំដែនប៉ូឡូញ បេឡារុស ដែលក្នុងនោះ ៧នាក់ ស្លាប់ក្នុងទឹកដីប៉ូឡូញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ